+ 0 - 0 | § ¶Nuver wekker wurden
Justerjûn haw ik sûnder it te witten de lêste rit makke yn ús Opel Astra. Ik haw efkes keatst en dêrby yn in foutefestival fan ús kant frijwat kânsleas ferlern. Nei ôfrin haw ik Jelle G. efkes nei de soas brocht en doe bin ik mei Troely, ús moaie reade Opeltsje wer nei Finkhuzen flein. Fannacht om in oerke as trije waard myn freondinne wekker fan wat nuvere lûden dy't har oan fjoerwurk tinke dienen. Doe't it fjoerwurk mar net ophâlde woe en sy ek noch wat geraas hearde seach sy efkes om de hoeke fan de doar. Der stiene wat plysjes ûnder de flat en der wie in brânwachtauto in brântsje oan it blussen. Wy hoopten doe noch dat immen de keet fan de skilders, of better noch, in kontener yn de brân stutsen hie. Mar dy hoop waard rap kwea út slein doe't wy ûnder de flat de hoeke om kamen. 
Us moaie reade Opeltsje wie net langer read mar metallic. It die bliken dat de ien as d'oare malloat in bakstien troch it achterrút smiten hie en de auto yn de brân stutsen hie. De bakstien lei noch sawat ûnoantaasten yn de kofferbak. Dat wie ik it ienige dat noch hiel wie yn de auto. Fan it stjoer wie noch in izeren rinkje oer. Alles wat fan keunststof wie is opbaarnt. De achterste bân is eksplodearre en ek de reservebân hat in bêste klap hearre litten. Alles fuort, neat mear te rêden en wy bleaune efter mei in kater en sûnder auto...
+ 0 - 0 | § ¶Fryske Software
Ik hie al ris earder wat sein oer de Fryske firefox en ik haw lêsten de Fryske oersetter dêrfan ek moete. Ik wie troch Roel van Dyk frege om by in gearkomste te wêzen oer Fryske software. No dat wie fansels ferhipte nijsgjirrich. Spesjaal foar dat projekt haw ik ek de domeinnamme www.fryskesoftware.nl registreard dêr't straks in samling ferwizings by elkoar brocht wurde sille oer de ferskate projekten. Myn eigen projekt, de Fryske phpBB, hat ek wer in nije ympuls krigen. Ik haw hjoed de nije fersje foar phpBB 2.0.20 opstjoerd nei www.phpbb.com sadat dy ek op de delhelside komt. Dit alles ûnder it troch my fan Bernlef en Philips liende motto "Let's make things Frysker"
+ 0 - 0 | § ¶Allegear wer feestjes
Sneon sille wy nei skoanheit want dy fiert de jierdei en dat is altyd wol gesellich fansels. En snein moatte wy al wer nei de Wâlden ta want dan sille wy heit syn jierdei fiere. Mem wol dan nei de Wokchinees ta en dêr bin ik fansels flak foar. Gewoanwei soe heit dat fansels yn Sint Nyk fiere mar omdat it Shantykoor mei de pinksterdagen optrede moat yn Earnewâld sille hja dêr efkes mei de boat hinne. No leit Earnewâld net sa fier fan de Rottefalle dus dat komt dan wol wer moai út. Foar myn suske is it wol wat fierder riden mar ja, dy woe sa graach yn Goor wenjen gean net? Jûn mar efkes goed fanatyk plúmkejeie om sa yn it foar wat kilo's kwyt te reitsjen...
+ 0 - 0 | § ¶Carcassonne
De freondinne is wer ferslingere oan spultsjes dat de lêste tiid dogge wy wer in soad Carcassonne. Wy hawwe de jeiers en samlersedysje en dat is in ferhipt leuk spultsje om mei syn twaën te spyljen. It ienige probleem is dat ik it meastal win en dan moat wy noch in potsje en dêrnei noch ien ensfh. Wy bin no al sa fier hinne dat at ik it tempeltsje lûk sy de tafel al ûntrommet om't sy dan neffens har dochs al net mear winne kin. Miskien moatte wy it tempeltsje der mar ris út litte...
+ 0 - 0 | § ¶Notaris
De ôfspraak mei de Notaris is makke dat it kin no dochs echt hast oan gean. It sil ek in kear tiid wurde want it giet my allegear fierstente sleau. Ik wol slope, keihurd slope. Mar ja dan moat it te slopen objekt fansels wol ús eigendom wêze. Ik bin benijd at it keapkontrakt ek yn it Frysk opsteld wurde kin/mei...
+ 0 - 0 | § ¶Gekleurde stuoltsjes
Ik sit krekt efkes nei it balskoppen fan Jong Oranje te sjen. Wy stean no mei 1-0 foar tsjin de Denen troch in goal fan Klaas Jan Huntelaar. Dy is no krekt topskoarder aller tiden wurden fan Jong Oranje mei syn 15e doelpunt. De wedstryd is fierder net echt denderjend dat wat dat oangiet mei Heit Klinkhamer it Foppe noch wol in kear goed útlizze (grapke út 'e Kameleonfilm dat my efkes te binnen skeat by it sjen nei de wedstryd). Der sit fierder gjin kop op de tribune mar om dat te ferhullen, tenminste ik nim oan dat dat it doel is, ha se de stuoltsjes yn it stadion ferskate kleurkes jûn. Fansels kin it ek wêze dat se de stuoltsjes twaddehâns kocht hawwe en dat se dêrom net allegear de selde kleur hawwe. No ja, yn alle gefallen liket it no net sa leech mar je misse de sfear wol in bytsje want lege stuoltsjes, ek al bin se noch sa moai farve, meitsje fansels net it lawaai dat in balskoppartij sa oantreklik makket. Ik sil jûn mar wer efkes nei de soas fan Bernlef. Dêr bin de krukken allegear swart, mooglik sjocht it der ek wer swart fan de minsken. Fal my dus moarn mar net te betiid lestich...
+ 0 - 0 | § ¶Suffe himelfeartsdei
Wat in dei sa'n himelfeartsdei. De iene katholieke feestdei is de oare net dat mei dúdlik wêze. Eartiids wie de bekerfinale altyd op himelfeartsdei en ek it Marpopfestival waard gau ris op dy dei hâlden wol 'k leauwe. Faaks wie it Marpopfestival ek dit kear wer op himelfeartsdei mar ik haw der neat fan mei krigen. Dat makket ek net út want Marpop is al hiel lang Marpop net mear. Eartiids wie it in aardich festival op de Ulesprong oan de râne fan it Tsjûkemar. Der spilen dan de hiele dei bands en oan it ein fan de rit wie elkenien smoarch, wiet en/as lam. Dat wiene noch ris tiden. De lêste jierren stie der in tinte mei de ien as de oare 'topartyst'. Nee jou my dan mar wer de tiden mei Reboelje, Jitiizer en Pigmeat (dy't doe noch wol ris gekke fratsen úthellen troch oeral yn te klimmen). No dizze himelfeartsdei hat foar my bynammen in bysliepdei west. Moarn giet de wekker wer betiid...
+ 0 - 0 | § ¶Us dreamkeuken
Ik hie juster in ôfspraak mei immen fan de Keuken kampioen dy't foar ús nije hûs graach ris in offerte en in tekening meitsje woene. Ik soe der earst mei de freondinne hinne mar sjoen it feit dat dy wat heal wie bin ik allinnich hinne west. Om 15.00 oere hie ik in ôfspraak mar sjoen it feit dat ik fuort efter de keuken kampioen wurkje wie ik in bytsje earder. Under it genot fan in fijn bakje tee begûn Paul my wat fragen te stellen en sa kaam er hieltyd fierder mei syn tekening. Sintraal yn ús nije keuken stiet fansels de Boretti V 93 seary (al dan net mei Fry-Top). Dêrneist moat der fansels de in hoop lijen besparjende ôfwaskmasjine yn, in kuolkast, in ôfsûchkap en faaks noch in magneetoven. As wurkblêd hawwe wy keazen foar in donkerswarte graniten plaat. De freondinne wol der fierder noch graach in apothekerskast yn hawwe en ik wol in draaiplatto yn 'e hoeke. Doe't dat allegear yntekene wie seach ús keuken der foar myn gefoel al gewaldich út. In moai iepen ûntwerp mei in soad wurkromte en gjin ûnnoadige fratsen dus dat skeelt. No moat wy it noch al efkes iens wurde oer de priis want it jild groeit ús fansels net op 'e rêch. Yn alle gefallen hawwe wy no in moaie fersy op papier dy't grif de nedige offertes opsmite sil...
+ 0 - 0 | § ¶Pearkekeatsen
Fannejûn hawwe wy foar de feroaring ris efkes oan it pearkekeatsen west. Net elkenien fansels, dêr wiene der yn tsjinstelling ta ferline wike net genôch froulju foar, mar dêrútwei is wol it idee berne om oan foar de simmerfakânsje in pearkeskeatskriich te hâlden yn it stedsperk mei fansels nei ôfrin in fleisbriederij. Fansels bin ik dêr flak foar want mochten de skroeiers mei it keatsen net oankomme, dan kin ik yn elk gefal op de barbejoe noch flamme. Wy wachtsje it ôf, de freondinne moat ynkoarten mar wer ris yn trening...
+ 0 - 0 | § ¶Frysk op de kompjûter
De Fryske taal is faaks net kommersjeel genôch om troch de grutte softwaremakkers stipe te wurden mar dat wol noch net sizze dat it Frysk net syn yntrede docht op jo kompjûter. Op dit stuit is der al in Fryske fersje fan Firefox beskikber, de populêre webswalker út de iepen boarne wrâld. Ek wurdt der troch guon lju wurke oan it oersetten fan Thunderbird sadat jim straks de eamels, e-post as e-mails net allinnich yn it Frysk tikke, mar ek noch mei in Frysktalich programma ferstjoere kinne. Yn gearwurking mei de Fryske Akademy is der al in Fryske staveringshifker foar Word beskikber mar der wurdt ek noch wurke oan in fariant foar Open Office en WP (dat skynt ek noch altyd te bestean). Ek wurdt der wurke oan in Fryske wurdlist om sa ek rap yn it Frysk sms'e te kinnen. Jim sjogge it wol, it Frysk libbet en giet mei har tiid mei. Ynkoarten ûntstiet der faaks neist de breeZAhtaal ek in BearenBURchsprAAk op de Frysktalige msn...
+ 0 - 0 | § ¶Ynboargerje oan de leijen
Om alfêst de minsken op 'e Rottefalle yn 'e kunde te bringen mei my en myn eigenaardigheden haw ik juster wer ris efkes mei de freondinne nei it kuorkebaljen west. Hja moasten balje yn Aldegea tsjin de ploech dy't al kampioen wie. Hja bearden noch oer 24 kear skoare mar al rap stiene de Aldegeasters op 0-3 efter. Mei in lytse foarsprong gie Wêz Handich sels de rêst yn. Nei de rêst naam Aldegea it ynisjatyf oer wêrnei't hja noch frij dik wûnen. Dêrnei hawwe wy noch efkes in toeristysk tripke makke troch de provinsje mei in koarte tuskenstop yn Aldeboarn dêr't wy efkes by de rûte fan de Gondelfeart (Sint Nykster merke mar dan op in boat) sjoen hawwe. Nei noch efkes troch ús takomstich hûs strúnt te hawwen wie it tiid foar de slotbarbekjoejûn fan it tredde. De partners wiene ek wolkom en it mei sein wurde dat dy fansels wer it meast oanwêzich wiene. It wie gesellich oan de Leijen en wy ha noflik efkes wat populêr fleis nei binnen wurke. De iene wat mear as de oare fansels. Oar jier komme wy ek op de fyts, dan kin wy ek allebeide in buorreltsje drinke...
+ 0 - 0 | § ¶Gjin fornuis, wol kachel
Juster haw ik efkes nei de pypkesjûn west op de soas fan Bernlef. Elke freed is de soas iepen en op dizze jûn bin der ek gauris in nustje âld(ere) leden. It wie gesellich juster want Douwe Gerlof wie der mei syn 'Wa is de mol' spultsje. Fannemoarn wie ik om 6.00 oere thús en dat waard my troch de freondinne net echt yn dank ôfnaam. Wy soene oars efkes op besite by in Borettidieler en dat gie no oer. Fansels hie it noch wol kint mar it gie dochs oer. It kaam my eins net sa min út want ik hie net it idee dat wy yn Haren de goedkeapste fornuizen fine soene. Dêrneist wol ik fansels earst graach it hûs keapje en dan pas de keuken.
+ 0 - 0 | § ¶Ferlern en dochs ek wûn
Juster hawwe wy yn Hegesân de finale spile fan it rekreanteplúmkejeien. De nûmers ien en twa út de ferskate groepen mochten oantrede. Net elkenien wie der by mar der wiene wol 6 tiems oanwêzich wêrfan 2 fan BC GO! Alles waard flink troch elkoar hussele en sa mocht ik yn myn earste partij inkelje tsjin in man út Stiens. De bêste man kaam al fuortdaalks op 4-0 foar te stean mar dêrnei krige hy gjin punt wer sadat ik mei 15-4 de earste set pakte. Yn de twadde set gie it lang gelyk op mar ek dy wist ik mei aardich wat punten ferskil winnend ôf te sluten. Eddy ferlear spitigernôch fan GO1 yn in spannende trijesetter. Ek Femke ferlear har inkelspul mar myn freondinne slagge der al yn har wedstryd winnend ôf te sluten. Mei 2-2 kamen wy dus út de inkelspullen. Yn it hearendûbelspul stiene wy hiel dik foar, 12-6 ofsa, mar troch dat de tsjinstanders in goeie searje del setten dêr't hja ek noch frijwat by stipe waarden troch de oanhang op de tribune koene wie it net oprêde en gie de set noch mei 17-15 de oare kant út. De frouljusdûbel gie ek ferlern mar dat wie gjin skande. Tsjin Go1 wisten ús froulju it oant fier yn de tredde set fol te hâlden mar úteinlik slagge it krekt net de lêste tikjes út te delen. Tegearre mei myn freondinne moast ik doe noch mikse. Wy hiene in pear goeie tsjinstanders en de earste set gie dan ek ferlern. Mar nei ús gebrûklike argewaasjes oer foar en efter bliuwe ensa pakten wy it spul yn de twadde set dochs wer frij aardich op. Mei 15-2 pakten wy de twadde set en dus moast der noch in tredde set oan te pas komme. En omdat wy krekt oan it winnen wiene koene wy dit ek noch trochsette nei de tredde set. De einstân wie úteinlik 3 punten út 8 wedstriden. Lang net genôch foar in priis fansels mar it die bliken dat de nûmer 1 5 punten hie, de nûmers 2-5 hiene 4 punten en sa waarden wy dus seisde. Ien wedstryd mear winne en wy hiene faaks in moaie beker mei nei hûs krigen. Hy hie sa moai by Tiny op de skoarstienmantel stean kinnen yn de kantine. Hoewol't it risseltaat dus net om oer nei hûs ta te skriuwen wie haw ik der sels mei 2 punten in grut oandiel yn hân. Fandêr dat ik der persoanlik noch wol mei in goed gefoel op werom sjoch...
+ 0 - 0 | § ¶Myn fyts is stikken mar myn plúmkejeiersark is wer hiel
Juster fûn ik al dat myn fyts wat nuvere lûden makke yn de omkriten fan myn eftertsjil. Ik tocht dat it kaam troch de nije speaken dy't faaks noch wat oanspant wurde moasten. Doe't it lûd hjoed hieltyd slimmer en slimmer waard haw ik mar besletten om wer efkes by de fytsemakker del te gean. Ik moast dochs noch efkes hinne foar in kontrôle fan de speaken want 14 dagen ferlyn is der in nije efterfelch yn kaam en 36 nije speaken. No docht bliken dat it net oan de speaken lei dat myn fytske sa'n nuver lûd makke mar dat der wer in lager stikken is. Ik begryp der neat fan. Eartiids wie ik folle swierder en fytske ik folle faker en folle fierder en der wie nea wat oan de hân. En no bin ik hast alle wiken by de fytsemakker. Dy minsken dêr witte myn namme al. Dat kin nea goed wêze fansels. No ja, ik haw dus no wer in lienfytske en ik sil moarn efkes sjen wat de skea is. Gelokkich is myn plúmkejeiersark al wer op spanning. Dus wat dat oangiet kin it mar oan gean jûn yn Hegesân yn de finale fan de rekreantekompetysje...
+ 0 - 0 | § ¶Firuskes
Myn kompjûter wurdt beskerme troch Norton Internetsecurity. Fansels haw ik de Ingelske fersy want de Nederlânsktalige fersy wol ik net op myn kompjûter hawwe. Al myn sêfte waar is yn it Ingelsk útsein Firefox fansels. De ôfrûne dagen begjint Norton gauris wer in pear firuskes te ûntdekken. Op 'm sels is dat wol moai fansels, want soks jout oan dat it programma noch wurket. Mar dochs haw ik der mar it mier oan dat minsken my firuskes stjoere. Wat hat it no foar doel om fan dy kringen te meitsjen. Ik sjoch dêr de wille net fan yn. It soe fansels wol grappich wêze kinne mar dan soe sa'n firuske yn ien klap alle kompjûters op it ynternet ferfryskje moatte. Eart dat firus ferskynt mei men my efkes in sijntsje jaan. Dan set ik de Norton efkes út. Oant dy tiid meie jim dy firuskes wol hâlde...
+ 0 - 0 | § ¶100 % efter Verdonk
Wylst it tal Nederlanders dat efter it beslút fan Rita Verdonk oangeande Ayaan (der fanút geande dat dat har echte namme wol is) grutter is as it tal tsjinstanders is der yn de keamer net in soad fan te merken. Verdonk past de regels ta en dêr is Ayaan it slachtoffer fan mar is dat net har eigen skuld? Alles oan Ayaan is nep. Har namme, har ferline en har bertedatum binne troch har optocht om mar yn it strjitsje fan Nederlân te passen. En dan yn de krante ek noch hiel sielich dwaan ("Ze zei tegelijk blij en verdrietig te zijn dat ze haar uitgekozen land moet verlaten" LC 16-5). Ut de dokumintêre fan Zembla komt oars hiel dúdlik nei foaren ta dat net Nederlân mar Ingelân it útkeazen lân wie. Mar dat it net hawwen fan in fisum dit opkearde. Dus Nederlân is hielendal nea it beloofde lân foar dy west Ayaan. Wa kin dy no noch fertrouwe neidat der út dyn mûle allinnich mar leagens kaam binne. En dan dy skeinheilige keamerleden mar silich dwaan fansels. Der soe in útsûndering foar har makke wurde moatte. Der binne ommers spesjale omstandichheden. Fertel dan ris wat dy spesjale omstandichheden binne? It ienige wat de net regearingspartijen wolle is sa gau mooglik dit kabinet omfier sadat der ferkiezings komme kinne. It is in wûnder dat Wouter de Boskabouter noch net sein hat dat hy Ayaan fuort nei de ferkiezings gewoan wer Nederlander makket. Dêr't Verdonk Ayaan faaks brûkt as foarbyld om sjen te litten dat der net nei de persoan sjoen wurdt mar nei it gefal wol de oermacht fan de keamer it liegen beleane. En dan kin Femke noch sa dom swetse oer dat elkenien wol wit oer wa't it hjir giet. Mar at ik in kear oanhâlden wurd troch myn neef dy't by de plysje wurket en ik soe myn rydbewiis net by my hawwe, dan kin hy noch wol witte dat ik Thaeke bin, en dat ik wol in rydbewiis haw, mar hy moat my dan wol in bekeuring jaan om't ik it net by my haw...
+ 0 - 0 | § ¶better de tried stikken dan de tried kwyt...
Yn de lêste wedstryd fan de rekreantekompetysje fan it plúmkejeien moasten wy it oppenij opnimme tsjin de BC Assen. Yn de útwedstryd hiene hja ús op 4-4 hâlden dat it soe der om spanne. Noch in tsjinslach wie dat ús earste dame ek net meidwaan koe. Ik hie noch wat goed te meitsjen sjoen it feit dat ik yn Assen myn inkelspul ferlern haw. Dit kear gie it mei it thúsfoardiel oan ús kant in stik better. It duorre eefkes ear't wy oer it deade punt op 3-3 hinne wiene mar dêrnei koe ik frij ienfâldich de earste set binnen helje. Spitigernôch knapte by it skoaren fan it lêste punt fan de earste set in snaar fan myn plúmkejeiersark dat yn de twadde set moast ik fierder mei myn 20 jier âlde aluminium eksimplaar. Troch dat ik efkes oan dit wat swierdere racket wenne moast ferlear ik de twadde set mei in minym ferskil mar yn de tredde set koe ik redelik flot útrinne en mei in lytse marzje koe ik dochs it punt feilich stelle. Ek Eddy en Femke wûnen harren inkelspul. Myn freondinne moast wer tsjin har angstgegner dêr't sy yn de earste wedstryd by troch de inkel gien wie. Hoewol't se gjin halsbrekkende toeren út hoegde te heljen kaam sy der dochs net oan te pas. Nei de inkelspullen wie it dan ek al 3-1 foar ús. Dat like net sa mâl. Spitigernôch ferlearen wy it dûbelspul krekt mei in pear puntsjes ferskil. Ek de froulju ferlearen harren dûbelspul yn in spannende trijesetter. De stân wie doe al wer lyk en wy moasten ynienen wer fol oan de bak. Gelokkich wiene myn freondinne en ik yn foarm dat yn 2 setten sloegen wy de tsjinstander alle kanten fan it fjild op. Mar om't Eddy en Femke harren miks ferlearen wie de einstân krekt lykas út eindige yn 4-4. Dêrmei binne wy twadde wurden yn ús groep. Dat betsjut dat wy nei de finale meie, kommende tongersdei yn Hegesân. Wy sille ris sjen at wy dan de priis binnen slepe kinne...
+ 0 - 0 | § ¶Marcel hat de jierdei
Myn Sweager Marcel waard hjoed 29 dat wy moasten wer efkes nei Goor ta. No hat ús heit krekt in nije (twaddehâns) auto kocht. In peugeot 306 of 307, dat bin ik efkes fergetten, mar hy is griis en hy hat 4 doarren. It wichtichste fan in auto is fansels ek dat er start nei't jo de kaai omdraaie, en dat die der. In prima weintsje dus. Ik wie mei de Q-liner út Grins nei De Lemmer ta kaam omdat dat op de rûte lei. Us heit soe it earste stikje wol efkes ride, dan koe ik weromreis mei de bob spylje. Ik hie eins earst noch wol efkes troch de Mc Drive wollen, mar dat gie oer. Yn Goor hawwe wy efkes moai sitten en it waard al letter en letter. Heit wie mei Rinkje har skoanheit nei de play-offs tusken Twente en Vitesse. Ik hie dêr gjin nocht oan want dy Twentelju hiene harsels wol sa assosjaal gedroegen yn it Abe Lenstrastadion dat ik dêr net foar juige woe. No ja, Twente won mei 2-0 dat it wie net alles, mar ek net niks yn Ynskedee. Sa krigen ek de Tukkers harren 'europeesk fuotbal' yn de foarm fan foarrondes UEFAcup. Nei in goed miel fan de Sinees op 'e hoeke bin wy de jûns wer ôfset nei Sint Nyk. Wie koene it rêstich oan dwaan want de lêste bus wie dochs al fuort en sa eindige de dei oan de Schonegevelstrjitte dêr't ik noch krekt efkes in stikje Marco van Basten mei krige dy't útlei dat Huntelaar net mei giet nei it WK. Spitich foar Klaas Jan, mar moai foar Foppe fansels...
+ 0 - 0 | § ¶Ayaan 'u wordt bedankt, u kunt wel gaan'
Fannemoarn seach ik yn de herhelling it programma Zembla oer Ayaan Hirsi Ali Magan. Sy hat altyd hiel sneu dien mar no docht bliken dat se alles by elkoar liegde om mar yn Nederlân bliuwe te meien. Mei dit yn de efterholle sjogge jo fansels al hiel oars nei sa'n frommis. Eins is Ayaan gewoan in ekonomyske flechtling dy't hjir it plak ynnimt fan immen dy't ús help faaks wol echt nedich hat. De UNHCR hat in soad jild yn har ynfesteard om yn Kenia in oplieding te dwaan mar ynstee fan har kennis yn Kenia yn te setten woe hja leaver nei Ingelân. En doe't dat net slagge hat se har mar Nederlân binnen liegd. In grut swaktebod fan de VVD fansels om sa'n lieger op te nimmen yn de fraksje. Ien sterk punt komt út de dokumintêre noch wol nei foaren. Doe't Ayaan by Rita Verdonk lobbyde foar Taïda Pasic mei as argumint dat ek sy jokt hie sei Verdonk: "Ayaan, als ik toen de minister van integratie was geweest had ik je ook uitgezet". No frou Verdonk, nei sokke wurden kinne jo fansels straks net mear op ien list stean mei Ayaan mochten jo fraksjelieder wurde. Ik woe hjir mar in âlde Pigmeatklasiker foar út de kast helje: "U wordt bedankt, u kunt wel gaaaaaaaaaaaaaaaaaaaaaaaaaaaaaaaaaaaaaan!
+ 0 - 0 | § ¶Lofts en rjochts ynhelle
Myn lytse nichtsje sil hjoed boaskje. Wy sille jûn efkes op it feest sjen want in feest lit ik fuortdaalks net oan my foarbygean fansels. Wol apart fansels want it is ien fan myn allerjongste nichtsjes en feitlik soe dy pas nei my boaskje moatte. De fraach is dan fansels, is sy no sa betiid, of bin ik no sa let. In ynkopper fansels want mei myn 31 (en in heal) foarjierren bin ik fansels in âld sek. Mar ach, op dit stuit haw ik gjin jild foar in grut feest, en sûnder grut feest hoecht sa'n trouwerij om my ek net. Dêrneist moat de freondinne dan fansels ek noch in kear 'Ja' sizze dus it sil noch wol efkes op him wachtsje litte. Earst mar sa oer ús nije drompel. Wy ha straks al safolle hokken op ús hiem stean, dan kin wy sels ek noch wol efkes hokken bliuwe...
+ 0 - 0 | § ¶Hurde plakjes?
Neffens Albert Hendriks fan it kommersjele promoasjebedriuw mei de ferskriklikke namme Friesland Holland moat it Tsjûkemar in 'hotspot' wurde foar de jongerein. De Gânzetippe, it eilântsje neist de sneldyk, moat it plak wêze dêr't de jongerein fikje stoke kinne, dêr't hja lûde muzyk meitsje meie en dêr't mei snelle boaten omskeurt wurde kin. It eilân is ommers dochs al in see fan lawaai troch de snelwei dy't der deun lâns giet. Wat my oanbelanget kin dy bêste Hendriks wol oppakke want it roait fansels igge noch seame wat er útkreamt. Doe't ik lyts wie kamen wy elts wykein mei de boat by it (doe noch ienige) eilântsje en ik haw my dêr altyd poerbêst fermakke. Dy grutte dyk hawwe jo weinich lêst fan, it is allinnich efkes in eintsje omfaren fanút de haven fan Sint Nyk. Mar sûnder dizze dyk hie de haven fan Sint Nyk der net iens west. It Tsjûkemar is noch ien fan de weinige marren dêr't je noch in bytsje ta rêst komme kinne, in mar dêr't je hielendal ta rêst komme kinne. Op de Heegemermar en de Snitsermar kinst dy de kont net keare. Lit dy jongelju mei harren snelle boaten en lûde muzyk dêr mar bliuwe. Foar de jonge bern is der no op de Gânzetippe genôch te belibjen, en de wat âldere bern wolle dochs net mear mei heit en mem mei. Lit heit en mem dan nei it Tsjûkemar gean, en de bern mei in sylboatsje by Menno Sappé yn de 'lovesleat'...
+ 0 - 0 | § ¶Fjoerfoks
Ynkoarten sil ik mei tal fan minsken om tafel dy't dwaande binne mei it oersetten fan sêftguod nei it Frysk. Dêr sille ek de oersetters fan Firefox bywêzich wêze. Sjoen it feit dat ik eins noch altyd de ynternetferkenner fan Microsoft brûk waard it fansels wol ris tiid en helje dizze Fryske webswalker nei myn kompjûter (rekkenreau neffens guon). Dit berjocht op myn Frysktalige webloch is dan ek makke fanút de Frysktalige webswalker Firefox. En ik moat sizze, it liket net sa gek. Op 'm sels makket it fansels ek net in hiel soad ferskil om't je by it webswalkjen fansels mar kwalik de Fryske teksten nedich hawwe. It wichtichste is ommers gewoan it swalkjen oer it ynternet en hjir en dêr ris in sykopdracht. Mar it is fansels moai dat der sa hurd oan wurke wurdt om it Frysk ek yn de ienentweintichste ieu in plak te jaan. Foar de leafhawwers fan dizze Fryske fjoerfoks, hy is hjir del te heljen...+ 0 - 0 | § ¶Net kwea, net foar, mar wol BOPPE!
Hjoed wie it hearlik waar om te keatsen dat it wie suver drok yn it stedsperk. De froulju hiene in folslein perk foar har allinne en dêr wie net iens mear plak foar Jelmer dat dy mocht yn de B-klasse opdrave. Sjoen it feit dat it nivo noch altyd net superheech leit koe ik noch krekt oansluting hâlde by ús A-klasse en sa koe it barre dat ik foar yn it perk bedarre by de Oandachtlûker (Wouter) en Eelke Brolsma. Wy namen it op tsjin it sterrenslach tiem mei Wiebe (bekend fan de Nederlânske Kameleonfilm), Douwe G. (bekend fan Under fjoer) en Lange Germ dy't miskien noch net bekend is fan TV, mar dy't wol it slach part foar syn rekken naam want hy rûn mei in blau each oer it fjild. Sa hie hy dus kontinu i(e)n eachje op de seis froulju twa perken fierder op. It wie dan ek foar ús gjin inkeld probleem om troch te stomen nei 5-0 en troch dat ik de bal op 5-0 en 6-0 krekt net foarby de keats krije koe waard de einstân 5-0 en 6-2 yn styl besletten mei in boppeslach. Ik haw wol ris minder keatst...
+ 0 - 0 | § ¶Hout as Keunststof
Op dit stuit sitte wy wat te dubben oer de kezinen fan ús nije âlde hûske. Wy hawwe no twa offertes lizzen. Ien foar houten kezinen en ien foar keunststof kezinen. It is in aardige smak sinten mar de houten kezinen binne in bytsje goedkeaper yn oanskaf sa liket it. Dêr stiet dan wer tsjinoer dat de houten kezinen noch skildere wurde moatte en dat dat ek sa no en dan oppenij barre moat. Ek haw ik it idee dat de keunststof kezinen dy't yn de offerte stean wat lúkser útfierd binne (mei in moai draai-kyp systeem). Us hûs hat in ferskaat oan ramen, der is sawat net ien gelyk. Sa hawwe wy ek in pear rûne ramen. Dizzen kinne moai rûn útfierd wurde mar dat kost al wer flink wat mear. It is ek mooglik om se rjochthoekich te meitsjen en dan de rûne boppekant ticht te meitsjen mar dat is wol wer minder moai fansels. Ynkoarten sille wy ris mei de oannimmer om de tafel, faaks komme wy dan wer in stapke tichter by ús dreamwente...
+ 0 - 0 | § ¶Ekspedyzje Aldiwynson
Krekt tusken de boufak en it WK balskoppen yn haw ik noch in gatsje yn de agenda fûn foar wer in geweldige Ekspedyzje Aldiwynson. Yn it wykein fan 14-16 july sille wy besykje wer in machtich moai miniskuul tintfeest op poaten te setten foar de leden fan ús romrofte aldiwynrûnte. Krekt lykas ferline jier sille wy wer mei de boat fan ús heit en mem nei in ûnbewenne eilân dêr't wy oerlibje moatte op bynammen aldiwyn. Fansels sil der ek wer in barbekjoe hâlden wurde en at it waar it talit kin der wer in flink soad swommen wurde. No is it fansels de fraach, hoefolle minsken kinne der mei. Mar at der net te folle ôfheakje giet it gewoan troch, want ek mei 4 man kin wy de tinte wol tille al moat wy dan wol wat faker rinne...
+ 0 - 0 | § ¶De fergunning is binnen
Nei de offertes fan de ferbouwing fan it hûs dat wy noch net iens kocht hawwe is no ek de boufergunning binnen. Fansels wurdt dizze fergunning troch de gemeente Smellingerlân fan in bêste rekkening foarsjoen. Wat dat oangiet wol ik wol by de gemeente wurkje en sa wat fan dy flutfergunnings ôfjaan. Ien per dei en ik kin der rojaal fan libje. It begjint der no fansels wol echt hast wat op te lykjen. Wy moatte no noch efkes in fatsoenlike hypotheek ôfslute, it hûs keapje en dan begjint it slopen. Ik haw dêr no al sin oan, lekker wat muorren útbrekke ensa. Mar fansels is soks allinnich de earste dei leuk en ik bin bang dat der noch wol in pear wiken langer sloopt wurde moat. No ja, earst mar ris nei de bank ta. At der noch immen goeie tips hat foar de hypotheek, dy bin altyd wolkom...
+ 0 - 0 | § ¶Gjin jild mar wol fuotbal???
Yn Ljouwert is it fuotbal foarlopich wer rêden alteast, sa liket dat. Mar no hawwe hja dêr wer in oar probleem. Nei de dea fan arsjitekt Abe Bonnema is der in legaat fan 18 miljoen euro beskikber kaam dat allinnich brûkt wurde mei foar de bou fan in nij Frysk museum op it Saailân. Fansels is dy 18 miljoen net genôch en moat de gemeente Ljouwert dêr ek noch de noadige miljoenen by dwaan mar de grutte partijen dogge dat mar al te graach. De lytse opposysjepartijen komme no yn opstân. Op www.nieuwzaailandnee.nl kinst in petysje tekenje om de sittende partijen sjen te litten datst it der net mei iens bist. Op 24 maaie sil der ek noch in referindum plakfine yn Ljouwert. De lytsere partijen roppe dêrby op om NEE te stimmen. Wat ik noch altyd in moaie kwoot fyn fan ik mien in lyts famke yn de Ljouwerter krante wie: "En at de ien as d 'oare Imam no 18 miljoen jout foar in moskee op it Saailân, komt dy der dan ek?" Ek hiel grappich is de reaksje fan de gemeente op it foarstel fan immen (in foarstanner) dy't mei steigerbuisen alfêst de ôfmjittings delsette wol om sjen te litten wat der bart. De gemeente wol dit net en komt dan mei arguminten as dat der dan te min romte wêze soe foar oare aktiviteiten op de merk. Mar yn eardere berjochten hawwe hja altyd sein dat der genôch plak oerbliuwt foar de merkkeaplju en ek de grutte merke op it Saailân soe gewoan troch gean kinne. Ik freegje my dan ôf wêrom't dy buizen der net stean kinne. Faaks is de gemeente bang dat it de neidielen goed sjen lit, en dat dit de tsjinstanders yn de hân wurket. Ik woe mar sizze, tekenje allegear dy petysje efkes minsken...
+ 0 - 0 | § ¶Dit wurdt wer in drege dei
Tsja, dêr sit ik dan om goed 5 oere efter myn kompjûter. Om 5.30 moat ik op it fytske nei de Friesche vlag ta mar ik haw noch net sliepen. Nei de 5-0 oerwinning fan ús Hearrenfean hawwe wy dat earst efkes yn fak 10 fiert, dêrnei yn it Feanplaza dêr't ek de spilers en de trener letter noch efkes delkamen. It wie gesellich en drok en de mannen hiene toarst dat wie dúdlik. Nei de lange obade oan spilers en trener setten de mannen ôf rjochting katakomben. Mar yntusken haw ik noch efkes mei Verbeek fûstke en ek Nillson, Van Derbussche en in stikmannich oaren haw ik noch by de poat hân. Dêrnei soene wy wer op nei Grins mar it like ús ek wol in idee en gean noch efkes nei Café Bak ta. Dêr wiene de spilers ek allegear en sa koe it wêze dat ik neist Petter Hanson in skodde molke jierdbei bestelde by de sinees op de hoeke. Hiel grappich om te sjen dat de spilers sa wiis wiene mei dizze dik fertsjinne oerwinning dat se frijwat bier nei binnen wurken. Dat bierdrinken in hiel oar ding is as goed fuotbalje mei dúdlik wêze, mar dat makket ek net út. De mannen ha no efkes in pear daachjes frij en se meie moarn in kater ha. Al sil der ek hjir en dêr wat minsken mei in heale lôngûntstekking by wêze want yn de bleate bealch nei bûten om 4 oere nachts is net befoarderlik foar de sûnens. No ja, ik haw dus in nachtsje oerslein en moat sa nei de fabryk dy't foar de helte út Feanfans bestiet, mar ek foar in helte út Grinzers en dy hawwe krekt net de finale fan de play-offs wûn. Spitich foar Grins wat dat oanbelanget, en spitich foar AZ en Utert. Mar kommend jier UEFAcup foar it Fean en Grins en dêrmei slacht it Noarden yn earste ynstânsje wer foar master op. Ha jim my ek noch op tv sjoen trouwens, ik skyn efkes yn byld west te hawwen op Talpa. No ik sil dy kant op eart ik yn sliep fal efter it byldskerm...
+ 0 - 0 | § ¶VNO, moat dat no?
Ik lês krekt op Omrop Fryslân.nl dat de VNO-NCW fan doel binne om aksje te fieren yn it Abe Lenstra stadion foar de Sweeftrein. Soks roait dochs igge noch seame? Wêrom moat in balskopkriich dy't foar it Fean en har oanhang fan ynternasjonaal belang is no wer misbrûkt wurde foar soksoarte fan Grinzer kolder. Begryp my net ferkeard, ik bin net samar in tsjinstander fan de sweeftrein. Ik haw my wol wat yn dizze saak ferdjippe. Ik bin ek gjin tsjinstander fan de magneettechnyk. Sa'n 2 jier ferlyn haw ik al ris in testritsje makke yn it Dútske Lathen dêr't in lyts proefbaantsje oanlein is. En ik moat sizze, de trein sels is geweldich. Hy makket net in soad leven en hy giet hiel hurd, ek troch de bocht. Wêrom dan sa tsjin dy trein? Yn it foarste plak wol men dizze trein oanlizze tusken Grins en Skiphol. Dat is dan dus in miljardenprojekt dat bynammen rjochte is op de stêd Grins. Drachten en it Fean meie der mooglik ek fan meiproviteare en fierder soe Almere noch in aardich tuskenstopplakje wêze. Mar lit ús no wol earlik wêze. Dizze trein hat nouliks mear om 'e hakken as de trein fan Ljouwert nei Starum. Tusken Ljouwert en Snits is it drok, dêrnei hâldt it net oer. Foar Almere is it dan ek bêst in aardich ding mar Fryslân hat der hielendal neat oan. Wylst wy der wol oan mei betelje meie fan Alders cs. Wat hawwe Grinzers überhaupt op Skiphol te sykjen, in ferbining fan it CS nei Eelde soe dochs folle rapper wêze, en folle goedkeaper. Dan soe it folsleine Noarden rap yn de loft wêze kinne. Dan freegje ik my ôf, wa brûkt sa'n trein as ferfiermiddel? Hoefolle minsken soene mei it iepenbier ferfier nei de rânestêd wolle. Ik wit ek wol dat in soad Friezen (metselaars ensa) nei de Rânestêd reizgje. Mar soene dy harren ark meinimme yn de trein? Ik tink fan net. Wat fansels wol in opsje is, dat is dat de rikere minsken út it Westen in hûske keapje yn in rêstich doarpke yn Fryslân. Wylst hja wurkjen bliuwe yn it Westen. Fryslân krijt dan mear ynwenners mei mear jild. Mar dizze autochtoanen sille neat op hawwe mei it Frysk en de Fryske kultuer. En at de boer begjint te jarjen krijt er de miljeuplysje op syn dak. Nee, op sokke minsken sitte wy yn Fryslân alhiel net te wachtsjen. En dan ha we it noch net iens oer it lânskip hân dêr't dan sa'n grut heech ding yn komt te stean. Ja, de Sweeftrein kin ek fersonken wurde, mar dat kost wer grûn en dan kin men wer net fan de iene nei de oare kant. Dus omheech mei dat ding, dwars troch ús moaie provinsje hinne wêrûnder it al slim troch de A6 oantaasten Tsjûkemar. Nee, dy Sweeftrein, dy meie se wol earne oars oanlizze. Bygelyks yn Appelskea, en lit him dan mar in pear kear troch in apel swefe en mooglik noch in kear oer de kop ek. Dan kin wy Walibi Flevo noch ris fan de troan stjitte as achtbaanhaadstêd...
+ 0 - 0 | § ¶In lyts stapke tichterby
Wy ha krekt in earste offerte krigen foar de ferbou fan ús mooglik oan te túchjen hûs en ik moat sizze dat soks earst altyd wol efkes skrikken is. In ferbouwing kost altyd in smak jild dat mei dúdlik wêze. Ik haw dat by Bernlef bygelyks in pear kear meimakke mei as hichtepunt de ferbouwing fan de húskes dy't neffens my fierstentefolle sinten kostte hawwe. Mar se sitte der no, en gelokkich hoege wy yn earste ynstânsje mar ien húske dat it sil ek wol tafalle. Wy moat ynkoarten mar wer ris mei de bank om tafel om te sjen at wy noch wat sinten liene kinne, de staatslotterij hat spitigernôch al in oar gelokkich makke...
+ 0 - 0 | § ¶Saw
Justerjûn haw ik tegearre mei de freondinne de film Saw sjoen. Dizze wie yn de oanbieding by de Albert Heijn foar mar 4,99 dat ik koe 'm net lizze litte. Saw II draait no leau ik yn de bioskoop en ik hie heard dat dit wol in aardige film wie. No dat klopt hielendal. It is in lekkere spannende thriller mei in pear leuke ferrassings. It ferhaal is wol wat faach fansels, mar dochs bliuwt de film spannend oantemei de lêste minút. Dus hawwe jim in kear niks te dwaan, gean dan nei de fideoteek en hier dizze film. Do witst net watst seachst...