+ 0 - 0 | § ¶Hoe no fierder?
Lokwinske Lousewies, wat Boris net dwaan woe nei in wichtich beslút (de militêre misje nei Uruzgan) dat koedest do wol foar elkoar krije om in futiliteit. D'66 hat krekt op tiid in nije listlûker keazen mar ik bin bang dat dat ek de lêste ferkiezing west hat dy't Alexander winne sil. Der sille no nei alle gedachten ferkiezings komme mar wat bart der dan? Stimt elkenien dan yn ien kear links? Sille wy dan allegear stimme op Wouter Bos dy't stie te glimkjen doe't it kabinet foel? Ik mei hope fan net. Dit kabinet hat fansels in tal drege besluten naam mar dat wie ek nedich. De sûnenssoarch bygelyks wie oars oer in oartsje net mear te beteljen west. Krekt lykas de boarger kin ek Zalm eltse euro mar ien kear útjaan en ynstee fan nei Leen fan Frisia te stappen om sa op koarte termyn goeie sier te meitsjen hâlde hja de hân efkes op de knip om der sa yn de takomst sterker út te kommen. Jouwe wy no de stim oan Wouter dan sil it op koarte termyn wol goed komme mar wachtsje dan mar oant jo ta binne oan de AOW...
+ 0 - 0 | § ¶Draaikonten '66
Je soene tinke dat it grutte D'66 wat leard hie fan de metoade Dittrich tidens it debat oer de misje nei Afghanistan. Mar neat is minder wier. Dittrich drige mei in kabinetskrisis om sa te besykjen de PVDA oer te heljen mei te gean yn dat stânpunt. Oppenij besykje hja no misbrûk te meitsjen fan dy pear setels dy't hja hawwe en dy't it kabinet de mearderheid jouwe. Fansels sit D'66 yn in lestige posysje want as it kabinet falt dan rekket D'66 aardich yn de put en it kin wol ris mear dan ien rûntsje om it politike guozzeboerd duorje ear't hja dêr wêr út komme. Mar om no om sa'n kolderike saak as dizze it kabinet op te blazen giet my dochs te fier. Dan hie Boris Dittrich better in pear moannen earder de stekker der út lûke kinnen. Yn alle gefallen hiene je dêr noch respekt foar ha kinnen...
+ 0 - 0 | § ¶Draaikonten yn De Haach
Nei wiken fan diskusje en ûndersyk is men der no ynienen efter kaam dat Ayaan Hirsi Magan dochs eins wol as Ayaan Hirsi Ali troch it libben gean mei. Dêrom soe sy dus ek net liegd hawwe by har naturalisaasje en dus mei sy gewoan Nederlanner bliuwe. Rita Verdonk hie har leaver gewoan útsetten sa't de wet soks foarskriuwt mar nee, hiel de twadde keamer fûn dat sneu foar Hirsi Magan dus sy moast bliuwe. Omdat Femke Halsema no fuortdaalks de grinzen iepen sette wol foar elkenien dy't liegde oer syn situaasje hawwe se der in moai ferhaal omhinne betocht oer de namme fan Hirsi Ali dy't dochs wol legaal brûkt wurde mocht. No freegje ik my ien ding ôf. Wat makket de namme fan in persoan út yn it gefal fan dat jo hjir al as net bliuwe meie. Hirsi hat noch oer folle mear dingen net de wierheid sprutsen. Sy soe flechten wêze út Somalië mar ynstee dêrfan hie se gewoan in oplieding folge yn Kenia mei jild fan de feriene naasjes. Sy soe wit ik hoefolle oarlogen meimakke hawwe dêr't neat fan wier is. Sy moast boaskje mar koe gewoan yn Dútslân út it fleantúch stappe en ynstee fan ûnder te dûken gie se de polityk yn en kaam mei har holle op de foarside fan Time magazine. It bistke hat no dan miskien wol in namme, mar sy hat ek de namme fan lieger. En krekt no't de polityk en Rita Verdonk har in finger jouwe stekt se dy (middel)finger omheech en seit se dat se allinnich mar tekene hat om it paspoart. No Hirsi, meitsje do no Submission 2 mar gewoan, dan litte wy Mohammed B. oer in jier as 10 wol efter dy oankomme. Dan witst pas echt wat it is om bedrige te wurden...
+ 0 - 0 | § ¶Gjin google adsense op Fryske siden
Sûnt in pear dagen stean der gjin advertinsjes mear op myn webloch. It foel my op dat der ek op guon oare siden fan my gjin gewoane adsense advertinsjes mear stiene. Earst tocht ik noch dat ik ûnterjochte blokkeard wie mar op guon Nederlânsktalige siden docht de adsense reklame fan Google it noch wol. Ik haw dêr dus mar efkes in eameltsje oer stjoerd nei Google. Dit krige ik as antwurd werom:
"Bedankt voor uw bericht. Ik heb uw Friese sites gecontroleerd en geconstateerd dat er op deze sites geen Google advertenties weer worden gegeven. Zoals u zelf al aangeeft is dit een taalkwestie.
Op dit moment kunnen we doeltreffende advertenties en ondersteuning bieden in de volgende talen: https://www.google.com/support/adsense/bin/answer.py?answer=9727. Als de Google AdSense-advertentiecode op pagina's is geplaatst waarvan de inhoud voornamelijk in een niet-ondersteunde taal is opgesteld, kan het helaas voorkomen dat we niet-commerciële advertenties of advertenties in een andere taal weergeven.
Aangezien we deze dienst momenteel niet kunnen aanbieden voor uw taal, verzoeken we u de Google AdSense-advertentiecode van uw site verwijderen. We doen ons best om ons programma uit te breiden. Ondertussen willen we u bedanken voor uw geduld."
Wol apart want hast in jier lang hawwe der gewoan advertinsjes op myn side stien.
+ 0 - 0 | § ¶De kleur is giel
Yn neifolging fan Ivanov haw ik de webloch mar wer giel makke krekt as foar it WK. Wy kin der fansels lang oer prate want hie Van Nistelrooy der net yn moatten as hie Klaas Jan Huntelaar net mei moatten foar wannear't Van Nistelrooy faalde mar it feroaret der gjin bliksem om. Oranje leit der terjochte út. Dat de duvel wer op de grutte bult skite justerjûn mei dúdlik wêze want doe't ik nei it 'ferjitten' op nei hûs gie krige ik healweis ek noch in lekke foarbân. Wûnderbaar is oars en myn kop fielt as de knibbel fan Ronaldo...
+ 0 - 0 | § ¶FF Mâltjirrich komt der oan...
Myn balskoptiem yn de WK Manager is dwaande mei in opmars. Sa bin ik yn de Bernlefleague fan 12 nei 6 gien en yn de algemiene ranglist stean ik no ek wer stevich yn it lofter rychje. Hoe dit kin? Net allinnich troch in goeie kar foar de spilers fansels mar bynammen ek trochdat in grut tal dielnimmers net wiksele hat en no dus mei Japanners, Súd Koreanen, Tsjechen en wat al net mear yn de ploech sitte dy't fansels net safolle punten opsmite. Fan Bernlef hat minimaal de helte fergetten te wikseljen mar ek fan de algemiene kompetysje bin der in pear sukkels by. Ik seach bygelyks juster dat de nûmer 11 ek net wiksele hie. Dat is wol skande fansels. No ja, myn tiem bestiet no at it goed is yn elk gefal út allegear basisspilers. Ik haw der dan ek mar gjin Nederlanners yn setten want it wikselbelied fan Marco van Basten is gjin tou oan fêst te knopen fansels. Om jûn hielendal neutraal foar oranje op de tribune fan Bernlef plak nimme te kinnen haw ik der ek gjin Portugees yn sitten trouwens. Ingelâns Peter Crouch moat hjoed mar efkes de winnende treffer meitsje, of better noch in hattrick...
+ 0 - 0 | § ¶WK Manager
Foar de WK manager haw ik myn folsleine earste tiem op non aktyf setten. FF Mâltjirrich 2 nimt no de honeurs waar. Uteinlik hawwe der dochs noch 10 spilers aktyf west mar dat kaam trochdat guon ploechjes al wis wiene fan de folchjende rûnde en dus mei in fantasy opstelling kamen. Yn alle gefallen wie it tal punten net sa denderjend en ik stean noch net iens yn it linker rychje. No mar hope dat net alle dielnimmers op tiid harren wiksels pleatse want dat kin noch mar in pear oerkes. Ik sil daalks sels nei Sint Nyk ta om dêr sels ek sportyf dwaande te wêzen op it mêd fan it keatsen...
+ 0 - 0 | § ¶Earst de Opel en no ik ek noch...
In pear wiken ferlyn rekke ús Opel slim skansearre doe't de ien as d'oare malloat him yn de brân stutsen hie. Ik haw nei de ôfrûne pôledei de grap makke dat it ferskil tusken my en de Opel wie dat ik read waard neidat ik ferbaarnd wie (ús Opel wie read foardat er ferbaarnd wie). Dizze grap is no net langer fan tapassing sjoen it feit dat de earste stikjes read no loslitte en der dêrûnder no dus ek wer in kleurleas stikje fel sichtber wurdt. jammer want ik hie krekt in bytsje in moai kleurke en no haw ik bynammen in soad Jûkte op 'e rêch (Bombarje)...
+ 0 - 0 | § ¶Wynplasse
It skynt dat der yn Europa tefolle wyn makke wurdt of der wurdt te min Europeeske wyn dronken. Faaks hawwe wy fan de Aldiwynrûnte dêr ek skuld oan. Fansels drinke wy allinnich in griemmank fan winen út ferskate lannen fan de Europeeske mienskip dus wat dat oanbelanget dogge wy goed ús bêst foar de Europeeske wynboeren. Mar troch in kombinaasje fan faktoaren lykas de ferdeechlikking fan guon fan ús leden leit it tal aktive aldiwynjûnen de lêste jierren op in wat leger pitsje. Fansels sille wy oer trije wiken wer in ynhelslach meitsje op Kamp Ganzetippe dêr't wy oppenij de ekspedyzje Aldiwynson oangean sille. Noch net alle Aldiwiners hawwe harren dêrfoar oanmeld. Dus kom út dy luie stoel en gean mei nei it Tsjûkemar, en dochst it net foar de Frânske as de Spaanske wynboeren, doch it dan foar in moai en sûn kleurke op it fel...
+ 0 - 0 | § ¶De pitchhitter
Yn sa'n wedstryd fan Oranje tsjin Argentynje dêr't eins net in soad op it spul stiet en dêr't ek noch in B-opstelling yn it fjild stiet wêrfan ik by guon spilers de namme net iens by de kop pleatse kin wie der gjiniens in plakje foar ús pinchhitter Vennegoor of Hesselink. Om net alhiel sûnder Pinchhitter te sitten haw ik my dy rol mar tabedield. Fansels bin ik net in bierman, dat mei bekend wêze, mar sa'n bierbeker is fansels ek prima geskikt foar de kombinaasje der kombinaasjes. Wy hawwe it dan fansels oer Joustra Sânomheech. De keunststoffen Pitcher fan Grolsch leit fierders prima yn ien hân en troch it skinktútsje kinst 'm sa oan de mûle sette by mannich dea spulmomint. Wat dat oanbelanget drinkt er in stik better fuort as de Oranje pothelm want dy iepening is sa wiid dat je sels ek wiet wurde at je der út drinke. Mei troch de nije Pitcher fan Grolsch haw ik myn alkoholynname no keurich beperke kinnen ta trije gleskes. Dat is gjin keunst fansels, mar wol keunststof...
+ 0 - 0 | § ¶Pearke keatsen
Dit berjochtsje is efkes spesjaal foar de leafhawwers fan it pearkekeatsen yn en om Grins. Op tongersdei 6 july sil der yn Grins pearkekeatst wurde mei ûnderwylst in fleisskroeierij en nei ôfrin in lekkere dûk yn it Hornyplaske. Sa't it no liket haw ik stelt mei de freondinne dus froulju, jim lykje efter it net te fiskjen wat dizze topper oanbelanget. Der wie noch efkes in lytse diskusje oft wy mei in gewoane as mei in sêfte bal keatse moasten mar de froulju hiene leaver in hurden dus dêr wiene wy rap út. No mar ris efkes sjen at der yn de omjouwing fan de Hornyplas noch in moai flak stikje greide is. Ik haw der no al nocht oan, is it net oan it keatsen, dan wol oan de fleisskroeierij...
+ 0 - 0 | § ¶Keep of the sunny side
Boppesteande is in lytse oanpassing fan in ferneamd nûmer fan Pigmeat. Sy sjonge dan altyd keep on the sunny side mar dat liket my op dit stuit net sa'n goed plan. Ik haw nammentlik noch in moai sûfnierke meikrigen fan de Pôledei. Myn rêch hat no in kleurke krigen wêrtroch't ik wannear't ik de ûnderbroek sakje lit, it yn kombinaasje mei myn noch wite krús trochgean kin foar in oanhanger fan it alvetal fan Switserlân. En dat is net noflik. No ja, gelokkich haw ik noch pear rêstige nachtsjes yn de kuolsel op it program stean dat dan lûkt al myn oerstallige energy der wol wer wat út. En oars moat ik it mar omsette yn boppeslagen moarn by it keatsen...
+ 0 - 0 | § ¶Ekstreem moai feest op 'e pôle
Fannemoarn om 12.00 kaam de karrafaan fan Kuipersboatsjes werom yn de haven. It wie in alderferskuorrendst moaie pôledei west. Sneontemoarn om 9.00 kamen wy yn de haven oan wêrnei't de measten in bakje wekkerwurdsop (kofje) nedich hiene om wekker te wurden. Dêrnei waarden de 13 oanwêzige Kuipersneven en 'oantrouden' yn de leeftiid fan 17 oant 44 ferdield oer 4 boaten. Ik siet by Ronnie yn de boat dêr't wy mei in fijn stikje DLB yn de skyfkeswikselder mei faasje yn de rjochting fan it Tsjûkemar farden. Albert hie mei syn snelle boat in kontrolearjende funksje, de bruorren Aerjen en Riemer soargen der mei harren polyfalk foar dat ek wy ús oan de Kyotonoarm hâlde koenen en Michel makke it feest kompleet mei syn boat. Nei in goed oere farren kamen wy al oan yn de Skarsterrien dêr't de Pôle hielendal ôfset wie mei linten sadat der gjin oare minsken lêst hawwe soene fan ús feestje. It is fansels Kuipers-eigen dat der op sa'n feestje fan alles rojaal genôch is. Sa ek no wer. De organisaasje hie in aggregaat regele dat genôch fermogen like te hawwen foar in feest fan it formaat Feanhoopfestival. Der wie in tinte regele dêr't de folsleine famylje Kuipers mei oanhang wol yn te bowlen koe. 'De Mier' soe foar in muzikale noat soargje en de ervenis fan 'Thaekes feestverlichting' waard ek noch efkes ynset. It aggregaat stie al moai te brommen mar hoe't wy it ek besochten, stroom woe it net leverje dat der waard noch efkes rap wer nei Sint Nyk flein om in noch folle moaier aggregaat. Dizze hie in útskobare mêst dy't in 4 tal enoarme boulampen in meter as 10 de loft yn tille koe. It kring joech safolle locht dat de fûgeltsjes de hiele nacht trochfluite hawwe. Wy hiene no stroom en muzyk en ljocht en de gesellichheid koe oangean. Hoewol't it net needsaaklik wie om de tinte op te setten hawwe wy dat dochs mar wol dien want oars hiene wy 'm om 'e nocht hierd. It opbouwen fan sa'n legertinte is ek altyd in moaie aktiviteit fansels. Om de feestvreugde fan de feestvierders net te folle te beheinen sil ik fierder op de details net te folle yn gean, dit yn it kader fan 'Wat op de pôle bart moat op 'e pôle bliuwe!' Inkelde hichtepunten wiene der fansels wol: In kuolwein fol kâld bier, bearenburch, sân-omheech, Lingens blond en lêst mar net minder fleis en slaatsje. Ek de snert foel der goed yn. Guon lju ha noch wat wurke oan harren tafels, bynammen dy fan sân. Oaren koene de blaastest net trochstean. Oan it ein fan de rit kamen wy yn alle gefallen ta de konklúzje dat it moai west hie. En oar jier dogge wy it wer, dan op 16 juny dus neefkes set dat mar yn jim aginda. Mochten der mannen wêze dy't oar jier ek meiwolle? Wy ha noch in pear fakatures, ûnderoaren noch trije yn Grins...
+ 0 - 0 | § ¶In ûnferwacht feestje
Juster haw ik op de soas it balskoppen sjoen wêrnei't ik nei it nuttigjen fan de noadige 'pinchers' ôfsette moast nei it stasjon. Om fannemoarn om 9.00 yn Sint Nyk te wêzen moast ik noch op freedtejûn ôfreizgje en sa kaam ik mei de lêste bus út Grins. Doe't ik de strjitte dêr't myn âlden wenje yn kaam stie der in grut stek midden op de dyk. Mei de Kameleonklassiker 'Der koe wol wat oan de hân wêze' yn myn efterholle gie ik de hûs yn en doe seach ik dat der foar hûs in grutte tinte stie mei allegear folk. It die bliken dat buurtferiening de Grietman in fuotbalfeestje mei in fleisskroeierij organisearre hie. Hja hiene ek noch in bakje fleis oer dus dêr haw ik se mar efkes fan ôf holpen. It wie al nei twa oere eart ik op ien ear lei...
+ 0 - 0 | § ¶Pôledei
Moarn is it Pôledei. Wy sille dan mei de neven en alle manlikke oanhang fan de nichten fan de Kuiperskant nei de Pôle ta by de Skarsterrien. Dêr sil wy in gesellige dei en nacht mei ús allen hawwe wylst wy ryklik fan floeiber guod foarsjoen wurde en fansels mei in hapke op syn tiid ek net ûntbrekke. Ik haw der no al nocht yn want it sil toarstich waar wurde wol 'k leauwe. Moarn om 9.00 oere sammelje wy yn de jachthaven fan Sint Nyk en sjoen it feit dat ik dêr net sa betiid mei de bus komme kin moat ik fannacht noch nei Fryslân ta. Mar ik wol fansels earst al efkes it Nederlânsk alvetal sjen tsjin de Oaljefanten út de Ifoarkust. Dus dat wurdt daalks om in oerke as 22.00 mei in slokje op yn de lêste Q-liner dy't noch oansluting hat op de bus nei Sint Nyk. Ynkoarten lêze jim op dizze side wol hoe't it ôfrint...
+ 0 - 0 | § ¶Sy hat wer in wein
De freondinne is wer werom fan fakânsje en dat net allinnich. Sy hat ek in nije twaddehâns wein oantúge. Om nije gefallen fan sinleas geweld tsjin rydend materieel foar te wêzen sil ik hjir net melde dat it om in blauwe ford focus giet. Yn alle gefallen is sy der wiis mei en ik fansels ek wol in bytsje. Op dit stuit wurde sawol de wein as de eigner noch efkes goed neisjoen en dan kin it weintsje yn de rin fan de wike nei Grins helle wurde. Dat is wol ferhipte handich want je wenne gau oan it gemak fan in eigen wein en at je ien kear in auto hân hawwe kinne je hast net mear sûnder...
+ 0 - 0 | § ¶Himmeldei
At it goed is komt de freondinne hjoed (fannacht) werom út Itaalje. Der bestiet ek noch in lytse kâns dat se pas moarnier yn Grins oankomt omdat sy mooglik noch in tuskenstop makket op 'e Rottefalle. Mar foar de wissichheid kin ik fansels better mar efkes in kear troch it hûs hinne. No moat ik sizze dat it hjir wol ris in gruttere puinhoop west hat. In kear ôfwaskje, de post wat sortearje en ik bin al in hiel ein. It is wol dúdlik dat it sûnder frou yn hûs net lang netsjes bliuwt. Ik sil bliid wêze at sy der wer is...
+ 0 - 0 | § ¶Sorry Wouter
Lei it oan de waarmte, oan it feit dat ik nachts min sliep by gebrek oan froulike oandacht as komt it om't ik noch gjin fatsoenlik waarm miel nei binnen wurke hie. Joast mei it witte. Faaks is it ek gewoan myn normale minne rite dy't der foar soarge hat dat Wouter en ik ferlern ha mei it keatsen. Dat it foar in grut part myn skuld wie mei dúdlik wêze. Ik sloech as in krante op en yn it perk krige ik de want net op tiid tsjin de bal. Dat spyt my Wouter, ik hie graach mei dy winne wolt mar it siet der fan myn kant net yn hjoed. Oare wike sneon mar ris efkes yn Sint Nyk sjen by de tradysjonele keatspartij mei Barbeque. En dan mar hope dat der genôch dielname is sadat dy barbekjoe ek trochgean kin...
+ 0 - 0 | § ¶Ik haw it mier oan dowen
Troch it moaie waar like it my in goeie saak en set de balkondoar efkes op it wiidst iepen sadat de saak hjir efkes goed troch luchtsje kin. In pear dowen mienden dêrfan proviteare te moatten troch in lekker skûlplak te sykjen ûnder ús twapersoansbêd. Gelokkich koe ik se der wei jeie eart se begûnen te skiten. No haw ik sawysa al it mier oan dy bisten. Se skite ús hiele balkon ûnder, se fleane altyd op it ferkearde momint de ferkearde kant op atst se op de fyts foarby giest en se hâlde de freondinne noch mear út de sliep dan dat ik dat doch. De ienige wize dêr't ik dowen op wurdearje is yn in stoofpotsje...
+ 0 - 0 | § ¶Smûk op de tribune
Doe't it SB (kommisje Soasjeteits Behear fan Bernlef) hjoed op de soas kaam frege ien fan harren har ôf wêr't al de lege kratsjes bleaun wiene. No dy steane no ûnder de tribune fansels. Want it WK moatte je fansels sjen fanôf de tribune en sjoen it feit dat der yn Leipzig net mear in plakje foar de gewoane man is hawwe wy ús eigen tribune dan mar del set. Mei digitale televyzje op de biemer sieten wy sa fansels ek minstens like goed as yn it stadion. Hielendal feest waard it doe't wy fan it SB nei de goal fan Robben in fergese konsumpsje krigen. Yn prinsipe hiene hja tasein dat by elke goal te dwaan fan it Nederlânsk alvetal mar sjoen it feit dat sy bang wiene foar in dikke oerwinning wiene se dêr dochs wat skruten yn wurden. Spitich, want in oerwinning mei moaie sifers is fansels altyd goed foar de omset. No freed mar wer efkes sjen, faaks kin wy ús dan by winst al opmeitsje foar de folgjende ronde...
+ 0 - 0 | § ¶De earste punten...
Sa de earste punten bin binnen. Artur Boruc, de tsjinhâlder fan Poalen (9.000.000), soarge noch efkes foar in -1 mar lokkigernôch die tsjinstander Luis Valencia (5.000.000) goed wurk troch foar Ekwador 3 punten út it fjoer te slepen. Costa Rica koe my net bekoare dus dêr hie ik net ien fan opstelt mar dy ferhipte rotmoffen moatte de kommende kear al efkes mei myn oanfierder Robert Huth (12.000.000) spylje fansels. Hast dat yn de gaten Klinsman, oars moat ik mar efkes oer de grins komme tinkt my. Yn de folsleine list stean ik nei ien dei 9879 en dus noch krekt by de earste 10.000 dielnimmers oer hiel Nederlân besjoen. Yn de 'subleague' Bernlef stean ik op plakje fiif en yn dy fan Fryslân stean ik op dit stuit nûmer 1 mar dat lêste komt fansels ek omdat dêr noch net elkenien foar oanmeld is. Jim kinne jim oanmelde foar de Fryslânpoel troch as brûkersnamme fryslân yn te fieren en as wachtwurd boppe...
+ 0 - 0 | § ¶De frou is op fakânsje
De freondinne is fannemoarn al betiid ôfset nei Rome. Op it momint fan skriuwen hinget sy wierskynlik earne boppe de Alpen tink ik. Sy woe graach ris mei ien fan har freondinnen op fakânsje. No dat past my fansels ek wol want dan haw ik efkes in momint foar my sels. Se is net ekstreem lang fuort want se komt woansdei al wer thús. Daalks earst efkes wurkje, dan taapje op de soas fan Bernlef dat it sil jûn wol wer ekstreem let wurde. Ik haw de lêste dagen flink oan it wurk west en dêr tusken troch ek noch efkes by de Notaris en de Bank (net 'de bank' mar gewoan de Rabobank) delwest. Notarieel besjoen wurdt it allegear dochs wer wat komplekser as wy tochten mar dêr sille wy wol útkomme. Finansjeel besjoen kinne wy it grif wol rûnkrije dus dat is moai. Noch in pear wiken en dan bin ik noch mar heal Grinzer al haw ik my nea echt Grinzer fielt fansels...
+ 0 - 0 | § ¶WK poeltsje
Krekt foar it sluten fan de transfermerk haw ik dochs noch mar efkes besletten om mei te dwaan oan de WK poel fan VI. Ik lies op de Bernlefside dat men dêr oan mei die en ik koe it net litte en folje ek efkes in pear nammen yn. Bêst lestich want mei mar 110.000.000 euro moat in tiem gearstald wurde fan 11 mannen út 11 ferskate lannen. De goeien binne allegear boppe de 10.000.000 dus atst der foar kiest om in tal toppers op te stellen dan hast ek wat mindere goaden yn it tiem. Sjoen it feit dat Marko van Basten gjin Friezen opstelt hat haw ik ek besletten om (foarlopich) gjin spilers fan it Nederlânsk alvetal op te stellen. Fierder hie ik ek noch hast de kapitale flater makke om Del Horno fan Spanje as oanfierder op te stellen mar gelokkich lies ik noch krekt op tiid dat dy blesseart is en net langer diel útmakket fan de Spaanske seleksje. No mar hope dat net elkenien safolle ûndersyk dien hat. Moarn begjint it WK en dan sil wy sjen hoe't it giet mei de punten. As FF Mâltjirrich kinne jim my dan hooplik heech yn de ranglisten werom fine...
+ 0 - 0 | § ¶Mariusz is OK
Doe't Marius de Boer in pear jier ferlyn út Reboelje stapte giene de oare Reboeljeleden troch as Swee. Fan Swee stean in pear tige aardige demo mp3's op it ynternet dus dy mannen meie ek wol rap mei in album komme. Platebaas Marius woe efkes in skoftsje gjin muzyk meitsje mar it slagge him net. No treedt er op as soloartyst ûnder de namme Mariusz. Sneon wie ik efkes yn Drachten en ik haw fan dy gelegenheid gebrûk makke om efkes wat nije (as âlde) Fryske kompakt skyfkes oan te túgjen. Dêrby wiene ek de singeltsjes mei de nûmers Spyt en Do lêste leafde en it moai yn in metalen doaske ferpakte Sulveren Wein dêr't ek it nûmer yn Frijheid op stiet. Mariusz hat noch altyd syn karakteristike stim allinnich is syn band no illektroanysk en komt it út in kompjûter. Fan de twa singeltsjes fyn ik dy mei it metalen doaske it moaiste. Dy is wat steviger en bynammen it nûmer Yn Frijheid is in nûmer dêr't ik wol fan genietsje kin. It wurdt tiid dat Marius Mariusz útbringt op in album want myn mp3 samling wol graach mei dit soarte fan materiaal útwreide wurde...
+ 0 - 0 | § ¶Thaeke.net kleuret oranje
Nei de goeie prestaasjes fan Oranje ûnder 21 en ûnder Foppe dy't goed gebrûk makken fan de âld Hearrenfeanspits Klaas Jan Huntelaar moat it mei it grutte oranje ek wol goedkomme fansels. Hja meitsje ommers ek gebrûk fan in âld Hearrenfeanspits (Ruud van Nistelrooy). Om harren te stypjen yn de kommende wedstriden haw ik it giele fan myn webside foar in pear daachjes en hooplik dus wat langer oranje makke. Ik bin noch altyd net foar it keningshûs mar fansels stean ik wol efter ús nasjonale balskoptiem...
+ 0 - 0 | § ¶Bûnspartij - NK Senioaren
Pinkstermoandei is altyd in dei fan ferskate aktiviteiten. Sa is der fansels de Fytsalvestêdetocht mar ek is der tradysjoneel altyd de bûnspartij yn Frjentsjer (keatsen). Dit hyt tsjintwurdich it NK Senioren mar dat is allinnich mar op papier fansels want it bliuwt fansels gewoan 'De Bond'. Gewoanwei soe ik op dit stuit wierskynlik by de fiskkarre oan it Sjûkelân stean om dêr it safolste bakje kibbeling nei binnen te skowen mar sjoen it feit dat wy no sûnder auto troch it libben moatte haw ik der dochs mar foar keazen om ek hjoed te wurkjen. Pinkstermoandei is in feestdei en dus wurdt dy dûbeld útbetelle en dat is wol noflik fansels. Ik siet krekt efkes op de side fan de KNKB te sjen mar dy hâlde de útslagen fan de foarste list noch net by. Ik kin dan ek noch net sjen at Grins it oprêden hat tsjin Weinum. Grins is dit jier net sa goed as oare jierren no't haadklasser Douwe Groenendijk ferhûze is nei it Fean. Ek Sake Porte keatst net mear alle dagen fansels dat wy sil it wol dreech hân hawwe. Op dit stuit harkje ik nei de Livestream fan Omrop Fryslân radio mar ik haw al neat mear meikrigen fan Grins as Weinum dat ik gean der mar fanút dat se de tredde omloop net helle hawwe. No ik sil sa nei myn wurk ta en dan lêze wy it moarn wol yn de Ljouwerter krante...
+ 0 - 0 | § ¶Sineesk wykeintsje
It wie wer in Sineesk wykeintsje. Krigen wy sneon by myn skoanâlden in noflik hapke fan de ôfhelsineesk, ek op snein stie der wer Sineesk op it menu mar dit kear fan de Wokchinees. Wokken is echt in hobby wurden fan my. Net allinnich mei ik sels graach efter de wok stean, sa komt der yn ús nije hûs fansels ek in bêste wokbaarnder yn it fornuis, mar ek is it wol ris aardich om by in proffesjoniel wokker te sjen. It fijne fan in wokrestaurant is dat dizze de mooglikheid hat om ûnbeheind te iten foar in fêste priis. Dêrneist kin mar ûnbekeind kombinearre wurde tusken de ferskate gerjochten. Yn De Pein ha se neist in wokker ek noch in Japanske bakplaat. Dêr kinst û.o. biefstik op bakke litte en dat is wol sa oergryslik lekker. Ik haw dan ek wol in stik as 12 stikken byfstik nei binnen wurke. Echt geweldich om te sjen hoe't hja dat sa lekker klear meitsje kinne en wat dat oangiet soe der dochs eins wol in Fry-top op ús Boretti moatte. Dêr't oaren by ús oan tafel it miel kompletearren mei bami as nasi haw ik it gewoan by fleis en griente hâlden. En dan bynammen moksels, inketfisk, garnaal en it foarneamde byfstikje. It wie wer in slagge wykeintsje...
+ 0 - 0 | § ¶Post Pyro Depresje
Sjoen it feit dat myn freondinne har rydbewiis yn it knopboerdkastje fan har Opel Astra lizzen hie, en dizze Opel Astra op lefhertige wize kremearre wurden is, mist sy no net allinnich har auto mar ek har rydbewiis. It stomme is no dat jo by it oanfreegjen fan in nij rydbewiis de folsleine kosten betelje moatte foar in rydbewiis (€49,80) plus noch in boete (€31,30) om't jo it âlde kwytrekke binne. By immen dy't it sels weitôge hat kin ik my dêr noch wol wat by yntinke. Mar mei it proses ferbaal fan de plysje yn de hân soe in gemeente dochs wat oars mei sa'n saak omgean kinne liket my. Dêrneist is it rydbewiis ek net oppenij 10 jier jildich mar kriget it de selde jildichheidsdoer as it âlde ferbaarnde eksimplaar. No hie myn freondinne gelok dat se noch gjin jier lyn har rydbewiis ferlingd hie. Mar stel dat it rydbewiis oer ien jier ferrûn wêze soe. Dan soene je dus oer in jier jitris de folle mep betelje moatte. Dat roait fansels igge noch seame. It minste wat se dwaan kinne yn sa'n gefal is it rydbewiis gewoan wer 10 jier jildich meitsje liket my ta...
+ 0 - 0 | § ¶Hâld it geëamel oer dy Sweeftrein dan nea op?
Hans Alders hie in dream, de Hans Alders ekspres, en foar dy dream woe hy alles opjaan. Je soene net tinke dat sa'n âld-minister fan miljeusaken him ynlitte wol mei sa'n lânskipsfersmoarchjend ûnding dat ek noch foar in kaptaal oan stroom fret. Mar Hans wol syn treintsje en hy sleept dêr ús treintsjesgek Ed yn mei. Yn earste ynstânsje moast it Noarden mar in trein hawwe mar doe't dat net samar slagge waard it Langmanjild hjirfoar frij makke. It jild dat wy krije soene om ús ekonomy te ferbetterjen moast allegear yn in snelle ferbining mei de rânestêd (lês Skiphol) pompt wurde. No freegje ik my ôf wat it foar doel hat om fanút Grins rap op Skiphol te wêzen of oarsom. Wat smyt dat op yn ús Noardlike ekonomy? Fansels soene de treinen bestjoerd wurde kinne troch minsken út it Noarden. Der soe ek in Noardlike kondukteur op sa'n trein komme kinne. Faaks smyt soks in 20 tal banen op. Mar oan de oare kant wurdt dan fansels flink snien yn de tsjinstregeling fan Grins nei it westen oer Assen. En alle oeren 2 treinen fanút it Fean nei Swol sit der dan ek net mear yn. Dêr gean dan dus wer banen ferlern. It oanlizzen fan de snelle ferbining soe fansels mei Noardelike arbeiders dien wurde kinne, mar dat is mar tydlik. Ik sjoch dan ek it belang fan dy snelle ferbining folslein net yn en haw dat ek nea sjoen. Wolle jo in snelle ferbining fan Grins nei Skiphol dan kin dat fansels it ienfâldichste fia Eelde en dan troch de loft. Dat is ek wol ris besocht mar dêr wie net genôch merk foar. Fanút Eelde moat Skiphol wol te heljen wêze yn 30 minuten tinkt my. En wat moat men ta eintsje beslút op Skiphol? Fleane tink? No dan kin dat ek wol yn ien kear fanôf Eelde liket my ta. Dus lis mar in Magneetsweefbaan oan tusken Grins sintraal en fleanfjild Eelde. Dan hat Alders syn rappe ferbining, en Grins hat der wer in moaie atraksje by. De rest fan it Langmanjild mei dan brûkt wurde foar lytse subsydzjes oan lokale bedriuwen sadat it Noarden ferskjinne bliuwe kin fan Rânestêdfoarming want fansels mei ús ekonomy wol wat better, mar wy hoege wier de Rânestêd net as blauprint foar de takomst te brûken...
+ 0 - 0 | § ¶Rutte - Verdonk
Rita hat it krekt net rêden tsjin Mark mar de hoatemetoaten moasten wol alle seilen bysette om it safier te krijen. It hindert neat Rita hjer, ik haw sels ek al ris by in ferkiezing it twadde plak ynnimme moatten mar úteinlik die bliken dat it ek better sa wie. Lit ús earlik wêze, do bist as minister fan frjemdlingesaken en yntegraasje folle better op dyn plak en JP docht foar mar in pear rotsinten in soad goed wurk. No kin de softe Mark Rutte ek D66 anneksearje. Kommend jier dus mar it selde kabinet as no, mar dan sûnder it net folle mear foarstellende D66. Lit de PVDA desnoads mar de grutste wurde, salang at VVD66 en CDA tegearre mar de mearderheid hawwe. Datst gelyk hiedest oer Kalou docht no ek wol bliken no't dy nei Chelsea ferhûzet en dyn gelyk yn de saak Ajaan krijst ek noch wol. Noch efkes geduld dus...