+ 0 - 0 | § ¶Alles yn 'e / boppe de macht
Hjoed ha wy in aldermachtichst soad wurk ferset. Ik mei wol sizze dat ik de breuk der út haw. Ik haw krekt efkes ûnder de brûs west by skoanmem want oars mocht ik harren skjinne bedsje net yn. No dat wie ek wol efkes nedich. Fannemoarn bin ik op de bus stapt nei Drachten dêr't skoanheit my oppikt hat. Tegearre bin wy doe nei ús takomstige wenning gien. Dêr ha wy earst it wichtichste stik oanpakt: De saak! Alle wanden ha wy oant de stien ta keal makke en ek it plafond is der út kaam. De flierbedekking is fuorthelle en sa waard it allegear al aardich rom. Neidat wy de earste karre fol rommel fuort brocht hiene waard der efkes wat floeiber guod ynslein en mei 2 koarte tuskenstops by skoanmem ha wy úteinlik de ienfâldigste helte fan it hûs folslein keal krigen. In knappe prestaasje al sis ik it sels. No mar lekker kûse en dan moarn wer betiid út de fearen. It baarnt my yn want slope is moai wurk sa no en dan...
+ 0 - 0 | § ¶Frij as wurkje?
Doe't ik de freondinne frege wat sy mei har jierdei fan doel wie en oft ik dêr ek frij foar nimme moast wie it antwurd: "Ik fier myn jierdei no net want elkenien is dochs op fakânsje en do hoechst dy dei ek net frij te hâlden". Omdat de snein yn de suvelsao goed betelle wurdt haw ik dy dan ek as wurkdei opjûn en hawar, ik mocht noch wurkje ek! Dêr hie de freondinne fansels net op rekkene. No ja, de finansjele kant fan it ferhaal makket fansels in soad goed en sa koe ik wer in kreas kadootsje foar har keapje...
+ 0 - 0 | § ¶Mem har jierdei
Nei de pôledei wie it no tiid om werom te kearen op de pôle foar ús mem har jierdei. Foar safier't it my heuge kin hat dit ek altyd al op dizze pôle west. It is dêrmei ek in wiere tradysje dus. Omdat myn swager mei syn nije peugeot mei noch gjin 200 km op de teller it ek oandoarde en ryd de polderdyk del koene wy net efterbliuwe. Der wie al aardich wat folk mar de measten kamen oer it wetter fansels. In grut part fan de famylje is yn it besit fan in boat dat sadwaande. Fan lyts fiskersboatsje fia polyfalk oant enorme kotter, se leine allegear yn de drek fan de Skarsterrien. Mei sa'n grutte famylje (fan beide kanten mear as 10 broers en susters) is it fansels altyd wol gesellich en sa waarden der wer ferskate nijtsjes útwiksele. Doe't de jûns de balonnen op 'e Jouwer omheech giene koene wy ek dy noch efkes goed besjen. Der wiene wer in pear pronkstikjes by fansels. Krekt foar tolven hie elkenien syn nocht wol wat dus diene wy efkes krekt as wie it al tolve oere sadat heit en mem de freondinne ek noch efkes lokwinskje koene. Dêrnei riden wy yn konfoai wer werom wylst der oan ús rjochterhân in grut fjoerwurk losbarste. Om't de freondinne mei in moaie ynhelslach it midden fan it konfoai berikke koe hoechden wy de auto net út om de hikke iepen as ticht te dwaan (bedankt Ome Ruurd en Ome Hannus) sadat wy rap op wei koene nei Sint Nyk ta dêr't wy de nacht trochbringe soene...
+ 0 - 0 | § ¶Keapoerienkomst
We ha no de keapoerienkomst yn hûs lizzen. Ik haw dizze al ûndertekene, no is it wachtsjen noch op de freondinne en de ferkeapjende partij. Nei alle gedachten sil dit snein plakfine. At ik it goed begrepen haw moat der dêrnei noch in akte fan levering makke wurde en dan is it hûs fan ús (en in bytsje fan de bank fansels). Dat sil ek in kear tiid wurde want der moat noch in soad tariedings dien wurde (lês sloopt). Earst moat wy noch in pear jierdeis fiere. Moarn nei de pôle foar ús mem en snein hat de freondinne sels de jierdei. Dan bin wy wer like jong...
+ 0 - 0 | § ¶De wrâld fan Boretti
Juster hawwe wy nei de toanseal fan Boretti west yn Watergang (krekt boppe Amsterdam). Wy woene de machtich moaie fornuizen wol ris allegear neist inoar sjen. No wiene wy it der eins krekt in bytsje oer iens dat it mar in seispitter wurde moast doe't der in ferkeaper op ús ta kaam. En omdat it waarm wie en dus rêstich naam dy efkes alle tiid om ús al it moais sjen te litten. Fansels moast er ek doe efkes de Fry-top demonstrearje. In Fry-top is in grutte rustfrijstielen bakplaat dy't boppe op in fispanbaarner leit. It duorre mar efkes of dêr stie ik al in pear aaikes te bakken op dizze toch wol geweldige oanfolling op in fornuis. De man waard sa entûsjast dat er ek noch earne in pûde garnalen opgarre en wat grienten. Yntusken wiene der noch 2 klanten bykaam en sa makke de bêste man in geweldich miel foar ús. Sjoen it feit dat de Fry-top mei fjouwer ekstra pitten like djoer is as de seispitter hat dit ús beslút wer op losse skroeven set. Ik bin no ynienen wol wer foar sa'n Fry-top en ek de freondinne is leau ik al hast om. Kompleet bepakt mei de nijste folders, in DVD oer de Fry-top en in moaie Borettipet kamen wy de winkel wer út. Us fornuis wurdt in Boretti, dat mei dúdlik wêze. No noch sjen hokker...
+ 0 - 0 | § ¶Dûbele pauze
Juster haw ik mei de freondinne nei de nije Must See bioskoop west yn de Euroborg. Neffens de thússide is dizze bioskoop mar sân minuten fytsen fanôf de grutte merk. Ik leau net dat ik dat mei myn freondinne der by helje soe. Sjoen it feit dat de grutte merk fanút Finkhuzen ek wol 20 minuten fytsen is bin wy mar mei de auto gien. Wy ha de auto parkeart yn P1, de parkearkelder ûnder it stadion fan FC Grins. Doe't wy de doar út kamen wie goed te sjen dat it allegear noch net ôf wie. Der waard noch asfaltearre en sa mar wy fûnen de yngong fan de must see ienfâldich. Yn de frijwat kille moderne wachtromte foar de kassa's (der wiene der leau ik 4 wêrfan mar 1 iepen) moasten wy efkes yn in koarte rige stean mar doe koene wy flot fierder. It seach der allegear wol kreas út en it is frij rom opsetten. Sa rom dat wannear't je tidens de film nei it húske wolle, je minstens 5 minuten misse om't it sa'n ein rinnen is. Yn de hal is ien hiele lange toanbank dêr't fan alles te keap is foar de ynwendige minsk. Wy sieten yn Seal 6 en dat wie tink ik ien fan de gruttere sealen. In moai grut skerm dat net flak wie mar in hiel lyts bytsje bol. De stuollen wiene rojaal en der wie genôch romte foar de fuotten. It wie allinnich wol in bytsje erch rôs allegear. Krekt as hie Jan van Stralen de kleurkes útsocht. Ek rûkte it allegear noch wat nij (krekt as eartiids yn de brêgeklasse mei de learen tassen) mar dat sil mei de tiid wol better wurde. En dat alles sa rôs is dat sjogge jo yn it tsjuster dochs ek net no. Doe't de foarfilmkes begûnen skokten dizze nochal wat op en del dus wy wiene efkes bang dat wy skokkende bylden sjen soene mar dat foel gelokkich mei de hoofdfilm ta. Wy ha nei Pirates of the Carribean, dead mans chest west. In geweldige film dy't ik elkenien oanriede wol. Je sitte kontinu op it rântsje fan de oars rojale stoel. Allinnich is it spitich dat Must See krekt as yn Camera in pauze ynlast midden yn de film. Dy grutte toanbank yn de hal wie der fansels ek net foar niks. Fansels wolle se graach wat fertsjinje mar sa'n pauze is fervelend want je bin dan efkes it ferhaal kwyt en yntusken tikt de parkearmeter ek noch troch a 1,20 per oere. Doe't oan it ein fan de film ek noch bliken die dat de film krekt as Lord of the Rings yn mear as ien (twa yn dit gefal) stikken hakt wie en dat wy no in jier wachtsje moasten op it ein hiene wy al foar 4,80 oan parkearjild brûkt. Efternei besjoen koene wy dus better in koartingskaartsje keapje by Must See, dan wiene wy foar 3,50 klear west. Konklúzje: De pirates is in film dytst sjen moatst mar yn Pathé sit der gjin pauze yn en it is ek noch minder fier fytsen...
+ 0 - 0 | § ¶Nadine
Skoanmem hat my hjoed al twa kear wekker skille. Earst om krekt nei 00.00 om te melden dat se nei Rotterdam moasten omdat der tekens wiene dy't der op wiisden dat it oan gean soe. Fannemoarn om 8.00 jitris om te melden dat wy op 'e nij omke en muoike wurden binne. Lytse Jorrit hat no in suske krigen fan seis pûn. Nadine is har namme wêrmei't skoanmem (Dine) fansels hiel grutsk is. Ynkoarten mar wer in reiske nei Rotjeknor ta dus...
+ 0 - 0 | § ¶Opkeaper
Ik kin sels mar slim dingen fuort smite mar myn skoanheit is dêryn noch ekstremer. Sa stiet ús takomstige wenning noch grôtfol mei âlde meubeltsjes. Ek stiet der in protte spul dat fan oare minsken is dy't it by him opslein hawwe en it dêrnei fergetten binne wer op te heljen. Om der foar iens en altyd mei ôf te weven hat skoanheit no in opkeaper ynskeakele. Ynkoarten is it hûs dan ek leech en dan kinne wy begjinne te slopen. At de boufakkers mei fakânsje gean begjinne wy te slopen, mar ja it is dan ek gjin sloopfak no...
+ 0 - 0 | § ¶Taken
Ik haw in skoft lyn ris in kear in ôflevering fan 'Taken' sjoen op de televyzje. Dy fûn ik sa nijsgjirrich dat ik dêrnei ek mar de folsleine DVD-boks kocht haw. In geweldich ferhaal oer de UFO's dy't sûnt de twadde wrâldkriich minsken meinimme en werombringe. Bytiden is it allegear wat te fier socht miskien mar it idee is goed en yn in stik as 10 'films' fan elk sa'n 80-90 minuten komt der gau ris in ferrassing nei foaren. Steven Spielberg hat de regiseurs útsocht en elke 'film' is wer troch in oar regisearre. Dit is fansels allegear nep mar tink der al goed om, der wurde de lêste tiid wer regelmjittich net bekende fleane opjekten sjoen. De kâns dat wy allinnich binne yn it hielal is net sa grut en op in dei komme sy by ús del fansels, of wy by harren...
+ 0 - 0 | § ¶Piromaan II
Fannemoarn waarden wy oppenij nuver wekker. Der stie immen op it balkon ûnder ús dy't oer de tillefoan melding makke fan in baarnende auto op it parkearplak. No wie dat ús foarige auto ek al oerkaam dat yn earste ynstânsje wiene wy fansels benaud dat de piromaan ús noch net mei rêst litten hie mar it die bliken dat er dizze kear oan de balkonkant fan ús flat taslein hie. Oppenij wie it in reade auto dy't ticht tsjin de boskjes oan stie. Omdat de ûnderbuorlju de plysje en brânwacht al warskôge hiene wie it fjoer rap út. Ik haw mysels noch efkes ferdacht makke troch ek by dizze autobrân op te dûken wêrby't ik de plysje koart ynsijnt haw oer ús eigen gefal. Al wisten hja dat faaks al wol. Hoewol't de auto dizze kear noch wol read wie en net folslein útbaarnde is er in oerke ferlyn dochs fuortsleept. Ek dizze auto sil wol totallos wêze. Yn alle gefallen koene hja har persoanlike besittings noch wol yn feilichheid bringe. It goeie nijs fan dizze brân is fansels dat ús gefal nei alle wierskynlikheid gjin persoanlike wraakaksje wie. It minne is fansels dat der no in Piromaan yn Finkhuzen omrint dy't it op autokes foarsjoen hat. Hooplik hâld er it foarlopich op reade autokes en wurdt er gau pakt...
+ 0 - 0 | § ¶Boten Anna
It sil de werom kearende besiker fan dit webloch net ûntgien wêze dat it logoke fan Thaeke.com wat sakke is. Dit komt omdat der no in nije favoryt taheakke is oan myn favoriten. It giet hjir om myn favorite ynternet mp3 fan dit moment. No is fansels Heu in echte topper mar der moat fansels ek sa no en dan wat feroarje. Dêrom no dus de topper fan dit moment: Boten Anna fan Basshunter. Doe't ik dat nûmer foar it earst hearde foel er der fuort goed yn. In lekkere dreun en in aardich refrijn al ferstiest der fansels gjin Leanenbesiker fan. It giet oer in kompjûternerd dy't sit te tsjetten mei wat hy tinkt dat in automatyske waakhûn (BOT) is. Oan it ein blykt it dochs in echt famke te wêzen. Sa sjogge jo mar wer dat in nûmer net perfoarst yn in gangbere taal wêze hoecht om in hit te wurden. Want in hit, dat wurdt it. Der is sels al in Nederlânske fersy fan it nûmer, makke troch de gebroeders Ko (ferneamd fan de Waterscooter mei de toeter) mar dy miene dan wer dat it oer in boat giet. No ja, at dit nûmer it al oprêd dan moat it foar Heu ek gjin probleem wurde fansels. Want dat nûmer kin elkenien nei ien kear meisjonge...
+ 0 - 0 | § ¶We neame it Hendrik
Ik haw fannemoarn betiid (in oerke as 00.00) efkes mei Marcel en Germ nei de simmeregeling west by Dionysos of hoe't je dy namme ek mar skriuwe. Foar it gemak neame wy se mar Hendrik. It wie gesellich by Hendrik al wie der net in soad yntegraasje mooglik. Wy ha der alles oan besocht te dwaan om de sfear der wat yn te bringen. Fan kaartsjeblazen dêr't it net mooglik wie om in folsleine fles te krijen oant strippoker dêr't de dûnsflier fansels it plak wie om ús ûnstjêrlik te meitsjen. Ynstee fan de brut dêr te slopen wat guon lju bytiden dogge haw ik fannemoarn besletten foar in jier steunlid te wurden. En omt dy oare Hendrikkers graach Dionysos hite wolle bin ik no dus hielendal Hendrik...
+ 0 - 0 | § ¶Jaap hie mazzel
Der binne deaden fallen by de fjouwerdeiske rintocht yn Nijmegen. Dat is fansels grof genôch. Ik haw sels in pear jier ferlyn mei rûn yn de Slachtemarathon (rinnend net dravend) dat ik wit wat it is om sa'n ein te rinnen. Ek doe wie it moai waar en ek doe wie it drok. Wy starten mei in groep fan in stik as 20 Bernleffers mar al nei de earste kroech wie dêr noch mar in lytse kopgroep fan oer. Mei de Fryske flagge op it skouder swalkten wy oer de 42.195 meter nei de see ta. Yn de lêste 10 km krige Jaap kramp. Hy koe de iene foet hast net mear foar de oare krije mar troch syn izeren wil hat er it dochs rêden en kom op eigen krêft oer de streep. Dat it ek oars ôfrinne koe die juster wol bliken dêr't guon minsken troch de waarmte net mear fierder koene en dêr't minimaal 2 minsken nea wer in stap sette sille. Minsken binne ek net makke om 50 km te rinnen. Wy ha de harsens krigen om in fyts te betinken foar de middellange ôfstannen en foar de lange ôfstannen ha wy in auto. Mei wat minder fantasij is it fansels ek noch in opsje en lit in hynder it draafwurk foar jo dwaan. Nei de Slachtemarathon koe ik ek net in stap mear sette. Mar dat giet wer oer fansels. Foar de rinners dy't juster harren lêste stap diene wachtsje der no oer 3 dagen alsnoch gladioalen en in lêste krúske...
+ 0 - 0 | § ¶Botulisme?
No't op guon plakken it botulisme op begjint te stekken kin der net iens mear in lekkere koele dûk naam wurde. It is te hoopjen dat der goed kontrolearre wurdt. Ik hie sneintejûn ek al wat lêst fan pynlike reade plakjes ûnder de earmsholten. Gelokkich bin dy plakjes no wer fuort mar faaks is it in warskôging dat it by it Tsjûkemar ek op it rântsje sit. Binne der mear minsken dy't yn it Tsjûkemar swommen ha en dêr wat lichte iritaasje oan oerhâlden hawwe? At it swimmen yn it Tsjûkemar ynkoarten ferbean wurdt dan hawwe de 'oare rekreanten' yn elk gefal gjin lêst mear fan al dy fervelende swimmers...
+ 0 - 0 | § ¶Rêstdei
It peloton hat hjoed in rêstdei en ik slút my dêr mar by oan. Nei de gewaldige ûntknoping fan ús rilekswykeintsje en de dêr op folgjende nachttsjinst moat ik earst mar wer efkes yn it normale ritme komme. Ik haw no alle eamels lêzen en alles wer wat bywurke dat ik fyn it wol moai west. Oer in pear tellen komt de frou thús en dy soe my hjoed kulinêr ferwenne. Dêr haw ik dan ek in soad nocht yn. Fierder sille wy ús tink ik fannejûn mar bynammen dwaande hâlde mei it earste seisoen fan Lost dat ik op DVD oantúcht haw en dêr't wy beide graach nei sjogge...
+ 0 - 0 | § ¶Oar jier mar wer
Wêrom is it wykein 2,5 dei en in wurkwike 4,5 dei? Dat is gewoan net handich. Sa'n wykein is fierstente rap foarby. No ja, wy ha de tinte wer delhelle, lekker swommen en alle restjes noch efkes fijn fuortwurke. Doe noch lekker in pear oeren foar anker lein achter it eilân dêr't wy bynammen in soad gniist hawwe om Gerlind tidens it Marko Poloën. It wie in machtich moai wykein en ik leau dat de measten har dan ek poerbêst fermakke hawwe. Lang libje de Aldiwynrûnte en oar jier mar wer. De tinte is der no al wer klear foar en hy stonk ek noch de helte minder as ferline jier. No begjint de wurkdei al wer. Ik mei daalks los om 22.00 dus der is weinich tiid oer om by te kommen. It sil wol in drege nacht wurde mar wy slaan ús der wol troch hinne...
+ 0 - 0 | § ¶Genôch salade
Nei in moarnsiten dat foar in grut part bestie út de kâlde ryssalade fan juster is it in moai momint om efkes werom te sjen op de earste oeren fan de ekspedyzje en wat dêr sa al foarôf gie. Ik wie al om 10.08 yn Sint Nyk en ik bin doe earst mei ús heit nei de Jouwer flein (riden) om dêr ynkeapen te dwaan by de Aldi. Dat is fansels altyd lestich ynkeapjen mar ik hie fansels in list foar it jûnsiten dus allinnich foar de barbekjoe soe der noch wat frijheid fan ynkeapjen oerbliuwe. Fansels wie de sûkerbôle wer rom fertsjintwurdige en de meloenen wiene ek net oan te slepen. 4 treeën aldiwyn mochten ek yn de samling net ûntbrekke en sa kamen wy al in hiel ein mei ús guod. Al it guod dat de Aldi ús net leverje koe waard letter noch yn Sint Nyk oanskaft mar doe die bliken dat der troch in brân by Conimex tydlik gjin kokosnútoalje wie yn Sint Nyk. Oppenij fleagen wie dus nei de Jouwer en gelokkich wie dêr noch wol wat. It iten wie freed geweldich goed slagge kwa kwaliteit allinnich lykas sa faak wie der kwantitatyf wer fierstente folle. No is dat better as oarsom fansels mar wy ha dus hjoed noch genôch salade om de dei mei troch te kommen. Neidat Landon wer tradysjoneel op 'pole position' stie koe de tinte gau omheech en sa ha wy noch in moai skoft sitten. De iene wat langer as de oare en ik wat koarter...
+ 0 - 0 | § ¶Ekspedyzje Aldiwynson
Ik bin der hjoed al betiid ôf want der is in drok program. Wy sille mei myn legertinte nei de Gânzetippe, it eilântsje yn it Tsjûkemar, mar eart it safier is haw ik de titaantsjes fan de Aldiwynrûnte in multygongenmenu út myn Aldi-Aziatysk itensiedersboek tasein. Op it menu stean fannejûn ûnderoaren in banane-sili-sop, in kâlde rys salade, in kalkoenkurry en in grientekurry (foar de fega). Dat betsjut dus betiid nei Sint Nyk ta om ynkeapen te dwaan en dêrnei de hiele dei yn de keuken stean om alles om 19.10 op tafel sette te kinnen. It sil wol wer kile kile wurde mar stress is fijn en ik haw der nocht oan en dat skeelt. Mochten jim noch oer de A6 troch de mar denderje mei jim wein, toeterje dan mar efkes koart-lang as yn Al-dyyyyyyyyyyyy!!!
+ 0 - 0 | § ¶Hoe istie?
Ik hie it al in pear kear fan minsken fernaam mar fannemoarn betiid doe't ik op it wurk efkes noflik yn de kantine siet mei in pakje pjiskeyoghurt knalde er út de radio. At ik it goed begrepen haw draait DJ Patrick Kicken no eltse moarn om 5.00 it nûmer Heu fan de Fryske tongercoreformaasje Jitiizer. Brekt dit nûmer dan dochs noch nasjonaal troch en kinne wy Jitiizer straks ek al net mear betelje foar in lokaal optreden? Faaks falt it allegear ta mar feit is wol dat it nûmer Heu al wer flink oan it stigen is yn de Fryske delhel top 30. It is dat ik noch wekker wie fannemoarn mar oars soe ik wol hiel noflik wekker wurden wêze...
+ 0 - 0 | § ¶Der komt wat romte
It hat efkes in skoftke duorre mar no wer efkes in lytse ús nije hûs updeet. Hjoed hawwe wy de lêste gegevens by de bank ynlevere foar de hypotheek. No moat allinnich it foarlopich keapkontrakt noch makke wurde troch de notaris en dan kin it oangean. Dan wurd ik in Rottefalster en dan kin wy begjinne mei it slopen. Skoanheit hat alfêst wat romte makke yn it hûs. It stiet no noch grôtfol mei meubeltsjes en oare saken. Fierder brûkt heal Rottefalle it leau ik as opslachplak foar it guod dat se efkes net mear brûke. Om dêr mar alfêst yn mei te gean hie ik ek myn legertinte dêr stalt. Dy leit no al achter yn de boat fan myn âlden sadat it freed mar oangean kin. Sa krije wy alfêst wat lebensraum yn it nije hûs. At de bank ús no noch efkes de finansjele romte jout dan kin it avontoer Grins ynkoarten ôfsletten wurde...
+ 0 - 0 | § ¶Ekspedyzje Aldiwynson tariedings
Ik haw krekt efkes in listke makke fan wat wy nedich hawwe op de Ekspedyzje Aldiwynson fan kommend wykein. Om de minsken dy't meigean alfêst it wetter yn de mûle krije te litten en de minsken dy't net meigean sjen te litten wat hja misse moatte hjir in pear fan de hichtepunten: 1400ml kokosmolke, 12 bananen, 6 reade pipers, bosksipeltsjes, 23 teannen knyflok, folle yoghurt, mango, kalkoen, gember, kurkuma, garam masala, aubergines en noch folle mear. De swimbroek kin wol mei want de troch Pyt al wer nei ûnderen bystelde temperaturen binne: freed 23, sneon 26 en snein 27 graden. Noflik waar om it Tsjûkemar ek efkes fan ûnderen te besjen fansels...
+ 0 - 0 | § ¶Sân der oer...
Wa't in kûle dobbet foar in oar krijt sels toarst is ien fan de wierheden út 'e Jitiizer almanak. En at jo in grutte kûle dobje dan hâlde je in protte sân oer. Sjoen it feit dat der no wol djip genôch graaft is wurdt it no tiid en sko mei in grûnsljochter it wurklike probleem op de Ulesprong yn ien fan dy kûlen en dan sân der oer...
+ 0 - 0 | § ¶Gjin ferstân fan fuotbal
Doe't ik sa'n 25 jier lyn it beslút naam dat fuotbal net myn sport wie moat ik wol in hiel helder momint hân hawwe. Nei dit WK docht wol bliken dat ik der weinich ferstân fan haw. Sa spile myn tiem de measte ronden mar op heale krêft trochdat de topkootzjes fan de lannen dy't meidiene it oars yn de kop hiene as my. Trochdat in hoop spilers fergetten wiene te wikseljen koe ik noch krekt yn it lofterrychje bliuwe mar úteinlik wie dochs hast ien op de trije wkmanager.nl kootzjes better as my. Yn de finale hie ik gokt op Frankryk mar earst al krijt dy ferhipte Zidane in reade kaart wat in soad minpunten opsmiet, letter ferlearen se ek noch. Grappich wie wol dat Zidane úteinlik de ienige wie dy't noch 1 punt opsmiet fan de Frânsen. Syn goal yn de earste helte koe de reade kaart en it ferlies noch kompensearje. No is it fuotbaljen wer efkes dien, Wimbledon is ek al wer foarby en wy kin ús no wer rjochtsje op de tour de France. Wy moatte dy Tour noch ris nei Fryslân helje dan kin se de alvestêdetocht moai as etappe dwaan...
+ 0 - 0 | § ¶De Spaanske ambassadeur
Op dit stuit hinget de ambassadeur fan Spanje yn in Bassie en Adriaanballon boppe Fryslân. Om in oerke as 20.00 gie de grutte ballon tegearre mei noch 2 lytsere ballonnen omheech op it b-fjild fan Renado. Fansels stie Boargemaster Kuiper, bekend fan de reklameskiep en fan panyk yn Sint Nyk, de man út te swaaien. No kin ik fierder de Ambassadeur fan Spanje net en ik stie dêr dan ek net om dy man út te wuiven. Earder op de dei wie it fuotbalfjild de arena fan KV de Oorsprong dêr't de skoalfamkes it Nederlânsk kampioenskip befochten. Op in list fan 21 partoer wie Winsum it bêste partoer. Hja hiene ek mazzel want hja hoechden op de earste list net yn aksje te kommen omdat de tsjinstander der net wie, en op de twadde list hiene ja in steand nûmer. Omdat de keatsferiening dus in ballonflucht oanbean hie as earste priis foar de trije winners en harren begelieder moast it programma efkes in bytsje oprekt wurde. Dêrom mochten wy, ik en noch 5 oare akteurs, tusken de heale finale en de finale noch efkes in demonstraasje keatsen yn it begjin fan de foarige ieu jaan. Yn lange ûnderbroek, sûnder want mei nap en fansels op sokken waard der fûl keatst op de fjouwerkante meter. De slach fan de jûn dêr't letter noch in soad oer sprutsen waard kaam fan my. Op in keats fan in heale meter naam ik in oanrin fan de rjochterkwea line. Sa brocht ik de bal diagonaal it perk yn wêrtroch't de bal dus op de ferkearde kant fan de spilers oankaam. Ek wie de foarline no net 4 meter breed mar in meter of 14 (ik wit net krekt wat de maten binne fan de skoalfamkesperken). Lestich opslaan fansels omdat it perk mar hiel koart is en de rûte nei it perk wat langer. Mar de opslach slagge wûnderbaarlik goed en de keats waard behâlden. Ik bin benijd wannear't men dizze opslachtechnyk yn de haadklasse in kear tapasse sil. Nei al dit keatsgeweld hawwe wy alle tinten, fjilden en banken wer oprûme en doe wie allinnich it koartmeande gers yn de arena noch it bewiis fan dizze prachtige en goed organisearre keatsdei. Mar dat is fansels allegear net wichtich want de ambassadeur fan Spanje moast ommers mei in ballon omheech. Doe't de ballon opsteech gie er rap omheech want der wie wat te rêden mei hynders yn Sint Nyk. In soad tiid om te wuiven nei de Ambassadeur wie der net. Op it stuit fan skriuwen sit ik yn de Rottefalle by myn skoanâlden en fandêr kin ik de ballon noch yn de lucht hingjen sjen. At jim moarn neat yn de krante lêze oer in ûngelokje dan sil de bêste man it wol oerlibbe hawwe. Mooglik binne ek de skoalfamkes fan Winsum dan yn harren doarp huldige al is dat lêste mar bysaak fansels...
+ 0 - 0 | § ¶Net grappich!
In soad saken op dizze wrâld binne net grappich! Ik woe dêr noch graach ien oan taheakje wolle. In Sint Nykster hetro foar homo útmeitsje mei help fan in fototastel en in fotobewurkingsprogramma is net grappich! Op www.panykynsintnyk.nl, de side dy't yntusken út de loft helle waard, waarden fotokes pleatst fan de autokes fan sekstoeristen. Sint Nyksters hâlde oer it generaal wol fan in grapke dus waard ek in (hetro)kollega fan de mannen efkes ferrast mei in eareplakje op de webside. Mei photoshop waard de eftergrûn efkes fuortpoetst en sa like it krekt as wie de Sint Nykster ek op it parkearplak foar in hite nacht as neimiddei. Dat de makkers fan de side de nijswearde faaks wat ûnderskat hiene die bliken doe't de side juster mei troch siden lykas www.gay.nl en it bekende webloch www.geenstijl.nl bekendheid krige. Omrop Fryslân folge al rap en dêrnei kamen ek de Ljouwerter krante en Hart van Nederland noch mei tillefoantsjes nei my. Ik haw mei de hiele side neat te krijen útsein dat ik de hostingprovider bin fan it gehiel. Mar om mar in foarbyld te nimmen: At der in wytplantaazje fûn wurdt yn in wenning fan de wenningstifting dan krijt de wenningstifting dêr dochs ek net de skuld fan? Om fierder lijen foar te wêzen haw ik de side mar fan it net helle.
+ 0 - 0 | § ¶Panyk yn Sint Nyk?
Ik waard krekt skille troch de redaksje fan gay.nl omdat hja in side ûntdutsen hiene dy't troch myn bedriuw hosten wurdt. No kin soks barre fansels want ik host wol meardere siden en dêr bin ek in moai nustje siden út Sint Nyk by. Ik wol hjir wol efkes dúdlik melde dat ik útsein it hostingpart mei de oanbelangjende side (www.panykynsintnyk.nl) fierders neat te krijen haw. de ynhâld wurdt fersoarge troch de klant sels en foar kommintaar moatte jim net by my wêze mar besykje it ris op ynfo@panykynsintnyk.nl soe ik sizze. De minsken fan gay.nl dêr't ik in kertier mei oan de tillefoan hongen haw wolle no de boel wer in bytsje ferdraaie. Se wolle my de skuld jaan fan dingen dêr't ik niks mei te krijen haw. Ik haw neat tsjin op homoseksuele minsken. Inkelde fan myn maten binne homo en/as biseksueel en dat is my fierder allegear wol bêst. Wat der by de Ulesprong en de Leanen bart giet allinnich te fier. Dat hat neat mei homoseksuelen te krijen trouwens, fan hetero's soe ik it ek net goedkarre. Minsken wurde dêr iepenlik lestichfallen mei seksualiteit en dat heard net sa. Wat my oanbelanget makket de gemeente Skarsterlân earne op in parkearplak in moetingsgelegenheid foar de behoeftige manlju. In soart Woeste Hoeve ofsa sadat de Homoseksuele man dêr syn behoefte dwaan kin en de oare 'rekreanten' der fierder gjin lêst fan hawwe. Set in pear skiep by de Uilesprong mei it adres fan dizze Woeste Hoeve der op en elkenien is gelokkich...
+ 0 - 0 | § ¶zwei dartele nichten yn Tirol
Fan in kolega fan myn freondinne hiene wy in DVD krigen dy't by de Veronicagids siet. Dêr stie in stikje op oer Desperate Houswives wat wy graach sjen meie. Ek stie dêr in stikje op oer de searje Lost. Omdat my dy searje wol wat ta like haw ik juster efkes nei de KS winkel west yn Grins en sa kaam ik thús mei in moai nustje DVD's. Neist Lost haw ik ek de tv-searje 'Taken' kocht en myn sf-kolleksje is wer útwreiden mei it folsleine 'Battlestar Galactica' ferhaal. Doe't ik dêrnei noch efkes in slach troch de winkel die foel myn each op in film dy't wy eartiids op fideo hiel faak yn de keiwike draaiden. Dit wie in Tiroler sa't dy eartiids gauris op RTL Plus kamen (wy ha it dan oer ein jierren '80 begjin jierren '90. Lekkere domme heabultnodzjerij mei in flinke matte foar de doar en in soad humor. In hiel skoft wie dit guod nearne te krijen mar kennelik wie der dochs genôch fraach nei want no is er dus yn in hiele searje op DVD útkaam. Mar 2 dartele nichten in Tirol wie dus yn de keiwike altyd wol in topper en dêrom haw ik dizze mar oantúcht. Ynkoarten moat wy mar wer ris in filmjûntsje op de Pizel hâlde...
+ 0 - 0 | § ¶In ferhaaltsje sûnder spanning
Fannacht om in oerke as 3.30 waard ik wekker. Net dat ik no sa fêst slipte mar ik hie kennelik it foargefoel dat der wat oan de hân wie. Alles om my hinne wie tsjuster dat ik gie op de taast op syk nei in bûslampe. Dêrmei nei de stoppekast mar dêr wie neat te sjen. Bûten wie ek heal Finkhuzen tsjuster dat doe wist ik wol genôch. De stroom lei der wer ris ôf yn ús wyk. No is dat op 'm sels net sa slim midden yn de nacht wie it net dat ik der om 5.15 út moast en sûnder stroom gjin wekker en sûnder wekker gjin Thaeke op it wurk fansels. Krekt doe't ik myn Nokia ynstelle soe as wekkermakker floepte de stroom der wer op. Hjir en dêr die bliken dat der mear minsken wekker wurden wiene. Ik koe wer rêstich sliepe. Ien fan myn kolega's wie al troch de wekker hinne slipt. Hy kaam wat letter. Ik wie moai op tiid te plak fansels...
+ 0 - 0 | § ¶Meitsje dy net drok fanke
It is waarm yn de 60 ûnder ien kap. Mar troch de ramen en de gerdinen sletten te hâlden haw ik de waarme bûtenlucht noch in bytsje keare kinnen. Mar ja, dan komt de freondinne thús fansels. En dy moat alles iepen sette wêrtroch't dy snikhite Grinzer luchten ús hûs noch fierder opwaarmje kinne. Mei sokke temperatoeren moatte jo fansels net te folle dwaan mar fan it wyfke moat der fan alles barre. De wask opteare op it smoarhite balkon en dan oan it ein fan de jûn wol sy ek noch út te fytsen. No dêr wie ik fansels gjin grut foarstander fan mar ja de freondinnes wil is wet dus wy hawwe noch te fytsen west ek. No dat foel noch mei want de sinne sakke hurd en mei in bytsje wyn der by (net út in pak dizze kear) bleane wy ek noch redelik fris. Mar it hie oan my net hoecht, lit my mar rêstich yn de bank lizze mei dit soarte fan waar...
+ 0 - 0 | § ¶We want Moose
Fannemoarn betiid om in oerke as 0.30 kaam ik op de soas fan Cleopatra yn Grins oan op it ôfskiedsfeestje fan Eelse en Monique. Dizze twa toppers sille nei Leien ta ferhûzje en dat moast fansels efkes betocht wurde. Omdat Eelse sûnt in pear jier yn de band Moose de sjongerij foar syn rekken nimt moast ek Moose ôfskied nimme fan harren publyk. Sûnder Eelse woene hja net trochgean dus wie ik juster tsjûge fan it lêste optreden fan Moose. En dat wie spitich want de eartiids faak noch wat rêstige Eelse hat yn de lêste jierren aardich wat byleard. Hy stie yn de mikrofoan te brullen en it klonk ek noch prima. It 'we want moose' wie dan ek noch lang te hearren. Neidat in sekere Kuipers de tapers lestichfallen hie mei in barte hinprikkers wie it tiid om nei hûs ta te gean en ûnder it mom fan 'Ik zie, ik zie, wat jij niet ziet en het is mijn jas' duorre ek it ôfskiedsnimmen noch wer krekt efkes wat langer as gebrûklik. It wie moai west nei in dei op it wetter en in optreden fan Moose. It koe wol oars, mar net better!
+ 0 - 0 | § ¶Rûntsje om Sint Nyk
Om efkes te bekommen fan al it drege politike geswets bin ik hjoed efkes mei de freondinne te silen west. Ik hie har al jierren lang tasein dat wy ris in wykeintsje te silen soene mar it kaam der mar nea fan. No hawwe wy hjoed in dei lang te silen west en wy ha doe fuort mar genôch kilometers makke foar in hiel wykein. Fanôf de Sleattemermar hawwe wy it wolbekinde rûntsje om Sint Nyk efkes dien. Dat hâldt yn: Sleattemermar - Sleat - Brandemar - Brekken - Follegea - Tsjûkemar - Skarsterbrêge - Langwarder wiellen - Kûfert - Wâldsein - Sleattemermar. In pear jier ferlyn haw ik dat al ris yn 'wedstryd ferbân' organisearre. Doe wie myn boat as twadde oan nei in folsleine dei bomen en peddeljen. Hjoed waaide it gelokkich wat mear en wy hiene no ek noch efkes tiid oer om te swimmen of foar in stikje bôle. It wie machtich moai waar allinnich bin ik yn it Tsjûkemar wer flink wat DNA kwytrekke, spitigernôch yn de foarm fan stikjes hûd. Ik bin hast út myn kokontsje wei dus ynkoarten kinne jim in moaie flinter ferwachtsje...