+ 0 - 0 | § ¶De lieding
Op in boupleats moat fansels ien persoan de lieding hawwe. Spitigernôch bin der yn ús gefallen wat mear minsken dy't miene dat se de lieding hawwe, of noch slimmer, witte wêr't de liedings komme moatte. Sjoen it feit dat mannen it went binne om harren lieding yn eigen hân te hâlden is it foar de froulju dus ek ferstannich har hjir fierder safolle mooglik bûten te hâlden. Op ús boupleats bepale de mannen dus wat der bart. Cor bepaalt dêrnei hoe't dat it bêste útfierd wurde kin. Sa ienfâldich is it dus. En at de goatstien en de waskmasine straks oansletten binne, dan binne jim, de froulju, oan bar om sa't it heard oan de ein fan de lieding jim ding te dwaan...
+ 0 - 0 | § ¶Eurokaartsje: in grut súkses???
In oartsje ferlyn hearde ik op Omrop Fryslân dat je foar ien euro fan Drachten nei Grins koene. Doe't ik yn line 100 stapte en frege om sa'n eurokaartsje koe dat ynienen hielendal net. Dat wie in foutsje west wat nea rektifisearre wie. No lekker is dat. Ik hie der net op rekkene dat ik in strippekaart nedich hie en strippen yn de bus binne djoer. Ik koe wol foar 6 euro in deikaart krije mar dan is de q-liner noch goedkeaper. Doe die bliken dat de q-liner net mear ryd nei 19.00 fan Drachten nei Grins. Lekker is dat sis. It wurdt allinnich mar minder mei dat iepenbier ferfier yn Fryslân. En dan mient Drachten ek noch dat se in treinferbining nedich hawwe. No ik snap wol wêrom't dy euro-aksje sa'n súkses is yn elk gefal. Je lokke minsken foar in euro, en je freegje der dan úteinlik 6 euro foar. It wurd tiid dat dizze jonge it fileprobleem yn it Noarden wer wat grutter makket...
+ 0 - 0 | § ¶Púnhoop fan in ieu
Fannemoarn wie ik al betiid ûnderweis nei de Rottefalle mar om't ik myn fototastel fergetten wie moast ik efkes werom. Dêrtroch miste ik de earste q-liner mar koe ik dochs noch myn reis mei de q-liner fan 7.29 ferfolgje. Yn Drachten waard ik troch skoanheit oppikt wêrnei't wy nei de Buorren fleachen. Dêr trof ik letterlik gigantyske púnhopen oan. Wol in meter heech lei it pún tsjin de muorren omheech. Wy hawwe it mei karren fol ôffierd om sa de kosten fan in kontener út te sparjen. Sa slagge it ús om acht frachtsjes mei grutte en lytse stikjes skjin pún yn Drachten te krijen. Dêrmei wie it hûs noch net leech mar it skeelde net in protte. Tuskentroch kaam ek noch efkes immen fan de firma Drijfhout om foar ús de nije kezinen op te mjitten. Wy kieze dochs mar foar hout en net foar it nijmoadrige keunststof want dat stiet net by sa'n moai âld hûs. Net folle letter kaam ek noch ús ynstallateur del om efkes de saken troch te sprekken. De freondinne wie ek efkes oerkaam fan har wurk om it saakje troch te sprekken dat sa waarden der in protte losse eintsjes oan elkoar knope. Wy krije gjin flierferwaarming mar gewoan in sintrale ferwaarming. De plakken dêr't de ôffier fan de ferskate ynstallaasjes komme moatte bin rûchwei bepraat en dêrnei ha wy noch wer de nedige karren fol pún hinne brocht. Yn totaal dus 8. alle oeren gemiddeld wol ien. 100 jier flier leit no yn pún, wy sil der in flier ynsmite dy't ús bernsbern der sa maklik net wer út krije sille mochten hja dat yn de takomst ea wolle...
+ 0 - 0 | § ¶De sânbak wurdt noch grutter
Wy hiene al in moaie sânbak yn de wenkeamer mar nei oerlis mei ús oppertimmerman Cor en de oannimmer hawwe wy besletten om dochs ek it stikje flier wat noch fan beton wie der mar út te slopen. Cor is op dit stuit ûnderweis earne tusken de Rottefalle en Eastersee om in grutte drilboar op te heljen. At it mei sit sil der fannemiddei al in moaie hoeke beton út ús keamer, keuken en sliepkeamer feegd wurde. Dit wie eartiids de wurkpleats mar yn 1908 waarden wurkpleatsen noch net sa goed isolearre as no dat it beton leit gewoan op it sân. Om't wy net fan kâlde fuotten hâlde sil der no in moaie nije laach yn komme mei foldwaande isolaasje dêrûnder. Wy sitte der dan straks lekker waarm by yn ús nije stulpke. Ik sil moarn ris sjen at it al wat opsjit. Faaks komme der dan ek wer nije fotokes want it grutste part fan it sloopwurk is no wol oer fansels. No sille wy stadich wei oan it hûs wer moai meitsje (litte)...
+ 0 - 0 | § ¶It 'Van Basten effekt'
Neidat Yildirim ien kear foar it Nederlânsk alvetal spile hat is it eins nea wer hielendal goed mei him kaam. Ruud van Nistelrooy bloeit by Real wer hielendal op mar dat is pas nei dat Van Basten him net langer brûke woe. Dêrfoar wie it net geweldich en woe Manchester United him wol graach kwyt. Gean der fierder mar fanút dat ek Van Bommel no by Bayern München wol wer goed foar de dei komme sil. Want ek dy is sûnt Van Basten in bytsje yn ûngenade fallen. It nijste slachtoffer is Klaas Jan Huntelaar fansels. Nei syn topwedstryd tsjin de Ieren hat er foar Ajax net mear skoart en mist er no sels ek noch in strafskop. Ik bin bang dat Klaas Jan no ek behekst is mei it "Van Basten effekt'. Jammer foar Ajax, jammer foar Marco, jammer foar Klaas Jan. Der is fansels ek noch goed nijs. It Hearrenfean hat sa mear kâns tsjin Ajax en fierder is der ek mar weinich kâns dat Van Basten in spiler fan it Fean selektearje sil want der mei hast net ien foar it Nederlânsk alvetal útkomme...
+ 0 - 0 | § ¶thaeke.fy?
Ik krige fan de FNP it ûndersteande parseberjocht. Ik haw dit letterlik oernaam:
"FNP: Fryslân moat eigen domeinnamme op ynternet krije
De Finske Aland-Eilannen hawwe ferline wike in eigen ynternet topdomein krigen dat einiget op .AX. Op de eilannegroep yn de Eastsee wennet in Sweedske minderheid fan likernôch 26.000 ynwenners. De domeinnamme is oanfrege troch it provinsjaal bestjoer fan de eilannegroep. De FNP trunet der by it Fryske provinsjebestjoer op oan om de .frl namme foar Fryslân yn te fieren en hat dêroer fragen steld oan Deputearre Steaten.
It Provinsjaal bestjoer fan de Aland-Eilannen hat de domeinnamme ein 2005 oanfrege. De ynternasjonale ynstânsje foar it útjaan fan domeinnammen, de ICANN, hat de takenning binnen in jier tiid regele. Dit liket ek wer nije kânsen ta jaan foar it Fryske stribjen nei in eigen topdomein op ynternet. Allinnich oant no ta hat net ien it oandoard om in oanfraach by ICANN te dwaan. De Provinsje Fryslân soe de oanwiisde ynstânsje wêze om soks te dwaan.
By it berjocht fan ICANN oer .AX sit in ferwizing nei in hânsum dokumint (4 siden) http://www.iana.org/reports/ax-report-09jun06.pdf. fan ICANN dêr't presys alle nedige stappen yn steane. Ek de kritearia (mei ferwizing nei de ûnderlizzende dokuminten) stean der yn. Fan in bepaalde befolkingsomfang as eask is gjin sprake. Wol moat de regionale oerheid de wil hawwe om der wat mei te dwaan. En der moat in betroubere provider yn de regio wêze dy’t de server mei it topdomein yn de loft hâlde kin fansels .
No’t de Aland eilannen ek sa’n eigen dommeinname krigen ha, moat it mooglik wêze dat Fryslân dizze stappen ek set. Ljouwert hat ommers sûnt koart ek syn eigen ynternet-knooppunt www.fr-ix.nl dêr’t servers streekrjocht oansluten wurde kinne op de grutte ynternasjonale ynternet ferbiningen. En de Provinsje Fryslân is in dúdlik ôfbakene territorium mei de iennichste erkende nasjonale minderheid binnen Nederlân. Mei in eigen domeinnamme ûnderskiedt Fryslân hem ek yn digitaal opsicht. Sa kinne boargers, ynstellings, oerheden en bedriuwen har better yn de aloan groeiende ynternetmienskip profilearje."
Fansels soe it moai wêze at Fryslân in eigen ekstinsje krije soe. Dat soe dan grif net .frl wurde sjoen it feit dat de ekstinsjes fan lannen altyd mar 2 letters hawwe. Foar Fryslân is de .fy ekstinsje beskikber. Kommersjeel helber soe it faaks net wêze mar it soe publisitêr en prinsipieel wol in goeie saak wêze fansels. En dan fuort ek de dakjes en streekjes ynfiere fansels, eat wat de SIDN al jierren tsjinhâld omdat hja bang binne dat kriminelen dêr misbrûk fan meitsje sille troch bygelyks räbobank.nl te registrearen en dêr in 'phishing' side fan te meitsjen...
+ 0 - 0 | § ¶Vitória Setúbal FC
Earst út en dêrnei thús tsjin in Portugeze ploech en dat koe noch wol ris dreech wurde. Mar it is fansels wol in moaie kâns om wraak te nimmen foar it WK. Dizze kear docht Figo net mei en is Ivanov nei alle gedachten ek net de skiedsrjochter al is dat lêste noch net wis fansels. In drege tsjinstander want yn de Portugalkup ferlearen sy ferline jier mar mei 1-0 fan FC Porto. Ferline jier skeakele Sampdoria harren yn de earste omloop út troch yn Portugal mei 1-1 lyk te spyljen en yn Itaalje mei 1-0 te winnen. Dat betsjut dus fol oan de bak. Foar de leafhawwers fan Grins, dy moat nei Belgrado...
+ 0 - 0 | § ¶Levertraan
Doede Veeman hat sûnt in tiidsje ek in eigen side op it ynternet. Dat is fansels goed nijs foar alle leafhawwers fan syn wûnderbaarlik moaie teksten. Dizze oermuzikant dy't gauris optreedt mei Piter Wilkens, Jaap Louwes en Gurbe Douwstra koe fansels ek net langer efterbliuwe. Spitigernôch hat er noch gjin folsleine nûmers op de side opnaam. Ik haw him dêr fansels al efkes om frege want dan kin er ek in hitnotearing krije yn de Fryske delhel top 30. Myn favoryt is fansels Levertraan mar dat mei dúdlik wêze...
+ 0 - 0 | § ¶fersekere fan in gouden takomst
Hjoed wie wer in wichtige dei yn it libben fan Thaeke Johannes Kuipers. Sa haw ik my fannemoarn earst ris lekker fersekerje litten. At it goed is bin ik no net allinnich WA fersekere mar ek ús auto, ús hûs en ús ynboedel is dutsen. Spesjaal foar fervelende mantsjes lykas dy fan Kluitman haw ik no ek in rjochtsbystânsfersekering. Glêshelder tocht ik sa. It kost in pear sinten mar dan ha je ek wat. No't wy alles sa goed foar elkoar hawwe moast der fansels ek noch efkes foar soarge wurde dat ek nei myn as har dea it swiet de goeie kant op driuwen bliuwt. Mei oare wurden, wy ha nei de Notaris west om dêr in testamint en in gearwenkontrakt op te stellen. Dit is wol tige wichtich want sjoen it feit dat wy (noch) net boaske binne soe oars by ferstjêren fan ien fan ús alles nei de âlden en de suster gean fan de oare. Dy oare soe dan bygelyks it hûs jitris foar de helte keapje moatte fan de skoanfamylje. Mei ús testamint is dat no regele. Dus salang at myn freondinne myn freondinne bliuwt is myn suske no ûnterft (haha)...
+ 0 - 0 | § ¶Ferkearstechnysk probleemke
Soms ha je dat, dat je yn in ferkearssituaasje komme dat je eins net krekt witte hoe't it no sit. Faaks is der immen dy't my hjirby helpe kin. De situaasje is bygelyks dy fan it Hereplein yn Grins. Foar de minsken dy't dêr net bekend binne efkes in koarte omskriuwing. In krúspunt mei stopljochten foar auto's en dêrneist ek noch aparte ljochten foar fytsers. De fytsers krije allegear tagelyk grien. Neist de stopljochten steane der haaietosken op de beide kanten fan de Hearewei. No kom ik fanút de rjochting fan it stasjon. Ik wachtsje kreas oant it ljocht grien is en begjin dan as in idioat te fytsen. De Hearewei krijt ek grien en dêr stean se tot oant bovenop de bult fan it spoarfiadukt te wachtsjen. Dêrtroch kom ik oan 'e ein fan de oerstek dus dy meute tsjin. Wy ha allegear grien dus dat is lykweardich. No komme dy lju fan rjochts mar der stean ek haaietosken. Is it no sa dat dy haaietosken allinnich jilde at de stopljochten bûten wurking binne of jilde se gewoan. Ik gean der altyd mar fanút dat se foarrang ha moatte. Dat is ek wol sa praktysk. Mar juster siet der in dikke trol op in snorbrommerke neist my dy't oant twa kear ta suïsidaal der yn op fleach. Earst by it Heareplein, en fuort dêrnei by de Easterpoarte jitris. Wa kin my fertelle at ik der kommende kear foar del mei as net...
+ 0 - 0 | § ¶Ivanov op it keatsfjild
Sûnt 2002 hat de KNKB blauwe en reade kaarten ynfiert yn it keatsen. De reade kaarten wiene oant dit wykein noch net earder brûkt mar juster hat Jacob Zaagemans fan Wytmarsum yn Froubuorren de twiveleftige ear hân om sa'n kaart op te rinnen. Wat soe dy jonge dan dien ha freegje ik my ôf. Soe der in trochbrutsen opslager ûnderút skoffele hawwe? Soe der de bal tsjin de hân krigen hawwe yn it perk? In moardoanslach op de tean fan Rudmer fan der Meer? Nee sa slim wie it net. Jacob brûkte neffens skiedsrjochter Gosse de Jong út Warkum 'onwelvoeglijk taalgebruik' dus mei oare wurden, hy sil wol wat yn it Hollânsk sein hawwe...
+ 0 - 0 | § ¶Toulûke is ek slopend
Justerjûn waarden wy, Boele en ik, troch Wiesje frege om efkes foar it toulûken te soargjen. Dus fannemoarn om 11.30 fleachen wy al mei faasje rjochting Siegerswâld ta om dêr it toulûkmateriaal wei te heljen. Doe't wy wer yn Grins wiene hawwe wy hiel brutaal ús wein nei de fiskmerk stjoerd mar dêr stiene al wat sneue studint en stêdpolitisi te toulûken mei in tredderangs tou en in fodsje as parkoer. Wy riden dus fierder nei de grutte merk ta. Dêr hie de organisaasje in moai parkoer foar ús útset wat fansels wer in pear meter te koart wie. No ja, je moatte lûke op de meters dy't je krije fansels dus wy ha de rubbermatten dellein en nei't Boele en ik it tou efkes fisyk kontroleard hiene koene de keirinners begjinne. Bytiden hongen der wol 20 man oan beide kanten fan it tou en wy bin dan ek bang dat wy no noch in meter tou mear ha as doe't wy begûnen mar it wie moai. In skatting fan it tal minsken dat lutsen hat rint moai op nei de tûzen. Hja ûnderfûnen dat toulûken net samar wat dom oan in tou hingjen is want it is in slopende sport. Atst in bytsje in lykweardige tsjinstander hast giest hielendal kapot. No kapot wiene wy oan it ein fan de rit wol mar nei't wy de rubbermatten wer yn Siegerswâld hiene moast ik Boele fansels noch al efkes ús boupleats sjen litte...
+ 0 - 0 | § ¶De pot der fan rukt
Ik wol gjin gesijk mear ha yn ús takomstige wente. Dêrom haw ik de pot der mar alfêst ofrukt. At minsken no noch neist de pot miege wolle dan moatte se wierskynlik nei de miljeustrjitte yn Drachten. Foar minsken dy't in bytsje gatsjetûk binne is it noch wol mooglik om wat yn it rioal te krijen trouwens. Neist it húske moast ek de trep belies jaan want boppe hawwe wy momenteel net it measte te sykjen. 
Wat ek wol frijwat modern is is ús wenkeamer. Wy hawwe út de 'VT wohnen' fan 1943 dy't wy earne yn in âld kast fûnen it geweldige idee helle foar in sitkûle yn de foarkeamer. Sa hast alle kearen it idee datst op strânfakânsje bist op Borkum. Ek it skjinhâlden is hiel ienfâldich. Gewoan mei de harke efkes it rûchste der wat út klauwe en foar de rest sân der oer...
+ 0 - 0 | § ¶Lange Frans - Grutte Germ?
Doe't ik justerjûn om 23.00 út myn wurk kaam koe ik it net litte en fyts efkes troch de binnenstêd om dochs efkes in snúfke keiwike mei te krijen. Op de grutte merk wie de iepening krekt west en it stie aardich fol folk. Doe kondige immen Lange Frans en Baas B. oan. Dy joegen in oere lang in optreden fanôf it balkon fan Vindicat. Alle jierren betellet dizze ballenklup in smak jild foar de ien as d'oare artyst om sjen te litten dat se in soad jild hawwe. No lawaai meitsje koene hja wol mar fierder fûn ik it net echt in soad om de hakken hawwen. It wie wol grappich dat Lange Frans sels al efkes by in ranzich nûmerke referearde oan it iisblokjesynsident. Hiene wy dat efkes earder witten dan hiene wy de djipfriezers efkes oeroeren draaie litten tinkt my. Ek wol lekker hypokryt om dan letter wol te sizzen dat Joes Kloppenburg 10 jier lyn sinleas troch ien of de oare sukkel deaslein wie. Dat nûmer oer sinleas geweld hat toch in dûkje oprûn en faaks kin se dat better net mear sjonge. Yn alle gefallen haw ik my noch it meast fermakke mei de minsken efter de ruten. By Vindicat hiene hja de raamkes ôfdekt mei trochsichtich materiaal. In sterke lampe der efter en trije mokkels der foar dy't dûnsje moasten. It earste kertier hiene hja der aardich nocht yn sa like it. Mar dêrnei wiene hja der wol wat flau fan hie ik it idee. Yn it pân neist Vindicat, tafallich ek noch krekt de Friesland Bank, wiene 2 (wierskynlik jonges) dy't ek in lamp efter it rút set hiene. Op in soarte fan Germ-Jelmer wize stiene hja dêr seksuele tinte bewegings te meitsjen. Dat wie foar my it hichtepunt fan de jûn. Om te sjen hoe't twa man hiel Vindicat belaggelijk makken sûnder dat hja it sels yn de gaten hiene. Hulde foar dizze potinsjele 'Grutte Germ' en 'Jelmer H'...
+ 0 - 0 | § ¶Pimp de Bernleffer...
+ 0 - 0 | § ¶Lost 2, part 1
It earste seisoen fan Lost wie tige ferslavend. De freondinne en ik koene hast net wachtsje om de folchjende ôflevering te sjen. Sa sieten wy soms oant let yn de jûn foar de tv omdat wy dochs noch mar efkes in ôflevering sjen moasten. Mar ja, nei ôflevering 25 wie it dien. No is sûnt hjoed seisoen twa ek op de merk. Al ha se it, wierskynlik om kommersjele redens, dizze kear ferdield oer twa doaskes fol DVD's. De earste 12 ôfleverings bin der dus no en de priis foel my ta. Foar noch gjin 30,- wie ik al eigner. No is it probleem allinnich dat ik alle dagen middeistsjinst haw fan 14.30 oant 23.00 wylst myn freondinne gewoan normale kantoartiden hat. Dat betsjut dus dat wy elkoar pas om 23.30 wer moetsje en dat is te let foar noch in ôflevering fan Lost. No lizze de skyfkes dus op tafel en wy bin oergryslik nijsgjirrich nei de ôfrin fan de klifhingers. Noch in pear daachjes geduld dus...
+ 0 - 0 | § ¶Hollanders ferneuke ek alles...
Yn it begjin wie dêr de (doe noch net) hit Boten Anna fan Basshunter. Fia ynternet bedarre it ferske yn Nederlân dêr't al rap de gebroeders Ko mei harren eigen fersy kamen dat al net mear dûbelsinnich wie mar gewoan gie oer in boat dy't Anna hyt. Fierder in klip mei wat geile mokkels en hoppa, súkses fersekere. No bin de Hollanders noch wer in stapke fierder gien en sa fûn ik hjoed op ynternet it nûmer: "Je hebt een uitgewoonde grot". Fansels kin ik dêr wol op syn Boeles hiel hurd om laitsje mar it orisineel bliuwt dochs it bêste. En atst goed harkest dan hearst ek noch dat Basshunter oer de Rottefalle sjongt...
+ 0 - 0 | § ¶Toulûke
Kommende snein bin ik frege om wer efkes mei te dwaan oan it toulûken. Dizze kear sil dat op de grutte merk as op de fiskmerk plakfine. Ik moat fansels earst noch efkes ôfwachtsje at ik ek wurkje moat mar oars bin ik der wol efkes by fansels. Foar de leafhawwers fan it toulûken. It begjint om 14.00 oere. Jim kinne der by wêze mar jim kinne fansels ek jim krêften mjitte mei oare sterke (kei)groepen. Wy kinne fansels net tsjin elkenien lûke, dat soe in bytsje te folle fan it goeie wêze, dus hast sin om te lûken? Kom dan sneintemiddei efkes nei it sintrum fan Grins...
+ 0 - 0 | § ¶Wurkje, wurkje en jitris wurkje
Hjoed begjint in mega-wurkwike. Ik moat snein oantemei freed wurkje en dat binne wol efkes seis dagen efter elkoar. Fansels komt it wol goed út want ik haw no ek dûbele lesten fansels. Wy moat no net allinnich de hier betelje mar ek ús hypotheek. Oant de ein fan dit jier sil ik it dan ek in bytsje suniger oan dwaan moatte bin ik bang. Yn alle gefallen moat der al efkes wat fertsjinne wurde sadat de belesting ek jild hat om oan ús hûs mei te beteljen...
+ 0 - 0 | § ¶Simmerregeling
Fannemoarn gie al wer betiid de wekker om't wy fisite krigen. Ik wie dêr wol fan op de hichte mar ik woe dochs juster hiel graach efkes nei de simmerregeling ta op Bernlef. Ik wie dizze simmerfakânsje allinnich mar ien kear nei Hendrik west en dit wie de lêste kâns alwer. Hoewol't de muzykkompjûter stikken wie hiene wy gelok dat Dokter Deurholt syn pda by him hie mei dêrop in aardige kompilaasje fan moaie nûmers. Sa rûn de jûn as in trein en mei dank oan in blok en wat spikers koe ik wer in aardige foarrie Joustra-Sânomheech oanlizze. Ik moat sizze dat, ûndanks myn slooperfaring en it feit dat ik al in pear wiken gau ris in hammer beet hân haw, it spikerslaan der net op foarútgien is. Mar om't der mear minsken wiene mei in minne each-hân-koördinaasje slagge it dochs noch om de jûn sûnder al te folle skea troch te kommen. Sa waard it letter en letter en it wie gesellich. Doe't Wouter de soas ticht goaie woe wie it al hast wer 7.00 oere en dat wie ek heechste tiid foar my. It sil wol wer in pear dagen jetlêk wurde mar ik hie it net graach misse wolt fansels. Kommende tongersdei begjint de keiwike. Ik sil my dêr net tefolle mei bemoeie mar yn alle gefallen sil ik besykje dêr sneontejûn al efkes hinne te gean. Dan spilet der wol in aardige band op de soas...
+ 0 - 0 | § ¶Thús? wêr is dat no?
Wie it eartiids altyd al ferwarrend at ik sei dat ik yn it wykein nei hûs soe wêrmei't ik dan faak bedoelde dat ik nei Sint Nyk gie. No is de situaasje noch yngewikkelder wurden. Wy hawwe fannemoarn by de Notaris yn Feanwâlden ús hântekening setten neidat skoanheit en skoanmuoike dat foar ús dien hiene. No ha wy dus in hierhûs (60 ûnder yn kap yn Grins) en in keaphûs (net in soad mear ûnder de kap want hast alles is sloopt op 'e Rottefalle). At ik no fannejûn op stap sil en de freondinne freget my om betiid thús te kommen, wêr moat dizze jonge dan hinne? Faaks is dat ek wol wer in ideaal ferlechje want ik kin no dus ekstreem let thús komme en dan melde dat ik earst nei it oare hûs kletsekke bin mar dat dêr net ien thús wie. De sloop is hast tenein want wy ha hjoed ek de stiennen muorre dy't ús keamer mitstwaën dielde der út feecht. Omdat dizze fan de selde stiennen wie as de bûtenkant fan it hûs kin wy dy stiennen faaks noch wer herbrûke. Dat hat twa foardielen: wy hoege dan gjin nije stiennen te keapjen en wy ha dan de selde stiensoart. Neidiel is faaks dat wy se dan earst skjinkappe moatte want der sit fansels al semint op. No ja, dat moat wy dan earst mar efkes mei de oannimmer oerlizze. Moarn sille wy wer fierder slope yn ús eigen hûs. No sil ik earst mysels taheakje oan de startpagina fan de Rottefalle...
+ 0 - 0 | § ¶Noch ien nachtsje sliepen
Moarn sil wy nei de notaris om dêr mei in pear hântekeningen de keap fan ús dreamhûs definityf te meitsjen. Jim sille dus wol begripe dat ik hjoed net in soad tiid haw foar de webloch want ik moat noch steapels mei yngewikkelde ambtelike stikken trochnimme. Fanôf moarn kinne wy dus klusse yn ús hûs ynstee fan yn dat fan skoanheit cs...
+ 0 - 0 | § ¶It âlde guod moat earst tenein...
"It âlde guod moat earst tenein" sei de jonge, en hy liet syn heit it wurk dwaan. Dy siswize komt no moai fan pas. Fannemoarn wiene wy mei de oannimmer yn petear yn en oer it hûs dat oer 2 dagen fan ús wêze sil. It risseltaat is dat wy no ek de flier yn de wenkeamer der út brekke sille om dizze letter fol mei beton kroadzje te kinnen. De helte fan ús hûs is nammentlik noch foarsjoen fan in houten flier. No is dat op 'm sels net sa slim fansels, mar de keamer soe oars foar de helte in betonnen flier en foar de oare helte in houten flier hawwe, en dat is wol in bytsje apart fansels. Tidens it petear skillen myn âlden. Hja woene wol efkes sjen yn de nije wente. Ik haw foar de grap sein dat se dan mar âlde klean oandwaan moasten sadat se noch efkes helpe koene. In oere letter stiene se al foar de doar mei in enorm brekizer dêr't grutte Pier oergeunstich fan wurde soe. Us heit koe sa sûnder trep alle dwerslatten fan it plafond slope en dêrnei hat er ús de kelder ek mar efkes wat ferromme. Mem liet har ek fan har bêste kant sjen troch de sloopte rotsoai ôf te fieren en de keamer oan te faaien. It is dochs wol geweldich dat sawol de famylje as de skoanfamylje ús sa graach helpe mei. No wy bin wer in aardich ein opsketten. Freed mar wer efkes hinne, dan is it hûs offisjeel fan ús mar ik bin bang dat skoanheit him net oan it kontrakt hâlde sil. Hy moat it hûs nammentlik leech opleverje...
+ 0 - 0 | § ¶Ierdbeving of fan de trep fallen?
Hoe let ik fannemoarn krekt thús wie mei Joast witte. Faaks wit de freondinne it ek. Doe't ik nei myn wurk justerjûn efkes op de brêgestrjitte siet foar in buorrel waarden dat der al rap mear as ien. Dêrnei bin ik de tel wat kwytrekke. Fannemoarn waard ik wekker om in oerke as 10.00 en doe seach ik op teletekst dat der in ierdbeving west wie dy't yn hiel Grins te fiellen wie. Ik haw dêr niks fan meikrigen. Spitich fansels want sa faak bart it ek net dat jo in ierdbeving fernimme om dêrnei noch út jo 60-ûnder-ien-kapswenning te stappen. Wat ik dan wol wer hiel apart fyn is dat se fuortdaalks wol witte dat sa'n ierdbeving feroarsake is troch de gaswinning. De oarsaak fan it ûngelok mei de trep yn Utert liket my in stik dúdliker. Mar dêr ha se dan wol wer in ûndersyk fan wiken foar nedich. Soe it trepke net goed wêze, of hat de beveiliging tefolle minsken op de trep litten. Of is it miskien wol eigen skuld en moat de minsken op de trep oanklage wurde omdat hja as in idioat oan it dûnsjen wiene. Fansels hie de organisaasje maatregels nimme kinnen. By de lêste Alvestêdetocht hie de organisaasje it brechje fan Bartlehiem ek spesjaal oanpast mei 2 skeane planken sadat der net te folle minsken op it brechje stean koene om ynstoartingsgefaar foar te wêzen. Mar lit ús al in bytsje redelik bliuwe. It ûngelok mei de trep wie stomme pech wylst de NAM ús ûndergrûn bewust leech sûget wittende dat dêr ierdfersakkings fan komme kinne. En at it Noarden dêr no like ryk fan wurde soe as Kuweit dan wie dat noch wat. Mar nee, it jild giet allegear nei de rânestêd ta en mei pine en moeite kin der bytiden wat werom. En no't de hûzen yn Grins fan't winter wer wat ekstra kieren hawwe kin de NAM de skamele skeafergoedings al yn ien winter wer werom fertsjinje troch it ekstra gas wat yn dy hûzen nedich is foar de ferwaarming...
+ 0 - 0 | § ¶Hup Waldsein
Dêr't it skûtsje fan Wâldsein oars altyd op eigen wetter in minne dei hie (foar safier't ik my heuge kin) ha se no wûn. Dêrmei stean hja ynienen op 0,2 punten fan it earste plak en ha se no alles wer yn eigen hân om de titel te beheljen by de SKS. Dat soe moai wêze want dat is al wer in skoftke ferlyn. Sjoen it feit dat ik berne bin yn Wâldsein is dat noch altyd myn earste favoriet. Langwar, myn favoryt foar plak 2, docht it spitigernôch wat minder goed. Faaks hie de Dokkumer flagge sintrale wol in foarútsjende blik doe't hja ynstee fan de Swan in mei de kop de ferkearde kant út steande gâns op it skûtsjewimpel farven...
+ 0 - 0 | § ¶Lost seisoen 1
Sa, krekt foar dat ik nei myn wurk moast hawwe wy de lêste ôflevering sjoen fan it earste seisoen fan Lost. In geweldige seary dy't de freondinne en my oeren foar it televyzjetastel s(w)itte litten hat. Foar de minsken dy't net witte wat Lost ynhâld: In fleantúch fan Sydney nei LA stoart del op in eilân. In stik as 40 minsken dy't inander foar it grutste part net koene oerlibje it en sy moat mei elkoar fierder op it eilân. Yn it begjin wachtsje sy noch op help mar nei in tiidsje ha se wol troch dat it wol efkes duorje kin eart hja fûn wurde. Alle persoanen ha wol wat bysûnders meimakke yn it ferline en sa fine wy eltse ôflevering wer nije dingen út oer de haadpersoanen. Mar it eilân is ek net samar in eilân. Der barre nuvere dingen op it eilân en dêrtroch bliuwt it spannend. Je witte eins nea wat der dêrnei barre sil. Oan it ein is der in ferskaat oan klifhingers dus wy kinne no al hast net wachtsje op it twadde seisoen dat oer minder as 14 dagen al te krijen is...
+ 0 - 0 | § ¶Seare hân fan it moken
Fannemoarn wiene wy al wer betiid op 'e Rottefalle. Noch ear't skoanheit der wie hiene wy ús takomstige túndoarren al wer op it wiidst iepen stean. Us takomstige wente wie al aardich lytsman makke mar de notiidske wenkeamer, dy't straks de achterste helte fan ús nije wenkeamer is, wie noch net skansearre. Dêr moast fansels nedich wat oan dien wurde. Sa koe de freondinne har enersjy kwyt yn it plafond en yn in ynboukast wylst ik it board fan de muorren skuorde. Yn it hoekje siet noch in skou mei moaie giele stientsjes. Dy stientsjes wiene der rap út mar de skoarstienpiip wie fan grutte stiennen blokken makke en dy sieten wat fêster. In linke put want at it saakje de ferkearde kant op nei ûnderen komme soe dan wie der kâns op in betide útkearing fan myn libbensfersekering. Fansels wie it pypke net bestân tsjin de 120 kilo fan my yn kombinaasje mei in flink brekizer. Doe wie it tiid om ek yn myn kantoar noch in stikje skoarstien der út te kappen en dêr gie it mis. De earste klappen lieten ferskate bakstiennen nei ûnderen komme mar it lêste stik wie fan wapene beton en siet mei grutte izeren stikken yn de muorre fêst. Ik haw der ferskate klappen opjûn mei de moker mar op in gegeven momint siet myn lofterhân wat yn it paad. Gelokkich haw ik noch wat fet op de knokkels sadat myn natuurlike 'loftsek' de klap foar in part opfange koe. Oars hie ik no alla Dokter Deurholt oant de skoader ta yn it gips sitten bin ik bang. It foel ta en nei ferskate klappen en in stikje flekswurk dêr't de fonken der by ôf fleagen joech it blokje úteinliks dochs beliis. It gefolch fan ús sloopaksjes wiene in karre fol plafond, in karre fol pún, in seare hân en in foldien gefoel. Us hûs is no sawat in kasko...
+ 0 - 0 | § ¶In lestige namme
Woansdei wie ik op in h nei kening fan de PC yn Frjentsjer. Taeke Triemstra waard kening op it Wimbledon fan it keatsen. It is dan ek wol ekstra lullich dat de Ljouwerter krante syn namme op de foarside ferkeard skriuwt. Dêr stiet nammentlik "Teake Triemstra koning op de PC". Fierderop yn de Ljouwerter krante hawwe se it wol oer Taeke mar krekt op de foarside giet it dus mis. Ik haw dêr sels ek gauris lêst fan. Minsken wikselje de E en de A om of brûke gjin H of in kombinaasje fan dy twa. Myn bedriuwsnamme haw ik dan ek op 4 manieren fêstlein yn de .com fariant. Yn de sprektaal is it ek lestich. Bynammen bûten Fryslân is it altyd mar wer ôfwachtsjen hoe't men myn namme (en dy fan Taeke) útsprekke sil. Yn myn gefal soe dat ûngefear as 'teerkuh' mei in stomme r en in stomme h wêze moatte. At ik ôfgean op de útspraak fan Omrop Fryslân dan sil dat by de jonge Triemstra net in soad skele. Hoe lullich it ek is, sa'n ferskriuwing, it kin altyd noch minder. Sa wûn ik in kear in wikseltsjelke mei it keatsen en doe't ik dy werom krige fan de graffearder stie dêr 'Tineke Kuipers' yn. It skeelt mar 2 letters mar dy bin wol essensjeel fansels...
+ 0 - 0 | § ¶Jitiizer unplugged
Soene hja dan nei al dy jierren dochs noch trochbrekke? De mannen fan Jitiizer komme oars al eltse moarn op Veronica radio mei harren nûmer Heu mar no wiene hja ek al efkes yn byld op de 4 in het land zomertour. Hoe't se it alle kearen wer foar elkoar krije mei Joast witte mar grappich is it wol. Mei de moaie Fryske túnbroeken oan setten de mannen efkes in moaie unplugged (sûnder snoerkes) sesje del fan it nûmer Ikke ikke ikke en de rest kin stikke. De rest fan it Feanhoopfestival sil ek wol gewaldich west hawwe tinkt my. Mei Sint Nykster merke komt de nije kompakt skiif út dus dan moat ik der mar wer efkes by wêze mei in skodde molke jierdbei jenever as twa trije...
+ 0 - 0 | § ¶Iritante automaat
By ús op it wurk hawwe wy in hiele iritante automaat stean. It is in kast mei allegear skiven deryn dy't yn fakjes opdield binne. Yn dizze fakjes lizze ferskate saken lykas 'cup a soup', snobberij, broadsjes en fansels mei de waarmte fan de ôfrûne dagen tige wichtich: blikjes frisdrank. Op 'm sels hardstikkene moai fansels mar it ding stamt noch út de foarige ieu. De masjine kin bygelyks wol jild wikselje mar hy docht dat allinnich mei munten fan 20 eurosint, 10 eurosint en 5 eurosint. At ik dus in 2 euro munt yn it apperaat smyt en ik nim in blikje kola, dan krij ik in hân fol lytsjild werom. It gefolch dêrfan is dat it kring rap troch syn wikseljild hinne is en dan allinnich noch mar kontante betelling oankin. Dat is foar dyjinne mei dy hân fol lytsjild fansels net sa'n probleem mar atst allinnich mar euro's yn de beurs hast bist moai de pisang. Sterker noch, in blikje kostet 50 sint mar at it wikseljild op is kinst gjin blikje keapje mei in muntsje fan 50 sint omdat er dan by in sopke fan 30 sint dy gjin 20 sint werom jaan kin. Dus moat der dan perfoarst mei 20, 10 as 5 betelle wurde. Ek is it iritant dat wannear't ik 2 blikjes drinken wol ik der earst 1 euro ynsmyt, dan krij ik in blikje drinken en automatysk falt der dan wer 2x20 en 1x10 sint út. Dy moatst der dan earst wer yn smite foar it twadde blikje. Mar it kin fansels altyd noch folle slimmer. Sa heakje de blikjes gauris wêrtroch de karûsel net mear draaie wol. Jild werom is al jierren in utopy want in knopke is wol oanwêzich mar it docht net in soad dus at it blikjesfak fêst sit wurde jo ferplichte om wat oars te nimmen om sa dochs mar in pear sinten werom te barren. Ik wit ek wol dat wy net seure moatte omdat der yn Libanon folle slimmere dingen barre, mar ik woe it dochs efkes fan my ôfskriuwe. Faaks skeelt dat yn de ferwurking fan myn leed...
+ 0 - 0 | § ¶Spanning en sensaasje
Fannemoarn wiene skoanheit en ik al wer betiid út de fearen. Klokslach 9.00 stiene wy foar it miljeuterrein fan Drachten om dêr in karre fol stikjes plafond ôf te leverjen. Justermiddei stie der noch in aardige rij autos foar ús mar no foel dat ta om't se noch mar krekt iepen wiene. Dêrnei mar wer oan it brekken. Wy moasten no begjinne oan it echte brekwurk. In flink stik houten muorre dat de notiidske keuken fan de takomstige keuken skiedt moast der oan leauwe. It brekizer die syn wurk en sa kaam moast it muorke stikje by bytsje belies jaan. Troch ús takomstige iepenslaande túndoarren koe it sa de karre yn. It gefolch is dat wy no in iepen keuken hawwe mar dy sil der kommend wykein nei alle gedachten ek noch wol oan leauwe moatte. Hoewol't wy de hiele dei al harken nei Omrop Fryslân radio waard it fansels pas om 14.00 echt nijsgjirrich. Klaas Jansma kin it altyd sa boeiend fertelle dat it krekt liket as steane jo sels oan de kant fan de Folkertsleat. It begûn in oerke letter mar dêr wie de sensaasje fansels net minder om. 
Dêr't de sensaasje fan Klaas kaam kaam de spanning dizze kear fan de Nuon. Wy hiene yn in grut part fan it hûs de stroom der al ôf mar op it muorke dêr't ik mei oan it slopen soe siet noch al in stopkontakt dat ús kuolkast en Klaas Jansma fan spanning foarseach. Ik tocht dat ik dat der wol efkes foarsichtich ôfhelje koe mar ik die fansels wer net foarsichtich genôch. It gefolch: In flits, gjin Klaas mear, gjin kâld drinken en in lamme lofter earm. Gelokkich gie it mei myn earm rap wer oer en doe't de stroom der dochs efkes ôf lei koe ik moai it stopkontakt demontearje wêrnei't ek it lêste stikje muorre sneuvelje koe en Klaas wer genôch spanning by syn sensaasje krige. Doe't wy ek it besteande kantoar oan de foarside fan it hûs, wat te lyts is foar de saak en dus ús rojale hal wurde sil, folslein oan stikken feegt hiene stie it swit my op de rêch mar dat makke net út. Wy wiene no sa goed as klear. De notiidske keamer stiet noch fol rotsoai fan oare minsken dus dy koene wy noch net slope. Mar wy ha ommers noch 2 wiken boufak oer foardat de echte boufakkers komme dus dat sil grif noch wol slachje. Sneon sille wy nei alle gedachten de earste stien der út slaan en dêrmei noch in stik as wat oare stiennen. Jim lêze it fansels op Thaeke.net. Ynkoarten sil ik ek noch wol wat fotokes op de side pleatse...