+ 0 - 1 | § ¶Snotterich
Al tiden bin ik net alhiel fit wat soarget foar in bytsje lêst fan de kiel, in nuver kuchje en in pear noastergoatten dy't as sels loazers fungearje. Ik bin frij rap wurch en ik haw it ek noch smoar drok. Bin ik net mei it hûs dwaande dan bin ik wol oan it wurk op it fabryk en at ik in pear oerkes frij haw dan moat ik my wol wer mei de saak dwaande hâlde. Ik haw in nij administraasjesysteem wat noch al it ien en it oar oan ymplementaasje oerlit. No ja, moarn bin ik lekker frij dus dat skeelt wer. Ik sil dan de hiele dei mei Mario op stap nei de Martiniplaza foar in beurs fan it MKB.
+ 1 - 0 | § ¶Stiennen bikke
Doe't ik fannemoarn oankaam by ús nije hûs wie ik yn de ferûnderstelling dat ik de resten fan de erker oprêde mocht. Der wie allinnich op dit stuit mear ferlet fan skjinbikte stiennen. Dêrom waard ik oan in tafel set mei in moai nustje twadde hâns stiennen dy't by it sloopwurk oerbleaun wiene. Mei in bile moast ik dêr it semint wat ôf besykje te krijen. Wat in helse klus is dat. Der komt gjin ein oan sa'n bult stiennen en faak ha je krekt in stien hast skjin en dan slachst 'm dochs noch stikken. No ja, yn alle gefallen koe ik sa ek noch efkes de lêste foarderings sjen fan ús hûs. It begjint hieltyd tsjusterder te wurden binnen want hast alle kezinen sitte der al yn mar de glêzen bin der noch net. Om der foar te soargjen dat der gjin ynslûpers komme hawwe hja de kezinen dan ek ticht spikere. Ik sil daalks noch wol efkes wat fotokes op de fotoside sette sadat jim de foarderings sjen kinne.
+ 0 - 1 | § ¶Gang is alles...
It is wer wintertiid en dat is te merken. Sa kaam fannemiddei ien fan myn kollega's al om 13.00 oere op it wurk ynstee fan om 14.00 oere. Guon lju bin wat prikkelber troch in net goed funksjonearjende biologyske klok. En ik bin fannacht yn goed in heal oere fan Dronten nei Grins riden. Net dat dat in nij snelheidsrekôr betsjutte fansels mar ik hie de tiid mei. De freondinne seit krekt dat ik moarn wer oan de slach kin by ús nije hûs dat ik sil no mar op bêd.
+ 0 - 1 | § ¶Toppers @ de pleats
It wie wer gesellich yn de pleats oan de Van Houtenleane justerjûn. Mei Dorien en Jellie wie ik te gast by Jarig om dêr it twadde seisoen fan de Champions League te klaverjassen. Nei in noflik pastamiel koe it spul begjinne en it gie dat it slydjage. Sa haw ik alle potsjes wûn en bin der allinnich tegearre mei my marsen helle. Yn tsjinstelling ta ferline jier ha wy minder potsjes spile want de algemiene trochsakkondysje giet wat efterút. Mar nei 4 beamkes (ynstee fan seis) stean ik dochs 1400 punten los fan de nûmer 2 en hast 3000 punten foar op Jarig dy't ûnderoan stiet. Set 'm op Jierdei...
+ 0 - 1 | § ¶Champions League
Ferline jier ha wy mei de top 4 fan it klaverjasklassemint fan seisoen 2004-2005 fan Bernlef in Champions League organisearre. Sa kamen Dorien, Jarig en Jellie by my te iten en oan it ein fan de jûn hiene wy 6 drege beamkes klaverjast. Wy ha doe besletten om by elkenien 6 beamkes te spyljen. Oan it ein fan de rit wiene der twa dingen dúdlik. Ik wie de winner en kommend jier moast it mar in ferfolch krije. Jûn is de earste sesje by Jarig op de pleats. It sil my benije want ik bin net echt yn in topkondysje. De lêste tiid is myn dei-nacht ritme earnstich fersteurd wurden. No ja, wy sjogge it wol. De foarige kear stie ik der nei ien kear ek net al te bêst foar...
+ 0 - 1 | § ¶Kieskompas
De stimwizer hie ik al earder dien mar no haw ik ek efkes it kieskompas ynfolle. Kaam ik by de stimwizer noch út op éénNL fan Marco Pastors, by it kieskompas siet ik tichter by de Fortuynisten. Hoewol't ik dêrmei noch wol yn it rjochter rychje sit haw ik yn elk gefal al wer in ruk nei lofts makke en neffens it kompas sit ik no al wer lofts fan de VVD. It mei dúdlik wêze dat Grien Links net myn partij is want dy eindige by de stimwizer ek al ûnderoan.
+ 1 - 0 | § ¶Keuken en brûs
It wie in drege dei hjoed en de dei is noch net iens foarby. Fannemoarn om 6.30 op bêd en al wer om 8.30 fan bêd. Wy hiene wer in drok programma. Om 10.00 moasten wy al yn Langwar wêze en dêr hawwe wy de lêste dinkjes trochsprutsen oer ús keuken. De greepkes, de frontsjes, de kuolkast en de boretti mei Fry top en messing knopkes. Alles is no dúdlik en dit sil ynkoarten dus besteld wurde sadat it der kommende moanne in plakje krije kin. Al mei al wiene wy al rap wer sa'n 2 oeren ûnder de pannen wêrnei't wy fuort troch koene nei ús heit en mem foar in waarm miel. Moai dat soks sa kin no? Om 14.00 hiene wy in ôfspraak yn Drachten om te sjen nei ús sanitêre behoeften. Dêr ha wy in moaie brûs útsocht, de ienige hingjende skytpot mei in plato der yn, in pear wasktafels en wat kranen. Doe noch rap efkes nei de bou ta om te sjen wat der sa al bart wie. No it die bliken dat de mannen goed wurk dien hiene. Sa sit ús nije efterdoar der al yn, ús prachtige túndoarren ek al en tal fan rûnde kezinen ha ek al harren plakje fûn. Hulde foar ús timmermannen (mei ek wol ris sein wurde). Ek de houten trep sit der al yn en dy is ek boppe ferwachting moai wurden. Ynkoarten sil der wol wer fotokes fan dit alles op de side ferskine fansels. Mar no moat ik earst wer nei myn wurk ta. Dizze dei is oars noch lang net om...
+ 1 - 0 | § ¶Primatich
Ik fiel my hjoed net echt geweldich. Ik hie fannacht nachttsjinst fan 22.00 - 6.00 en sa wie ik dus goed 6.30 thús. Lekker sliepe wie doe it idee mar al om in oarke as 10.00 gong de tillefoan. Cor, de timmerman, woe witte wat foar glêzen at wy yn ús kezinen woene. Ik moat soks fansels earst efkes oerlizze mei de freondinne dat dêr hie ik doe noch gjin antwurd op. Yn alle gefallen bin se wer goed dwaande yn de Rottefalle want it earste kezyn sit der al yn. No mar wer lekker kûse tocht ik sa. Efkes letter, ik tink in oerke as 12.00 wer tillefoan. Dizze kear de mobyl dêr't maat Boele my besocht te berikken. Myn REMsliep wer raar ferstoard mei it gefolch dat ik no net echt fit bin. Ik neam dat sels 'primatich' wat in miks is fan prima, matich en primêr. Moarn sil it net folle better wurde mar dan kin ik my dêr tenminste noch op ynstelle. Moarn haw ik om 10.00 alwer in ôfspraak yn Langwar mei ús keukenleveransier. Ek dan haw ik dus heechút sa'n 2,5 oerke sliep. Ik tink dat ik nei iten noch mar efkes in tukje doch. At jim my dan net skilje wolle soe dat fijn wêze...
+ 0 - 1 | § ¶In moaie wurkdei
It wie juster in moaie wurkdei. Mei myn Feansjaaltsje om wie ik oan it wurk en fansels wiene der ek tal fan Grinzers mei sa'n griene poetsdoek om de strôte. Ik hie de poaster fan Bernlef op de kantine plakt om noch wat mear wetter op it fjoer te smiten. Omdat wy Omrop Fryslân net goed ûntfange kinne moast er mar op radio Noord. Grins wie folle better sa die bliken mar it Fean kaam op 1-0. It soe mar in kwestje fan tiid wurde en Grins soe de lykmakker wol meitsje sa tocht men op de radio. No it barde net en oppenij koe ik it fabryk wer daverje litte doe't it 2-0 waard. 3-0 en 4-0 wiene sa ticht opelkoar dat ik de Grinzers eins mar ien kear de gek oan stekke koe mar doe't ik wer by de radio wie die bliken dat wy ek wer ús tradysjonele strafskop tsjin krigen hiene. In dikke 'Sualbe' sa die letter bliken doe't ik de striid op tv werom seach. Doe't der ek noch de 4-2 oerhinne kaam waard it dochs noch wer efkes switten mar gelokkich hâlde de definsje stân. Oant febrewaris meie wy dan ek wer de Trots fan it Noarden neamd wurde...
+ 0 - 1 | § ¶Net fan dat benaude
It is hjoed wer sa fier. De FC út Grins mei hjoed wer oantrede yn it Abe Lenstra stadion dêr't de earste fan twa moetings plakfine sil dy't mei bepaalt wa't dit jier de trots fan it noarden is. Eins is Cambuur fansels de echte derby mar no't dy noch net in ear(st)edivyzje weardich tiem ha moat wy it salang mar mei Grins dwaan. Ik bin der hjoed net by op it Fean want ik moat wurkje hjir yn Grins mar ik sil al efkes myn Fean-sjaaltsje omdwaan op it wurk fansels. Ek haw ik juster noch in pear moaie poasters meinaam fan Bernlef dy't ek in bytsje oer dizze wedstryd gean. Dêr sil ik der ek efkes ien fan ophingje op it wurk. It is te hopen dat wy no net dy akelige nul oan it begjin fan de einstân krije dat ik soe sizze mannen, net fan dat benaude en skoare mei dy handel. Bosvelt wer efkes fan eigen helte en Rob Friend, atst echt ús freon wurde wolst dan moatst der no ris in stik as twa trije ynsjitte mantsje. Myn wurkdei soe der yn alle gefallen in hiel stik noflikker fan wurde...
+ 0 - 1 | § ¶Oktoberfest
Anne en Tina fiere hjoed dat hja tsien jier ferkearing hawwe. No't ik der sa ris by neitink soe dat bêst ris op in oktoberfest west hawwe kinne. Yn alle gefallen organisearje hja jûn ek sa'n feestje en it idee is dêr dat je as Dútser ferklaaid gean. Dat kin neffens de útnoeging as Peter en Heidie mar ek as oanhinger fan Dy Manschafft as mei in Sissi-jurk. No, wy ha efkes de stêd troch west om wat te finen foar dit feest. Ik sels wie al frij rap klear want ik seach in moaie kapiteinsmûtse lizzen en sa koe ik mei de skipperstrij oan foar Dútske hierboattoerist troch it libben. De freondinne woe eins wol as Heidie of Sissy hinne. Uteinlik slaggen wy der yn de Oosterstraat yn om dizzen te finen. De sissie jurk like har wol wat mar dêr moast noch in hoepel yn en dat is net handich fansels. Dan kreëare jo sa'n ôfstân tusken de minsken. Uteinlik hat sy in kreaze Heidiejurk oandien en dat wie 'm krekt. No kin wy fannejûn lekker yn steil nei it feestje ta. Dat drinkt dochs in stik noflikker fansels.
+ 0 - 1 | § ¶Stairway to hell
Der is wer ien fan de Martinitoer sprongen hjir yn de stêd. De jonge man (hy wie noch jonger as my) hie skynber syn nocht fan it libben en om toch noch wat omtinken te krijen weage hy de sprong fan de earste trans fan de martinitoer. Dêrmei bin de lange rûnddraaiende trepkes fan de toer no ferwurden ta Stairway to hell want stel dat der al in himel is, dan komme dy minsken dy't der op sa'n eigen wize útstappe dêr grif net binnen. No ja, de man is dea dus sân deroer soene je sizze mar nee. No is dit al de tredde kear yn trije jier en men wol der no wat oan dwaan. Der moat stekken op de toer komme sadat minsken net mear nei beneden springe kinne. Dit roait fansels igge noch seame want de toer is feilich genôch. Jo falle der allinnich mar ôf at jo der graach ôfwolle of at immen jo dêr efkes by helpt. In stek om dizze prachtige âlde grize stiet as stront op in flagge en wêr is dan it einde? Moat der straks op alle fiadukten stekken komme omdat guon lju it leuk fine om dêr stiennen ôf te smiten? Moat alle spoarbanen straks mei in stek omheind wurde sadat der net ien mear foarspringe kin? Neffens my ferpleatse je dan allinnich it probleem. De minsken dy't it libben net mear oankinne sille der dochs wol útstappe. Faaks kin men by de Martinitoer better twa soarten kaartsjes ferkeapje: in retoerke as in inkelde reis. De lju dy't dan foar de inkelde reis kieze kin troch in oare doar yn in hokje komme dêr't hja opfongen wurde troch in hulpferliener. Jo kinne nammentlik minsken better opfange wylst se noch op de grûn steane...
+ 0 - 1 | § ¶Saw II
Juster haw ik mei de freondinne Saw II sjoen en ja der wie yndie in soad bloed. In geweldich relatyf goedkeap konsept wat frij aardich útwurke is. By Saw I wie it einde tige ferrassend en ek no wie it net alhiel goed te foarspellen al hie ik dizze kear al mear in idee hokker kant it opgean soe. Mar dat komt fansels ek omdat je no wat aparts ferwachtsje. Guon sênes wiene sa blodderich dat de freondinne efkes útnaaide. Sy is fansels ek net in soad went wat dit soarte fan films oanbelanget sjoen it feit dat hja eartiids allinnich mar Nederlân 1, 2, 3 en Omrop Fryslân ûntfange koene. Hja wiene net oansluten op it ferderf wat kabel tv hyt...
+ 0 - 1 | § ¶De kezinen bin der ek al
It hat efkes duorre mar úteinlik is it dochs slagge. De firma Drijfhout út Jiskenhuzen hat ús kezinen hjoed levere. Ik haw se noch net mei eigen eachen sjoen mar skoanheit sei dat se net te huffen wiene dus dan sil it wol kwaliteit wêze. Nije wike kin Cor dan faaks al begjinne mei it fatsoenearjen fan ús foar-, syd- en eftergevel troch dêr in pear moaie hurdhouten kezinen yn te pleatsen mei dûbeld glês. Ynkoarten sil dan de treppen ek wol komme sadat de meterkast pleatst wurde kin sadat de nutsbedriuwen ús fan alle gemakken foarsjen kinne. Dan is ús hûs hooplik sa goed isolearre dat ik de radio ûnhuer hurd sette kin sûnder dat de freondinne de buorlju op de buorren as ferlechje brûke kin. No mar hope dat sy der sels ek oer kin...
+ 0 - 1 | § ¶De stimwizer is der wer
Op www.stemwijzer.nl lit men wer sjen by hokker partij atst hearre moatte soedest. Ik haw de stimwizer efkes ynfolle en dêr kaam tink ik wol aardich út wat ik ferwachte hie. Al stean der tal fan lytse splinterpartijkes boppe oan dêr't ik dochs net op stimme sil yn dit gefal. Yn prinsipe soe ik op Marco Pastors stimme en syn éénNL partij stimme moatte neffens de stimwizer. As twadde komt Hilbrand Nawijn út de bus en tredde Geert 'Alien' Wilders. Nei de Liberaal Democratische Partij fan Sammy van Tuyll van Serooskerken (wa is dat?) komt dan de earste 'grutte' partij út de bus. As jonge ûndernimmer kin dat hast net oars as de VVD wêze fansels. Dizze partij wurdt op de foet folge troch D'66 en it CDA fan Balkenende. Dêrmei docht bliken dat ik it dus yn grutte linen wol iens bin mei it sittende kabinet. Wat my oanbelanget krije wy dan ek de kommende fjouwer jier Balkenende 4 yn in CDA - VVD koalyzje. Om dizzen tegearre oan in mearderheid te helpen kin men better net stimme op de lytse splinterkes mar op ien fan dizze twa. At der gjin gekke dingen barre sil ik dat ek dwaan fansels. Al stim ik dan sawysa op in Fries fansels...
+ 0 - 1 | § ¶Slach by Warns
"Bernlef fynt de slach by Warns krekt in tsjerketsjinst" skriuwt de Ljouwerter Krante. Neffens Klaas Yde Haarsma soe it mear in feest wêze moatte ynstee fan in betinking sa lêst de redaksje yn de Harpe fan Bernlef. Krekt foar de betinking hie âld-foarsitter fan sawol Bernlef as de Ried fan de Fryske beweging Liuwe Westra al in skerp stik skreaun wêryn't er ôfstân naam fan de betinking en fan de koers fan de Fryske beweging op dit stuit. Ik kin beide mannen persoanlik en ik fyn dat se ek wol in punt hawwe. Ik bin sels leau ik twa kear op de Slach by Warns betinking west wêrby't wy troch Siebren de Boer dy't yn it bestjoer siet fan de betinking frege waarden om dêr wat Fryske ferskes te sjongen. Op 'm sels in oanfluiting fansels sjoen it feit dat wy net in folweardich koar wiene mar gewoan in klup minsken dy't it leuk fûn om te sjongen, mar it helle de gemiddelde leeftiid yn elk gefal wol wat nei ûnderen. Under lieding fan Siebren waard der doe ek noch besocht in feest te meitsjen fan de betinking. Sa wie der jûns in grut popkonsert (Slachpop). Spitigernôch wie dêr sa weinich belangstelling foar dat der mear artysten wiene dan beteljende taskôgers. Starum leit ek wat yn in úthoeke fansels. Ik haw dêrnei leau ik ek net wer by de betinking west. Der wurdt dêr tefolle werom sjoen nei hoe't it wie ynstee fan foarút wurke nei hoe't it ek wêze kin. Klaas Yde hat dêryn gelyk dat it mear in soart fan útfeart is wylst it in houlik wêze moatte soe. Faaks is de tekst 'leaver dea as slaef' yn dy kontekst dan ek wol wat te letterlik oernaam.
+ 0 - 1 | § ¶Ramadan
Fannemoarn waard ik nuveraardich wekker rammele troch de tsjerketoer fan Aldeboarn. It wie noch mar 9.00 oere en de freondinne skopte my út bêd want sy moast kuorbalje. Hoe't ik krekt op bêd bedarre bin wit ik net krekt mear dat it sil wol gesellich west ha justerjûn. Fia de Rottefalle kaam ik yn lijn 100 terjochte en sa wie ik al flot wer yn Grins dêr't ik om 14.00 op it wurk ferwachte waard. No dat soe wol wer in drege dei wurde tocht ik sa mar it foel ta gelokkich. Der wie allinnich ien probleemke. Der wurkje by ús ek in pear moslims en dy sitte no yn de Ramadan. Ut it eachpunt fan sosjaliteit waard dêrom keazen de pauze net om 18.00 mar om 18.45 yn te lassen. Dan koene hja mei ús mei ite omdat de sinne dan wol ûnder wêze soe. Dêrmei kaam it antikater miel fan de Sinees dus wer trije kertier letter. No ja, it is goed kaam en ik haw net iens wat stikken makke. Nei de pauze wie it hielendal net lang mear en sa koe ik folslein nuchter wer nei hûs ta. Doe't ik de tv oansette haw ik noch efkes nei reporter sjoen dêr't hja by in libbensechte autopsy wiene. Ek dat koe de maach wol oan dat ik tink dat it slimste efter de rêch is...
+ 0 - 1 | § ¶De nachtwacht brigade
Sûnt ik de 'Gezanten van Mars' krige op myn jierdei bin ik oan it sammeljen fan Suske en Wiskes begûn. Earst gie dat stadich mar doe't ik wat âlder waard en wat mear sinten om hannen hie haw ik mei help fan rommelmerken in moai nustje fan dy reade strips byeloar garre. At je dêr op in gegeven moment sa'n 200 hawwe dan wolle je se ek allegear ha fansels. No haw ik at it goed is de samling fan de gewoane nûmers allegear kompleet. Mar it fervelende is dat nei de dea fan Willy van der Steen der nije skriuwers fierder gien binne. It kommersjele súkses fan de boeken moast noch efkes fierder útmolken wurde en sa ferskynt der noch gauris in read stripboekje op de merk. At it no troch myn leeftiid komt as troch de kwaliteiten fan de skriuwers wit ik net mar meastentiids ha de nijste útjeften net in soad om de hakken. De âlde Suske en Wiskes ha folle mear djipgong en subtile humor. Mar nûmer 292 wie dochs wer in bytsje better gelokkich. Faaks ek omdat dizze wer in nije tekenaar hat no't de man dy't Suske en Wiske nei Auschwitz stjoere woe dien krigen hat. Sa goed as de earste Suske en Wiskes sil it fuort net wer wurde mar gelokkich sit der no wer in stiichjende line yn. Ik moat dochs myn samling wol kompleet hâlde fansels, mar at it dan ek noch wat lêswille opsmyt is dat moai meinaam...
+ 0 - 1 | § ¶Freed de trettjinde
Ik haw noch gjin berjocht hân oer dat ús hûs ynstoarten is dus ûnder it motto: 'gjin nijs is goed nijs' sil ik der mar fanút gean dat it dizze freed de trettjinde wer oerlibbe hat. No haw ik sawysa net in soad op mei dit soarte fan byleauwen. Ik haw myn heale libben wenne op hûsnûmer 13 en ik haw dêr net in soad hinder fan hân foar safier't ik wit. Swarte katten skine ek ûngelok te bringen mar dy fan ús wiene altyd wyt mei swart dus dan soe ik heal ûngelokkich wêze moatte en dat wie ik ek net. It ienige wat ik my yntinke kin by it rinnen ûnder in leider is dat sa'n ding, al dan net mei de beklimmer der noch op, nei ûnderen ta komt en dy ferplettert. Oars haw ik der gjin probleem mei en ik bin dan ek al moai wat kearen ûnder de leider yn ús nije wente trochrûn. Hy stiet noch as in hûs. It ienige skrikmomentsje wat ik hjoed hie wie doe't ik de freondinne besocht te skiljen en sy kear nei kear net opnaam wylst ik wol wist dat sy thús wêze moast. Mar ek dêr wie gelokkich in logyske ferklearring foar. Ik haw thús ISDN en sa ha wy 2 linen. At de iene yn gesprek is, wat by froulju noch al ris in oerke as wat duorje kin, dan gean de oare tillefoans noch gewoan oer. Mar der is dan net ien om dizzen op te nimmen. Ik moat dat straks yn it nije hûs mar efkes better ynregelje. Moarn wer in drokke dei dus no mar rap op bêd. Efkes immen gelokkich meitsje...
+ 0 - 1 | § ¶Binnendoarren
Hjoed ha wy wer efkes yn de Rottefalle west en it wurdt hieltyd moaier. Sa sitte sawol de leidings as de radiators der al yn en ek it wetter en gas leit no oer de flier. De keuken kin der by wize fan sprekken sa op oankeppele wurde. De stukadoar is klear en it ynboupart fan ús húske sit der ek al yn. Noch altyd wachtsje wy op de treppen en de kezinen. Hjoed ha wy de doarren útsocht dy't tusken de ferskate keamers yn ús hûs komme. Wy bin úteinlik by in kreaze MDF doar útkaam mei in stikmannich paneeltsjes. Jim sjogge dizze doar hjir neist stean. Dan kin jim mar alfêst in bytsje yn de stemming komme. Wy sil noch wol efkes geduld ha moatte want der sit sa'n 5 wiken levertiid op. Ik wurd stapelgek fan al dy levertiden. Wêrom moat dat allegear sa lang duorje? No ja, wy bin yn alle gefallen wer in stik tichter by de oplevering fan ús hûs kaam. Lokkigernôch haw ik de freondinne no ek safier dat wy in nije foardoar krije sille. De doar dy't der no yn sit is noch gjin twa meter heech en dat is net noflik fansels. De berichten binne fierder dat de nije trep kommende wike ôflevere wurdt. Boppe hat Spoelstra al hast de hiele souder ticht timmere mei grutte platen sadat wy dêr straks ien grutte romte fan hast 100 m2
+ 0 - 1 | § ¶Nije waskmasine
Us waskmasine wie al in âld beestje dat yn ús nije hûs woene wy wol graach in nije waskmasine ha. Dat moast fansels in Miele wurde want Miele is goed spul. Begjin dizze wike hie ik al op meardere plakken yn Grins in aardige oanbieding sjoen mar meastentiids hie it priiskaartsje fan de Miele dy't wy foar eagen hiene noch fjouwer siferkes foar de komma. De Makro hie dizze wike in krease waskmasine yn de oanbieding en dy soene wy efkes besjen mar ear't wy dizze stean seachen stroffelden wy al oer in pallet mei dêrop in sjomodeltsje. No dizze hie wol 1400 toeren en wit ik wat foar funksjes al net mear. Wy koene 'm foar in pear sinten mei krije mar dan wol fuortdaalks. Dus de Focus mocht foar it earst sûnt wy 'm ha mei in karre ride. De freondinne miende dat se 'm wol tille koe tegearre mei my mar dat foel net ta. Wy ha 'm op it lêst mei pine (yn de rêch) en moeite op in stikje flierbedekking nei de flat skuort. Mar it ding wasket yn alle gefallen stikken better as dy âlde. Dit hiene wy dus 8 jier earder dwaan moatten...
+ 0 - 1 | § ¶Nije fotokes fan it hûs
It giet goed mei de ferbouwing fan ús hûs want at it goed is wie juster de stukadoar ek al wer foar it lêst. It wachtsjen is no op de trep en de kezinen. Foar de leafhawwers dy't ús ferbouwing fan tichtby meimeitsje wolle haw ik wer in moai nustje fotokes op de side setten. It binne net de meast briljante fotokes mar ja, der feroaret ek net in soad op dit stuit. It bin bynammen in hiel soad pvc-buiskes en wat gipsplaten. At it goed is komme der dizze wike noch wat gas en wetterliedings troch it hûs. Sawol foar de kraan as foar de sintrale ferwaarming. It sil my benije. Moarn sil ik mei de freondinne wer efkes op ûndersyk om de lêste details dien te meitsjen.
+ 1 - 0 | § ¶It komt troch Pyt...
Ek dit jier hiene wy wer in moanne dy't fierstente hyt wie en in moanne dy't fierstente wiet wie. Jim sille wol troch hawwe dat soks net normaal is. Mar der is in ferklearring foar fansels...
+ 1 - 0 | § ¶Aldledefeest
Juster wie it jierlikse âldledefeest fan Bernlef. Mar om't ik sneon earst noch efkes it balskoppen sjen woe spile it grutste part fan it âldledefeest him hjoed ôf fansels. It wie gesellich en der wiene aardich wat âldleden fan myn generaasje. Us âlde bestjoer wie sawat kompleet mar ek âlde freonen kamen wer efkes del. It pearkesgehalte wie yn alle gefallen heech wat bewiist dat Bernlef it goed docht op de relaasjemerk. Myn freondinne haw ik dêr ek opdien fansels mar dy wie nei al it gesloop sels ek sloopt dat sy is mar betiid op bêd gien. No ik haw it noflik oant it ein fan de jûn úthâlden en it is dat der noch tapers wiene mar oars hie ik it ljocht útdwaan kinnen. Dat moast fansels ek wol want omt myn dynamo fan de fyts dondere is kin ik allinnich noch by deiljocht fytse. It ienige probleem is dat ik no daalks om 14.30 wer op it wurk ferwachte wurd. No ja, moarns in keardel, middeis ek in keardel fansels. Dy netten droechje ik letter wol...
+ 0 - 1 | § ¶Tegearre op de bank
Hjoed ha wy wer lekker oan it slopen west yn it nije hûs. Ik hie sa myn nocht fan dy lytse kutkeammerkes boppe dat ik se der ien foar ien allegear útfeecht haw. Op in gegeven moment kaam myn suske del mei de freon. Ik tocht dat se efkes nei ús foarderings sjen woene mar it die bliken dat hja mei in oar doel ús kant op kaam wiene. Myn suske sil oar jier boaskje. No dat is fansels hardstikkene moai want in moai feestje dat sil dizze jonge him net rap foarby gean litte. Faaks kin ik ek noch oanklampe by Marcel syn frijgesellefeest dan is it hielendal ien grut feest. Rinkje, by dizze fan herte lokwinske en Marcel, by dizze in soad sterkte...
+ 0 - 1 | § ¶Hans Alders net langer ûntspoard
In bytsje nuver is it wol. Arriva hat hjoed de nammen fan de nije treinen bekend makke. Sa kinne wy ynkoarten tusken Starum en Rodeschool plaknimme yn de Abe Lenstra trein, de Foppe de Haan trein en de Riemer en Annie trein. En dat wylst dizze treinen dus nea yn it Fean ride sille. Dêr sille de Cambuurfans bliid mei wêze at alle oeren wer sa'n Fean-ikoan harren stasjon binnen daverjen komt. Der is fierder in ferskaat oan bekende en minder bekende noarderlingen dy't in trein nei him as har ferneamd seach. Wat wol opfalt is dat Hans Alders, dy't oars altyd sa foar de Sweeftrein pleitet, no ynienen wol in gewoane trein nei him ferneame lit. Ferneamd treintsjesgek Ed Nijpels krijt dy ear oars net. Spitich dat der gjin Bernleftrein by is trouwens...
+ 0 - 1 | § ¶De tûke terrorist
Nee dit is net de nijste Suske en Wiske dy't myn samling wer kompletearret mar it is mear in dûbelsinnige tekst dy't slacht op wat ik krekt meimakke haw. Ik siet hjir yn de tolve ûnder ien kap rêstich wat te kompjûterjen doe't ik ynienen in oarlochs leven hearde flak boven myn holle. Ik hie it idee dat in fiere neef fan Mohammed Atta it op ús foarsjoen hie. It lawaai waard lûder en lûder en ik wachte foar it raam op de klap. Mar se kamen net fan foaren mar fan efteren en it wiene ek gjin moslims mar it wie de traumahelikopter. Ik tocht dat der in ûngelok bart wie op de rûnwei ofsa mar hy sakke al earder en sa sette de piloat 'm del tusken de hûzen yn in strjitte parallel oan dy fan ús. Ik tink, ik moat der mar efkes hinne dat as in wiere ramptoerist haw ik my efkes tusken de minsken jûn. Dêr stie dy grutte giele helikopter op in lyts boartersfjildsje midden tusken de hûzen. Net ien wist wat der oan de hân wie mar in eintsje fierder wie ek wat reboelje. Doe die bliken dat der in lyts jonkje fan 7 jier sa bliid wie dat er syn heit thús kommen seach dat er de tûke wêr't er op siet efter him liet en sa út de beam foel. De net sa tûke âlden ha it bern doe de hûs yn tilt skynt it. En neffens my haw ik op EHBU-les eartiids leart dat je sa'n slachtoffer net ferplakje moatte. No ja, it jonkje is mei de siikenauto ôffierd en de traumahelikopter hat it boartersfjildsje efkes ûntdien fan smoargens wêrnei't er wer it romme loftrûm keas. Ik hoop dat it jonkje it oprêde sil en dat alles goed komt. Safolle bern binne der oars ek al net mear dy't noch yn beamkes klimme. Dêr hat de playstation wol foar soarge...
+ 0 - 1 | § ¶Frysk tonger core yn de oanbieding
De earste skiif fan de Fryske tongercore band Jitiizer is no folslein útferkocht. Dat barde earder ek al mei de earste skiif fan Sebeare. Beide bands ha dizze skiif no as mp3 op de thússide stean. Fansels in goedkeape en legale wize om jim Fryske muzyksamling wat út te wreidzjen. Frysk tonger core is noch altyd de moaiste kompakt skiif fan Jitiizer (neat ten neidiele fan dy Hendrik hear). Op dizze skiif stean topperkes lykas Drankula "Do hearst se wol sizzen''It is in fampier!'' Ik tink fan net want dy fent dy stjonkt nei bier." en Bûter, brea: "Wêr giet dat mei ús lân nei ta, no't wy fan dy stumpers ha. De Friezen binne gjin Friezen mear, dit giet te fier, dit komt sa net klear!" mar ek fansels de Knyn (basearre op in berneferske) dy't op lettere skyfkes wol gauris wer werom komt. Readkapke, wêrfan it yntro gauris troch net Friezen oan Metallica tabedield wurdt. It moaiste nûmer op de skiif is fansels Heu! Tsjin de krêft en de ynfâld dêrfan kin gjin inkeld nûmer fan Jitiizer op. Wolle jim de ferskes allegear harkje as delhelje, gean dan efkes nei www.fryskemp3.nl en lit jim modems switte. Jim helpe Jitiizer dêrmei ek wer omheech yn de band top 11. Fansels soe ik it ek leuk fine om fan jim in reaksje te krijen op de moaiste nûmers fan Jitiizer of faaks fan in oare band want ik haw aardich wat Fryske skyfkes...
+ 0 - 1 | § ¶UEFA lotterij
Fannemoarn wie de lotting foar de UEFAcup. Dêrby is it Fean keppele oan it Italjaanske Parma, it Spaanske Osasuna, It Frânske Lens en it Deenske Odense. At der gjin nuvere dingen barre moatte wy út nei Lens en Odense en dit bin beide plakjes dy't mei de auto relatyf ienfâldich te dwaan binne. Sa is Odense neffens de ANWB mar 5 oeren en trije kertier riden. Lens is mar 4 oeren en 28 minuten riden dus dat is noch tichter by. It soe moai wêze at it sa bliuwt. Parma en Osasuna bin fansels fan in hiele oare kattegoary en foar my op dit stuit finansjeel net helber bin ik bang...
+ 1 - 0 | § ¶Plúmkejeien bliuwt der efkes by
Ik haw it de lêste tiid frij wat drok. Op 'm sels in goeie saak fansels mar dêrtroch komt der fan it plúmkejeien op dit stuit net in soad terjochte. Ik haw dit jier noch mar ien kear west leau'k. No ja, eins twa kear mar doe hie de gemeente mient de sporthal oan in pear foljeballers út te lienen. Fannemoarn betiid fan bêd ôf omdat ik miskien wol nei de Rottefalle soe mar dat bliek net nedich te wêzen. Dêrnei mei de saak dwaande en straks om 22.00 mei ik wer oan it wurk op de Skandinaviëwei. Nei it iten hie ik gewoan efkes gjin sin om te plúmkejeien en dat is apart want op 'm sels mei ik graach efkes myn agresje der útslaan. No ja, dan moat it mar wer ferbaal op de webloch...
+ 0 - 1 | § ¶Hulde foar Mark en Ruud
Van Basten hat it no hielendal ferbruit by tal fan ynternasjonale topspilers. Earst jout er oan dat der foar Van Bommel en Van Nistelrooij gjin plak mear is yn syn oranje. No reitsje der in pear minsken blesseart en dan bin hja ynienen wol wer goed genôch. Hulde foar Mark en Ruud dat sy net mear ûnder Marco spylje wolle en de poat stiif hâlde. It wurdt tiid foar in nije bûnskootzj dy't wol mei elkenien troch ien doar past. In bûnskootzj dy't wol bewezen hat dat er op in grut toernoai de priis pakke kin. Rinus is al dea, dan bliuwt der noch mar ien oer: Foppe de Haan! Syn maat Riemer kin dan mei Annie moai meihelpe. Foppe krijt de twa âld Feanspilers Klaas Jan en Ruud wol yn ien tiem tinkt my...