+ 0 - 0 | § ¶Rotte R'dammers
De Nederlânske fuotbaloanhang hat harsels wer op de kaart setten fannejûn. In swikje relskoppers dy't Feyenoord leaver net yn Frankryk sjoen hie sloopte de stêd en waard dêrnei troch de Frânske plysje it stadion yn wurke. Dan wiene hja mar efkes út de stêd wei. In hearlik ôfskosysteem fansels want no waard net de stêd sloopt mar it stadion. En at it al net dramatysk genôch wie nei al dat slopen en de 3-0 op it fjild brocht de plysje ek noch triengas op de tribune. No sit Feyenoord noch mear yn de rats wylst se hjir eins net in soad oan dwaan koene. Sy ha dy minsken net meinaam en sy woene hja ek net yn it stadion ha. Feyenoord wurdt no miskien oanpakt wylst de flater ek foar in grut part by Nancy leit. Ik snap dat fan dy 'supporters' trouwens ek net. Je gean dochs net je eigen klub kapot meitsjen. Of soene it oanhangers fan in oare klup wêze mei Feyenoordmouhimden oan???
+ 0 - 0 | § ¶Wy ha it wer yn eigen hân...
Nei de oerwinning yn Arnhim wêrby't it yn de earste helte wat dreger gie as yn de twadde dogge wy yn de kompetysje wer leuk mei. Mar der is noch mear goed Fean-nijs. Wy ha wer in mooglikheid krigen om Europeesk te oerwinterjen. Wy moatte dan wol thús mei trije goals ferskil winne fan Lens. Dêrmei soene wy dan sels noch twadde wurde kinne yn de poel. Parma is wer Italjaansk winner wurden yn de 92ste minút neidat hja al foar de tredde kear yn dizze poel mei 1-0 efter kamen. Mei 9 punten en 6 foar en 3 tsjin bin hja no al poelwinner. Lens hat 4 punten in in doelsaldo fan 5 foar en 4 tsjin. Mei ús trije goals ferskil soe dat 5-7 wurde. Osasuna moat noch tsjin Parma en at Parma thús harren sportive plicht docht dan bliuwe dy ek op fjouwer punten stean. Der fanút geande dat ek dizze wedstryd 2-1 wurde sil soe Osasuna dan ek op 5-6 komme. Odense is al útfuotballe. Hja hawwe 4 punten en in doelsaldo fan 5-6. Mei in oerwinning fan it Fean mei 3-0 (hattrick Alves) soe de stân sa wêze kinne:
- Parma 4-12 8-4
- It Hearrenfean 4-4 4-4
- Osasuna 4-4 5-6
- Odense BK 4-4 5-6 (Osasuna hat fan Odense wûn)
- RC Lens 4-4 5-7
Mocht Osasuna dochs in punt helje as mear tsjin Parma dan soene wy sakje nei plakje nûmer 3. Mei oare wurden: Mei syn allen nei it Fean en raas dy bal trije kear tsjin it net oan!!! Mocht ik de UEFA-rigels net goed begrepen ha dan spyt my dat, dan wurdt it sipelskilen...
+ 0 - 0 | § ¶Fryske fiersichten
De wekker gong fannemoarn wer betiid. Al om 5.15 waard ik rûch út de sliep wei helle wylst ik der op dat stuit noch mar krekt 3 oerkes yn lei. Juster wie ik mei in stikmannich Friezen om utens nei de Fryske fiersichten west. Kommisaris Ed Nijpels kaam nei Grins ta om dêr de Friezen om utens de kâns te jaan om ideekes oan te dragen. Dizzen soene dan mooglikerweis útfierd wurde kinne mei jild wat de provinsje krije wol troch it ferkeapjen fan de oandielen NUON. Dit alles fûn plak yn de mediacentrale. Yn dizze âlde illektrisiteitssintrale, bekend fan de pipen dy't jierrenlang de Grinzer loftline ynfolling joegen, wie in smûk plakje kreaëarre troch yn de gigantyske sintrale hal in gerdyn sakje te litten. Op de gearkomste kamen in lytse hûndert minsken ôf skat ik. Ed Nijpels iepene it kongres mei twa wurden Frysk wêrnei 't er spitigernôch werom foel op it Hollânsk. Myn earste idee wie dan ek om de man in taalkursus te jaan fan de sinten. Nijpels lei út dat se wat oandielen NUON ferkeapje woene en dat dy 1,5 miljard euro opsmite soene. Dêr moast fansels wat mei barre en dus wiene der ideekes nedich. Ik hie yn it foar gjin echte ideekes mar ik liet it fansels allegear wat yn my omgean en sa kaam der sa no en dan noch wol wat nei boven. It wie dan ek spitich dat der by de ferskate harsenskrabbersplakjes yntelektuelen stiene dy't leaver yn diskusje giene oer in idee dan it domwei op te skriuwen. No ja, guon fan myn ideekes bin yn elk gefal noch wol hingjen bleaun wol ik leauwe. Sa hie de Ljouwerter krante ek al wer in stikje dêr't myn namme yn foarkaam haw ik fernaam. Ik haw de krante noch net lêzen, dy leit noch yn de brievebus, dus ik sil dat moarn fierder wol sjen. Uteinlik hie de jûn faaks net it rendement wat der yn it foar fan ferwachte wie mar it wie dochs wol efkes in aardichheid om ris mei guon minsken wat ideekes út te wikseljen. Ek nei de fiersichten wiene der noch genôch mooglikheden om fierder te sjen ûnder it genot fan in drankje. Al ûntbruts it dêr fansels wol oan in fijn slokje bearenburch. Kalmoes is dochs lang sa lekker net as de bearenburch fan de Widdo. Ik bin benijd hokker plannen der úteinlik útfierd wurde sille, al soe it my neat ferbaze at de plannen al lang makke binne en dat dit hiele barren allinnich mar is om it ien as 't oar ûnsinnich plan fan in hotemetoat te rjochtfeardigjen...
+ 0 - 0 | § ¶Yn de goate
Fannemoarn wiene wy oppenij op 'e Rottefalle en no wiene timmerman Cor en de mannen fan de nutsoanslutings der ek wer. It die bliken dat it noch in hiele put wie om ús hûs fan gas, kabeltv en tillefoan te foarsjen. Wetter hiene wy freed al krigen krekt lykas stroom. No wie it de bar oan de wat minder dringende saken. De mannen troffen it net want om hjir en dêr by te kinnen moasten hja ek in gat dolle fan sa'n 1,5 meter djip tusken ús hûs en dat fan de buorlju. Dêr koene hja mei de kraan net by dus dat moast mei de hân. No ja, nei it graven fan tal fan gatten en sleuven slagge it de mannen dochs om de lêste triedsjes fêst te meitsjen. No mar ôfwachtsje at wy ynkoarten ek wat te sjen krije op de kabel. Ek de tillefoan kin ynkoarten omset wurde mar dêrfoar sil ik noch wol efkes nei de KPN moatte tinkt my. Yn de hûs waard ik fansels konfrontearre mei de minpunten fan myn plamuurwurk fan juster. No, dêr wie ik sels ek al efter dat soks net sa tûk west hie. Oeren en oeren haw ik der op omskjirre mar it plamuur wie hurd op de bealch en sa bin ik dus noch net iens healwei. Cor wie yntusken drok dwaande om foar ús in nije dakgoate te meitsjen. Wer in fijn stikje fakwurk. It hat foarlopich ek syn lêste putsje west want it measte timmerwurk sit der no wol op. Hy komt letter noch in kear werom foar de finsterbanken en om de dakgoate op te hingjen. It wurd is no earst oan de freondinne dy't ús de kommende wiken in skilder útsparje sil...
+ 0 - 0 | § ¶Tûke Thaeke
Fannemoarn waard ik brút troch skoanmem út de sliep roppen. De freondinne moast der ôf om te kuorbaljen dat sadwaande stie ús wekster al ûnderoan de trep. No ja, sa koe hja my moai by it hûs ôfsette dêr't ik yn it kantoar de gatsjes stopje soe. Mar ik wie flau fan dy krimende plamuur dy't hieltiten wer lytse gatsjes efter liet. Dat ik tocht, ik meitsje der mar in bultsje op, dan skjirje ik it yn ien kear wol glêd. No dat hie ik fansels better net dwaan kinnen want dy rottige plamuur woe der foar gjin mooglikheid ôf fansels. Sa wie it middel slimmer as de kweal. Ik wie dan ek bliid dat ik wurkje moast om 14.00 yn Grins. Sa koe ik it skjirjen efkes efter my litte...
+ 0 - 0 | § ¶Dochs mar laminaat
Ik kin der no net langer omhinne. Yn de hal soene wy al laminaat lizze mar no't de freondinne de ûnderlaach al oantúcht hat moat ek myn kantoar mei dit selde laminaat bedekt wurde. De freondinne hat my út it wurk helle wêrnei't wy nei de Rottefalle west ha. Dêr ha wy flink oan it skjirjen west. No hie ik op 'm sels altyd al wat it mier oan skjirjen mar dat is der net better op wurden nei hjoed. Wat in pokkewurk is dat sis. Earst plamure, dan skjirje en dan blykt it plamuur krompen te wêzen. Kin der wer plamuurt wurde en dus wer skjirre. Krekt sa lang oant it flak is. No dat is in bealch fol wurk fansels. En sûnder kachel is it ek noch bêst wol fris yn it hûs want wy helje no de stroom by de buorlju wei en wy wolle harren stoppen der net út kletse litte fansels. Fannejûn bliuwe wy lekker by myn skoanâlden sliepen, dan kin wy moarn wer betiid út de fearen...
+ 0 - 0 | § ¶Spanning en sensaasje
Hjoed is der flink wat omdold by ús hûs. Sa hawwe se it wetter oppenij oansluten en ek de stroom komt no yn ús nije meterkast binnen. Dy hellen wy earst noch út de wurkpleats mar dat is no net mear mooglik. Us ynstallateur moat no noch efkes soargje dat der in ferbining komt tusken de meter en de stoppen en dan ha wy stroom en stromend wetter. De lêste latsjes op de ramen sitte no ek te plak dat it begjint al aardich smûk yn de hûs te wurden haw ik begrepen. Wy sille it moarn efkes mei eigen eachen oanskouwe...
+ 0 - 0 | § ¶Winners - Ferliezers
Wat wie it wer in hearlik debat fannacht om 24.00 oere. Wouter Bos miende dat de koalyzje dik ferlern hie en dat de trije loftse partijen wûn hiene. Tsjonge jonge wat pronket dy man mei in oar syn fearen. Lit it dúdlik wêze dat de PVDA ûnder lieding fan Wouter Bos mear ferlern hat dan It CDA en de VVD tegearre (10-6+3). At minsken dan neffens Wouter Bos de koalyzje net mear wolle, dan wolle se de PVDA dus noch folle minder. Dan Andre Rouvoet dy't mient dat se no net mear om him hinne kinne omdat er de grutte winner is. Fan 3 nei 6 is fansels in moai risseltaat bêste man. Mar 6 stimmen betsjut no net echt in partij dêr't je rekkenskip mei hoege te hâlden. It bin der mar kwalik mear as de partij fan de kastrearde barchjes. Femke is ek wer in sit kwyt mei har grien linkse rakkers. De ienige dy't oan de lofterkant wint is de SP dy't dêrmei de tredde partij fan Nederlân wurden is. Dêrmei sit de SP ûngefear yn it selde boatsje as de FNP yn de Fryske steaten. Mar lit it al efkes dúdlik wêze dat it by it winnen fan de ferkiezings net giet om it ferskil tusken no en doe mar om de absolute oantallen. Dêrmei bin de grutte winners fan de ferkiezings: 1 CDA, 2 PVDA, 3 SP, 4 VVD dan in hiel skoft niks en dan 5 PvdV, 6 Grien Links, 7 Christenunie, 8 D66, 9 SGP/PvdD. Sa is it en net oars!
+ 0 - 0 | § ¶Koalyzjefoarming
Wy ha wer nei de stimbus west mei ús allen. De tradysjonele partijen ha wat ferlern. De LPF is wer fuort en de proteststimmers fan dy selde LPF ha no wer in nij plakje fûn by Jan Marijnissen, de tovenaar út Oss. Sa swalkje hja fan rjochts nei lofts. It CDA bliuwt de grutste partij mar hat minimaal 2 partijen nedich foar de mearderheid. Der is gjin echte loftse mearderheid en ek gjin echte rjochtse mearderheid. Wat dat oanbelanget jout de kiezer wol oan dat wy earne yn de midden eindigje moatte. It soe dan ek net mear as logysk wêze dat der úteinlik in kabinet CDA, PVDA, VVD útrollet. Wêrom in pakt slute mei de Christenunie mei syn 6 stimmen at je in folle sterkere koalyzje foarmje kinne mei de trije grutte 'middenpartijen'. Fansels moat Balkenende foar de foarm ek efkes mei Jan Marijnissen prate mar dat trúkje kent er noch wol fan ferline kear. Ik tink dat it CDA mei de VVD fierder gean moat en dat de PVDA der dan mar foar soargje moat dat it in 'bytsje sosjaler' wurdt...
+ 0 - 0 | § ¶Wy hâlde de fleur der mar wat yn
Fannemoarn betiid wiene wy al yn Sint Nyk foar de útfeart fan pake Thaeke. Goed njoggen oere wiene wy al by myn âlden want hja moasten al betiid nei Doniahiem ta om pake op te heljen. Wy gongen wat letter dy kant út. Om 10.00 soe der kondolaasje wêze efteryn it tsjerke en dan soe der om 10.30 in mis plakfine. Wy kamen om 9.45 by it tsjerke oan en koene doe noch krekt ús heit mei syn sân bruorren sjen dy't pake foar it lêst nei it tsjerke riden. Neidat pake efteryn it tsjerke delset wie foarmen beppe en alle omkes en muoikes in lange rige (24 persoanen) dy't stik foar stik kondolearre wurde koene. It mei dúdlik wêze dat soks net sa hiele hurd giet. Gelokkich wiene wy rojaal op tiid en koene wy sa trochrinne. Fan oare neven en nichten dy't wat letter kamen hearde ik letter dat se in moai skoft bûten yn de kjeld stean moasten en dat der in rige tot de dyk oan ta foar it tsjerke stie. Sa waard it net 10.30 dat de misse begûn mar in bytsje letter. De pastoar hie rap útrekkene dat it sa'n 30 tellen wie foar elts jier dat pake libbe hie. Mei syn 94 jierren bin je dan fansels gau trije kertier fierder. Neidat pake troch de 8 soannen nei foaren brocht wurden wie mocht ik mei noch fiif neven in kears oanstekke rûnom pake. Pastoar fertelde der dan wat moais by. Fansels wie der yn de misse fierder ek noch plak foar tal fan anekdotes ferteld troch de nichten, de muoikes of troch pastoar sels. Nei de tsjinst waard pake oppenij troch de 8 bruorren meinaam nei bûten. Dêr krige er noch ien kear de gelegenheid ta in lêste ronde ûnder it gesang fan in aardich úttinne shantykoor (de 5 bruorren Kuipers stiene der net tusken ommers). Nei it ôfsakjen fan de kiste en in tankwurdsje fan omke Catharinus koe der yn it sealensintrum noch efkes neipraten wurde. Pake woe graach dat wy de fleur der yn hâlde soene, dus dat ha wy dien. Rêst sêft Pake, wy bin noch altyd grutsk op jo!
+ 0 - 0 | § ¶Nije telling, nije kânsen
By it plúmkejeien ha se sûnt dit jier it rallypuntsysteem ynfiert. Eartiids koe men allinnich punten meitsje op de eigen opslach. No is eltse flater in punt foar de tsjinpartij. Wie men eartiids mei in partij 15-13 gau in heal oere ûnder de pannen. No is in útslach fan 21-19 frij gewoan en binnen 5-10 minuten berikt. Ik fyn dat spitich want it is no net mear mooglik om immen hielendal kapot te spyljen. Boppedat wurdt de neidruk mear lein op 'e ferdediging omdat oanfallend spyljen gefaarlik is. Risiko nimme mei de opslach kost dy fuort in punt by eltse misser. Wat my oanbelanget draait men dit dan ek rap werom. It hat fansels ek foardielen. Ik kin no aardich meikomme tsjin de bettere spilers. Sa haw ik hjoed twa inkelspultsjes spile en beide kearen ferlear ik mei mar 2 punten ferskil. Net omdat ik sa goed wie, mar bynammen troch flaters fan de tsjinpartij...
+ 0 - 0 | § ¶Gjin neigesetsje?
Op snein is it tradysje dat wy op it wurk Sineesk iten bringe litte. Ik bin dêr fansels ien fan de grutste iters en dêrneist bin ik ek noch leafhawwer fan de Easterske keuken. De besoarchkosten hoege wy dan ek net faak te beteljen. De lêste tiid bestel ik gauris in Yndyske riistafel. Dat is miskien wol wat djoerder mar je ha dan in grut ferskaat oan iten en it is oe sa lekker. In lekker bakje hinnesop om mei te begjinnen, dan bami mei rendang, lekkere stikjes fleis, in pear hinnepoaten yn sambal en wat gado gado. As neigesetsje heart der dan noch in lyts bakje iis by te sitten. Dy wiene hja dizze kear fergetten. Ik makke my dêr nochal drok om fûn men, ik hie oars genôch te iten. No dat sil bêst mar ik haw betelle foar in neigesetsje, ik haw nocht oan in neigesetsje en soks wurdt my dan ek noch ûnthâlden. Ik haw noch mei de Sinees belle mar dy wie yn gesprek. Faaks wiene der mear minsken dy't harren neigesetsje net krigen hiene. Oare kear dan mar in sorbet der by as kompinsaasje. As neigesetsje dan mar in pakje pjiskeyoghurd...
+ 0 - 0 | § ¶Wy binne grutsk op jo
Nei't ik de freondinne ôfset haw by ús nije hûs foar wat plamuur- en skjirwurksaamheden bin ik trochriden nei Sint Nyk. Mem wie net thús mar heit wie der al. Hy hâlde 'm der frij goed ûnder en hy hie ek noch tiid oer hân om oan ús Frânsk balkon te wurkjen. Nei in hiel petear bin ik fierder gien nei Doniahiem dêr't ik earst yn de gong al lâns pake syn rollator en pake syn pet moast om yn de keamer te kommen. Beppe hie besite fan tal fan (skoan)dochters. Pake lei op de sliepkeamer en hy lei der hiel kreas by. Mei Beppe en myn muoikes ha wy it der noch efkes oer hân. Sa krige ik ek tal fan roubrieven ûnder eachen. Dêr sieten ek in pear hiele moaie tusken. Dat selde jild foar de advertinsje yn de Ljouwerter krante. In kreaze Fryske advertinsje mei as kop: "Wy binne grutsk op jo". No, grutsk dat bin wy seker. Net allinnich op pake fansels, mar seker ek op beppe. Jûns nei iterstiid bin ik werom riden nei de Rottefalle om de freondinne op te heljen. Myn holle stie net mear nei plamuurjen dat wy bin fuort mar troch gien nei Grins.
+ 0 - 0 | § ¶Pake Thaeke (1912-2006)
Justerjûn krige ik in kertier foardat ik nei myn wurk soe in tillefoantsje dat myn pake ferstoarn wie. Fansels hie der dy moarns al in lytse warskôging west mar soks falt je dochs altyd nuver op it dak. Pake Thaeke, dêr't ik nei ferneamd wurden bin, is 94 jier wurden. Nei in tiid fan hurd wurkjen hat er noch tal fan moaie (bourgondyske) jierren hân en wy mei him.
+ 0 - 0 | § ¶Tele2foon terreur
Ik waard nies krekt belle troch in muts dy't sei foar Tele 2 te wurkjen. Hja frege oft ik in KPN abonnemint hie wat ik befestigde. Dêrnei frege hja at ik tefreden wie oer dat abonnemint wat ik opnij befestigde. Dêrnei frege hja oft ik ek oerstappe woe nei Tele 2 om sa goedkeaper te skiljen. Ik sei dat ik dêr neat foar fielde. Sy frege my wêrom net. Ik haw har ferteld dat ik op dit stuit in tefreden klant wie en dat se dat krekt ek al frege hie. Wêrom dan oerstappe. Boppedat sei ik dat ik in trouwe klant wie. Har antwurd wie dat ik dan ek in trouwe klant wurde koe fan Tele 2. No dêr fielde ik neat foar en al dy administrative rompslomp foar dy pear kutsinten (want safolle ferbelje ik net, ik doch hast alles online) haw ik ek gjin sin yn. No sy koe my net begripe. Ik haw har ferteld dat sy my dan mar net wer belje moat. Hearlik sokke gesprekken...
+ 0 - 0 | § ¶190
Fannemoarn wie ik om 6.00 oere wekker wurden. Ik wie juster al om 20.00 op bêd gien dus ik lei al in pear oerkes. Dochs hie ik noch gjin nocht en gean fan bêd. Sa haw ik it noch oant 9.00 rekke kinnen. Doe hie ik 13 oeren efter inoar op bêd lein en dêrmei de nacht fan moandei op tiisdei hast wer goed makke. Hjoed soene wy ris yn Dútslân sjen at dêr noch wat te keap wie. Ek woene wy de Ford Focus efkes útprobearje. No dat lêste foel seker net ta omdat wy hast oant Leer ta te meitsjen hiene mei wurk oan de wei wêrtroch't der in beheining wie yn de snelheid fan faak mar 80-100 kilometer yn it oere. Yn Leer ha wy efkes wat omstrúnt mar net echt wat leuks sjoen. Dêrnei mar wer yn de auto en sa op nei Oldenburg. Gelokkich wie doe de beheining rap efter ús wêrnei't it pedaal tsjin de auto oantreaun wurde koe. Yn it sok fan de man foar ús gie de teller hieltyd mear nei de 200 ta mar spitigernôch bleau er op 190 kilometer yn it oere heakjen. Bêst kreas foar ús dieseltsje want it âlde Opeltsje hâlde der by 165 al mei op. Dan skodde der ek noch al wat wêr't ús Focus krekt docht as stean wy stil en draait de wrâld ûnder ús troch. Uteinlik ha wy neat kocht wat it neamen wurdich wie mar wy ha noch wol efkes lekker iten by de Taj Mahal yn Grins wat ús tige nei it sin wie. Om 22.00 mei ik daalks wer oan it wurk...
+ 0 - 0 | § ¶Hurde (w)erker
Mei in slieperige kop skriuw ik dit stikje. Fan moandei op tiisdei moast ik wurkje tusken 22.00 en 6.00 en sa kaam ik fannemoarn thús om 6.30. Ik koe doe rap efkes wat ite en dêrnei bin ik al wer op de fyts stapt nei it stasjon. Om goed 9.00 wie ik noch foar myn skoanheit al op 'e Rottefalle. Cor wie al wer drok oan it wurk en it skeat al aardich op. Hjoed soe it wêze en soene de lêste resten fan de erker oan kant moatte. Yn de erker komt de útgong fan ús nije rioel de wenning út en om dizze oan te sluten op de riolearing moat dus earst de fundearing fan de erker der omwei slein wurde. De boppeste laach stiennen wie der samar ôf mar nei ûnderen ta waard de fundearring hieltyd breder en taaier. Mei in moker en in ferskaat oan koevoeten en brekizers besocht ik stikje foar stikje de brut kapot te slaan mar der siet safolle semint omhinne dat it net meifoel. Uteinlik haw ik hast de hiele erker útgroeven tegearre mei skoanheit. Doe koene wy fan twa kanten wurkje en sa joech úteinlik in part fan de konstruksje beliis. Doe hiene wy in begjin en ynienen hie ik der ek wer wat niget oan. Nei in pear stikken bôle krige ik 'm der yn in oerke as wat folslein út. Om fan it rotding ôf te wêzen ha wy 'm fuort mar op de karre laden en nei it stoart yn Drachten brocht. Sa wie ik om goed 17.30 wer yn Grins. Al mear as 24 oeren efter inoar wekker en dwaande bin ik no hast wol ree om op bêd te gean...
+ 0 - 0 | § ¶Kameleon II
Lei de earste Nederlânsktalige kameleonfilm al wiken lang foar mar €5,- yn de oanbiedingsrekken fan de mediamarkt. No wie ek it ferfolch, troch de makkers oantsjutten as Kameleon II (mar eins diel IV), sa fier yn priis sakke dat ik de sinten der wol foar oer hie. Sa wie ik by De schippers van de Kameleon ien fan de earsten dy't de film seach op in geheime parsefoarstelling yn Amsterdam tegearre mei Pier en in man fan it filmblêd Screen. No wie ik ien fan de lêsten dy't it ferfolch seach. De measte minsken sille wol witte dat ik ien fan de minsken bin efter de Fryske kameleonfilm, in multimedia protest tsjin it gebrûk fan de Hollânske taal yn de Kameleonfilm. Hielke en Sietse soene yn dy tiid ommers nea Hollânsk tsjin heit en mem praten hawwe en troch dit oan te passen joech filmer Steven de Jong in folslein ferkeard byld fan Fryslân. Us film luts folle sealen yn Fryslân, Hollân, Belzenlân en Dútslân (dêr't de Tigerhai ek populêr skynt te wêzen). De makkers fan de Nederlânske film koene dêr mar min oer dat sa dwaande stean wy noch altyd foar it gerjocht, no al sa'n fjouwer jier lang. No efkes wat mear oer de ynhâld fan film II. Steven de Jong hat krekt as yn 'De Schippers' stikjes út de Kameleonboeken brûkt om dêrby syn eigen film te meitsjen. De reade tried yn de film is de twilling en harren boat. Mar dêr hâldt hast al it Kameleoneftige ek al wer mei op. Wat ik mis yn de film binne de fjouwer jonges yn in boat. Louw dy't yn de smederij komt en mei giet te faren. Se pikke Kees (myn rol yn de Kameleon sjocht yn it waar) op by de mûne en dan bart der fan alles. Yn de films fan Steven komt Louw net iens foar. De jongens moat yn de film fereale wurde op famkes wat yn de boeken nea foarkomt. Kees is ynienen gjin maat fan de skippers mar in nuvere pipo dy't mei in carbidbus oan it sjitten is (better goed pikt dan min betocht). Achterfolgings om de mûne komme yn de film net foar wylst dat yn de boeken altyd wol sa is. Boppedat hat Steven in soad karakters geweld oan dien. Mem Klinkhamer is net de stoere Fryske mem dy't altyd efter har man stiet. Mûner Dykstra is net de wat noarske man mei in goed hert (by ús wol goed delset troch Dr. Deurholt). Gerben is noch altyd te âld. Sjoerd is net de slome postsegelslikker mar begjint ek al op it leafdespaad te gean wat folslein neat taheakket oan it ferhaal fansels. Dat Steven fierder de boeken net goed lêzen hat mei dúdlik wêze. Sa is der mar ien mûne yn Lenten (Marherne), mar yn de film sjogge wy der hyltiten twa. Der sit boppedat ek gjin omloop om de mûne. Ien fan de grutste flaters is eins noch wol dat se de Kameleon brûke om in skip te lûken. Yn hast alle boeken komt wol nei foaren dat de Kameleon in opdrukker is en dat er net lûke kin omdat dan de efterkant ûnder wetter lutsen wurdt. Yn de film lûke hja mei gemak in skûtsje. In tsunami dy't de stiennen man oerstige soe makket de waansin kompleet. Steven de Jong hat mei de Kameleon II in ûnderhâldende film makke mei slechte aktearprestaasjes mar neffens my is it mar goed dat Hotze de Roos dizze film net mear ûnder eachen krije sil.
+ 0 - 0 | § ¶Grûnfarve
Hjoed wie yn tsjinstelling ta juster wer in stik produktiver. Wy wiene al betiid ôfset nei de Rottefalle om dêr wat mei it hûs dwaande te kinnen. In grut part fan de troch ús timmerman Cor ynsleine stikken hout moast noch yn de grûnfarve strutsen wurde. Sa haw ik in stikmannich kezinen bydel west. Myn skilderkwaliteit binne net om oer nei hûs te skriuwen, om net te sizzen dat ik in soart skildersezel bin. Mar ach, it wie noch mar it ûnderste laachje en der kin altyd noch wol wer wat fan makke wurde troch in wat bettere hantearder fan de kwast mei ik hoopje. Uteinlik bin ik ek noch wol tefreden mei it resultaat. It hûs liket ek fuort in stik frisser no't de houtkleur ferfongen wurden is troch it maagdelike wyt fan de grûnfarve. Spitigernôch krigen wy noch al wat fisite wêrtroch't ús dei noch wat minder produktyf wie as wol wêze kint hie mar ach. At je sa'n moai hûs ha dan wol je soks ek efkes sjen litte fansels...
+ 1 - 0 | § ¶In dei goed besteed
Nei de kater yn Breda komt hjoed de kater yn Grins. Juster haw ik miskien krekt wat te goed myn bêst dien by it ferdrinken fan ús fertriet. Myn holle fielt as in bowlingbal en ik moat by eltse stap oppasse dat ik net omfal. Gelokkich hat de freondinne in drok programma útstippele sadat der net genôch tiid is om my te fervelen. Earst nei de Decorette om it bestelde behang op te heljen. Dat wie der dus net mar dy oksen hiene ús dat ek net efkes witte litten. Doe nei de Kwantum om efkes in stikje behang te besjen mar dat wie it ek krekt net. Doe nei de Hornbach om dêr efkes de skanierkes fan de Louvredoarkes te ruiljen. Wy hiene de ferkearden mei naam dat sadwaande. By de Hornbach stie ek in fiskkarre dat nei twa porsjes kibbeling mei saus (ravigotte want der wie kar) en krûden siet der ek wer fisk yn it akwarium. Dêr knapte ik suver in bytsje fan op. Doe nei Ali Hahn om te sjen at dy noch in piano foar ús hiene. Der wie genôch kar mar neat kocht fansels. Fia de Korenbeurs en de AH kamen wy úteinlik mei allinnich 6 nije skanierkes en wat iten thús.
+ 0 - 0 | § ¶Jûntsje NAC
Fannejûn mocht it Hearrenfean yn Breda tsjin NAC wer ris foar RTL 7 akteare. No hawwe wy dêr yn it generaal net al te goeie ûnderfinings mei. Wedstriden foar RTL 7 bin gauris saai en wy ha ek al in kear as wat sneu ferlern. NAC hie krekt de FC út de beker wei knikkere dat wy wiene warskôge, bynammen foar Leonardo fansels. Al rap koe Leonardo syn holle dan ek kennis meitsje mei de Rots fan it Noarden (Petter Hansson). Net folle letter makke Afonso Alves al wer syn achtste fan it seisoen. In goal folslein út it neat mar wy giene der ris goed foar sitten. Efternei besjoen wie it mar goed dat der bearenburch yn de omkriten fan it grutte skerm wie want de wedstryd wie fierder wat Hearrenfean oanbelange spile. Yn de twadde helte stoarte Leonardo noch wol yn elkoar wêrtroch't wy it wat maklikker krije moasten soene je tinke. Mar Verbeek helle ús superspits Alves nei de kant en brocht Friend yn. Neat ten neidiele fan Friend mar fuort dêrnei makke NAC de 1-1 en sa eindigen wy de wedstryd redelik kânsleas mei in lykspul. Faaks hat Kissi (Bier) wol gelyk at er seit dat it Fean gjin goeie ploech hat mar ôfhinklik is fan de grillen fan in pear spilers...
+ 0 - 0 | § ¶Finsterbanken en doarkrukken
It wie wer in hektyske dei hjoed. Sa hawwe wy earst nei de Hornbach west om dêr in pear 'louvre'doarkes te keapjen foar yn ús ynboukast op de nije sliepkeamer. Dizze doarkes wiene 2,40 lang en dêrtroch krige de freondinne sawat in hernia by it ferfier yn de Focus rjochting de Rottefalle. Dêr oankaam moast Cor har teloarstelle want der wie te min romte foar in hingkast. De tegelsetter wie sawat klear mei de lêste stikjes brûs en it húske en dat like geweldich. De nije tegels sjogge der geweldich út dat wy bin tige optein. Der moasten ek noch finsterbanken komme. Yn de keamer hawwe wy der foar keazen om dêr natoerstien foar te brûken. Dit ha wy útsocht yn de Harkema sadat der no ek wat Wâldske saken yn it hûs komme. It sil fuort gjin Wâldhûske wurde fansels mar in bytsje moat kinne. Dêrnei ha wy nei Regts west op de Jouwer dêr't wy it doarbeslach en de krukken en sa útsocht hawwe. Ynkoarten wurdt ús hûs dus in ûnnimbere festing. Jim kin jim besite dan ek mar better yn it foar oankondigje...
+ 0 - 0 | § ¶promoasjedagen
Ik haw hjoed tegearre mei Mario nei de promotie dagen foar it Noardelik bedriuwslibben yn de Martiniplaza west. No dat wie dus foar Mario in behoarlik koarte trip. Nei 2 hallen wie er der al flau fan en sa koe ik sûnder Mario allinnich fierder. De hiele Martiniplaza wie fol setten mei stentsjes fan bedriuwen en der wie wol in soad ynformaasje te krijen. Dochs foel it my al mei al wat ôf. Ik bin der hinne west op útnoeging fan KPN en dêr haw ik no ek in ôfspraak mei rinnen om efkes te sjen nei in oplossing foar yn myn nije kantoar. Fierder haw ik net in hiel soad nijsgjirrige saken sjoen. Binnen 2 oerkes stie ik wer bûten...
+ 0 - 0 | § ¶Tegeltsjes
Hjoed hat de tegelsetter west om fan ús brûs in foar focht ûnnimbere festing te meitsjen. Ek it húske is at it goed is fan in moaie laach keramyk foarsjoen. Ik bin fansels benijd at de troch ús útsochte tegels wat kreas wurden binne. Tongersdei sil wy it efkes oanskouwe. It begjint no aardich op te sjitten allegear. Wy ha tongersdei de hiele dei frij naam om de puntsjes safolle mooglik op de I (ï) te setten. Dat sil wol wer in drege put wurde...
+ 0 - 0 | § ¶Plúmkejeie foarkomt stress
Myn wike begjint alle moandeis altyd mei in partij plúmkejeien. Dat is in moaie útlitklep om alle stress en agresje der efkes hielendal út te slaan. Fansels moat der dan al efkes in ynspannende partij spile wurde. Mar om't der gauris gjin romte is foar in inkelspultsje en der ek net in soad tsjinstanders nocht oan hawwe bin ik no ek gauris dwaande mei in Amearikaantsje. Dat hâldt yn dat je allinnich tsjin twa tsjinstanders spylje. Mei de nije puntentelling wêrby't je by eltse flater in punt krije kin ik dan aardich meikomme. Hjoed slagge it my sels om ien set te winnen fan twa man dy't it spultsje dochs wol aardich yn de fingers ha. Nei sa'n prachtige adrenalinestjit kin ik de hiele wike wol wer mei fertrouwen temjitte sjen.
+ 0 - 0 | § ¶Spartaansk fuotbal
Justerjûn krige ik in tillefoantsje. Der wie immen mei in seisoenskaart foar Nieuw Noord dy't net hinne koe. Ik koe syn plakje wol efkes ynnimme. No dat koe fansels wol efkes mar omdat de freondinne kuorkebalje moast koe ik net mei de auto. Dan mar mei de bus fansels. Dêr woe de bussjauffeur fan de q-liner ús earst ôfsette troch foar de hinne- en weromreis sa'n 13 euro te freegjen. Ik koe him gelokkich noch efkes oan it ferstân bringe dat in deikaart mar €10,- wie. Sa kaam ik dus moai op tiid yn it Fean oan sa'n trije kertier foar de wedstryd. Niks gjin problemen by it parkearen en de bus koe ek noch oer de busbaan by de file del ride. Yn it stadion socht ik in moai plakje op tusken de peallen. Eins is it wol spitich dat dy kringen der yn stean. Yn de haadtribune stean se der net yn mar sa sil it wol goedkeaper west ha en oars soene faaks ek de grutte fideoskermen fan boven komme kinne. No ja, der is yn elk gefal in flinke deade hoeke at je efter sa'n peal stean. Ik stie der moai tuskenyn dus dat probleem hie ik net. Dan it balskoppen. Hoewol't Sparta sa no en dan wol efkes tsjinwraksele like it net as soene wy in soad problemen ha mei dizze klup dy't yn de kompetysje hielendal ûnderoan stiet en gemiddeld per wedstryd sa'n trije goals om de earen krijt. In moaie ploech om it fertrouwen wer werom te krijen dus. It bestjoer fan Nieuw Noord liet yn it foar noch struibryfkes rûnd gean mei oanwizings. Sa mocht der net mei bier smiten wurde. De flachjes moasten yn it stadion bliuwe en elkenien moast fansels meisjonge. No dat sjongen barde om my hinne mar in bytsje. Achter my stiene in pear lju allinnich mar te seuren. Op it lêst hie ik dêr myn nocht fan. Ik haw se ferteld dat de ploech der faaks mear oan hie at se meisongen. Dat seuren koe men ommers op it fjild dochs net hearre. Fansels wie men it dêr net mei iens mar se begonnen al wat te sjongen en al rap skoarde Lasse Nilson de 1-0. Doe't yn de twadde helte it ek noch 2-0 waard koe der wer in feestje bouwd wurde. Mar it Fean moast yn it lêste kertier dochs noch wer efkes werom yn de eigen 16 meter. It waard noch efkes dreech foar Brian mar neist Yildirim wie gelokkich ek Vanden Bussche wer in man fan de wedstryd. Mei 2-0 bleaune de trije punten yn it Fean. De soargen bliuwe allinnich spitigernôch ek bestean...
+ 0 - 0 | § ¶It oansjoch
Hjoed wiene wy wer efkes by it hûs en ta ús ferrassing wiene de metselaars ek al del west. Der moasten hjir en dêr noch wat muorkes ticht makke wurde en de finsterbanken dy't it net oerlibbe hiene moasten ek wer yn eare hersteld wurde. No dat liket der mar op. De foarside fan ús hûs krijt no sawat syn definitive oansjoch. De nije ruten moatte der allinnich noch yn en dêrnei komme der ek noch wat latten op de raamkes. De ruten dy't der no ynsitte binne tydlik. It bin de âlde ruten dy't efkes op maat snien binne. Oars is it sa ûngesellich en tsjuster yn ús hûs. De bûtenkant is no dus sa goed as klear. Ynkoarten komt de tegelsetter ús wiete romtes oanklaaien en wy bin noch drok dwaande mei it útsykjen fan de flierbedekkings en it behang. Ien muorre yn de keamer ha wy al dutsen. De oare muorren sille spackt wurde dus foar de keamer hoege wy allinnich noch mar flierbedekking en gerdinen. Yn de keuken soe ik wol in stikje marmoleum ha wolle. Mar dêr bin wy noch net hielendal oer út. Fansels kinne jim op de fotoside sjen hoe't it fierder giet mei de ferbouwing...
+ 0 - 0 | § ¶Mei de sturt tusken de fuotten
Fannemoarn moast ik wer betiid oan de slach. Om 6.00 begûn myn wurk en bynammen de earste fiif minuten wiene dreech. Net dat ik doe al fol oan de bak moast fansels. Mar ik moast fansels al efkes it ien en't oar útlizze oer it Fean. Ajax hie wol wûn en dat makke yn elk gefal ien fan myn kollega's noch bliid. Ik haw se mar ferteld dat je better fan Odense ferlieze kinne dan dat je hielendal net iens hoege te spyljen. De kranten wiene ek net al te entûsjast oer it Fean. It wie allegear 'onthutsend' en mear fan dit soart krachttermen. Ik fûn dat net hielendal terjochte want it Hearrenfean hat it wol besocht. De bal woe der allinnich net yn (op ien kear nei dan mar doe woene de 'man in black' it net sjen). De ynstelling wie wol goed, de útfiering wat minder. Wat dat oan giet hat Verbeek it noch net sa min sjoen. It is no fansels wol oan Verbeek om syn âlvetal wer mei fertrouwen it fjild yn te stjoeren. Faaks kin wat gember der foar soargje dat de sturt wer fier omheech stean giet...
+ 0 - 0 | § ¶Forza Heerenveen onee onee
It wie hjoed wer in nuvere dei. Earst hie ik op myn wurk al flink oan it ruien west oer it Fean dat wol efkes ôfrekkenje soe mei it Deenske Odense. Doe haw ik op de merk 2 hintsjes kocht dy't ik efkes lekker brieden haw en sa hie ik wer genôch pikefel foar in kâld jûntsje yn it Abe Lenstrastadion. De freondinne wie om 17.00 al thús sadat ik mei de auto nei it Fean koe. Earst noch efkes by de soas del om in pear oare Feanatics op te heljen en doe op nei it stadion. Mar troch drokte op de dyk wiene wy frijwat let. Sa waard it folksliet al ynsetten doe't ik yn de kantine efter Nieuw Noord wie. Dizze kear mochten wy op de trep stean en it wie tsjokfol op Nieuw Noord. De wedstryd begûn en wy songen allegear lûd. De sfear wie goed en it soe in moaie jûn wurde kinne. De earste helte krige Odense in pear aardige kânsen mar Brian hie in ingeltsje op de latte sitten. Ek it Fean koe in pear spjildeprikjes jaan al koene hja net al te bot oertsjûchje. Yn de blessuretiid fan de earste helte skoarden de Denen 0-1. Dat wie spitich mar ik hie it gefoel dat wy noch wol werom komme soene. Yn de twadde helte wie it Fean wat feller en wie der ek mear bal besit al kamen de Denen noch wol mei gefaarlike útfallen. Sa waard it ek 0-2. Doe sloech de sfear yn ien kear folslein om yn it sfearfak. Alle sfear wie fuort en men begûn te sjongen foar Foppe de Haan, tsjin Verbeek en ek moast der noch al wat fluite wurde. Krekt doe't de ploech efkes wat steun nedich hie liet de tribune it der by sitte. Tige spitich want it Fean joech net op en besocht it noch wol. Djiptepunt wie fansels de arbitraasje dy't in bal dy't oer de line wie net takende as doelpunt. Dêrmei waard de hoop op in goed risseltaat de grûn yn board. Foppe de Haan sil syn mannen oars ek better oanpakke moatte want syn Yndonesysk alvetal siet lekker te fretten by de Mc Donalds fan Drachten. Foar it Fean sit der foarlopich net folle oars op as tsjin de Spammers fan Parma te flammen en Lens thús hielendal lens te spyljen...
+ 0 - 0 | § ¶Twa direkteuren op stap
Op útnoeging fan de heer Huiberts fan Mucho Fresh, in nijkommer op it gebied fan de ketering, wie ik woansdeitemoarn al betiid yn de Martiniplaza oanwêzich. Dêr wie in beurs foar middelgrutte en wat lytsere bedriuwkes. Wy hiene frijkaarten dy't oars sa'n €150,- it stik wiene. De organisaasje hie dan ek flink útpakt. By binnenkomst krigen wy in nammekaartsje op it boarst en sa kamen wy yn in sealtsje mei hjir en dêr wat standsjes fan stipers. It wie noch net sa drok en sa kamen wy as earste yn oanrekking mei Vodafone. Dêr stiene wat lju mei de nijste snufkes op mobyl ynternet foar de gsm. Ik wol foar de saak eins noch wol ris in tillefoan ha om mei te eameljen en te ynternetten dat ik woe wol wat witte oer harren opsjes. Ik mocht ek efkes wat mei in tastel boartsje en dat wie in hiele aardichheid. Nei wat ompielen koe ik myn eigen thússide der foar krije al wie dy net echt mobylfreonlik. Net folle letter waarden wy útnoege yn de téaterseal. Dêr wie in ferskaat oan sprekkers wêrby't de iene 10 minuten lang neat te melden hie wylst de oare dy 10 minuten der noch wol by ha koe. Myn grutte maat Loek 'Fryslân 500' Hermans hie in alderaardichst praatsje en ek de man fan it Grinzer museum die it aardich. Paul Turken koe it moai bringe. De rest wie mear fan it kaliber 'ik wol ek efkes op it toaniel'. Dêrnei koene wy efkes oan in stikje bôle en wat drinken. Dat wie prima foar elkoar wêrnei't der in wurkwinkel op it program stie. Mario hie ús opjûn foar in ûntstressing. Dat wie alderaardichst om nei te harkjen. Wy krigen ferskate tips wêrby't bynammen de 'Adje' in moaie krêftpuntpresintaasje makke hie (tegearre mei syn suske). Der moast mear tiid wêze om te gnizen, dat wie hiel wichtich. Spitigernôch gie it yn de kursus bynammen om it herkennen fan stress by it personiel en net by josels. Nei in bytsje floeiber guod koene wy noch nei in oare wurkwinkel dy't oer pensjoenen gie. Ek net bot nijsgjirrich al wiene guon súksesferhalen fan oare MKB'ers ek wol wer aardich. Ek ha wy noch efkes mei de oersetter fan de Fryske tomtom praten. Doe kaam it hichtepunt fan de dei: In waarm miel. Al ridlik gau kamen wy Wiesje fan Bernlef tsjin dy't by in grutte skaal mei iten stie. Sa koene wy ús bealchjes moai rûn ite. De ketering wie dan ek goed al moat der oar jier fansels wol sop by wêze...