+ 0 - 0 | § ¶Opsizze is in hiele toer, thúskomme ek!
Ik haw hjoed besocht in pear saken op te sizzen. Sa haw ik myn ynternetferbining per 1 febrewaris besocht op te sizzen. It faksnûmer op de side fan myn kedizer wurke net mear dat ik haw it mar nei Fiberworld stjoerd. Dy stjoere my oars ek altyd de rekkening. No mar hope dat it goed kaam is. Noch dreger is it om fan de fêste tillefoan ôf te kommen. Ik haw it, lokkigernôch fergese, tillefoannûmer fan harren skille en sy fertelden my fuortdaalks al dat it drok wie troch in soad tillefoantsjes foar it ynternet + skiljen gedoch. No, ik haw in hiel skoft oan de line hongen mar ik waard mar net wizer dat úteinlik bin wy dochs mar wer nei de Rottefalle ôfset foar de noadige handelingen yn it hûs. Sa haw ik noch efkes lekker mei latex oan de gong west om alle muorren dy't behange wurde moatte yn te smarren sadat dy wat minder sûge. Dat wie in tip fan guon lju fan de behangwinkel. Ik bin no krekt wer yn Grins mei de alderlêste Q-liner út Drachten wei. Op it stasjon fan Grins liet Arriva my noch efkes in goed heal oere klommerje want de bus fan 20.08 gie net. Neffens in passearjende bussjauffeur soe der om 20.30 noch in bus komme nei Finkhuzen. Sa kamen der mear en mear minsken by de halte mei in min sin mar om 20.30 kaam der gelokkich noch in bus. Ik sil no myn pakjes aldiwyn opsykje en dan nei Gerlind ta om dêr it âldjier út te sitten. Oant oar jier dus mar...
+ 0 - 0 | § ¶Spierpine
Ik haw op 't stuit mear lêst fan myn rêch dan Saddam fan syn nekke. Dat kuorbaljen is noch dreech genôch. Juster haw ik mei Wêz Handich oan it kuorbaljen west yn de sporthal fan de Houtigehage. It wie in toernoaike foar leden, freonen en bekenden sa waard sein dus ik moast ek mar efkes mei. No haw ik yn myn libben ien kear earder kuorballe en dat is al wer in pear jier ferlyn dat ik woe it wol wer ris besykje. Doe't se my fertelden dat de earste priis de tradysjonele taart wie stie ik fansels hielendal op skerp. Der wiene 5 ploechjes mei nammen út it krystferhaal. Us ploechje hite hiel tapaslik 'de Ezels'. Mar troch taktysk goed te wikseljen koene wy dochs de earste trije wedstriden winne. Ik spile hieltyd ien helte fan seis en in heale minút en begûn yn de oanfal, by in flater fan my waard der dan ommers net fuortdaalks skoard. Ien kear haw ik de folsleine tretjin minuten folmakke en ek dy wedstryd waard wûn. Yn de lêste wedstryd bleaune wy stykjen op in lykspul mar it wie genôch foar de taart. Ik haw net skoard mar wol assistearre by de earste skoare. It wie gesellich en goed organisearre mar ja, al dy gekke bewegingen fan drokke minsken efter my bin ik fansels net wend. Dat no docht myn rêch it in bytsje minder. Hjoed mar gjin plinten skilderje dus...
+ 0 - 0 | § ¶Merbau plankjes en hjerstige Wâlden
De freondinne is net echt topfit en wy soene fannejûn te kuorbaljen. Sy hat harsels ôfmelde moatten mar ik sil fansels al efkes hinne. Ik moat dochs in bytsje yntegreare op it doarp no? Net tsjinsteande har sykte hawwe wy dochs noch efkes nei de Praxis west om dêr in pear merbaukleurige stikjes laminaat te keapjen. Dy wiene yn de oanbieding. Ek soe ik dêr it hjerstige stikje Wâlden keapje foar op myn kantoarsmuorre. Wy hiene gelok want ek dêr siet 40% koarting op. Sa hiene wy de Ford fol mei laminaat dy't ik straks noch mar efkes nei de Rottefalle ride sil. Ik moat ommers dochs te kuorbaljen...
+ 0 - 0 | § ¶Iritante spammers
Ik haw wer in probleemke mei spammers. Dizze kear net op myn webloch mar no yn it fotoalbum. Op 'm sels is reklame yn gasteboeken en oare reageardinkjes op ynternet al iritant, mar dizze spam is noch ranzich ek. Ik snap net wat de aardichheid dêrfan is. Wat hat it no foar doel om immen syn fotoboekje fol te spammen mei porno. It kost my momenteel klauwen fol mei tiid om it fotoboekje foar alle leeftiden te hâlden. Ynkoarten dus mar ris nei in wat permanentere oplossing sykje. Fansels soe it ek aardich wêze at jim, de besikers fan myn webloch, der ris wat krommintaar op pleatsten. Dan falle dy pornodinkjes ek wat minder op. Oars kin ik likegoed it kommintaarpart fuorthelje ommers...
+ 0 - 0 | § ¶Glêsweefsel
Wy ha no ek behang kocht foar de hal en myn kantoar. Ik meitsje sels hieltyd de flater om it glêsfeselbehang te neamen mar it hyt dus glêsweefselbehang! Op ien wand fan myn kantoar komt fierder in prachtich stikje hjerstwâld. Dit om my der efkes oan te herinnerjen dat wy straks yn de Wâlden wenje. De oare wanden wurde dus mei glêsweefsel beplakt en dêrnei oerskildere. Skoanheit sil dus wol wer efkes plakken bliuwe op de buorren...
+ 0 - 0 | § ¶Frette op ierde
Fannemoarn kaam ik om 6.00 fan myn wurk. In kertierke letter stie ik al efter it fornuis om foar de skoanfamylje in geweldich krystmiel yn elkoar te flansen. It soe in kombinaasjegerjocht wurde mei Argentijnse en Indiaaske ynfloeden. As bygerjocht soe ik in kâlde riissalade meitsje. Dan moast de riis fansels wol kâld wêze dus dy haw ik om 6.15 mar alfêst sean. Yntusken koe ik moai efkes de marinade meitsje foar de kalkoenkurry. Dat skeelde my letter op de dei wer in bealch fol wurk. Doe't ik om in oerke as 13.00 wer út it nêst kaam haw ik de riissalade ôfmakke en alles ynpakt en mei naam nei de Rottefalle. Dêr haw ik noch sa'n 2 oeren oan it snijen west mar doe hiene wy ek wer in hearlik miel dêr't sels skoanmem, dy't oars net sa gek op fleis is, fan genietsje koe. Wy begûnen mei in bananesilisop, dêrnei de kâlde riissalade mei in kalkoenkurry en beef chimmi churry (Knor wrâldgerjocht). As neigesetsje kaam myn skoansus noch mei in lekkere fanilleyoghurt mei slachreamme. Doe wie it foar de famylje tiid om oan de ôfwask te begjinnen wylst ik mei de freondinne wer ôfsette nei Grins. Om 22.00 moat ik (wer) oan it wurk...
+ 0 - 0 | § ¶Kalkoen
Earste krystdei fiere wy standaard altyd by ús heit en mem dêr't dan ek myn suske mei har bijna man delkomt. Wy ite dan altyd in hiele kalkoen op. Hjoed wie wer gjin útsûndering op dizze regel. It bistke wie yn de rapsiidpanne frijwat gear wurden en sa koe der in fijn boarststikje op myn board plaknimme. Mei in fijn reamsauske der by en wat sjampinjontsjes der by wie dit wer in feestmiel dêr't wy graach yn 2007 foar werom komme. Mochten jim trouwens gjin krystkaart krigen hawwe, dat klopt! Wy hawwe dit jier gjin krystkaarten de doar útdien omdat wy it te drok hawwe mei ús hûs mar by dizze winskje ik jim ek út namme fan de freondinne dochs noch in pear fijne krystdagen fansels...
+ 0 - 0 | § ¶Tiid foar in spultsje
Mei in gewaldige kater fan justerjûn (Sinteklaas fiert op syn Ellys mei de Aldiwynrûnte) begûn dizze dei mei in lange ferplichte opname yn bêd. Op de jûn foar kryst wie der wer ris neat op 'e televyzje dat wy hawwe wer ris in âlderwetske spultsjesjûne dien. Tegearre spultsjes dwaan is net altyd leuk mar mei Carcassonne kin wy ús noch wol wat fermeitsje. By de measte spultsjes is it leuker om mei trije as mear te spyljen dat sadwaande. Nei twa spultsjes wie it 1-1 en doe ha wy der mar in gelykspul fan makke. Moarn wer in lange dei foar de boech. Earst nei heit en mem foar it krystitentsje en dan om 22.00 noch oan it wurk...
+ 0 - 0 | § ¶Spactakulêr
Tongersdei is ús hûs spact en ik wie fansels tige benijd nei it risseltaat dêrfan. No dat koe besjen lije. Ik miende dat it stúkwurk al aardich wyt wie en dat de ramen ek kreas wyt skildere wiene. No blykt dat it dochs noch witer kin. De plafonds binne prachtich helder wurden en de keamer en de keuken bin ek frijwat opfleure. No blykt pas dat it amandel-wyt dat wy op de ramen smart hawwe net spierwyt is. Ynkoarten noch efkes in stikje behang op de muorren en dan wurdt it noch folle moaier...
+ 0 - 0 | § ¶Nieuw Noord
It hat efkes duorre mar ik haw no myn earste edysje fan Noord Nieuws binnen krigen. Ik bin sûnt koarten lid fan de supportersferiening Nieuw Noord fan de SC Heerenveen. Yn de takomst sil ik faaks noch ris besykje in seisoenskaart yn it Sfearfak te bemachtigjen. De ynlogkoade foar de besletten thússide hie ik noch net krigen mar dêr bin ik sels al efterkaam fia de 'ik wit myn wachtwurd net mear' knop. Ik bin no dus wer in bytsje mear Feanfan...
+ 0 - 0 | § ¶Suertsjeferkearing
De hiele dei wurde wy op de radio en yn de blêden lestich fallen mei it feit dat ús aller Jantje Smit de ferkearing mei de tsien jier âldere Ellemieke Vermolen útmakke hat. Dat soks yn de prive stiet as yn de telegraaf dat is noch tot dêr oanta. Mar no wie it sels op it sjoernaal op de radio en dan tink ik by mysels. Wêr giet dit hinne mei Nederlân en soks al wichtich nijs fûn wurd. Ik bedoel, hoe lang hiene hja no wat mei elkoar, noch gjin trije moanne. Mei oare wurden, it wie gewoan suertsjeferkearing dus! No ja, Jantje kin no syn froulike oanhang nei de optredens wer wat omtinken jaan en Ellemieke kin dêr dan wer lekker oer blêre yn Sjo-nijs. Fansels is der ek noch echt nijs: ús leafdesnestke op 'e Rottefalle is moai wyt spact. Sa hat der dochs noch ien in wite kryst...
+ 0 - 0 | § ¶Alles ôfplakt
Fannemoarn haw ik wer efkes yn it hûs west omt de freondinne it dochs net hielendal fertroude mei de spacspuiters. Se hie alles al in pear kear op papier set mar it moast dochs ek noch in kear tsjin de mannen sein wurde. Wy moasten ek noch efkes kieze hoe grof at wy it guod op 'e muorren en de plafonds hawwe woene. Net te gek grof fansels, want dy tiid haw ik no wol in bytsje hân (faaks). Fan it spaccen soe hjoed dochs noch neat komme want earst moast alles noch ôfplakt wurde. Alle plinten, ruten, stopkontaktsjes en oare útsteksels moasten ôfdekt wurde. Ek de lêste stikjes gipsplaat moasten noch efkes ferdwine ûnder in bêste laach stúkwurk. Omdat wy mear yn de wei rûnen as strikt needsaaklik bin wy mar wer ôfset om noch efkes wat tegels te besjen foar yn de nije keuken. Wy ha in pear proefstikjes meikrigen en sille dêr efkes mei nei de nije keuken sjen at dy goed en wol spact is.
+ 0 - 0 | § ¶Swiere puzzel mei in stikje tefolle
Us oanrjochtblêd bestiet út 5 stikken granyt. Dy stikken farieare yn ôfmjittings fan sa'n 64 by 2 meter oant 4 sintimeter by 90 sintimeter (efter de boretti). It lytse stikje stien wie by de keukenboer al sneuvele dus wy hiene yn earste ynstânsje 4 stikken om mei de puzzeljen. De iene kant wie ienfâldich want dêr siet de oansluting foar de wasbak en de kraan. Dy koe dus mar op ien plak lizze. Der bleau dan ek noch in hoekje oer dat eins ek mar op ien plak paste. Doe waard it lestiger want yn de oare hoeke hiene wy in stik as 120 sintimeter en ien fan 184 en dy fan 184 paste presys tusken de kuolkast en de muorre. Mar dy fan 120 moast dêr eins lizze want dêr siet in spesjaal bywurke stikje oan. Nei lang puzzeljen kamen wy ta de konklúzje dat der dus 30 sintimeter te folle oanrjocht levere wie. Gelokkich wiene de mannen fan De Haan der rap by en noch dyselde dei waard it stik oanrjocht ophelle, nei de leveransier riden en mei 30 sintimeter minder stien noch dy selde dei wer ôflevere. Dat liket der op fansels!!! Ek it stikje wat oer wie ha se doe mei krigen sadat ús keuken no al hast hielendal ôf is. No noch efkes wachtsje op de Boretti fansels. Want dy Italjanen dogge alles op syn 11 en 30st...
+ 0 - 0 | § ¶Toch noch in gelokje
Sa't ik earder al melden hie wie ien fan ús finsterbanken net hielendal yn ien stik ûnder it raam kaam. Ik haw hjoed efkes mei de leveransier skille en lokkigernôch hie er noch in stikje fan de selde plaat oer. Dit soe hy moarn noch efkes foar ús bewurkje sadat it der dochs noch foar de spacspuiters yn setten wurde kin. Wy ha no alle plafondplintsjes skildere en fierder ek sa'n bytsje alles wat spact wurde moat yn de ferve setten. Alle sintrale ferwaarmings hawwe wy fan de muorre helle sadat de mannen oeral goed by kinne (en wy straks sels ek mei it behangplakken). Us heit hat wer de hiele dei oan it skilderjen west en sa liket myn kantoar no ek al wer in hiel stik better. De keukenman sjit al aardich op dat mei in bytsje gelok kin moarn de graniten blêden der al op...
+ 0 - 0 | § ¶De klok rûn klust
Sûnt tongersdei hawwe wy in tillefoanoansluting mar om wat yn de kosten te besparjen miende ik dat ik sels myn tillefoansintrale wol efkes oanslute koe. No dat blykt ek wol te kinnen mar dochs hie de gebrûksoanwizing wol wat better wêze kint. Ik hie de Vox Davo ophongen yn de meterkast en de triedsjes oansluten mar doe koe ik wol fanôf alle tastellen skilje, mar at ik mysels skille dan wie ik net te berikken. Efternei besjoen kaam dat trochdat ik fan de ferkearde kant begûn wie mei de triedsjes. Allinnich it systeemtastel op poart 11 koe yn begjinsel tillefoantsjes binnenkrije. En omt ik dêr neat oansluten hie wiene wy dus net berikber. De oare tillefoans moat ik fia it rekkenreau frij jaan mar dan moat ik earst efkes myn netwurk oan de praat hawwe fansels. No ja, wy kinne fan no ôf dus skille wurde at wy thús binne. It nûmer krije de leafhawwers faaks noch wol in kear...
+ 0 - 0 | § ¶Bedankt Jaap
Justerjûn haw ik efkes nei it feestke fan Jaap Holwerda west. It wie gesellich op de soas mei in fracht leuke minsken ensa. Mar fansels hawwe sok soarte fan feestjes ek in kearside. Sa wie ik fannemoarn hast net út myn bêd wei te slaan en koe it klussen wat my oanbelange wol in dei oerslaan. Uteinlik ha wy dochs noch efkes nei it hûs ta west om de skea te oersjen. De keuken kriget al aardich foarm trochdat de measte kastjes al te plak steane. Wat dat oanbelanget bin ik noch altyd tige bliid mei de keuken dy't wy útsocht hawwe. It sjocht der allegear geweldich út. No ja, hjoed net al te folle nocht om oan it wurk te gean dus moarn is der wer in dei. Bedankt Jaap...
+ 0 - 0 | § ¶Alderferskuorrendste spitich
No hiene wy juster sa goed ús bêst dien om ús prachtige nije natoerstiennen finsterbanken feilich yn it hûs te krijen. Wy hiene alles kreas rjochtop ferfierd en tochten der goed om dat wy nergens tsjin oanstjitten mar no hat der flak foar de meet dochs noch in ûngelokje plakfûn. Ien fan de finsterbanken bestie al út twa stikken omdat de kâns op brekken oars te grut wie mar no bestiet in twadde finsterbank ek al út twa stikken. En dat wie sa net bedoeld fansels. No mar hope dat ús stienleveransier noch in stikje plaat oer hat. De foarige kear moasten wy der oars in wike as wat op wachtsje en woansdei komt de spacspuiter al...
+ 0 - 0 | § ¶1-0 winst mar toch gjin fee(n)st
It wie wer in drokke dei yn de Rottefalle. Sa haw ik yn it kantoar oan it grûnfervjen west en wy hawwe de keukenmannen efkes holpen by it útladen fan de kuolkast, de ôfwaskmasine en de platen fan it oanrjocht. Sa op it earste gesicht sjocht it der allegear fantastysk út. Moaie swarte graniten stientsjes. Letter op de middei ha wy ek noch de finsterbanken ophelle. Doe moast ik mei de bus nei Grins en ik hie mazzel want de Q-liner hie in kapotte spegel en moast dus efkes wachtsje. Oars hie ik 'm mist. Yn Grins miste ik krekt de bus nei Finkhuzen mar de wachttiid koe goed brûkt wurde by de Burgerkening. Doe't ik thúskaam wie de freondinne ek hast teplak sadat ik fuort wer yn de auto koe op nei it Fean. Mei Klaas en Elp giene wy dy kant op en neidat ik harren noch efkes in rûnlieding jûn hie op ús nije stee giene wy nei it Abe Lenstrastadion foar ús lêste kâns yn Europa. Wy moasten mei 3 goals ferskil winne fan Lens, de nûmer twa fan Frankryk. Dat wie faaks in ûnmooglike opjefte mar hawar, net sjitte is sawysa net raak dus wy besochten it. Ik siet net yn Nieuw Noord omdat Hearrenfean dy plakken allinnich noch mar ferkeapet oan seisoenskaarthâlders. Dêr foar yn it plak moast ik dus yn in wat saai fak 27 sitte. Wol rjocht efter de goal dus wat dat oanbelanget in prima plakje. De sfear yn sa'n fak is toch in hiel stik minder en hast net ien wol meisjonge en raze. Dan fielt sels in Kuipers him soms wat nuver. No ja, wy ha it besocht, it wie in moai gefjocht, mar de bal woe der wer net yn. En at der al in kâns ûntstie dan wie der wol wer de ien as d'oare Cyprioot dy't fûn dat it Fean te gefaarlik wie. Yn de alderlêste minút makke Alves dochs noch in prachtige 1-0 sadat de Frânse supporters (hulde foar dy Frânsen trouwens) efkes stil wiene. Mar Lens gie fierder en wy net. Op doelsaldo ferlern snin snotter...
+ 0 - 0 | § ¶Hal leluja
Fannemoarn waard ik der al wer betiid ôframmele troch skoanmem. Der moast wer wurke wurde en sa teagen wy nei it hûs. Dêr kaam heit ek wer efkes del en nei in bakje kofje foar heit en skoanheit en in gleske Milk en Fruit Mango foar my koene wy wer fierder mei it skilderjen. Heit die de doarren, skoanheit lei de lêste tegels teplak foar it hûs en ik mocht mei de hal begjinne. No dêr hiene wy noch net in soad oan dien en dat knapt dan ek fuort in hiel stik op. It noch keale hout waard troch my fan in moai wyt laachje foarsjoen. Letter skille de keukenman ek noch dat se de keuken foar in part al yn de bus hiene. No bring it guod mar soe ik sizze. Dy middei waard der in bus fol mei kasten, laden, draaiplato's en wit ik wat al net mear besoarge. De hiele keuken stiet no dus fol mei keukenguod. Moarn komt de apparatuur en dan sil se freed nei alle wierskynlikheid los. It begjint der sa stadich wei oan op te lykjen...
+ 0 - 0 | § ¶Goed nijs
Hjoed sliep ik by de Spoelstra's op 'e Rottefalle. It wie wer in drokke dei mar der is wer fan alles bart. Sa siet ik fannemoarn al wer betiid yn de bus nei Drachten doe't ik skille waard troch de natoerstienman fan de Harkema. Hy hie de stiennen plaat fan ús finsterbanken binnen krigen en dy soe hy tongersdei klear meitsje. Dat wie goed nijs fansels. In pear kilometer fierder skille de KPN my dat myn Vox DAVO klear lei om op te heljen. Tongersdei krij ik myn nije tillefoanoansluting dat soks komt goed út fansels. Sa haw ik tusken de middei noch mar wer efkes in ritsje nei Grins makke mei de auto fan skoanheit om dêr de sintrale op te heljen. Nei wat prakketinken en wat tips fan Peter, ús ynstallateur, haw ik it kastke yn de meterkast skroeve kinnen. No moasten der noch in ferskaat oan triedsjes yn pleatst wurde en dêrfoar moasten wy earst op syk nei hokker triedsje by hokker plak hearde. Lokkigernôch hie ús aller 'Pyt' noch wol earne in ampèremeter lizzen. No is alles dus oansletten en de KPN kin him mar ree meitsje foar in soad tillefoantsjes. Peter hat der ek foar soarge dat wy it húske no gewoan trochlûke kinne sadat wy gjin amer mei wetter mear hoege te brûken. Under de brûs is ek al in opsje mar wy ha noch gjin waarm wetter. Om 22.00 hiene wy myn persoanlike Alpendrama fan it plafond skjirre en dêr ek noch in likje farve opsmart. De jûn waard tegearre mei skoanheit yn styl by de shoarmaturk ôfsletten...
+ 0 - 0 | § ¶Autodeet
Hjoed makken wy wer optimaal gebrûk fan de auto fan de freondinne. Sa haw ik har earst op it wurk yn Súdlaren ôfset wêrnei't ik binnentroch 'deur Donderen' fia Leek nei de A7 ried om sa de drokte op it Julianaplein wat te omsilen. Op 'e Rottefalle wie skoanheit al wer drok oan it wurk en ek ús heit en mem kamen noch efkes del om wat streekjes te setten. Sa hawwe wy wer aardich oan it wurk west en ik haw de lêste ûneffenheden om ús hûs hinne wat fol sân stoppe. De riolearing sit sa wer krekt op tiid ûnder de grûn en ús tún kin mar wer as parkearplak brûkt wurde troch de memmen dy't de bern fan skoalle helje. Middeis haw ik de freondinne wer ophelle en sa kamen wy yn Grins dêr't ik de jûns noch ekfes tsjin in plúmke jeit haw. De spierkes wiene oars al wer moai op lengte troch it tillen fan de kroade...+ 0 - 0 | § ¶It is wer leuk op it wurk
Neidat de pleatslikke FC (ûnterjochte dat wol) fan PSV ferlern hat stean wy no wer offisjeel boppe de Grinzers. Dat is moai fansels want dat makket myn wurkdagen der in stik aardiger op. Ik haw hjoed noch efkes in wurkdei hân (dy't foar twa telt fansels) mar moarn sil ik in pear dagen nei de Rottefalle ta om dêr wat hân en spântsjinsten te ferlienen. Yn de kuolkast stiet noch in prakje fan myn Indyske riistafel dus moarn kin de dei ek wer goed útein sette...+ 0 - 0 | § ¶Pokerharses
Soms hearst der in grypfirus en ha je it gefoel dat je op it rântsje balansearje tusken wol as net siik wurde. Sa is dat mei it pokerfirus ek wol in bytsje. En op dit stuit sit ik dus in bytsje op dat rântsje. Justerjûn nei it balskoppen eindige it ritsje mei de auto yn de túnstrjitte en omdat it wat reinerich waar wie hie ik gjin sin om myn fytske op te heljen om sa it nuttigjen fan wat spraakwetter mooglik te meitsjen. Mei oare wurden, ik wie BOB en ik bleau dus fan de bearenburch ôf. Nei in pear beamkes klaverjast te hawwen wêrby't myn kaarten alderbelabberd wiene haw ik my doe mar op it pokerspul stoarten. Net te grof fansels, mar gewoan allegear 2 euro ynlizze, in steapeltsje fysjes foar my en spylje mar. Ik bin noch net sa'n pokermaster mar ik haw al in pear kear in oerke as wat nei it europeeske pokerbarren sjoen op tv. Dêr leare jo fansels wol wat fan. Eartiids spile ik op hast alles en no smyt ik myn kaart dus wat earder fuort. Wy spilen mei 8 man dus dan moat je bynammen yn it begjin oppasse omdat der altyd wol ien in moaie hân hat. Mar doe't ik de 'American Airlines' hie moast ik fansels al efkes mei gean. Dat slachje smiet in aardich nustje fysjes op mar dêrnei wiene myn kaarten krekt as mei it klaverjen wer bacher. Sa koe ik it spul mei in fjirde priis ferlitte en eindige ik dus wol yn it lofter rychje wat by it balskoppen altyd sa wichtich fûn wurdt. Mar sa't Klaas de Jong altyd sa helder opmerkt, oan it ein fan de jûn wint Hein, sa ek dizze jûn spitigernôch...
+ 0 - 0 | § ¶Wy stean wer boppe Grins...
Tsjonge jonge wat wie it wer billenknipe op de tribune. It wie mar goed dat ik yn it steanfak stie want oars hie ik wol oan de stoel fêstsûgje kint. Mar hawar, wy ha wer trije punten en dêr giet it om. De wedstryd wie oars ek net ûnaardich om te sjen. In sterk Hearrenfean dat de hiele wedstryd lang oanfoel en in oergryslik weak Roda JC dat it wol goed fûn, in punt sûnder moeite. Yn alle gefallen wie de sfear goed yn it fak en dat is ek wichtich fansels. En sa krigen wy kâns nei kâns dat hy moast wol in kear falle fansels. Ik hie noch efkes wat argewaasje mei in snotbongel dy't fûn dat ik tefolle leven makke mar ja, at je dêr net oerkinne dan passe jo net yn it Sfearfak fansels. Foar dat soarte fan minsken is 90% fan it stadion in better plak. No ja, yn de rêst trof ik Ronald de Boer mei de freondinne noch efkes en dy blieken myn webloch te lêzen. No fan dizze kant dan noch mar efkes 'Heudy'! It is altyd leuk om wat reaksjes te krijen fansels. No ja, 4 minuten foar tiid kaam it dochs noch goed troch de gouden wiksel fan Verbeek. Faaks ha se de goaltsjes opsparre en meitsje se dy kommende tongersdei der efkes ekstra by...
+ 0 - 0 | § ¶114
Hjoed ha wy de hiele dei yn it grûnwurk sitten. It reinde in bytsje mar it waard dochs in kear tiid dat der in ferbining mei it rioel ta stân kaam. Wy woene dat sels mar dwaan om't soks wer in pear sinten útsparret. Sa hiene skoanheit en ik in flinke groppe iepenhelle tusken it hûs en de dyk. Nei flink wat passen en mjitten kamen wy frij aardich út mei de buizen. De âlde oansluting moasten wy noch efkes foarsichtich stikken houwe wêrnei't de pvc-buiskes harren nije plak krije koene yn de âlde riolearing. No noch efkes besykje fansels en ja hear, it wetter rûn kreas it putsje yn. Ik sil ynkoarten mar efkes mei 114 skilje om te melden dat de brune der no in heal oerke earder is op 'e Jouwer...
+ 0 - 0 | § ¶Nije Basshunterkloon
Nei Boten Anna fan Basshunter wiene der tal fan Hollanders aktyf om hjir in oare tekst op te skriuwen. Hichte- as djiptepunten wiene fansels Ik heb een boot fan de gebroeders Ko dy't it letter ek noch ris mei in Sinteklaasferzje diene en de Uitgewoonde grot ferzje. No is der ek op de nije 'hit' fan Basshunter in nije ferzje skreaun dy't fuortdaalks ek efkes kommintaar jout op alle foargeande kopiearders. DJ Maarten makke 'Alle idioten die zingen over boten'. It hat net safolle hitpotinsje as Basshunter syn earste mar it idee is wol aardich fansels. Harkje der ien kear nei en ferjit it dan mar wer...
+ 0 - 0 | § ¶Sinteklaasjûn, mar net by KPN
Ik haw it wol ris drokker hân op Sinteklaasjûn. Wie it net as hulpke dan wol as dichter en/as seurprisemakker. Fannejûn bin ik lekker allinnich thús want de freondinne is drok oan it farvjen. Ik bin wurch want ik haw wer de hiele dei oan it wurk west en ik haw fia de tillefoan noch ris in poging dien om 0512-345678 te krijen. Nuver dat je net in eigen frij nûmer út de searje bestelle kinne. Sa soe ik hiel graach 0512-842353 ha (0512-THAEKE) mar dy is al fuort. Ek it âlde nûmer fan de spoelstras koe ik net krije. No mar ôfwachtsje at se noch wat foar my betsjutte kinne. It sil wol net want it bin net de heldersten dêr. It soe dochs fraai wêze at ik dat mei de domeinnammen ek sa dwaan soe. Stel dy foar: "Goeie, ik wol graach in domeinnamme foar myn bedriuw. No wol ik graach www.mynbedriuw.fy hawwe. Kin dat?" "Nee bêste man, dat kin net. Wy ha wol www.indommenamme.fy en www.innochdommerenamme.fy foar jo yn de oanbieding." Faaks is dat KPN har probleem in bytsje, dat se net mei de tiid meigean en altyd oeral efteroan toffelje...
+ 0 - 0 | § ¶Spierpine fan in bestjoeren
Der wie dit wykein wat ekstra produksje by Friesche vlag sadat ik 2 dagen efterelkoar as in idioat oan it fleanen west haw mei de heftrúk. Ik kin dat goed fernimme want myn lofter skouder is suver wat gefoelich troch al dat stjoeren. By it manoefrearjen yn lytse romtes moat der gauris in flinke slinger oan it stjoer jûn wurde en dat de hiele dei lang. Moarn mar efkes wat oars dwaan tinkt my. Dan kin it liif efkes bekomme. Jûn it oare skouder noch mar efkes in opdonder jaan by it plúmkejeien...
+ 0 - 0 | § ¶We Wok
Der is wer in nije wokchinees yn Grins. Yn it winkelsintrum paddepoel sit no ek in Wokrestaurant. Om't ik in grut leafhawwer bin fan wokken en alles wat dêr yn makke wurde kin hawwe wy dêr snein efkes út iten west. Minsken dy't al ris by it wokrestaurant fan de Pein west ha as by Ni Hao sille fan in kâlde merke thúskomme. Dit is it lytse broerke dêrfan. Sa kamen wy dus yn in smûk lyts restaurantsje mei mar in pear tafels. Der wie noch in tafel frij foar twa persoanen dus dat wie wol noflik. Wy krigen fuort in soad omtinken en der waard in foarôfke op de bakplaat bakt. Dit wie tige goed fuort te krijen mar wêr't it yn de Pein en Ni Hao ûnbeheind wie krigen wy no mar ien kear fan dizze plaat. It wokken wie gelokkich wol ûnbeheind en dat wie fansels eat dêr't de Sinees gau spyt fan krige want ik haw in stikmannich kearen nei de wokker ta west. Fansels wie ik sunich mei de sêdmeitsjende bami en nasi dat sa koe ik dochs in kear as 5 it ritsje meitsje. No it restaurantsje wie dan miskien wat kneuterich, it iten smakke bêst en de priis wie skaplik. Sa koene wy foar 14,50 ûnbeheind ite. Wêr fine jo soks noch? Atst in kear in soad honger hast en do hast sin yn Sineesk iten dan is We Wok in oanrieder. Foar in lúks dinee kinst faaks better foar in oare Wokker kieze...
+ 0 - 0 | § ¶Oanslutingsprobleemkes
Foar de saak haw in in ferskaat oan oanslutings nedich. Ien fan de wichtichsten is fansels de ynternetferbining. Op dit stuit bin ik oan it ûndersykjen wat de mooglikheden binne. De rapste oant no ta is UPC mei harren Chello extreme abbonnemint. Dêrmei kin ik 20mbit dellade en 2 mbit oplade. Dêrneist krij ik der ek noch in tillefoannûmer by wêrby't ik nei 19.00 ûnbeheind mei skilje kin nei fêste nûmers. Altyd handich foar de freondinne har praatsesjes fansels. Ik haw foar de saak dochs leaver gewoan tillefoan fan KPN dat ik haw mar in nije ISDN oansluting oanfrege. No woe ik graach it nûmer 0512-345678 wat neffens de mefrou fan KPN dy't je der foar krije at je it nûmer skilje noch net beskikber wie. Mar yn it saaklik sintrum fan KPN koe men my net oan dat nûmer helpe. Uteinlik haw ik dêr dochs mar in tillefoansintrale oanskaft. Nei alle gedachten bin ik op 14 desimber te berikken op myn nije nûmer al wit ik noch net hokker nûmer dat wurde sil...
+ 0 - 0 | § ¶De keukenflier
It begjint der no hieltyd mear op te lykjen yn ús nije hûs. Sa is der al in ferskaat oan ljochtknopkes oansletten en ek de keukenflier leit al yn it hûs. De flier leit noch net yn de keuken trouwens mar dat komt ynkoarten wol. Oer in goeie wike komt de keuken al dus dan moat de flier der yn lizze. Wy hawwe úteinlik dochs mar keazen foar in stikje seil. Net de alderminste kwaliteit mei ik hope al hie ik sels leaver marmoleum hân. Mei skoanheit syn karre en in yngenieuse konstruksje mei twa planken hawwe wy sa de 4 meter lange rolle yn in karre fan goed 2 meter yn de Rottefalle krigen. It begjint der no al aardich op te lykjen want heit, skoanheit en de freondinne bin aardich mei de kwast dwaande west.