+ 0 - 0 | § ¶Fry-flop?
Justerjûn haw ik foar it earst gebrûk makke fan de bakplaat op ús Boretti. De saneamde fry-top is in bakplaat fan rustfrij stiel. Dat moat oars noch al efkes wenne want ik hie wat griente kocht en in pear byfstikjes. Mar nei't ik de plaat efkes goed foargloeid hie en ik der wat olyfoalje op dien hie waard dat fuortdaalks brún. Ek de griente dy't ik kocht hie wie mear geskikt om yn de wok te bakken dan op de plaat. Neidat ik wat oare oalje pakt hie gong it al better. Sa waard it byfstikje moai tichtskroeid en de kastanjesjampinjons smakken net nei bûter mar nei kastanjesjampinjon wat ek de freondinne wol wurdearje koe. Ik moat noch mar ris nei Wateren foar in stoomkursus bakke op de fry-top want it kin noch safolle lekkerder fansels...
+ 0 - 0 | § ¶Gjin jûne yn Grins
Ik hie mei skoanheit ôfpraat hy soe om in oerke as 14.00 yn Grins komme mei de karre. Ik hie ommers justernacht wurke oant 6.00 en sa koe ik noch efkes wat moarnsrêst krije wêrnei't wy dan tegearre de bank en it bêd ferhûzje soene. Spitigernôch prestearde myn wurkjouwer it allinnich al om my om goed 11.00 wekker te skiljen. Yn alle gefallen hie ik doe it bêd al útelkoar helle doe't skoanheit kaam. Tegearre ha wy de rest fan it spul ferhûze en de bank dy't doe't wy him kochten net yn de lift paste koe der no wol yn (mei dank oan Pythagoras). By it ferlitten fan de 72-ûnder-yn-kap foel it bêd noch heal útelkoar mar gelokkich koe skoanheit dat wer meitsje. Sa hat de freondinne straks de mooglikheid om ús bêd op de nije lokaasje yn te sliepen. Ik moat wer wurkje sadat wy de auto wer effisjent brûke kinne. Moarnier sil ik ris sjen hoe stil en tsjuster it yn de Rottefalle is...
+ 0 - 0 | § ¶Jeiers en Sammelders
Der stiet my faach wat fan by dat der yn de skiednisboeken wat skreaun wurden is oer de Jeiers en de Samlers. Hjoed hearde ik by beide groepen sa like it wol. Sa haw ik wer hiel wat mei de auto oan it jeien west oer de A7 om sa al it guod dat wy sammele hiene mei te nimmen. Dêr't de freondinne yn alles hiel krekt is wat it ferhûzjen oanbelanget is it by my bynammen effisjent. Sa haw ik de hiele foarriedskast yn plestik pûden kwakt. Dat dêrby wol ris in pakje bloem sneuvelje kin is dan net oars. Yn alle gefallen is it hûs no sa goed as leech. Allinnich de bank en it bêd stean der noch en de lytse tv fan de sliepkeamer. Doe't ik de freondinne jûns ophelle woe sy wat iten siede mar alle foarried wie al yn Fryslân. Dêrom ha wy it plúmkejeien mar in kear oerslein en ha wy by de Sinees yn Finkhuzen noch in ôfskiedsitentsje hân. In lekkere Kantonese riistafel. Fannacht moat ik wer wurkje dus ús lêste nacht yn Grins wie justerjûn al...
+ 0 - 0 | § ¶Gjin rêstdei
Nei sa'n drege ferhûzing soe in rêstdei wol noflik wêze fansels en ús leave hear hat dêr yn prinsipe ek wol yn foarsjoen mar ja, de minsken wolle op moandei fansels al wer nei de winkel om in pakje molke of in neigesetsje dat de logistike wrâld draait ek op snein gewoan troch. Omdat der ek noch 2 minsken net opdaachjen kamen moasten wy aardich oanpoatsje. It Indyske riistafeltsje kaam dan ek gjin tel te let. Lykas altyd koe ik noch krekt wat gado gado oerhâlde foar moarnier...
+ 0 - 0 | § ¶It ferhûzjen sit yn de lift
Fannemoarn wie ik al wer betiid op paad mei de auto. De freondinne woe earst noch wol efkes útsliepe en dat wie fierder wol goed. Ik ferwachte dan fansels wol dat wannear't ik mei de karre werom wêze soe der wer in moaie samling guod klear stean soe. No sa, ik haw in auto hielendal folstampt en dy nei de Rottefalle riden wêrnei't ik mei de karre wer werom kaam. Dêr koe ik myn auto net rjocht kwyt omdat der al immen mei in grutte iepen karre klear stie. Doe't ik mei de lift op de tsiende ferdjipping kaam stie de hal al grôtfol mei guod dat ik wie al hast grutsk op de freondinne mar ik koe it guod net alhiel pleatse en it die dan ek bliken dat it net fan ús wie. Der wie noch immen op ús ferdjipping op it idee kaam om dy deis te ferhûzjen. No dan mar efkes wachtsje fansels mar it baarnde my yn. Ik woe dy deis noch wol in pear frachtsjes dwaan en no moast ik wachtsje op myn buorlju. No ja, úteinlik slagge it dochs en sa krigen wy in moai soad guod by de lift. De antike bank fan de freondinne paste net mear yn de lift dat dy moast noch mar efkes ûnbeheard op 10 bliuwe. De freondinne wie benaud fansels mar it ding wie hast net te huffen dus ik sei dat it wol tafalle soe. Doe't wy de lift ûnder wer útromme hiene bin ik rap wer nei boven west om de bank op te heljen. Doe die bliken dat der op tolve ek al wer ien klear stie mei in fracht guod. Ik haw dan ek meilied mei de minsken dy't faaks lang wachtsje moasten op de lift. No ja, alles kaam yn de auto allinnich myn burostoel paste der net yn neffens de freondinne. No dan moast de hânsteun der mar efkes ôf dus dy waard efkes proffesjoneel troch har amputearre. üteinlik koene der ek noch wat blomkes mei op skoat. Doe't de fracht yn de Rottefalle wie hie de freondinne net in soad nocht om noch in kear nei Grins te fleanen dat wy koene noch net sliepe yn it nije hûs. Dat komt dan nije wike wol...
+ 0 - 0 | § ¶De saak ferhûzje
Fannemoarn wie ik al wer betiid út 'e fearren want de saak soe ferhûze wurde. Ik hie noch wat lêst fan jetlêk troch de nachttsjinsten fan ôfrûne wike mar it moast no dochs mar wêze. Alle kompjûters wiene al ôfkeppele en sa waard de auto folslein folstampt mei alles wat de saak nedich hat. As lêste waard de faks noch efkes loskeppele en it âlde nûmer haw ik doe trochskeakele nei it nije nûmer. De freondinne wie yntusken ek wekker dat dy koe noch krekt neist my plaknimme. It sicht wie min mar de foarútsichten wiene better. Fia Súdlaren kaam ik mei de saak yn de Rottefalle oan. Dêr haw ik fuort oan it útladen west en sa kin ik dit berjocht no dan ek type fanút it nije kantoar. De kompjûter draait wer as in tierelier allinnich bin ik bang dat der noch efkes in nije netwurkkaart yn moat om't dizze de hege snelheden fan Chello extreme net oan liket te kinnen. No ja, dat rêd 'm dan ek wol wer. Moarn mar sjen dat wy ek de priveesaken dizze kant wat op krije kinne...
+ 0 - 0 | § ¶Twarres
Mirjam Timmer en Johan van der Veen sille wer optrede. Dat wie ek wol logysk fansels want oars hie de bandnamme ek wol Ienris wêze kinnen. It is te hoopjen dat de twa ek wer wat Fryske nûmers op skiif útbringe sille want net tsjinsteande it grutte súkses fan 'In nije dei' fan de Kast (dy't ek wer in bytsje byelkoar binne) wie it dochs 'Wêr bisto' dat as earste op nûmer 1 kaam yn de nasjonale hitparade. De kast hie dêrby fansels de pech dat in Ingelske eks-prinses in tunnel yn Frankryk net goed trochkaam. No wie it dus Twarres dy't op ien kaam wêrby't ja sels ynternasjonaal súkses hiene. Ik mien my faach te herinnerjen dat Twarres sels in kear op de BBC by Top of the pops west hat mei Wêr bisto. Dan krij't sels dizze Fries pikefel (eartiids soe ik kipefel sizze mar ik bin no al sawat in wâldpyk hè). No ik winskje de twa wer in dikke nûmer ien hit, mar dan wol yn it Frysk graach...
+ 0 - 0 | § ¶Hout efter de doar
It mei dan wol gjin echt hout wêze mar yn myn kantoar leit yn alle gefallen de laminaatflier der no al yn. Dat betsjut dat de ferhûzing fan it ien en 't oare ynkoarten begjinne sil. Skoanheit is op it stuit noch drok dwaande mei de plintsjes en ek de doar moat noch in stikje ôf mar it liket yn elk gefal hiel moai. It liket der dan ek op dat ús lêste wike yn Grins sûnder dat wy it yn 'e gaten hiene al fan start gien is...
+ 0 - 0 | § ¶Fan D nei C
Foarich jier bin ik klupkampioen fan BC GO! wurden yn de D-klasse fan it plúmkejeien. No soe ik dy titel eins ferdigenje moatte mar ik haw der dochs mar foar keazen om de latte wat heger te lizzen dit jier. Ik haw my no dan ek opjûn foar de C-klasse. Myn kânsen om ek dêr mei de tsjelke thús te kommen binne dêrtroch fansels wol minimalisearre mar ach, dan hoech ik it kelkje ek net nei de Rottefalle te ferhûzjen. It is ek leuker om ien as twa partijen te winnen yn de C-klasse dan ien partij te ferliezen op D-nivo. Mar ik sil fansels wol myn bêst dwaan om yn elk gefal ien oerwinning út it fjoer te slepen. 3 febrewaris kinne jim tsjûge wêze fan myn prestaasjes yn de sporthal fan Heechtsjerke...
+ 0 - 0 | § ¶Tsjûge
Ik bin krekt troch myn suske frege om tsjûge te wêzen by harren boaskjen. Dêr hie ik fansels hielendal net op rekkene mar ik fyn it wol in hiele ear en ik sil foar dy ferantwurdlikheid net fuortrinne fansels. Ik bin der gewoan in bytsje stil fan
no ja, earst mar yn ûndertrou dan, en dan mar feilich weromkomme fan de wintersport...
+ 0 - 0 | § ¶It netwurk wurket net
Sa stadich wei oan falt alles op syn plak. Ik hie al in ynternetferbining op de buorren mar no haw ik tegearre mei Wouter ek efkes soarge foar genôch oanslutingsmooglikheden. Ik kin no wol in aardige LAN-party hâlde thús want sûnder problemen kin der no 10 kompjûters op ien ynternetferbining oansletten wurde. Der is allinnich noch ien probleemke. Gjin inkelde utp kabel yn myn kabelgoat, myn wenkeamer en myn sliepkeamer makket kontakt. Ik moat ynkoarten de ynstallateur der mar wer in kear by ha want it wie fansels net de bedoeling dat de flier besaaid lei mei triedden...
+ 0 - 0 | § ¶It ein is yn sicht
It ein fan de ferbouwing is yn sicht. De keuken is no hielendal klear útsein in pear tegeltsjes mar ek dy hawwe wy al yn hûs lizzen. Ik bin tige tefreden mei it einrisseltaat. In moaie rojale keuken mei in machtich moaie Boretti, in rojaal graniten oanrjochtblêd en fierder alle apperatoer mei fuortwurke. Sels de waskmasjine kin net ien twa trije lokalisearre wurde. Wy ha de ôfwaskmasjine fuort mar efkes brûkt en soks is dochs wer in flinke ûntlesting yn ús relaasje. Wy hiene jierren lyn al sa'n ding ha moatten tink ik no. De flierbedekking yn de sliepkeamer hat skoanheit der al efkes ynlein al moat der noch al wat lym ûnder. Ek de flierbedekking yn de keamer leit al klear, dy sil der moandei yn lein wurde. Fan nije wike ôf dus de skuon út by it betreden fan ús hûske. De plannen binne no om oankommend wykein al te ferhûzjen, de lêste wike Grins is dus faaks hast oanbrutsen. Ik haw trouwens ek noch in kaartsje foar de wedstryd fan it Fean tsjin de FC Grins bemachtigje kinnen dus der moat noch efkes in matraske lizzen bliuwe...
+ 0 - 0 | § ¶TicKUTbox
Nei oppenij in frij lang tukje bin ik dochs mar wer opstien. Ik moast noch efkes sjen oft der noch kaartsjes wiene foar de wedstryd FC Grins - Hearrenfean fan 2 febrewaris. By de Milo yn Finkhuzen stie de ien as d'oare miep dy't my fertelde dat harren kaartsjesmasjine it net goed die. Der is ek altyd wol wat mei dy tickutbox. Dan wer bin der gjin kaartsjes omdat it saneamd útferkocht is. Of der bin allinnich noch mar waardeleaze plakken wylst der in wike letter wer plak sat is. No wiene der dus wer hielendal gjin kaartsjes. Foar safier't ik wit bin der oars noch kaarten sat dat ik wol eins al efkes hinne. It sil de lêste kear wêze dat in útwedstryd fan it Fean sa ticht by hûs is. No haw ik ek gjin sin om de hiele stêd troch te fytsen dus dan moarn mar wer efkes hinne fansels. Straks nei iten mar wer betiid op bêd en dan sil wy moarn ris sjen hoe't it der foar stiet mei it hûs.
+ 0 - 0 | § ¶Standje Bear Boeloe
Hjoed wie echt in dei fan hielendal neat. Sa haw ik wurke oant 6.00 moarns en dêrnei haw ik my deljûn. Omdat ik nochal wat slieptekoarten hie waard ik pas let yn de middei wekker wêrnei't wy efkes in waarm miel nuttige hawwe en sa kin ik al hast wer oan it wurk. Ik soe noch bêst efkes in oerke as wat op bêd lizze wolle want sa'n ferbouwing yn kombinaasje mei in op hannen steande ferhûzing nimt in soad fan dy. Mar it ein is yn sicht, en dan kin wy wer 'Lekker sliepe'!
+ 0 - 0 | § ¶Foarname gasten
Hjoed stiet wer yn it teken fan de ferbouwing. Sa is der wer immen mei ús keuken dwaande en ús heit is yn de hal dwaande om it plafond klear te krijen. De tegeltsjes bin oankaam en de freondinne is om flierbedekking út. Skoanmem hat ús efkes foarsein hoe't wy behang plakke moasten en skoanheit en de freondinne hawwe oan it wrakseljen west mei it wâldbehankje. It kantoar is no fierhinne klear. Ek de flier leit der al yn, al moat dy noch efkes ûntsteapele wurde. Wylst wy drok oan it wrakseljen wiene mei de waskmasine, it foel net ta om dy yn it keukenkastje te krijen, skrok ik fan in klop op de efterdoar en dêr stie samar ynienen myn omke Catharinus foar de doar. It die bliken dat se mei syn nije wein efkes út te riden wiene en neist tante Anneke hiene hja ek myn beppe en tante Jannie mei naam. Dat wie in ferrassing fansels en ik hie dêr ek hielendal net op rekkene mar wy ha se de keet efkes sjen litten en ik leau dat se it wol in moaie wenning fûnen. Tante Jannie fûn ek de kasten yn it hok tige nijsgjirrich, ik hie se al hast mei jûnt...
+ 0 - 0 | § ¶Saaiste jierdei ea
Myn jierdeis ha noch nea sa saai west as hjoed. Fannemoarén wie ik oan it wurk op it fabryk oant 6.00 en dêrnei hawwe wy nei it hûs west. Ik haw dêr tuskentroch net op bêd west. Heit en mem wiene der ek wer ris en mem hat yn en om ús hûs de ruten himmele wêrtroch't wy no nei bûten sjen kinne (en bûten nei ús). Middeis waard ik noch skille mei de fraach oft ik fannejûn ek wer wurkje wol. Dat wol ik wol fansels, mar wannear moat ik dan sliepe? Yn alle gefallen haw ik no de tillefoansintrale oan de praat krigen sadat no alle tastellen lûd jaan wolle at wy skille wurde. Ek haw ik ynternet fan UPC krigen (Chello extreme, 20mbit) en dat haw ik hielendal sels oansletten. Ik bin der suver hast grutsk op mar ach, sa dreech wie it ek wer net! Ik sit no dus efter de skoatkompjûter op myn nije ynternetferbining. Gjin besite, weinich kaartsjes (ik stjoer sels ek net faak kaartsjes) en sa fljucht de dei om en kin ik straks om 22.00 al wer oan it wurk. Sliepe kin ommers altyd noch wol, en mocht ik in burn-out krije dan moat Capac mar efkes mei wat sinten komme...
+ 0 - 0 | § ¶Noch ien dei 31
Fannemiddei waard ik om in oerke as twa wekker en doe haw ik earst ris efkes de kompjûter bywurke. Dêrnei wie it al wer tiid om iten te sieden foar my en myn skatsje. Om sân oere mochten wy alwer oantrede yn de sporthal foar ús wyklikse plúmkejeisesje. Dat wie wol wer efkes lekker switten mar dêrnei koe ik fuort troch nei myn wurk want ik haw dizze wike nachttsjinst. Earst noch efkes nei de Makro foar in gebakje sadat ik myn kollega's ek noch wat nofliks foarsette kin fannacht om 00.00 ofsa. Moarn haw ik ommers alwer myn jierdei al fier ik dat dit jier wat letter yn ferbân mei de ferhûzing. It kin dan moai kombinearre wurde mei in soarte fan hûsferwaarmingsfeestje...
+ 0 - 0 | § ¶In stikje út de film
Gurbe Douwstra song it al ris: "Ik mis in stikje út de film". No sa is it mei my no ek. Faach driuwe der noch wat flarden troch myn kop. Bearenburch mei Sânomheech, Kaartsjeblazen, Moksels, Jitiizer en de Dikke lul band en fierder gewoan in hiel soad wille en in grutte bende nei ôfrin. Sa giet it oars wol gau ris op de Brugstrjitte. No ik haw wer sa'n soad drank hân dat ik earst mar wer efkes in pear wiken sûnder moat. Foar my kommende moanne dan ek gjin alkohol mear. Ik bin ommers ek al hast 32. Foar de wissichheid mar net mei de auto nei it wurk ta mar op 'e fyts. Rottefalle mei it hjoed sûnder my stelle...
+ 0 - 0 | § ¶Flierbedekking
Wy ha wer in drokke dei efter de rêch. Earst ha wy mei Skoanheit sawat de hiele wâlden troch west op syk nei flierbedekking foar yn ús sliepkeamer en keamer. Yn Westergeast fûnen wy noch in restje dat wol aardich passe koe yn de sliepkeamer, foar de wenkeamer ha wy op dit stuit noch in pear opsjes. De freondinne wol ek noch in grutte kast yn de keamer ha dat ek dêr ha wy noch efkes nei omsjoen. Oan it ein fan de rit hiene wy bêst wol honger en in goeie boaium wie ek wol nedich fansels want der stiene fannejûn noch in twatal feestkes op it program. Earst nei Martin foar in hûsferwaarmjend feest yn it kader fan de Aldiwynrûnte. Dêrnei noch efkes nei de Brugstrjitte foar it ôfskied fan Boele dy't him foarlopich yn Moskou festigje sil. Doe't ik op de Boretti in noflik pantsje mei Macaroni klearmakke krige ik in sms dat it feest by Martin 2 wiken opskood wie dus dat kaam noch better út. Op nei Grins, op nei de Brugstrjitte foar in grof feestje...
+ 0 - 0 | § ¶Omropfryslân.nl is fernijd
Omrop Fryslân hat in nije thússide makke en dy is nochal feroare. Ik moat sizze dat it al efkes wennen is. Ien fan de fernijings is yn elk gefal wol ferhipte handich. Foar de net sa hiele Frysktalige mar wol leargierige ynwenner fan Fryslân is it no fia in spesjaal knopke mooglik om in oersetting yn it Hollânsk te krijen fan in grut ferskaat oan Fryske wurden. Sa kinne drege Fryske teksten begryplik wurde en leart men jitris in nij wurd. Ek nij is de Fryske fersje fan 'uitzending gemist' dy't it no mooglik makket om it nijs ek fia ynternet oeral op de wrâld te besjen. In goeie taheakking fansels foar de Friezen dy't net yn it gebied fan de Astrasattelyt wenje! It is moai dat de webmasters fan de Omrop der sa goed mei dwaande binne. Omrop Fryslân is dêrmei ien fan de bêste
Frysktalige thússiden op it net!
+ 0 - 0 | § ¶Bûten is it kâld en fochtich...
Fannemoarn wie it drok yn Huize Kuipers/Spoelstra. Cor en Sipke wiene der om ús dakgoate op te hingjen. Peter wie der foar de ynstallaasje, skoanheit foar ferskate putsjes, ús heit foar it skilderwurk en ik foar it tasjochhâlden. Sa moast der sels noch in stoel út it hok byhelle wurde om elkenien in sitplakje te jaan. Wylst Peter drok dwaande wie mei it reemeitsjen fan de ferwaarming stiene Cor en Sipke te klomjen op de steiger temidden fan wynkrêft stoarm en mei in luchtfochtigheid fan 100%. Foar de kofje hie Peter noch rap efkes in antennefersterker pleatst en de ferskate kabeloanslutings oansletten. Mei in rap út it hok oantúchde swart-wyt tillevyzje koene wy doe op ferskate keamers tv sjen. Dat is moai want dan hat UPC ús dus alfêst oansletten. Nei de kofje koe der wetter yn de sintrale ferwaarming en doe koe de stekker fan de tsjettel der yn. Nei inkelde tellen kaam der al hearlik waarm wetter út de kranen yn keuken en badkeamer. Ek de ferwaarming begûn no waarm te wurden en sa hearste der foar it earst sûnt jierren wer in oangenamere temperatoer yn it hûs. Fansels moast de kachel net fuort op toarst stean omdat oars de ferskate nij oanbrochte stúk, skilder, spac en behangwurkjes it net oankoene. Mar doe't ik oan it begjin fan de middei fan de trep kaam wie it boppeyn al aardich noflik. Sa koene Cor en Sipke tidens it skoft wer efkes op temperatoer komme. Spitigernôch moast ik middeis wurkje want hjoed barde der wer fan alles mar allee, dat sjogge wy dan sneon wol fansels...
+ 0 - 0 | § ¶Der komt wat kleur yn de keamer
Wat wy yn de polityk dizze kear net krije hawwe wy no yn ús wenkeamer wol: Pears! Ien wand fan de keamer wie noch net behandele, de oare trije wiene al earder spact. No is de hiele keamerwand fersierd en hawwe wy in moai kontrast mei it pearse dat aardich ôfstekt tsjinoer it spierwite fan it spacte. Spitigernôch kaam ús keukenman hjoed net om de keuken ôf te meitsjen want dat wie neffens him noch ien dei wurk. Dochs haw ik al in bytsje gebrûk makke fan de Boretti om in pantsje mei sop op te waarmjen. Noch gjin kulinêr hichtepunt fansels, mar wol lekker waarm en in stik suniger dan op it illektryske stoofke fansels. Oan 'e ein fan de middei skille Cor ús ek noch om te fertellen dat er moarn de dakgoate pleatse soe. Peter soe dan ek komme en dy koe de goate dan beklaaie mei sink. No sieten wy fansels net te springen om dy nije dakgoate, mar Peter wie wol tige wolkom omdat dy de sintrale ferwaarming opstarte moast. Fandêr dat ik mar efkes yn de Rottefalle sliepen bliuw fannacht...
+ 0 - 0 | § ¶No de hal noch
De hal yn ús nije hûs wie it projekt fan de freondinne. Sa moast dêr in balkeplafond yn komme. No hongen de balken der al mar dy sieten net sa moai mear yn de ferve en omdat de hal gjin prioriteit hie (hat) koe it noch wol efkes wachtsje. Yntusken hawwe wy sawat it folsleine hûs skildere mar de hal is noch altyd net in soad oan bart. Us heit hat de kezinen al in kear goed skildere dus no liket it al wat moaier mar it plafond is noch altyd like skurftich. Ek de doarkezinen dy't yn de rest fan it hûs prachtich wyt wurden binne bin yn de hal noch donkerbrún. Mar no net mear want nei lang skjirjen en plamuren haw ik hjoed de grûnferve der mar ris opsmart. It liket no allegear wer in stik frisser. No dy ellendige balken noch...
+ 0 - 0 | § ¶Boretti mei hout foar de doar
Fannemoarn haw ik earst de freondinne efkes nei har wurk brocht om dêrnei mei de auto fanút Súdlaren troch te riden nei de Rottefalle. By dat ritsje bin der ferskate opsjes mooglik. De snelste opsje is gewoanwei oer Grins mar omdat it Julianaplein moarns frijwat drok is gean wy meastentiids in oare kant om. Gewoanwei gean ik dan rjochtút oer Donderen, Roden en Leek om dan fia de A7 wer fierder te koersen. Hjoed woe ik ris besykje om oer de Wâldwei te gean dus fleach ik earst Assen foarby en doe lâns Appelskea en Easterwâlde. Dit wie al in bytsje langer en bynammen efter frachtweinen skeat it net al te bot op. Doe't ik yn de Rottefalle oankaam stie de bus fan De Haan al wer foar de doar. En wat ik al hoopte wie wier, ús Boretti wie no ek te plak. Wat in prachtich fornuis is dat je. Se hiene 4 man nedich om 'm yn 'e hûs te tillen. Spitigernôch wiene de Italjanen fergetten in pear dinkjes yn te pakken want ús oanrjocht is 94 sintimeter heech en in standaard Borettipoat kin mar oant 90 sintimeter komme. Der moat dus spesjale poatsjes ûnder en dy hiene hja net levere. No stiet ús Boretti dus op 4 houten blokjes. Ek mist der noch in stikje fan de Fry-top en it plamuurmes wat by de fry-top hearde wie ek net oanwêzich. No, dat sil ynkoarten dan noch wol neilevere wurde tinkt my. Yn alle gefallen kin wy no mar omraak iten siede yn ús nije keuken. Wy ha der sels in ierdewurken pizaplaat bykrigen sadat wy echte piza's bakke kinne krekt as by de Pizeria.
+ 0 - 0 | § ¶In jier frij( )sinnich?
Hjoed is it krekt in jier ferlyn dat ik mei dizze webloch begûn. Myn earste reaksje krige fuortdaalks al 2 reaksjes en sûnt dy tiid haw ik alle dagen minimaal 1 bydrage skreaun. Dizze bydrage sil leau'k de 369ste wêze dat der hawwe ek in pear dagen west dat der mear as ien bydrage west hat. It is lestich om alle dagen wat nijsgjirrichs te skriuwen dus ik begryp bêst dat jim net alles lêze. It foarste jier stie foar in grut part yn it teken fan de ferbouwing. Ik syktocht op it wurd Rottefalle smyt dan ek al 38 (straks dus 39) stikjes op. It Hearrenfean hat ek foar de nedige stikjes soarge (23). Ik haw ek gauris skreaun oer in film dêr't ik hinne west haw as oer in nije Fryske top kompakt skiif. Mar guon stikjes bin ek maatskippijkritysk as gean júst hielendal nearne oer. Nei in jier is dan de fraach, wêr dogge jo it foar? Ik haw fansels útwreide statistykjes fan myn side en sa docht bliken dat der alle dagen wol hast mear as tritich unike besikers op myn side komme. Yn desimber 2006 bygelyks, wiene it der gemiddeld 38,13 per dei. Yn maart wiene it der hast fyftich per dei. Wy hawwe it dan dus oer unike besikers mei in eigen IP-adres. De minsken komme fansels bynammen út Nederlân mar ek de Feriene Steaten en Kanada stean heech. Dêr bin in protte Friezen hinne gien eartiids. Ek myn neef Radmer hat op syn wrâldreis foar wat útwriidske lannen yn Súd Amearike soarge. Der ha sels noch 2 Iraniërs west en ek yn Algerije is myn webloch populêr. 93,7% fan myn besikers hat gewoan Windows as bestjoeringssysteem. 86,8% brûkt Internet Explorer, Firefox (dy't ek yn it Frysk beskikber is) stiet mar op in meagere 6,5%. In soad minsken komme fia Google op myn side mar ek it Fryske foarum is hofleveransier. De startpagina fan Sint Nyk docht ek leuk mei oars. Populêre syktermen by de sykmasines binne fansels 'Thaeke' en 'Kuipers' mar ek 'Landon Gildar', 'Kalou' en 'Verdonk' bin populêr. Ik bliuw dus mar gewoan trocheameljen oer fan alles en noch niks. Want sa te sjen bin der leafhawwers foar...
+ 0 - 0 | § ¶Radiatoren, fisite en swier transport
No't alle muorren in laachje ferve krigen hawwe of in laachje spac hawwe wy alle radiators wer te plak hongen (dus Peter, atst dit tafallich lêst, kinst moandei wol komme om de sintrale ferwaarming oan te sluten en op te starten en nim dan ek efkes it tankje mei foar de utp-stekkerkes). Hjoed wie de dei dat elkenien efkes op de bou sjen woe. Sa krige ik in SMS fan Elly en Frank dy't wol efkes by ús sjen woene. Se woene ek iten bliuwe mar ik sei dat dat neat wurde soe. Dan soene hja wol Sineesk foar ús helje mar dat hiene wy juster al hân. In lekkere Pizza dan? Ek net goed want dat ha wy in dei earder al hân. Uteinlik ha se dochs efkes west om te sjen, dat itentsje komt letter noch wol in kear. Ek Jelle en Machteld ha noch efkes del west. Dy bin sels ek drok dwaande mei it fernijen fan harren âlde hûs dat sy koene by ús moai de keunst efkes ôfsjen. Letter op de jûn haw ik noch efkes mei de karre nei Grins west om de waskmasine op te heljen. Dy moat moandei yn de nije keuken yntegreard wurde dat sadwaande. Ik hie de help efkes ynroppen fan sterke man Boele om de waskmasine yn de karre te krijen en hy hie Mr. Muchofresh Huiberts ek efkes meinaam. Omdat der noch romte oer wie yn de karre haw ik ek myn ienpersoansbêd meinaam en in fyts. It ienpersoansbêd paste net yn de lift dus dat ha wy by de trep del sjouwe moatten. Ik hie it fansels ek demontearje kinnen mar dêr hie ik gjin sin yn. In hiele optocht dus, 10 treppens nei ûnderen mar wy rêden it op. Bedankt hearen! De weromreis nei Grins gie noch stadiger as de hinnereis en it is dan ek bêst wol frustrearjend om mei 80 oer de snelwei te riden. Ek de poat op it gas stiet dan yn in fervelende hoeke. Cruisecontrol, wa wit der in kreas Frysk wurd foar, soe dan ek yn de takomst in aardige opsje wêze. No ja, yn Grins wurdt it hûs hieltyd leger, yn de Rottefalle kin wy no ek sliepen bliuwe. Krekt as eartiids, lekker ticht tsjin elkoar oan...
+ 0 - 0 | § ¶Net SLIM fan KPN
Juster hie ik myn tillefoannûmers yn Grins opsein. Dat wie noch in hiel gesoademiter want wannear't jo skilje mei KPN krije jo earst in karmenu en in soad geëamel oer dat it sa drok is troch it nije ynternet + skiljen. Nei in stik as 7 opsjes by del west te hawwen kaam ik dochs teplak en doe moast ik noch 5 minuten wachtsje. Ik haw myn tillefoannûmers opsein mar net per fuortdaalks fansels. Ik hie in opsistermyn fan 1 moanne dus dy moanne woe ik myn nûmers noch wol graach behâlde. Fannemoarn waard ik troch in klant skille yn 'e Rottefalle. Dy fertelde my dat er dit nûmer fia 118 krigen hie en dat myn oare nûmer ôfsletten wie. In flaterke fan KPN yn myn neidiel fansels en dêr wurde ik net bliid fan. Dat ik haw fuort KPN skille en nei lang wachtsjen (in kertierke ofsa) krige ik der fia fia fia úteinlik immen foar dy't keurich yn syn kompjûterke seach dat it nûmer ôfsletten wurden wie per fannemoarn. Dat wie net neffens de ôfspraak dat ik sei: "Slút 'm mar wer rap oan" mar dat koe net want de bêste man hie gjin oarder en sûnder oarder koe er neat begjinne. Ik sei tsjin de bêste man: "Dan pleatse jo mar in oarder" mar dat koe er op syn manier net dwaan. Ik moast mei in 0900 nûmer skilje en in oarder pleatse. Lekker is dat, hja meitsje in flater en ik kin der wer foar opdraaie en it kost noch jild ek. No ja, de earste 2 kear krige ik de melding: "door de grote drukte zijn wij momenteel niet bereikbaar, de verbinding wordt nu verbroken tuut tuut tuut". Dat wie net fuortdaalks mar nei 2 minuten troch in menustruktuur banjere te hawwen. Dêr waard ik net echt gelokkich fan mar de oanhâlder wint fansels. Dat by de tredde kear waard ik yn de wacht setten en sa krige ik úteinlik in oarder. It soe moandei wer wurkje. "Moai is dat sei ik, jim slute my yn ien dei ôf mar it duorret 4 dagen om my wer oan te sluten?" Tsja, ik hie noch mazzel want offisjeel stiene dêr 5 wurkdagen foar sei it wyfke. No kin myn saak fansels net 5 dagen sûnder tillefoan en faksnûmer dus ik haw se noch efkes sein dat ik der totaal net bliid mei wie. No, it feroare der net om. Mar in oerke as twa letter krige ik dochs tillefoan fan KPN, se hiene de nûmers wer aktyf makke. It koe dus dochs wol!
+ 0 - 0 | § ¶De kleur is salm
Fannemoarn hiene wy kleurkes útsocht om hjir en dêr op te smarren. Sa hiene wy ek in Keniaansk kleurke útsocht foar op it glêsweefselbehang yn it kantoar. Dat soe in foarm fan ljochtgiel wêze moatte hiene wy tocht mar it wie dochs wat mear salmkleurich. It is noch krekt gjin rôse gelokkich mar it wie yn earste ynstânsje wol efkes wennen. Faaks lûkt de kleur noch in bytsje by at it opdroeget. At de boulampen út binne liket it yn elk gefal net sa gek. Ik bin wol benijd hoe't de kleur stean sil by myn wâldsk boskje. Ien ding is wis, mocht der in fûgeltsje yn myn bosk libje dan sil it grif in salmsnip wêze. Wy ha ús yn alle gefallen de jûn noch efkes goed besteed troch ús maachjes te fullen by de wokchinees fan de Pein. Dat smakke wer mear as geweldich, in oanrieder dus!
+ 0 - 0 | § ¶Alwer in boutrouma
Nei ús avontoeren mei it glêsweefselbehang yn de hal en yn myn kantoar stie hjoed it âlde fertroude finyl op it programma. De sliepkeamer soene wy behangje mei in frij swarteftich behang mei in patroantsje der yn. Dat foel noch net ta want in patroantsje komt fansels hiel krekt allegear. Yn earste ynstânsje woe it net sa goed plakke dat op in gegeven moment tocht ik, dan moat der mar wat mear plaksel op. Myn earste lympoging wie ek fuort wer myn lêste want skoanheit is langer dwaande west om it tefolle oan lym der wer ôf te heljen dan dat ik mei it smarren dwaande wie. Myn boutroumas en myn boufaaleangst bin dus wer stegen nei iensume hichten. Yn alle gefallen is de kelder wol moai wyt wurden...
+ 0 - 0 | § ¶Chello extreme
Ik haw krekt de oanfraach foar rap ynternet de doar útdien. Ik haw dochs mar keazen foar Chello fan UPC. Dit bedriuw hat yn it ferline wol gauris foar wat klachten soarge mar sy hawwe dochs in tige rappe ferbining foar in redelike priis. Ik haw fansels keazen foar de rapste ferbining dy't hja leverje koene wat betsjut dat ik straks mei 20 Mbit delhelje kin. Dield troch 8 soe ik dan dus 2,5 mb per sekonde ophelje kinne, rom fiif kear sa rap as no. De oplaadsnelhyd is mei 2Mbit wol wat leger as wat ik no haw mar ach, je kin ek net alles hawwe no? Ik moast der wol ferplicht ek radio en televyzje by nimme mar ach, dat is ek net sa'n ramp fansels. Ekstra foardiel is ek noch dat ik straks in ekstra tillefoannûmer krij wêrmei't ik jûns en yn wykeinen fergees nei fêste nûmers skilje kin. It kin net op mei UPC, no mar hope dat se wat op tiid leverje kinne...
+ 0 - 0 | § ¶Behangdei
Fannemoarn wiene wy alwer betiid ree om nei de Rottefalle ôf te reizgjen. Hjoed soe der behange wurde dat wy wiene wol benijd hoe't dat gean soe. Skoanheit is in ekspêr op it gebied fan behangplakken dus dat komt moai út. Mar mei glêsweefsel hie er noch nea earder aktyf west. It die bliken dat dat net folle útmakke want hy rêde der wol mei. Wylst ik de muorren fan myn kantoar ynstruts mei plaksel út it giele pakje plakte skoanheit hiel sekuur baan nei baan. Oan it ein fan de dei siet it kantoar foar trije kwart yn de behang. Op it oare kwart komt ommers myn hjerstwâldbehang. Dit dogge wy letter noch wol omdat earst de muorren mei in radiator foar gean. Hooplik kin de sintrale ferwaarming nije wike foar it earst oan want it is no noch frij kâld en klam yn it hûs...
+ 0 - 0 | § ¶Segen yn it nije jier
Allegear mar in noflik 2007 tawinske. Ik bin âldjiersjûn wer redelik trochkaam en hoewol't ik no net mei 10 fingers type kin koe ik dat foarich jier ek al net dus dat falt ta. It fervelende fan in nij jier is dat it meastal begjint mei in kater. Dit jier is dêryn gjin útsûndering. Juster haw ik earst by Gerlind sitten dêr't ik op Gerlind nei de ienige (âld) Bernleffer wie. De rest fan it partijtsje waard opfolle troch freonen fan Thijs, de freon fan Gerlind. Myn freondinne wie ek net oanwêzich omdat dy har net fit genôch achte. Boppedat stie de auto ek feiliger op 'e Rottefalle. De freonen fan Gerlind hiene in wereld oan fjoerwurk by harren. Ferskate pylken, kearsen en ek de goeie âlderwetske astronauten ûntbriken net. Mar wat ik net ferwachte hie barde dochs. De astronauten wiene yngrediënten foar in sels makke bom. Gewoanwei ferwachtsje jo soks net fan de wat heger oplate minsken, útsein in inkelde betástudint. Al it troch de lytse bernefingerkes soarchfoldich yn de kartontsjes stampte krûd waard sammele en yn in plestik bakje byelkoar hâlden. It risseltaat wie net in oerweldigjende dreun mar bleau beheind ta in lyts fjoerke en wat reek. Neidat de babypylkjes sawat it memmeboarst fûn hiene bin ik mar ôfset nei de soas fan Bernlef dêr't ik noch krekt in pear skotsjes mei de Carbidbus meipakke koe wêrnei't de jûn eindige mei in fles bearenburch en in pakje kaarten. Doe't ik thúskaam die bliken dat der yn Finkhuzen in hiel oar âld en nij fiert wie. Alle ruten fan ús entree wiene fernield, in ferskaat oan brievebussen lei kompleet út de muorre wei en alle fytsehokken wiene iepenbrutsen. Foar patrimonium begûn it jier dus al wer goed...