+ 0 - 0 | § ¶In nije kachelmotor
Hjoed wie ik mei de auto fan skoanheit nei it wurk ta west. Dêrnei haw ik myn pak ophelle en yntusken wie ik ek noch kear skille troch de garaazje. It die bliken dat de kachelmotor trochbaarnt wie. Der moast eins mar in nijen yn. No dat liket my nochal logysk want ik wol net alle kearen beferzen as swittend út myn auto komme. Moarn soe der in nije kachelmotor komme en mei in bytsje gelok is de auto dan sneon wer klear. Dat komt ek net sa krekt want wy ha moarn fansels de trouwerij fan Marcel en Rinkje en dan bin wy dochs de hiele dei fuort.+ 0 - 0 | § ¶In bûsgroentsje en gjin griene auto
Doe't ik út myn wurk kaam krige ik in sms'ke fan de freondinne. Sy stie op it parkearterrein op my te wachtsjen. Mei har auto giene wy de binnenstêd yn en sa kamen wy nei it nedige opûnthâld yn de Naberpassage telâne. De stêd wie hjir en dêr, bynammen op it Damsterdjip, opbrutsen dat wy koene net oeral del. By de V&D hawwe wy doe in moai bûsgroentsje kocht en in pear nije sokken. Dêrnei wer nei de auto en sa waard ik wer by Friesche vlag ôfsetten om mei myn auto werom te riden. Ik wie doe al sa wurch dat ik binnen 100 meter fan it fabryk al hast op de trekheak fan de freondinne siet. No hie my dat fansels wol in moaie sleat bensine skele kint en de auto moast dochs nei de garaazje ta foar de luchtsirkulaasje mar de freondinne wie dochs wat skrokken, ik net minder fansels. Mei gepaste ôfstân hawwe wy de auto nei de garaazje brocht dêr't wy yn Drachten alletwa fansels in ferkearde mar wol in oare ôfslach namen. Ik bin no efkes tydlik autoloas en dat fielt net noflik.+ 0 - 0 | § ¶Fan trije nei twa
Dêr't myn freondinne al wer frijwat oan it panyksaaien wie oer it feit dat ik noch gjin pak hie foar kommende freed bin ik fannemiddei mar efkes de stêd yn west om in pak. Ik bin fuort mar nei de winkel west dêr't myn oare pak ek weikaam. Dêr woene hja myn maat witte mar dat wist ik fansels net. Ik sei, lit wy earst mar ris de grutste besykje en doe die bliken dat se dochs wol wat foar my betsjutte koene. Ik woe eins wol wer in trijedelich kostúm hawwe mar neffens de ferkeapster wiene dy net mear sa yn trek dat ik bedarre úteinlik by in twadelich pak. Fansels moast der ek noch efkes in bûsgroentsje by mar dat hiene hja net yn myn maat. De earmlingte wie wat te koart. It koe wol besteld wurde en at alles mei siet soe it der dan tongersdei wol wêze mar men koe soks net garrandearje. No dan hoecht it oan my ek net want ik wol net tongersdeitejûn noch op jacht nei in bûsgroentsje fansels...+ 0 - 0 | § ¶Stress yn de hûs
Wat yn prinsipe in rêstige twadde pinksterdei wurde soe waard oan it ein fan de rit dochs noch efkes flink stressfol. Wat wie der oan de hân? In klant fan my organisearre in kongres en dêrfoar wiene fia ynternet kaarten te bestellen. Der wiene 800 kaarten en dy soene om 20.00 yn de ferkeap gean. It fervelende wie allinnich dat der om dy tiid hinne sa'n 3000 minsken as in idioat op de F5 knop sieten te rammen om mar as earste yn skriuwe te kinnen. It rissultaat wie dat de server yn ien minút oergryslik faak in side oanleverje moast dy't ek noch ris brûk makke fan php en mysql. De server waard der oergryslik traach fan en jim favorite webloch wie dan ek hast net mear te besykjen. Om alles wer wat oan de praat te krijen hat efkes duorre en no moat wy noch efkes sjen dat der in oplossing komt foar de ynskriuwings. Ik moat noch mar ris sjen nei in betelle nûmer a 75 sint de minút foar myn saak. Mei alle tillefoantjes fan de foarsitter fan it kongres hie ik dan yntusken wol smoarryk west...+ 0 - 0 | § ¶Anti Ajax
Ik bin al jierren anti Ajax en dat is ek fuort ien fan de wichtichste redens dat ik noch altyd net skiedsrjochter bin op it heechste nivo. In oare wichtige reden is fansels dat de coopertest my in meterke as wat te fier is. Ek no hawwe dy hufters út de haadstêd it wer foar elkoar krigen om krekt as tsjin it Fean yn in pear minuten de wedstryd nei harren hân te setten. As ien fan de weinigen fyn ik dat net allinnich sneu foar AZ mar ek foar Van Gaal. Want hoe nuver at dy man bytiden ek docht, yn syn hert is it wol in prima keardel. En dat dy Ajaksiten him sa nuver behandelje mei spandoeken ensa fyn ik hielendal gjin poarum. De man hat foar Ajax oars genôch dien om in stânbyld te fertsjinjen, it leafst yn de bekende 'Karatetraaphâlding' sa't er dat ek yn de finale fan de Champions League die.+ 0 - 0 | § ¶In maatsje te lyts
Yn 1998 haw ik myn earste pak oanskaft mei it idee dat ik dêryn boaskje soe en dat men my dêryn ek de oven ynskowe mocht. It wie in moai trijedelich pak dêr't ik tegearre mei de freondinne mei nei it alder earste stinzefeest west haw. Letter haw ik it ek noch mannich kear oan hân by resepsjes, by itentsjes fan myn skoanâlden en fansels yn myn bestjoersjier fan Bernlef. Mar dêr't guon minsken geastlik groeie is it by my bynammen ek yn de breedte en djipte dat by de premjêre fan de Fryske Kameleonfilm skuorde myn broek al in eintsje út, op dit stuit wol it knoopke allinnich noch ticht at ik steande myn adem ynhâld. Der moast dus mar in nij pak komme dat wy teagen tegearre nei Drachten om dêr foar in nij pak te soargjen. Moatst net miene dat sy myn maat dêr hiene. Mei lege hannen kamen wy wer thús en noch altyd gjin pak foar kommende freed. De freondinne wie al aardich yn de stress mar ik bin krekt oan it lêzen yn de Hitchhikersguide to the galaxy dus de twa wichtichste wurden út it bekende hielal stean my noch helder foar de geast: "Gjin panyk!"+ 0 - 0 | § ¶Gjin stikjes
Op it troufeest fan Rinkje en Marcel mocht ik fan Rinkje gjin stikje dwaan. Dat is spitich want ik hie fansels wol efkes sin om harren efkes mei in moai Frysk stikje wer mei beide fuotten op de grûn te krijen. Lokkigernôch hie Marcel syn broer noch in alternatyf fûn yn de foarm fan in brulloftsboekje mei tips en saken út it ferline. Sa koe ik him fansels yn alle gefallen noch it ien as 't oar fertelle oer Rinkje har reitfoby, har komkommermany en noch in stikmannich eigenaardigheden.+ 0 - 0 | § ¶Desepsje by in feestje
Ik krige fannemoarn in kefert mei pompeblêden en it Hearrenfeanlogo der op troch de bus. No stean ik sûnt in tiidsje op de wachtlist foar in seisoenskaart dat ik hie al in bytsje hoop op in oanbieding. Mar doe't ik it kefert iepene die bliken dat se in feestje fiere woene en dat ik as klubkaartbesitter ek wolkom wie om foar mar 16 euro nei Jannes en George Baker te harkjen. Yn de brief wie men ek sa lekker oerdreaun dwaande. Ik kwoot efkes: "Per slot van rekening hebben we een hoop te vieren: een bijzonder succesvol seizoen dat eindigde met plaatsing voor de UEFA Cup. En niet te vergeten: onze topscorer is inmiddels geselecteerd voor het Braziliaanse elftal!". No miende ik my te herinnerjen dat de doelstellings wiene: By de earste 5 eindigje, Europeesk oerwinterje en lang meidwaan yn de Beker. Fan dy doelstellings hawwe wy mar ien helle en yn de play-offs hawwe wy it wer raar ôfwitte litten. Dat ús Alves selektearre is foar it nasjonale alvetal is moai foar him en it sil syn ferkeappriis faaks wat ferheechje. Mar kommend jier sil de Braziliaan grif net wer yn it Pompeblêdemouhimd spylje. No ja, men makket der mar in moai feestje fan mar my sjocht men hjir net...+ 0 - 0 | § ¶RIHA gearkomste
Ik bin wer hielendal yn myn elemint want ik kin wer nei gearkomsten ta. Hjoed hie ik de earste gearkomste fan de RIHA, de Rottefalster yndustry, hannel en ambacht. Ik bin no algemien lid fan it bestjoer en wy sil sjen dat wy de bân tusken de ûndernimmers fan ús doarp wat oanhelje kinne. It begjint fuort al geweldich want wy sille yn juny te silen mei in skûtsje om dêrnei ôf te sluten mei in barbekjoe. No binne ite, sile en brantsjestoke dochs in pear fan myn hobbys dus it moat goedkomme. Myn oare bestjoersleden bin stik foar stik prima minsken dat ik tink dat it wol goed komme sil mei ûndernimmend Rottefalle...+ 0 - 0 | § ¶Krekt Jitiizer
Myn Laguna hat in lyts probleemke (hoop ik) mei de fenitalor. Dy docht it net wêrtroch't de klimaatkontrôle en de airco it ek net al te bêst dogge. Dat betsjut dat it moarns om 5.15 frijwat kâld is yn de auto. Middeis om 14.30 is it dan wer smoarhyt. It is wat dat oanbelanget krekt Jitiizer want ek dy bin kâld en hyt tagelyk. Fansels hat myn auto ek wol arko mar mei de ramen iepen kin ik de radio sa goed net hearre en it skynt ek nochal wat ekstra brânstof te nimmen. Dêrneist waaie al myn papieren ek noch in kear fuort wat net altyd de ideale manier is om de auto op te rûmjen. No ja, nije wike kin er te plak by de garaazje dus dan mar efkes sjen at it sa ienfâldich is. It sil wol wer jild kostje...+ 0 - 0 | § ¶Hast dea ûnderfining
Fannemoarn om 6.00 wie ik klear mei myn wurk. Ik wie wurch en myn auto fielde mei my mei. Hy hie de tank ek leech dat ik bin earst mar efkes nei de Makro west foar wat brânstof. Doe de noch net al te drokke A7 op yn de rjochting fan Drachten. It riid wol lekker troch mar doe't ik ynienen 'wekker' skrok siet ik al hast op myn foargonger. Ik hie dan ek mazzel, hy ek fansels. Autoride mei in groanysk sliepgebrek is net ideaal dat is no wol dúdlik. Mei de Radio ekstra hurd oan en de Sletten fol Bearenburch fan Willehúske lûd meibrullend kaam ik thús. By de drompel fan de Rottefalle srkoef ik tsjintwurdich it nivo fan myn radio wat werom want myn auto is net sa goed isolearre as ús hûs...+ 0 - 0 | § ¶Brak yn de harsens
Fannemoarn wiene wy al wer betiid wekker al hiene wy wol it gefoel dat wy goed sliepen hiene. De dei begûn goed mei Dellen spesjaal en porno yn digitale kwaliteit. Nei in moai reiske seach ik ús heit en mem moai yn it sintsje sitten op it eilân yn it tsjûkemar. Ik haw efkes nei hûs west om te sjen at de fotokes fan de pôledei der al wiene en dy haw ik no dus dy sil ik ynkoarten efkes op de side smite. Wol efter in wachtwurd want allinnich foar neven en partners fan nichten fan de famylje Kuipers fansels. Wat op de pôle bart bliuwt op de pôle. Ik haw no al sin yn de kommende pôledei. Spitigernôch moat ik no earst noch nei myn wurk ta en dat sil wol dreech wurde.+ 0 - 0 | § ¶Frijgesellich ûnderweis
Hjoed fiere wy dat Marcel, myn oansteande sweager, noch hiel efkes frijman is. Al om 7.45 siet ik fannemoarn yn de Laguna op wei nei Sint Nyk. Gelokkich wie ik moai op tiid want der wie wat bart tusken de Gordyk en it Hearrenfean wêrtroch't wy efkes fan de A7 ôfmoasten mar ik wie dochs noch krekt op tiid yn Sint Nyk. Gerrit woe my wol meinimme nei Goor dus dat skeelde wer. Wy pikten ûnderweis ek Tsjeerd noch efkes op. Doe begûn it frijgesellefeestje eins al in bytsje want wy moasten dus nei Goor ta wat in aardich ein riden is. Yn Goor giene wy earst nei in sammelplakje en doe't elkenien dêr wie op nei it hûs fan Marcel en Rinkje. Marcel wist noch fan neat al hie er nei juster fansels wol in fermoeden dat der wat barre soe. Yn alle gefallen oerfoelen wy him dochs in bytsje en nei wat drinken en sûkerbôle koene wy dan ek ús mystearieuse reis begjinne. Ik wist net krekt hoe en wat mar ik hie noch wol begrepen dat wy te raften soene by Dutch Waterdreams yn Zoetermeer. Dat wie fanút Goor wol in moai ein riden fansels mar wy fermakken ús wol op de A1 en de oare A-dykjes. Yn Zoetermeer waard nei wat pearse krokodilleferhalen úteinset mei de tariedings foar it raften. Earst wie it fansels saak om in goed wietpak te krijen wat om myn bealch paste. Nei lang sykjen koene hja ien fine dy't paste. Dêrnei koene wy fierder en krigen wy ek noch sokken, skuon, in jaske, in swimfest en in helm. Dy helm mocht net fan de kop falle en dat die der ek net mar hy siet wol sa strak dat ik nei ôfrin noch in moai skoft de lidtekens derfan oer hâlden hie. Doe nei de baan ta fansels. It kompleks wie in lytse fiver mei 5 hiele grutte pompen dy't it wetter in meter as wat omheech pompten nei in bak wêrút it dan fia in kronkeljende sleat wer mei gong nei ûnderen streamde. Omdat der in kâns bestie dat wy út de boat reitsje soene moasten wy earst mar efkes swimme om oan de streaming te wennen. Tusken de golfen sykhelje sei de ynstrukteur. No dat wie noch in hiele toer mar it wie ek wol wer heftich. Sa heftich dat ien fan ús al net mear yn de boat woe. Wy wiene mei 13 man, ien woe perfoarst net, ien dus nei it swimmen net dat mei 11 man koene wy ferdield wurde oer twa rubberboatsjes. Ik hie al klúske 13 en kaartsje 13 dat wy moasten ek mar mei boat 13. Nei wat ynstruksjes giene wy mei de 'farende bân' omheech nei it begjin fan de rûte. Dêr mochten wy it ris besykje en it gie hardstikkene moai en hiel hurd wer nei ûnderen. Mar wy koene it aardich goed sa like it wol want wy bleaune moai yn de boat sitten en wy hellen ferskate oare groepkes yn. De oare boat hie wat minder lok. Tsjeerd waard al by de earste streamfersnelling grepen troch it wetter en sa mocht hy it hiele reiske nei ûnderen meitsje op eigen krêft. Dat foldie him sa min dat wy doe wer yn beide boaten mei fiif man wiene. It wie bêst heftich en wy hiene noch wol graach in pear kear wollen mar it wie drok en wy hiene ek noch in drok program fansels. Fan Goor nei Zoetermeer wie noch mar it begjin, no giene wy wer werom nei Goor en dan noch in bytsje fierder om krekt oer de Grins yn Gronau yn Dútslân efkes te priuwen hoe't fleis smeitsje kin. Harry syn fleisplankje smakke nei mear mar it fulde sa bot dat der gjin plak mear foar wie. Doe nei Marcel syn stamkroech yn Goor en dêr stoppe in grutte bus dy't ús nei St. Isidorushoeve brocht foar in tintfeest. Wy wiene fansels wer op de ferkearde dei want de Edwin Eversband koe my net echt boeie al wie Vangrail noch net sa ûnaardich. De DJ woe de flam net yn de pan hawwe want doe't it gesellich waard op de pogopit sette hy Frans Bauer op. No ja, yn alle gefallen wie it wol in mega tinte. Wol twa kear sa grut as dy fan aaipop en dan ek noch dûbeld sa breed. Wy ha bynammen in soad konsumearre en bin dêrnei noch efkes oant let yn de afterparty yn it stamkafee west. Doe wie it tiid om op bêd te gean. Spitigernôch hie immen myn doggybag al yn beslach naam...+ 0 - 0 | § ¶At de poes fan hûs is...
De freondinne is hjoed op it frijgesellefeest fan myn suske dy't begjin juny boaskje sil. Ik haw dus hjoed it ryk allinnich en dêr moatte jo as man gebrûk fan meitsje fansels. Ik haw dan ek lekker efkes yn de thúsbioskoop nei de Lord of the Rings, the fellowship of the ring sjoen. De fuotten op de bank en it lûd wat lûder. Dan is sa'n 5.1 setsje dochs wol hiel moai hear. Tegearre mei skoanheit haw ik ek noch efkes de lêste resten fan hokje nûmer 2 fuorthelle. No haw ik dus noch mar 3 hokken oer. Der stiet ek noch in beam yn it paad mar at it in bytsje meisit kin dy der ynkoarten ek wei. Wat sille wy dan straks in moaie grutte tún hawwe...+ 1 - 0 | § ¶Eigen hûs en túnfeest
It moast der in kear fan komme en omdat de Pôledei útsteld wurden is koe it moai op sneon 16 juny plakfine tocht ik sa. Dus freonen en bekenden, at jim miene dat jim ús hûs en tún besjen wolle ûnder it genot fan in drankje dan bin jim wolkom. Mar wol efkes yn it foar oanmelde. Klik op it logo foar mear ynformaasje...
+ 0 - 0 | § ¶Pavlov
Doe't ik fannemoarn krekt foar Grins by de weiwurksaamheden oankaam liet ik keurich it gas los en sa denderde ik mei 70 yn it oere fierder. Der wurdt al in hiel skoft wurke oan it fiadukt by it oerwinningsplein omdat se de ûntsluting fan de wei nei Assen better meitsje wolle. Pas doe't ik flak by it board wie seach ik ynienen dat der in nij board del setten wie. No mochten wy mei 90 yn it oere fierder. Nuver is dat, je ferwachtsje in board mei 70. Jo eagen sjogge in read rûn board mei swarte letters en sa geane jo der dan mar fanút dat it wol 70 wêze sil. Moarn sil ik my ris wat better yn de eagen wriuwe ear't ik by de gasuny bin. Faaks kin ik no noch in heale sekonde letter fan hûs...+ 0 - 0 | § ¶Bioskoop oan hûs
De thúsbioskoop draaide fannejûn de Pirates of the Caribean, de deade man syn kistke. Hoewol't ik 10 jier ferlyn in fatsoenlikke byldbuis kocht haw is it yn breedbyld dochs noch net hiel rojaal. Mar it lûd fan de 5.1 set makke fansels in hiel soad goed. Sa wie de rein fan de begjinsêne sa libbensecht dat de freondinne miende dat it echt reinde wêrtroch't hja it kuorbaltrenen mar in kear oerslein hat. It lûd mocht spitigernôch net te lûd mar it wie noch heftich genôch. Ik bin tige optein mei myn hifi-ark...+ 0 - 0 | § ¶Pluvero thús is altyd lestich
De lêste wedstryd fan de plúmkejeierskompetysje wie al wer oanbrutsen. It wie hjoed in drokke dei want al om 5.00 gie de wekker. Dêrnei nei myn wurk en fanôf 14.30 oant 18.00 moast ik mysels wat fermeitsje yn Grins. Ik haw dan ek mar efkes nei de mediamerk west. Ik soe earst noch nei de bioskoop mar der draaide gjin film dy't leuk genôch wie om yn myn tiidsplenning ynpasse te wurden. Underweis noch in dikke stoartbui op de bealch fansels dat úteinlik haw ik noch mar efkes in poeiermolke dronken op de soas fan Bernlef. Net folle letter gie ik wer nei de auto ta want om 18.00 hie ik mei de freondinne ôfsprutsen yn it restaurant fan de Makro. Dêr ha wy flot efkes wat iten nei binnen wurke en doe mei ús folsleine weinpark op nei de sporthal. Wy wiene noch krekt op tiid mar Pluvero wie noch krekt wat letter dus neat oan de hân. Mei myn oant dan ta ûnoerwinnelikke racket begûn ik oan myn inkelspul mar it like wol as hie Pluvero taktysk wiksele want yn myn inkelspul krige ik mar in bytsje tsjinstân. Us twadde hear krige it wat dreger mar de froulju wûnen al. Mei 3-1 giene wy dus de dûbels yn. Spitigernôch slagge it my net om mei Eddy te winnen fan de twa keardels fan Pluvero dat myn racket is net langer ûnoerwinlik, mar it foldocht my noch altyd poerbêst hear. De froulju hiene winne moatten mar sy rêden it net en sa wie de stân al wer 3-3. De freondinne en ik wûnen dêrnei wer frij ienfâldich ús miks en omdat ús twadde mikstiem ferlear bleau it by in lykspul. Mei 3 punten út 4 wedstriden bin wy eindige op in tredde plak. Net goed genôch foar in finale bin ik bang...+ 0 - 0 | § ¶Sopsiede
It wie fannemoarn wer in stresspartijtsje yn ús keuken. De freondinne hie oanbean om sop te sieden foar de kuorkeballers. Ik soe dus in panne fol bananesop meitsje en sy soe grientesop regelje. Sy hie de grientesop al klear doe't ik noch op bêd lei want sy moast earst spylje. Ik soe dan om 11.45 mei de sop op it fjild komme. No wie ik fansels in pear minuten letter mar sy woene earst ûnder de brûs dat de sop hat noch in goed heal oere kâld stien te wurden. Ik hie dan ek wol rêstich oan dwaan kinnen. Yn alle gefallen smakken de sopkes goed en ek de skiedsrjochters lieten harren omkeapje. Om 14.30 fansels efkes foar de radio want it Fean moast de 1-0 ferdigenje tsjin de Amsterdammers. Doe die bliken dat ik ek noch wol wat sipelsop meitsje koe...+ 0 - 0 | § ¶Efkes fan de strjitte
Fannejûn wie der troch de pleatslikke foljebalferiening in iepenloft foljebaltoernoai organisearre foar strjitten. Us strjitte die mei twa tiems mei en se hiene my ynskeale foar it twadde tiem. Dat wie fierders prima, sa koe ik moai in bytsje yn de kunde komme mei wat lju hjir op de buurt. Myn buorjonkje koe ik al mar de rest wie nij foar my. It foljeballen gie yn alle gefallen frij aardich. Wy oevenje fansels ek alle jierren efkes mei de famylje en dat skeelt. Sa wisten wy trije fan de fjouwer partijen te winnen. Dêrmei eindigen wy as twadde yn ús poeltsje mar dat wie krekt net genôch foar in finaleplakje. De wille wie der yn alle gefallen net minder om. Foljebal is bêst in leuke sport at je it net te faak dogge. Ien as twa kear yn it jier moat krekt kinne...+ 0 - 0 | § ¶Utputtingsslach
It wie noch efkes spannend at myn racket wol op tiid wêze soe. Op de webside dêr't ik 'm bestelt hie stie dat er de oare dei besoarge wurde soe. Dat hie dan tongersdei wêze moatten mar hy wie der tongersdei net. Ik haw fannemoarn om fiif oere doe't ik nei myn wurk moast dan ek mar in bryfke op de doar plakt dat se him by skoanmem bringe koene. Dy is dochs hast altyd wol thús. Doe't ik út myn wurk kaam lei it racket al yn de gong. It wie yndie by skoanmem besoarge. It is yndie krekt sa'n ien as op de foto fan in pear dagen earder. Super licht en super strak. Yn Sint Nyk haw ik earst noch efkes in boardsje boerekoal mei woarst nei binnen ta haffele en doe op nei de sporthal. It wie in reúny omdat myn âlde feriening, de plúmkejeiers, harren 25 jierrich bestean fierden. Der wiene dan ek in moai soad bekenden fan eartiids. Ek in moai soad wiene der net trouwens mar der wie in moaie opkomst en sa koene wy allegear fiif kear tolve minuten spylje en ek noch twa kear rêst hâlde. Dat wie foar guon lju ek wol nedich. Ik wûn al myn partijen, sawol hearendûbels as miksdûbels mei in minimaal ferskil en sa kaam ik yn de heale finale te stean. Dit wie op 'e nij in miks mei twa fan de fjouwer bêste manlju en twa fan de fjouwer bêste froulju. Dit wie dreech en oant 10-10 gie it gelyk op. Mar doe't wy 2 minuten foar tiid it alvde punt skoarden wie de tsjinstander brutsen en sa koene wy noch útrinne oant 14-11. Yn de finale mochten wy inkelje en ik moast dêrby tsjin de winnende hear út it oare duel. Dat gie wer in stik ienfâldiger, mei troch it feit dat hja yn Sint Nyk net in soad enkelspulûnderfining hawwe. By in stân fan 13-0 gie myn partner fan de foarige ronde tsjin de flakte troch útputting. Doe binne wy der ek mar mei ophâlden. De earste priis wie binnen en ik leau ek dat dit de foarste kear is dat ik yn Sint Nyk in earste priis wûn. Eartiids wie Martijn gauris better mar die wie der no net. In kreas fleispakketsje wat goed smeitsje sil op de bakplaat wie myn beleaning. En foar de minsken dy't it yntresearret, mei de frou dy't tsjin de flakte gie haw ik yn de kantine al wer in gleske drinken naam. Sa kaam oan in moaie sportdei in ein en bin ik mei myn nijste racket noch nea ferslein...+ 0 - 0 | § ¶Klink dan en daverje fier yn it rûn
Doe't wy ús nije hûs oan it ferbouwen wiene haw ik fuortdaalks al rekkening hâlden mei de oanskaf fan in moai 5.1 systeem foar it besjen fan films. Yn alle hoeken fan de keamer stieken al triedsjes út de muorre en de freondinne waard dêr net bliid fan fansels. Mar omdat ik graach moai ark haw en myn bankrekken net ûneindich is spitigernôch wie it der noch net fan kaam. Al hie ik al wol in skoftke in moai setsje op it each. Neidat de belestingtsjinst my wat sinten werom betelle hie koe it dan dochs wêze. En no bin ik dus de grutske eigner fan de KEF KHT 3005 5.1 set. Dizze wurdt oanstjoerd troch de SONY STR-DA5200ES fersterker wat in 7.1 fersterker is dus kin ik der yn de takomst noch twa bokskes by keapje. It moat allegear noch in bytsje ynstalleard wurde mar ik haw it saakje yn elts gefal al efkes oan de praat hân en it is krekt lykas mei it Frysk folksliet. It klinkt en it davert fier yn it rûn...+ 0 - 0 | § ¶Hearrenfean - Ajax
Tegearre mei Marcel Westerhof haw ik efkes nei it Abe Lenstra stadion west foar de wedstryd tsjin Ajax. Dêr't wy foar de wedstryd ferwachte hiene dat it Alves - Ajax wurde soe foel soks dochs wat ôf. Alves hie syn dei faaks net as der sieten him wat tefolle skoppers op de bealch. Yn alle gefallen joech er al wer in moaie bal op Nillson dy't kreas skoarde. It wie de ienige goal fan de wedstryd en dus wûnen wy mei 1-0 en wurdt it snein spannend. It wie gesellich drok en der waard flink meisongen yn Nieuw Noord. Dat begûn al mei it Frysk folksliet dat no ek yntegraal mei te lêzen wie op de fideoskermen. Soks hearre wy dochs út te holle te kinnen Feanfans? Bynammen yn de twadde helte gie der aardich wat lawaai út ús steanfak oer it fjild. De pear ajaksiten yn it útfak koene wy net hearre. It fak siet ek mar heal fol, de oare helte sil noch wol fêst sitte foar reltsjes. Spitigernôch slagget it net samar en set efkes spontaan wat moais yn mar de 'Hij krijgt de winstpremie' betocht troch Marcel as in oade oan de flutgrinsrjochter op de eastkant die noch wol in lyts bytsje leuk mei. Der wie hjoed mar ien ploech dy't fuotbalje woe, de skoppers meie noch in oerke as wat yn de bus as de auto. Ajaksiten hawwe oer it generaal it mier oan treinen...+ 0 - 0 | § ¶Plúmkejeiersark
In plúmkejeier hat perfoarst twa dingen nedich. Yn it foarste plak fansels in plúmke, mar soks fersoarget de pleatslikke feriening yn it generaal wol. Dêrneist moat er fansels ek de beskikking hawwe oer in racket (neffens it wurdboek skriuwst dat sa mar ik soe der graach in wat Frysker wurd foar hawwe, suggestjes bin wolkom). No hie ik juster myn racket fan syn stokje slein en freed moat ik al wer nei Sint Nyk foar in reúnytoernoai fan de Plúmkejeiers (sa hyt myn âlde feriening). Omdat ik net wol dat myn materiaal ferantwurdlik is foar in eventueel minder slagge toernoai, kompetysje as ûnderlinge kriich moast der fansels wer in goed racket foar werom komme. Ik haw ris op ynternet omsneupt en uteinlik haw ik keazen foar de Yonex Nanospeed 9000 S. Dat is it nijste racket út de nanospeed searje. In stiif racket wat geskikt is foar de allround spilers dy't op syk binne nei in racket mei gefoel. No bin ik fansels mear in stiif en gefoelich spilerke dat op syk is nei in allround racket mar allee, hy is foar in part giel dus wêr seure wy oer...
+ 0 - 0 | § ¶Fan syn stokje
Moandeitejûn is myn fêste plúmkejeijûn mar omdat ik lêsten yn de kompetysje sa hurd oan it ynslaan wie dat fan myn slachwapen in triedsje knapt wie en ik oant no ta te laks west haw om dy efkes meitsje te litten moast ik oppenij de striid oangean mei myn 22 jier âlde aluminium racket. Dat wie myn earste eigen racket neidat ik earst in jier mei it reserveracket fan ús mem spile hie. In pear jier letter haw ik in better racket kocht en dat hat my altyd bêst foldien. No mocht it âlde fertrouwde aluminiumracket dus wer efkes foar master opslaan. Mar healwei in drege partij wêrby't ik allinnich tsjinoer twa tsjinstanders stie fleach ynienen it blêd mei it stokje troch de seal wylst ik it hânfet noch stevich yn de mattekloppersgreep hie. Einde oevening foar myn 22 jier âlde partner yn sport. No wurdt it faaks tiid en keapje in nijen. Ik sil moarn ris efkes om my hinne sjen...+ 0 - 0 | § ¶Sinees op 'e hoeke
Justerjûn ha wy tegearre mei in freondinne wer efkes nei de yt mar lekker troch oant datst sêd bist woksinees west yn de Pein. Dat smakke wer bêst genôch mar hjoed stie der al wer sineesk iten op it program. Myn skoansus wie op besite by myn skoanâlden en it wie dan ek wer efkes tiid om om te sjen nei myn omkesizzers. Dêr hearde fansels ek wer in goed boardsje Sineesk iten by. Fansels haw ik de Laguna noch efkes sjen litten en myn sweager moast der fansels ek efkes in ritsje yn meitsje. No hy fûn it wol in prima auto want hy is ek twa meter lang en dan binne net alle autokes like noflik. Daalks mei ik wer oan it wurk. Sjen at it no wer in bytsje better giet...+ 0 - 0 | § ¶Bliid dat ik frij bin
Befrijdingsdei is foar de measte jongerein in dei fan feest en festivals. Foar my is it bynammen in dei fan útsliepen en bykommen. Justerjûn hie ik wer in nachttsjinst en it gie net al te bêst. Sa fleach ik mei de heftruck sa hurd by in peal op dat it kontragewicht der heal ôflei. Gelokkich stiene de kratsjes noch aardich op de pallet. Ik haw in goed oere oan it pielen west om it kontragewicht wer te plak te krijen. Uteinlik dochs mar gewoan mei grof geweld efkes in betonnen muorre opsocht. Doe klapte it saakje lokkigernôch wer te plak. Doe't der dêrnei ek noch in frachtsje sûpe oer de wrâld gie hie ik sels ek wol sin om my klem te sûpen. Mar ja, ik wie mei de auto hè. No ja, ik bin wer feilich thús. It fjouwer oere (nachts) cup a soup moment hat my der wer boppe op krigen. Hjoed dan ek mar efkes in baaldei...+ 0 - 0 | § ¶Der ûntergang
Hjoed wie it de dei foar de ûndergong. Fannejûn wie Der ûntergang op 'e televyzje oer de lêste dagen fan Hitler. Dizze film ha wy eartiids al ris yn de kelder fan Bernlef sjoen wêrtroch't jo it gefoel hawwe sels ek yn de bunker fan Adolf te sitten. Yn alle gefallen wie it in grof ferhaal. Earder op de dei wie ik ek al grof dwaande west. Op myn hiem stiene fiif hokken mar no steane der noch mar fjouwer. Ien fan de houten barakken haw ik fakkundich mei it brekizer oan barrels slein. No leit der allinnich noch in betonflierke yn mar ek dy sil ynkoarten beliis jaan moatte. Sa is it de bedoeling dat wy wer wat romte krije. En mei dizze lebensraum haw ik wer in moai brechje slein nei de film fan fannejûn tocht ik sa...