Thaeke syn tinzen

+ 0 - 0 | § ¶Top 100 fan Fryslân

Aldjiersdei is alwer sûnt in moai tal jierren de dei fan de Fryske top 100. Ek dit jier wer hawwe mear as 8000 stimmers 5 stimmen útbrocht wêrtroch't der in top 100 gearstald wurden is. Dit jier binne der 11 nije binnenkommers wêrfan it troch klipkar blau draaide nûmer Avé Maria fan de noch net sa lang ferlyn ferstoarne Rommy op nûmer fjouwer de heechste is. Wat my fierders opfalt is dat Reboelje dan wol wer op plakje 1 stiet mei Marije Maria mar dat der neist de tunnel fan it ljocht gjin inkeld nûmer mear yn de top 100 stiet. Faaks is dat ek it súkses fan Reboelje, dat elkenien automatysk op Marije Maria stimt omdat it sa bekend is wylst Reboelje echt wol moaiere nûmers skreaun hat. It neidiel fan Piter Wilkens is bygelyks dat er mei in hiel soad ferskes yn de top 100 stiet. Mar leafst 14 kear stiet hy yn de list en dêrtroch wurde de stimmen sa ferspraad dat er nea earste wurde sil. Ek de lietsjes út Simmertime binne populêr. In kear as 8 stean dizzen yn de top 100. Dat is fansels ek gjin wûnder want dizze skyfkes bin massaal ferkocht tidens it simmer 2000 festival en se wurde ek griis draait by de omrop. De kast hat krekt as Piter Wilkens wat tefolle stikjes makke wêrtroch't In nije dei net op ien stiet. Wat Gerrit Breteler mei syn Op een dag drink je geen Grolsch meer op plakje 6 docht snap ik net trouwens. It nûmer is foar it grutste part Hollânsktalich. Ris sjen hoe't myn nûmers it dien hawwe. Bombarje is mei Jûkte op 'e rêch eindige op plakje 76, Jitiizer is mei Gek net yn de top 100 kaam mar stiet dit jier wol mei Fryslân Boppe nij binnen op plakje 41. Ek dat komt omdat se net echt in útsjitter hawwe en de stimmen dus oer tefolle stikjes ferdield binne tinkt my. Piter syn Liwwader blues stiet op plakje 25 en Reboelje stiet wol op 1 en op 49 mar dus net mei it Folksgerjocht. Sebeare hat ek lêst fan it te grutte repertwaar en stiet allinnich mei Lit ús gean op plakje 57. Tefolle foar dy stiet der dus net mear yn. Ik tink dat it wol in aardich listke is foar de wat âldere Fryske harkers. De jongerein hie in oare list gearstalle, dêr bin ik wis fan. It wurdt tiid foar in top tûzen...

+ 0 - 0 | § ¶Feyenoord terjochte gjin winterkampioen

Op de dei dat Ajax net winne koe fan VVV moast Feyenoord it yn it Abe Lenstrastadion opnimme tsjin alle spilers dy't noch oer wiene nei blessureleed en skorsings. It wie foar Gert Jan dan ek net al te dreech om de spilers oan te wizen foar dizze wedstryd. Lestiger wie it fansels om se op it goeie plak te setten. Dochs slagge dat aardich want it Hearrenfean begûn geweldich oan de wedstryd. Wat in striid leverden dizze mannen en Feyenoord krige net in kâns. Dochs gie er yn de earste helte ien lyts dinkje mis. Dingsdag en Pranjic besochten in bal fuort te wurkjen mar Slorry provitearde der as tredde hûn fan en hy skeat de ienige kâns fan Feyenoord yn de earste helte binnen. Ek de twadde helte spile de koprinner op in laffe wize dy't in kampioen yn spee absolút net weardich wie. Yn totaal hat it Hearrenfean leau ik santjin hoekskoppen naam wylst Feyenoord der mar ien krige. It wie dan ek net mear as terjochte dat wy trije minuten foar tiid fia in geweldige frije traap fan Sibon de 1-1 makken. Doe woene de Feyenoorders ynienen wol wer balje mar se koene it gewoan net. Wy hiene dizze wedstryd winne kinnen, winne moatten eins. Feyenoord fertsjinne wer krekt sa'n ôfgang as foarich jier. Mar yn elk gefal bin se no gjin winterkampioen wurden...

+ 0 - 0 | § ¶Wildersfilmkes

Op it ynternet sirkulearret in filmke dêr't Geert Wilders de kiel trochsnien wurdt. Geert is dêr noch al lulk om en ik kin my dat fansels fan de iene kant ek wol in bytsje yntinke. Mar oan de oare kant is it allegear allinnich mar wer reklame foar Wilders syn partij want de jonkjes dy't it filmke makke hawwe roppe fansels by it grutste part fan Nederân wjersin op wêrtroch't ús grutte antymoslim allinnich noch mar mear setels krije sil by de folgjende ferkiezings. Dan wie it filmke fan Pigmeat dochs leuker. It ferske trouwens ek...

+ 0 - 0 | § ¶It wurdt dreech tsjin Feyenoord

Snein spylje wy de lêste wedstryd fan it seisoen tsjin koprinner Feyenoord. No is it sa dat dit seisoen hast alle kearen de koprinner ferliest dus der is noch hoop. Dochs bin der ek wat probleemkes foar Verbeek want Alves is no dochs echt blessearre en hy hat dan ek mooglik tsjin Roda syn lêste wedstryd foar ús spile. Bradley krige tsjin Roda al wer syn fyfde giele kaart en hy is dus foar ien wedstryd skorst. Breuer krijt foar syn karatetraap minimaal 2 wedstriden. Ek Geert Arend Roorda, ús superfries, en Bak Nielsen ús nije rots fan it Noarden bin net ynsetber. Faaks ha wy noch wat beloften omrinnen?

+ 0 - 0 | § ¶Hoe live is live?

Hjoed moast it Hearrenfean de fierste útwedstryd spylje dy't op dit stuit mooglik is. Hielendal yn Kerkrade yn it puntsje fan Limburch moasten wy op besite by Roda JC dat ek in konkurint is foar in plakje by de earste fiif. Ik siet om 20.00 efter de kompjûter wylst ik op de radio nei Omrop Fryslân harke. Johan Cnossen siet foar in fergees pear to pear programma dêr't er fia Sina ofsa fergees de wedstryd live folgje koe. Ik hie net folle sin om fan dy fage programma's op myn kompjûter te ynstallearjen mar neffens Johan wie it byld prima. Al gau kamen wy der efter dat der dochs in pear minuten fertraging yn siet want al nei ien minút stie it Hearrenfean mei 1-0 efter troch in flaterke yn de definsje. By Johan wiene hja doe noch drok dwaande mei de opstellings. Spitich fansels mar mei Alves yn de basis soene wy dochs ek noch wol in goaltsje as wat meipikke kinne fansels. It Hearrenfean besocht yn elk gefal wol wat te dwaan oan de efterstân mar it waard net ienfâldich. Doe't ik nei rêst om 21.15 yn de auto stapte om nei myn wurk te riden miste ik krekt de reade kaart fan Breuer. Wat er krekt dien hat bliuwt foar my dan ek in riedsel op dit stuit mar dat wy mei 10 man fierder moasten wie minder fansels. Doe't net folle letter ek noch Alves en Sibon wiksele waarden siet der nei alle gedachten net folle mear yn as in lokkige 1-1. By de gasunie yn Grins begûn it sinjaal fan de Omrop lykas altyd te stoaren mar gelokkich koe ik troch myn auto taktysk op it parkearterrein foar it fabryk op te stellen dochs de lêste minuten wer meipakke. Wy ferlearen mar mei 1-0 omdat Roda net by machte wie de skoare út te wreidzjen. Dêrmei bleau Grins no wol boven ús stean en dat is fansels pynlik.

+ 0 - 0 | § ¶Frette op ierde part twa

Fannemoarn wiene wy al wer betiid út de fearren want der moasten tal fan tariedings dien wurde foar it krystmiel fan fannemiddei. Myn skoanâlden en myn skoansus mei de freon en harren twa bern sille by ús ite. Dat like skoanmem better ta dan út iten mei twa lytse bern. Foarich jier ha wy iten sean by myn skoanâlden thús mar omdat wy krekt wat mear romte en mooglikheden hawwe yn sawol ús hûs as ús keuken waard it dizze kear nei de buorren ferpleatst. Op it menu stie in fulde reuzesjampinjon dy't opfolle wie mei reamtsiis, walnuten en sjallotsjes. Dêrnei kaam der in sels makke mosterdsop op tafel en as haadgerjocht servearren wie Argentijnske Bief chimmichurry (út in pakje mar op fersyk fan skoanmem), bakte jirpels yn de skyl, beantsjes en in ovenskûtel mei sipels en ferskate krûden. As neigesetsje hiene wy iis mei slachreamme. It smakke wer bjusterbaarlik goed mar omdat de berntsjes wat sinnich wiene en myn sweager net 100 prosint fit bleau der noch genôch oer. Moarn ha wy dus oppenij in feestmiel ta ús beskikking...

+ 0 - 0 | § ¶Frette op ierde

Tradysjoneel ite wy tegearre mei myn suske en har man op earste krystdei altyd in hiele kalkoen op by myn âlden. It wie dan ek wol efkes skrikken doe't wy hearden dat Rinkje en Marcel net komme soene omdat hja kryst fierden yn Goor. Omdat dizze twa grutte iters ôfsein hiene wie de folsleine kalkoen wat te folle fan it goeie en dêrom hie mem der foar keazen en helje allinnich mar fiif kalkoenepoaten. No wie it likernôch wol gesellich. Wy hawwe lekker iten allinnich sitte dy poaten fol mei ferskate lytse fervelende rotgraatsjes. Gewoanwei hie ik altyd in heal boarststik en dat wie gewoan 5 sintimeter tsjok fleis sûnder bonkjes. No wie it fleis al hast kâld neidat alle stikken kalk ferwidere wiene. No ja, nei ôfrin ha wy noch efkes trije beamkes klaverjast en dat is ek wol in unikum want eins kin de freondinne hielendal net klaverjasse. Let yn de jûn bin wy wer nei de Rottefalle ôfset dêr't moarn fan ús ek wer in kulinêre topprestaasje ferwachte wurdt...

+ 0 - 0 | § ¶Nije wok

Yn in fier en griis ferline hawwe wy in kear in moaie djoere wokpanne kocht yn in winkel foar itensiedersguod yn Grins. Dizze panne foldie hiel goed mar nei in tiidsje liet de antyoanbaklaach hielendal los. By de IKEA kochten wy doe foar sa'n 3 euro in hiele ienfâldige goedkeape wok en dy foldie minstens like goed as dy hiele djoere mar ek dêr liet nei in tiidsje de antyoanbaklaach los. Doe't de panne ek noch begûn te ruskjen hawwe wy wer in nije IKEA wok kocht. Mar dizze stoar noch earder oan de selde sykte. Nei trije fan dy porsjes antyoanbaklaach sille ús terms wol net in soad iten mear fêsthâlde kinne dat it moast mar ris oer wêze mei dy grappen. Fandêr dat ik fannemoarn al om 7.00 nei de Makro west haw om dêr ynkeapen te dwaan foar it krystdinee by ús thús. Ik haw doe fuortdaalks ek in rustfrijstielen horekakwaliteit wok helle. Dizze panne bestiet foar 100 prosint út rustfrijstiel en de kâns dat de antyoanbaklaach no út de panne wei rekket is nihyl. Der sit ommers net sa'n laach yn. Ek kin wy der no mei in foarke as mes yn omkrasse en skjinmeitsje kin gewoan mei in skjirspûnske. Ik bin benijd hoe't dizze nije panne him hâlde sil...

+ 0 - 0 | § ¶Mistlampen

Alle kearen at it in bytsje mistich is binne der wer fan dy idioaten dy't fuortdaalks tinke: "hee dêr haw ik in lochtsje foar". It gefolch is dat je soms tiden efter immen oan kachelje dy't jo besiket te ferblynjen mei syn mistefterlocht. Offisjeel mei it mistlampke pas oan by in sicht fan minder as 50 meter. Dat is dus de helte fan de ôfstân tusken twa hektometerpealtsjes. Sjogge jo noch minimaal 2 fan dizze pealtsjes stean dan hoecht it mistlocht net op. Myn dank is grut!

+ 0 - 0 | § ¶Alves vs N'Kufo

Foar de wedstryd fan it Hearrenfean tsjin FC Twente wie der in grutte fjoerwurksjo op it fjild te sjen. Ik koe my yntinke dat net alle Tukkers fan dit fjoerwurk like gelokkich waarden. Yn elk gefal wie der yn de wedstryd ek genôch fjoerwurk te sjen. Sa krige it Hearrenfean nei in kertierke al in penalty en wa oars dan ús topskutter Afonso Alves, krekt werom nei fjouwer wedstriden skorsing, soe dy der wol efkes ynrosse. Mar it gie oars want hy skeat de bal fierstente sunich en net skerp genôch yn de hannen fan Boschker. Net folle letter waard in spiler fan Twente krekt al of krekt net oanrekke troch Vandenbusche en ek dêr gie de bal op de stip. De topskoarder fan Twente, N'Kufo dy't like faak skoart hie as Alves, wist de bal fanôf de stip wol efter ús Belgyske doelman te krijen. Gelokkich koe Alves noch foar rêst mei in machtige frije traap de stân wer op 1-1 bringe. Nei de rêst giene beide ploegen foar de winst en hoewol't Zuiverloon nea mei Denneboom yn it pompeblêdehimd spile hat spile hy de bal per ûngelok dochs yn de fuotten fan ús âld spits. Hy koe de bal frij ynsjitte en dêrmei stie de einstân 1-2 op it boerd. Wy hiene mannich kâns mar de bal woe der net yn en sa kamen de Tukkers dus wer lyk mei ús. Nei de wedstryd moast ik rap wer nei Grins ta want ik waard om 22.00 alwer op de wurkflier ferwachte. Troch dat ik de oprit fan de A7 net op komme koe bedarre ik spitigernôch op it yndustrieterrein dêr't ik oppenij yn in file bedarre. Pas foarby Tsjalbert koe ik alsnoch op de grutte dyk komme. No ja, it wie bekend dat ik miskien in bytsje letter komme soe.

+ 0 - 0 | § ¶De waarmte fan desimber

De compagnons en shantykoar Piipegaeltsje-Sjongers hiene fannejûn in wintersk optreden fersoarge op skûtsje it Bruine leven dat fersierd mei lochtsjes al in skoftke yn de haven fan de Rottefalle leit te pronkjen. Fansels moasten wy dêr ek efkes sjen mar it wie al ferhipte kâld. De organisaasje hie dêryn foarsjoen troch foar fjoerkorven en gloeiwyn te soargjen. It shantykoar song fanút de kúp fan it skûtsje har lietsjes en gastsjonger Adrie de Boer die ek in oantal fan syn lietsjes. It wie sa kâld dat de fersterking der sa no en dan mei ophâlde mar mei troch it kâlde waar wie it dochs in bysûnder optreden. De waarmte fan desimber koe allinnich net ferhinderje dat myn hannen kâld waarden neidat de gloeiwyn troch it kielsgat ferdwûn wie en ik moat fannejûn noch yn de auto dat ik woe ek mar net mear ha.

+ 0 - 0 | § ¶Twa soarten lantearnepeallen

De mannen fan de werynrjochting binne hjoed drok oan it opromjen want ek foar harren begjint moarntejûn de krystfakânsje. Dat betsjut dat alles wat los leit oprêden wurdt, de buorren is wer berydber makke mei pún en alle grutte masjines binne út it strjitbyld ferdwûn. Foar ús hûs leit no noch in dikke laach pún mar oan it begjin fan de Buorren en op de Bildwei lizze de reade stientsjes der al yn en ek stean dêr al ús nije lantearnepeallen. No is it my allinnich noch net krekt dúdlik wêrom't der twa ferskillende soarten lantearnepeallen pleatst binne. Ek de sprieding fan dizze twa soarten ten opsichte fan elkoar komt op my wat nuver oer. Der sil grif immen oer neitocht hawwe mar it bliuwt nuver. As soene it restpartijkes wêze?

+ 0 - 0 | § ¶Friesland-Campina

Hjoed hearde ik op it nijs dat Friesland Foods en Campina plannen hawwe om te fusearjen. No bin se dat fansels al jierren fan doel mar it liket der no dochs fan te kommen. Faaks hat dat ek ien fan de redens west om it flafabryk yn Grins ticht te dwaan. Mei Campina derby hawwe hja wer genôch flafabriken om oan de fraach nei fla te foldwaan. Nei Nestlé en Danone soe Friesland-Campina dêrmei de tredde suvelkoöperaasje fan Europa wurde. It is no fansels noch de fraach oft de NMA mei dizze fúzje akkoard gean sil.

+ 0 - 0 | § ¶Verbeek fuort?

In tiidsje ferlyn stie it al yn de VI mar no docht bliken dat it dochs echt wier is. Hjoed waard bekend makke dat Gert Jan Verbeek dwaande is oan syn lêste seisoen as fuotbaltrener fan It Hearrenfean. In nuver momint fansels no't wy krekt dwaande binne mei in goeie searje en op in fjirde plakje tsjin de klassike top trije oanhingje. De reden fan dit beslút is dan ek net alhiel dúdlik. Verbeek sels seit dat er net teloarsteld is mar ik kin my dêr eins net folle fan foarstelle. Faaks kin er dit jier de kompetysje op in weardige manier ôfslute sadat de banen foar it opskeppen lizze. Hy hat altyd sein dat er gjin Foppe de Haan wurde wol mar ek Foppe is troch it Hearrenfean in kear oan de kant setten. Doe't er werom kaam wie er pas echt de held fan Hearrenfean...

+ 0 - 0 | § ¶Russyske tastannen

Twa maten fan my wurkje op dit stuit yn de Russyske haadstêd Moskou. Yn Moskou is it hiel gewoan dat jo as bûtenlanner troch de plysje oanhâlden wurde. Der is dan altyd wol in probleemke mei it fisum of oars wat en jo wurde dan foar de keuze steld: in bytsje betelje oan de plysje as in soad betelje en mei nei it buro ta. Dizze problemen bin ûntstien troch dat de plysje mar in hiel lyts bytsje fertsjinnet. Op in kreative manier witte hja sa wat by te beunen. Yn Nederlân fertsjinje de plysjes ek skrikbarend weinich jild. Allinnich binne de (measte) plysjes yn Nederlân gelokkich noch net korrupt. Juster staakte de plysje by de fuotbalwedstriden fan de supersnein omdat hja 200 euro yn de moanne mear fertsjinje woene. Direkteur betelle fuotbal Henk Kessler neamde de plysjes "verwende kereltjes". De boargemasters fûnen it net fertrouwd dat de wedstriden waarden ôflast. Wannear't je de kosten fan dizze ôflasting ferspriede soene oer alle plysjes wie it faaks goedkeaper west en jou dy mannen harren 200 euro yn 'e moanne der by...

+ 0 - 0 | § ¶Gjin keapsnein

Doe't ik fannemoarn wekker waard lei ik hielendal allinnich yn in twapersoansbêd yn in typyske studintekeamer. It wie goed dat ik net folslein lam wie justerjûn want oars hie ik my no fansels al soargen meitsje moatten mar gelokkich koe ik my noch herinnerje dat ik juster mei Klaas nei hûs gien wie. Net mei Klaas Haije trouwens lykas ôfpraat mar mei Klaas Yde. Dizze Feanfan en trochsakker hat tegearre mei my noch efkes nei Cappadocië west dêr't wy krekt as yn in fier en griis ferline earst mar efkes twa shoarme met friet nei binnen stampt hawwe. Klaas Yde koe it net hielendal fuort krije mar hawar. Dêrnei bin wy trochrûn nei de grutte merk dêr't wy foar de lêste pear hûndert meter lekker ordinêr in taksy naam hawwe. Ik koe kieze tusken de bank of neist Klaas yn it twapersoansbêd. Under it motto net fan dat benaude bin ik mar by Klaas yn bêd stapt. Doe't ik fannemoarn wekker waard hie ik in SMS'ke fan Klaas krigen dat ik wat tefolle lawaai hie en dat er dêrom mar by in hûsgenoate yn bêd kropen wie. Dy wie spitigernôch foar Klaas net thús. No wit ik dat Klaas graach útsliepe mei dat ik haw earst mar efkes op de bank sitten en in praatsje makke mei Jelle Gerbrandy dy't wol moai op 'e tiid by de pinken wie. Net folle letter bin ik ôfsetten foar de mediamarkt want ik bin net sa gek dat ik no fuortdaalks al yn de auto stap fansels. Spitigernôch wie ik efkes fergetten dat it snein wie en dus kaam ik foar de tichte doar. Uteinlik haw ik by de Mc Donalds noch in skodde molke jierdbei helle en doe fûn ik it wol wer tiid wurden om ôf te setten nei de Rottefalle. It wie in moaie jûn west, bedankt foar de gastfrijheid Klaas Yde!

+ 0 - 0 | § ¶Trije ferrassings op ien jûn

Fannejûn fiere wy de jierdei fan Jaap Holwerda dy't 30 wurden is. Hy wist sels fan dit feestje hielendal neat ôf. Al syn freonen en bekenden wiene troch Afke útnoege om nei de soas fan Bernlef te kommen dat om 20.00 wie it al in drokte fan belang. Jaap wie mei in ferlechje troch Gerard Postma útnoege om te fieren dat er in nije baan krigen hie. Dat wie fansels hielendal net wier mar Jaap wie nayf genôch en traapje der yn. Doe't wy om 21.00 wol genôch yndronken hiene om ús feestbeest te ferrassen waard elkenien ferdekt opsteld. Guon lju hiene konfettysjitters klear om te fjoeren en doe waard der efkes in tillefoantsje nei Gerard oan weage. Der wie in stroomsteuring op de soas en oft Gerard dêr ek by helpe koe? Fansels wie Jaap as earste beneden om dit probleem út de wrâld te helpen dat doe't er mei it smoar yn de soas binnenkaam moast er al efkes skrokken wêze. Hy wie der yn elk gefal hielendal stil fan. No koe it feestje begjinne. Seker net minder ferrassend wie de útslach fan it Hearrenfean yn Breda. It Fean wûn dêr mei 5-1 dat it avondje NAC sil grif in stik minder gesellich west ha as it avondje Jaap. No moat ik foar mysels allinnich noch efkes in sliepplakje regelje want Klaas Haije hie my syn bank tasein mar dy haw ik noch net sjoen. Wêr't ik fannacht bedarje is dan ek de tredde ferrassing...

+ 0 - 0 | § ¶Ynstee fan kaartsjes

Wy hawwe dit jier in beam omseagje litten en om de koalsoergasopname dêrfan te kompinsearjen hawwe wy besletten dit jier net in soad krystkaartsjes te ferstjoeren. Sa bliuwe wy dochs noch in bytsje CO2-neutraal. Mochten jim dochs graach in echt krystkaartsje wolle dan kin jim fansels de ûndersteande foto útprintsje...

+ 0 - 0 | § ¶De Leyen yn

Fannejûn hiene wy wer in gearkomste fan it bestjoer fan de RIHA, de ûndernimmersferiening fan de Rottefalle. Ien fan de bestjoersleden is útbater fan it paviljoen oan De Leyen. Dêr binne hja fan doel om nei it grutte súkses fan ferline jier ek dit jier wer in nijjiersdûk te hâlden. Fansels haw ik my dêrfoar daalks oanmelden want ik haw dêr yn Grins romme ûnderfining mei. Sa stiene wy foar it earst yn 1997, krekt 2 dagen nei de Alvestêdetocht, oan de râne fan in sels makke wek. Om logistike redens dûkten wy altyd op 7 jannewaris. Foarich jier kaam it my net sa goed út mar no stean ik dus op de list en kin ik fansels net mear werom. It fynt plak op 1 Jannewaris om 13.00 by Paviljoen de Leyen dat mochten jim jim roppen fiele...

+ 0 - 0 | § ¶Nij kontrakt

It fabryk dêr't ik wurkje sil ynkoarten slute. Op 18 april sil sa't it no liket de lêste pakjes út de masjine komme dat fandêr dat ik hjoed in nij kontrakt tekenje mocht dat my tot 18 april oan Capac ferbynt. Dêrmei komt alwer myn twadde fabrykssluting yn sicht en ik moat no per 19 april sjen dat ik oar wurk krij. It leafst wat tichter by de Rottefalle fansels. Dat komt my ek net iens sa min út eins want it is dochs bêst wol in geflean. Ik wit wol dat men yn de Rânestêd oergeunstich op my wêze soe mar alle dagen twa kear in heal oere yn de auto betsjut wol dat in grut diel fan de deibesteging op giet oan wurkjen fansels. No ik bin bliid dat ik oant it ein ta bliuwe kin. Wy sil sjen dat wy der noch wat fan meitsje kinne de lêste wiken...

+ 0 - 0 | § ¶Fryske Suske en Wiske

De provinsje Fryslân hat der foar soarge dat der wer in Frysktalige Suske en Wiske útkomt. Dit stripboek dat de titel "De Alvestêdestunt" meikrigen hat, spilet him fansels ek ôf yn ús provinsje. It is de bedoeling dat alle nije ynwenners fan ús provinsje sa'n eksimplaar krije. Wy binne dus wer krekt in pear moanne te betiid ferhûze want no rin ik dit unike eksimplaar wer mis fansels. Doe't ik wat jonger wie sparre ik alle Suske en Wiskealbums en ik haw dan ek alle nûmers wol earne yn de kast stean. No keapje ik se eins allinnich noch om de samling kompleet te hâlden. Yn elk gefal is it wol in leuk idee fan de provinsje om it Frysk in hert ûnder de riem te stekken. Eins soe der in potsje komme moatte om noch folle mear topboeken oer te setten nei it Frysk. It soe it Frysk lêzen aardich befoarderje kinne...

+ 0 - 0 | § ¶Topdei sûnder sjaaltsje

It wie hjoed fansels in topdei op it wurk al haw ik út respekt foar de ferliezers om my hinne en omdat it my dochs mar yn de wei sit myn sjaaltsje yn de auto lizze litten. De striid om de trots fan it Noarden is foarlopich wer efkes fan de baan en wy bin in pear punten frij fan de Grinzers. Dêrmei kin wy ek wer omheech sjen al krije wy foar de winterstop noch wol in dreech programma mei thúswedstriden tsjin Twente en Feyenoord en in útwedstryd nei NAC en Roda. Yn elk gefal mei Alves hast wer meidwaan. Faaks kin dy wer ris in kear goed úthelje...

+ 0 - 0 | § ¶Hearrenfean - Grins

Foarich jier hiene wy tsjin Grins de grutte Alves sjo mar ús kanary wie noch altyd skorst dat wy moasten it sûnder him dwaan hjoed. Der stie wer in soad op it spul hjoed want ik moast moarn al wer om 6.00 oan it wurk en by ferlies soe dat net in leuke wurkdei wurde. De Grinzers wiene wer manmachtich nei de fuotbaltempel fan it Noarden kaam en it útfak siet dan ek wer tsjokfol mei grien witen. Gewoanwei binne wy de tolfde man fan it Hearrenfean mar hjoed wiene wy de nûmer trettjin want al binnen twa minuten hie Lovre de bal geweldich strak efter syn eigen doelman kopt. Doe koene wy fansels lekker fokaal los gean tsjin de Grinzers en neidat Michael Bradley de 2-0 yn it net wurke wie it hielendal feest. Mar wy hiene faaks te betiid juigd want Nevland makke troch twa fouten fan ús kant ienfâldich wer 2-2 en sa koene wy wer oppenij begjinne en de wedstryd wie noch net in kertier oan de gong. Mei dank oan Bradley waard it al gau wer 3-2 en 4-2 en sa koene wy feilich de rêst helje. Dochs wiene wy noch net wis want ek de Grinzers bleaune gefaarlik. It wie in moaie wedstryd dêr't wy oan it langste ein lutsen en sa bleaune wy noch lang yn it Nieuw Noord fak efter om de Grinzers noch efkes wat Ede Staal ta te sjongen. "Ut hèt noch noait, noch noait so donker west of het wurdt altyd wel wear licht!"

+ 0 - 0 | § ¶xxxxxxl

Alle jierren is it wer in hel om in moai ferlanglistke te meitsjen foar Sinteklaas. Fansels haw ik noch genôch winsken lykas in megagrutte flatscreen televyzje, in ipod, in berchfyts en in pear ekstra boksen foar yn de Laguna mar ik gun in oar ek wat dat ik wit tsjintwurdich dat de Sint leaver lytse kadootsjes jout. No is it sa dat wannear't ik eat nedich haw wat maksimaal 20 euro kostet, ik dat meastentiids fuortdaalks oanskaf. Safolle bliuwt der dan ek net oer om te freegjen. Lokkigernôch wist de freondinne noch wol in pear dinkjes op papier te setten. Nei in goed miel, wy hawwe efkes lekker gûrmetten, die bliken dat de Sint yn alle gefallen wer foar in soad pakjes soarge hie. Dizze kear krige ik dus net de kadootsjes dy't ik graach ha woe mar de kadootsjes wêrfan't myn freondinne fûn dat ik se wol brûke koe. Sa krige ik dan ek gjin Fryslân sokken mar donkere sokken. Wat ûnderguod en wat postsegels en fansels in sûkeladeletter. Mar it moaiste kadootsje hie de Sint sels makke. De freondinne hie om ûnderbroeken frege yn de maat XXXXXL. No dêr hie Sinteklaas fansels lang om socht mar hy koe se net fine dat hy wie sels mar oan it naaien west. Wûnder boven wûnder sakke de broek ek net iens ôf. It wie wer in moai feestje, dank je wol Sinteklaas...

+ 0 - 0 | § ¶Sjaaltsje

Snein stiet de wedstryd Hearrenfean - Grins wer ris op it programma en dat bringt op it fabryk yn Grins fansels altyd wol wer wat aardigheden mei him mei. Sa rinne der yn de kuolsel altyd twa minsken mei in grien wyt Grins sjaaltsje om de hals en gauris ha se der ek noch in FC Grins mûtse by op. Ik bin net sa'n grut leafhawwer fan sjaaltsjes op it wurk want dy dingen sitte my altyd yn it paad en boppedat wol ik ek gjin fla- en yoghurtflekken yn myn moaie pompeblêdesjaaltsje hawwe fansels. Doe't ik hjoed sei dat ik myn sjaaltsje ek mar efkes om dwaan soe waard my dúdlik makke dat it sjaaltsje dan rap wer ferdwine soe. Soks wie fansels oalje op it fjoer dat ik bin fuort nei de auto flein om it opfallende blau wyt reade ding op te heljen. Foar Grinzers wurket in Fryske flagge lykas in reade doek foar in bolle. It past se dan ek mar min dat op al ús bedriuwsklean it Friesche vlag logo naait sit, meastentiids ek noch lofts foar op it bûske sadat se mei de pompeblêden op it hert wurkje moatte. Us grutte ADHDrie soe my dan ek wol efkes klem sette mar hy wie fergetten dat ik fansels krekt wat mear gewicht meidraach wêrtroch't ik him ienfâldich oan de kant sette koe. De hiele fierdere dei ha wy wat sebeare oan it provosearjen west en dat wie machtich moai. Uteinlik kinne wy prima mei elkoar troch ien doar hear mar dizze wike efkes net...

+ 0 - 0 | § ¶Goeiemoggel

It reklamefilmke fan de KPN begjint hieltyd mear yn te burgerjen by ús op it wurk. It is hjir by ús goeiemoggel, goeiemoggel en jitris goeiemoggel op de ôfdieling flatransploft. Us baas hyt tafallich ek noch De Vriep dus dat komt fansels hielendal goed út. Der is ien ding dat wy noch net roggele hawwe. Der moatte noch efkes goeie oersettings komme fan goeiemiddei en goeiejûn want ek dan bin wy aktyf mei sproetjes ensa. Der bin fansels ek al malloaten dy't der in karnafalskraker fan besykje te meitsjen.

+ 0 - 0 | § ¶Aparte Sinteklaas

Op Sinteklaasjûn joech de bios Drachten koarting op alle foarstellings. Sjoen it feit dat Sinteklaas it sa drok hie dat er ús pakjesjûn mar útsteld hie oant sneon wiene wy fannejûn frij. Ik hie dan ek fannemiddei al kaartsjes foar de film Alles is liefde helle om de freondinne te ferrassen. Hoewol't de freondinne der op rekkene hie dat wy in jûntsje tegearre thús wêze soe koe ik har dochs mei krije mar wy wiene fansels wer krekt op tiid. No hie ik net troch dat it folle bak wêze soe dat wy bedarren op de foarste rige. Wy hiene dat al in kear earder hân by A.I. en de ûnderfinings mei snelle bewegings op in grut skerm wat dy deun op 'e noas hinget wiene dan ek net al te bêst. Gelokkich gie it dizze kear net om in aksjefilm mar om in romantyske komeedzje mei in swart rântsje. Wy ha ús poerbêst fermakke mei dizze film en ik kin him dan ek elkenien fan boven de 10 oanriede. In soad typysk Hollânske gebrûken wurde op de hakke naam wêrûnder Sinteklaas en it keningshûs en sels tidens de folsleine ôftiteling wie der noch genôch om nei te sjen. In superfilm, bynammen ek omdat wy him op 5 desimber sjoen ha...

+ 0 - 0 | § ¶Blaze op it wetter

Dat jo mei in sleat drank op net yn de auto stappe meie is de measte minsken wol dúdlik. Mear as 0,5 promyl, wat foar de measte minsken delkomt op twa gleskes bier, is net tastien. Op it wetter jildt in noarm fan 0,8 promyl. Dat soe dan nei alle gedachten ien gleske mear wêze. No bin der yn de polityk minsken dy't hjir de noarm oanskerpje wolle. Foar snelle en/as grutte boaten dêr't in farbewiis foar ferplicht steld is kin ik my soks yntinke. Ek op de grutte rivieren en kanalen kin ik my noch yntinke dat soks needsaaklik is. Mar hoefolle ûngelokken barre der op dit stuit ûnder ynfloed fan drank op it wetter. Persoanlik hear ik dêr nea wat oer. Ik sjoch regelmjittich minsken mei in boat fuort farren neidat hja in pear fleskes bier mear as de noarm dronken hawwe. Soks giet gewoan altyd goed want de measte wettersporters bin tige grutsk op harren boat. Sy wolle dizze net op it spul sette omt der in grut part fan harren kapitaal yn sit. No wit ik ek wol dat der op de Fryske marren kwalik in plysjeboat mear rûnfaart dat it sil wat tafalle mei it tafersjoch. It blazen op it wetter sil dan foarlopich ek wol bynammen tapast wurde by sylwedstriden dêr't gjin wyn mear is...

+ 0 - 0 | § ¶De jongerein jout it goeie foarbyld

Jong Hearrenfean hat hjoed alfêst it goeie foarbyld jûn troch yn Grins mei 0-2 te winnen fan Jong FC Grins. It koe wol ris in moai wykje wurde foar de pompeblêdefans. Yn elk gefal is de earste klap in daalder wurch! Snein spylje de twa earste alvetallen tsjin elkoarom de titel "Trots fan it Noarden".

+ 0 - 0 | § ¶Wy stean wer boven Grins

Omdat Grins juster al spile hie en wy hjoed pas moasten wie it fansels tige wichtich dat de wedstryd tsjin NEC efkes wûn waard. Wy wolle de derby fan it Noarden fansels wol as heechste yn gean oars krije de Grinzers tefolle praatsjes. Op it fabryk hiene wy de radio dan ek wer op radio 1. De wedstryd koe alle kanten op sa like it mar lokkigernôch wie it dochs in goaltsje fan Poulsen dy't der foar soarge dat wy oppenij mei 3 punten nei hûs koene. Oare wike stiet it Hearrenfean der dan ek wer goed foar.

+ 0 - 0 | § ¶Bowle mei keatsers

De keatsferiening fan de Jouwer hie oan it ein fan it jier altyd in bowlingjûn. Hoewol't de Hurde hân sûnt begjin dit jier net langer bestiet, dizze is opgien yn KV de Oorsprong út Sint Nyk, waard dizze gesellige jûn net fan it program helle. Om 20.30 moasten wy dus oantrede yn bowlingsintrum 't Haske. Bowlen is yn myn gefal krekt keatsen. Jo pakke in bal, gean rjocht foar de kegels stean en slingerje dan dy bal sa hurd mooglik dy kant in ein op. Dan is it allinnich noch mar hope dat er wat it midden oanhâld. Troch de bal genôch snelheid mei te jaan wykt er pas fan syn koers ôf at er de kegels al foarby is. Ik begûn mei in searje fan 9 dêr't de freondinne op de baan neist my de iene spare nei de oare mei strikes ôfwiksele. Uteinlik hie ik nei tsien kear smiten dochs ek 3 kear in strike smiten en sa kaam ik dochs noch op in net misselik oantal fan 127 punten. De freondinne hie allinnich mar leafst 150 punten en sy waard dêrmei neffens my dyjinne mei de heechste skoare yn tsien beurten. Nei in oerke rêst mochten wy it jitris besykje en doe koene je wol merke dat der wat alkohol yn it bloed siet by guon. Sa smiet de freondinne yn har twadde tsien beurten mar 88 punten byelkoar. Ek myn skoare daalde wat al kaam dat net troch de drank dizze kear. Mei 106 koe ik dochs noch boven de 100 bliuwe yn elk gefal. Fuotbal wurdt wol ris omskreaun as: der wurdt twa kear trije kertier fuotballe en oan it ein winne de Dútsers. By it keatsen spylje wy mear as ien omloop en oan it ein wint Tiede. Spitigernôch jildt ditselde ek op de bowlingbaan. Tiede wie hjoed net te ferslaan al kaam de freondinne fansels aardich yn de buert mei har earste searje. Sy koe yn alle gefallen noch mei de priis foar de bêste frou nei hûs. It wie in gesellige jûn dy't lekker flot organisearre wie. Oar jier sille wy der alles oan dwaan om der wer by te wêzen fansels...