+ 0 - 0 | § ¶Dolle as baarne
Hjoed stie der in stikje yn de krante oer hoe't de jongerein tinkt oer harren begraffenis. No bin ik fansels noch lang net fan doel om dea te gean mar it kin gjin kwea om hjir ris oer nei te tinken. Foar mysels bin ik der noch net hielendal oer út. Op 'm sels soe ik der wol foar wêze en lit my mar opbaarne. De jiske soe dan útstruid wurde kinne oer ús flierkleed sadat de freondinne my noch ien kear sûgje kin. Eventueel soe de stofsûgersek dan útkloppe wurde kinne boppe it Sjûkemar, it wetter dêr't ik by opgroeid bin. Neidiel fan sa'n kremaasje fyn ik allinnich dat it faak sa'n keale, bytsje sikenhûseftige en bynammen ek hastige bedoening is yn sa'n krematoarium. Jo bin noch net klear mei ôfskiednimmen of de cake en kofje stean al wer klear want der moat wer in nij lyk foar de kachel stean. Wat dat oanbelanget hat bedobjen wer mear fansels. In moaie útfeart fanút in moaie tsjerke, lykas dy yn Sint Nyk, mei in moaie, folslein Frysktalige, mis dêr oan foarôf is ek net ferkeard fansels. Soks jout dochs in wat better ôfskied. It neidiel fan bedobjen is allinnich wer dat jo de neibesteanden opskepe mei de kosten fan de grêfrjochten. Fansels is it gjin probleem om de kosten fan it grêf fan jo âlders te beteljen, dy fan pake en beppe kin faaks ek noch mar it hâld in kear op. Op in dei wurdt sa'n grêf in kear romme fansels. At de wjirmkes dan noch net al te goed har bêst dien hawwe rinne der letter mooglik wer minsken te fuotbaljen mei myn holle. Op dit stuit kies ik dochs foar kremearjen, mar lit it ôfskied dan mar bûten it krematoarium plakfine. Oer de muzykkar bin ik noch net hielendal út, al soe it fansels moai wêze om mei "Heu" te begjinnen...+ 0 - 0 | § ¶Europeesk fuotbal
Yn de rees om Europeesk fuotbal bin wy noch lang net wis. Troch it ferlies fan Ajax juster stean wy nei de hjoed spile wedstriden noch altyd by de earste fiif mar omdat no sawol Feyenoord as Roda JC net mear by de earste fiif stean sil at it sa bliuwt de bekerwinner dus net mei dwaan oan de play-offs. Dat soe dan betsjutte dat de nûmer 10 mei dwaan mei om Europeesk fuotbal. De nûmers 2-5 bin dan noch net wis fan Uefacupfuotbal want by twa kear ferlies moat der noch spile wurde tsjin de winners fan nûmer 6-10. Utgeande fan de stân fan dit moment soe der oppenij in Ajax - Hearrenfean útkomme kinne...+ 0 - 0 | § ¶Lokkich Ajax
Ik wol dit stikje begjinne mei te sizzen dat wy wer in moaie wedstryd sjoen hawwe yn it Abe Lenstrastadion. Dat de ferdieling fan de punten swier yn ús neidiel plakfûn hat is dan ek hiel spitich. It Hearrenfean hat in baas wedstryd spile en wy ha Ajax frijwat alle kanten fan it fjild sjen litten. Stekelenburg is mannich kear passeard allinnich hie de materiaalman de lytse goaltsjes opsteld. Krekt lykas tsjin Roda komme wy wer ûnnedich op 0-1 en 0-2 en wannear't it dan úteinlik dochs slagget om 1-2 te meitsjen sûnder dat de peal as de latte yn it paad stiet dan komt ús âld goaltsjesdief Huntelaar der fuort in minút letter al wer oerhinne om de 1-3 te meitsjen. Vink die syn namme as bline fink wer ear oan want dêr't er Ajax terjochte in strafskop joech hiene wy der ek seker ien as twa fertsjinne. De ajaksiten diene krekt as wie it foljebal. Ek ús grien wite freontsje Suares hie wol in reade kaart fertsjinne. Faaks hat Vink ús mei Grindheim in bytsje matst mar dat wie dan ek de ienige kear. At jo sjogge nei de kânsen dan hie it Fean grif minimaal 1 punt fertsjinne en faaks noch mear. At jo sjogge nei effektiviteit dan hat Ajax it fansels hiel goed dien. Dochs hat Ajax hast de hiele wedstryd op de tsjinoanfal spile, hoopjend dat in goed oankommende lange úttraap fan Stekelenburg by Suares as Huntelaar yn de fuotten komme soe. It is foar Ajax te hoopjen dat soks ûnder Van Basten wer feroaret yn moai en oanfallend fuotbal. Mei trije relatyf ienfâldige wedstriden tsjin ploegen dy't de punten hurd nedich hawwe moat it noch altyd mooglik wêze om by de earste fiif te eindigjen fansels. Faaks komme wy Ajax dan jitris tsjin...+ 0 - 0 | § ¶Bier yn 't hier
De direksje fan sc Heerenveen hat tidens it duel tusken sc Heerenveen en Ajax in drankferbod ôfkondige foar it steanfak fan Nieuw Noord. Oanlieding foar dizze maatregel is dat guon taskôgers fanút it fak mei bier goaie. De direksje hat nei meardere klachten besletten kommend wykein in drankferbod yn te stellen. It ferbod jildt foar sawol alkoholyske- as net-alkoholyske dranken. De direksje fynt it spitich dat der net tsjinsteande de warskôgings noch altyd mei bier smiten wurdt. Om oare gasten hjir net de dupe fan wurde te litten, hat de direksje besletten kommende sneon in algehiel drankferbod yn te stellen foar it steanfak.No jonges, jim wurde wer bedankt. No't ús fak droech lein wurdt betsjut dat dus in droege bek fan it sjongen. Ien ferske dat moarn fansels net ûntbrekke mei is:
1,2,3,4,5,6,7 Fryslân is myn heitelân
8,9,9,9,9,10 de loft is blau en it gers is grien
Bier yn it hier, ik goai graach bier yn 't hier
Oh it giet my noait te fier ik goai graach bier yn 't hier
Ik sit oan de bar en ik haw lol
Lústerje graach nei Fryske bryk en rol
Bier yn 't hier, ik goai graach bier yn 't hier
Oh it giet my noait te fier ik goai graach bier yn 't hier
Ik doch it by har, sy docht it by my
it einde fan it ferske is we dogge it allebei
Bier yn 't hier, ik goai graach bier yn 't hier
Oh it giet my noait te fier ik goai graach bier yn 't hier
Wa seit wêr slacht dat no wer op
slaat de spiker boven op syn kop
Bier yn 't hier, ik goai graach bier yn 't hier
Oh it giet my noait te fier ik goai graach
Oh it giet my noait te fier ik goai graach
Oh it giet my noait te fier ik goai graach bier yn 't hier
+ 0 - 0 | § ¶Film as krêftpunt?
De film fan Geert Wilders stiet sûnt hjoed op it ynternet dat ik haw him mar efkes besjoen. Myn earste yndruk is dat it net in echte film is mar mear in soarte fan kreftpuntpresintaasje mei wat bylden en wat muzyk der ûnder. It is mar kwalik better slagge as wannear't ik soks yn elkoar flanse soe. Ynhâldlik is de film in opsomming wurden fan saken dy't troch fanatike moslims útfretten binne mar dy't by de measte minsken noch wol helder yn it ûnthâld sitte. De oanslagen yn New York, London en Madrid bin fansels noch lang net fergetten. Geert wol ús no tinke litte dat eltse Moslim in fanatike moslim is. Ik tink dat it wat dat oangiet wat meifalle sil. Moslims bin ek minsken en je ha goeie minsken en wat minder goed slagge eksimplaren. Ek by de kristlike minsken hawwe jo fanatiken dy't by de doarren del geane en minder fanatiken dy't allinnich sneins yn it tsjerke sitte as sels dat net iens. Geert besiket no mei de Moslims te dwaan wat in sekere Dútser in jier as wat ferlyn mei de Joaden dien hat. Ik bin bang dat Geert syn politike karjêre frijwat oer wêze sil at dit wat delbêde is. Lokkigernôch is der noch in oare favoRita om oan de rjochter kant fan it polityk spektrum wat stimmen te garjen...+ 0 - 0 | § ¶Op nei de fyftjin
Goed fiif jier ferlyn fierden wy ús earste lustrum fan de Aldiwynrûnte. Ik wit it noch goed want wy hiene de hiele soas fan Bernlef fersierd as in soarte fan Aldi. Der stie in enoarme piramide fan pakjes Aldiwyn klear foar elkenien allinnich liet elkenien ús der in bytsje mei sitte. Dochs wie it Karnafaldi fan fiif jier ferlyn wol slagge want "in libben sûnder Aldiwyn kinne wy ús ommers net tinke yn". Dêrom is it wol apart dat wy dit jier it folsleine lustrum fergetten binne. It is net dat de Aldiwynrûnte dea is ofsa want wy ha yn desimber noch in aktiviteit hân mar dêrnei is der gewoan nea wer oan it lustrum tocht. 131, op nei de 10 wie it fiif jier ferlyn. Wa organisearret der noch efkes in postlustrumfeestje?+ 0 - 0 | § ¶Sopjunk
De ôfrûne dagen bin ik in bytsje in sopjunk oan it wurden. Net om fjouwer oere út in pakje fansels mar gewoan in bêst board fol en it leafst ek noch in bytsje sels makke. Sa haw ik de ôfrûne dagen in hearlik bananesopke hân út it boek fan de Aldi. De freondinne hie in hiel lekker reammich spinaasjesopke klearmakke dy't sels dat wat nei de Jouwer giet grien makke. Fansels siet der sa no en dan ek wat blikfoer tusken want ik hie net altyd tiid en nocht om iten te sieden. Moarn mar ris sjen oft it ek mooglik is om wat fêster iten binnen te krijen. Makaroanje wie eartiids altyd myn lekkerste iten en it binne fansels ek moaie lytse stikjes...+ 0 - 0 | § ¶Sûnder hin gjin aaipop
Dêr't twadde peaskedei gewoanwei foar my reden is om ôf te setten nei Nijlân foar it aaipopfestival haw ik it dit jier in kear oerslein. Dat lei net oan de besetting fan it festival want dy is altyd wol dik yn oarder. It wie mear sa dat ik bang wie dat it my net slagje soe myn hiele hintsjes fatsoenlik, foar safier mooglik, efter myn nije kiezzen te krijen. Ik haw it dan ek mar in jierke oerslein. Kommend jier sil Jitiizer wol wer oantrede moatte en at alles in bytsje meisit bin ik dan seker wer fan de partij. Oan de oare kant wurd ik fansels ek in pear jier âlder dat der sil in tiid komme dat ik de harkjesankjeseal net mear útkom bin ik bang, útsein foar in hintsje fansels...+ 0 - 0 | § ¶Lost en fûn
Mei help fan Gerrit haw ik ôflevering 1 fan seisoen 4 fan Lost dochs noch sjen kinnen foardat wy fannejûn wer foar de buis dûkten om part twa te sjen. It is wol efkes wennen want oppenij is it in hiele nije ynstek fan de searje mar it bliuwt yn alle gefallen noch altyd tige nijsgjirrich. Wy sille de kommende wiken op snein dan ek foar de tv sitte en oars litte wy de fideorekorder wol snorre fansels. Alle kearen wannear't ik immen de Lost dvd útlien freegje se binnen in pear dagen al om mear ôfleverings. Spitich dat der no ferplicht wer in wike tusken sitte moat alle kearen...+ 0 - 0 | § ¶Hearrenfean - Roda JC
Nei de operaasje fan juster siet ik al in bytsje te twiveljen oft ik wol nei it balskoppen ta koe hjoed. Ik hie it idee dat it wol koe dat ik haw al efkes hinne west en ik haw dêr gjin spyt fan hân. Op it program stie de wedstryd tsjin Roda JC en Roda koe by winst noch meispylje om plakje fiif wylst wy by ferlies dat selde plakje hast ferspylje soene. In echte seispunter lykas der de ôfrûne wiken al mear west hiene fansels. By winst koene wy NAC foarby dy't nei de bekerstriid tsjin Feyenoord te wurch wie yn de twadde helte. Roda hie ek in drege bekerstriid efter de rêch dat wy setten fuortdaalks goed útein mei ús bekende oanfallende fuotbalstyl. Dochs wie it Roda dat mei twa domme fouten op 0-2 foarsprong kaam. Gelokkich die it Hearrenfean rap wat werom wêrtroch't it 1-2 waard en der wer fan alles mooglik like mar noch foar rêst bedarre de bal foar de tredde kear yn de goal oan ús kant fan it fjild en sa moasten wy mei 1-3 de rêst yn. Trije kânsen en trije goals, dat bin effektive sivers fansels wylst wy hast de folsleine earste helte balbesit hân hiene. Lokkigernôch begûn it yn de rêst in bytsje te snijen en dêr wiene ús skandinavierkes dochs wat better op tared as de Afrikaantsjes fan Roda. Mei Henrique foar Sibon namen wy de oanfal wer op ús en sa wie it al rap 4-3 foar it Hearrenfean. De ploech fan de mannen út Kerkrade wie wurch en ryp foar de slachtbank mar by de 4-3 naam de druk nei foaren wer ôf wêrtroch't ek Roda noch in pear kânsen krige. Guon Feansters wiene ek wat te selssuchtich wêrtroch't it lang spannend bleau. Doe't de skiedsrjochter, dizze kear gjin freontsje fan Braamhaar mar Braamhaar sels, ek noch trije minuten by telde wie it noch efkes dreech. Mar oan it ein fan de rit ha wy dochs in moaie striid sjoen en wer trije punten. Ajaxtrener Adrie Koster siet ek op de tribune. Hy kin syn mannen mar warskôgje. No mar hope dat it nije wike sneon tsjin Ajax ek wer snie snijt en (Fean)goals reint...+ 0 - 0 | § ¶In goed himmelfreed
Op goed freed 21 maart wurdt net allinnich stil stien by it ferstjêren fan Jezus mar it is ek noch ris de begjin fan de maaitiid. Dêrmei komt ek de grutte himmelsykte yn guon minsken omheech. Foar my wie it hjoed ek in tige wichtige dei want hjoed binne der ek stikjes fan my ôfstoarn. Sjoen it feit dat ik dêr de help by hie fan in offisjele sjirurch kin dit fansels omskreaun wurde as pleatslikke eutanasy. Ik ha de deade stikjes Thaeke ter beskikking steld fan guon wittenskippers yn oplieding (takomstich kollegas fan M8eld). It wiene dochs al net de kreaste stikjes fan mysels dat dêrmei is myn persoanlikke himmeldei no pas echt goed op gong kaam. Kaam foar Jesus syn wite tongersdei foar goed freed, by my is it krekt oarsom en wurdt it in wite sneon!+ 0 - 0 | § ¶John Jorritsma
Doe't ik foar it earst earne lies dat Jorritsma de opfolger wurde soe fan Ed Nijpels as kommisaris fan 'e keninginne tocht ik fansels fuortdaalks oan ús Annemarie. It die bliken dat it om in oare Jorritsma gie al kaam de man wol út Boalsert. Hjoed is John Jorritsma offisjeel beneamd as de opfolger fan Ed Nijpels. Op 16 maaie sil hy it stokje fan Ed oernimme. Oppenij krije wy in kommisaris fan de VVD mar dizze kear is it wol in Fries. Oft it ek in oprjochte Fries is moat noch blike fansels want hy is de Fryske taal noch net machtich. Dochs liket it der dizze kear al op dat er it leare sil. As stifting Fryske aksje hawwe wy dan ek syn domeinnamme noch mar net kleemt...
+ 0 - 0 | § ¶Suvelkao
Yn de nije suvelkao (kollektive arbeidsoerienkomst) stiet dat de suvelwurknimmers fanôf 1 april 3,5% leansferheging krije. Dat tref ik dus mar wer want dan kin ik dêr noch krekt 17 dagen fan proviteare. Sa fertsjinje ik yn de lêste moanne dat it molkfabryk fan Grins noch iepen is dochs noch efkes in heale dei mear. Alle bytsjes helpe...+ 0 - 0 | § ¶Ni Hao stedsperk
Al in hiel skoft soene de freondinne en ik mei M8eld en Jelle nei Ni Hao mar troch omstandigheden mei de namme Lyne kaam it der hieltyd net fan. Troch oare omstandigheden hawwe de freondinne en ik hjoed al efkes te iten west yn it Stedsperkpaviljoen dat tsjintwurdich ombouwd is ta Sineesk wok- en spesjaliteitenrestaurant. By binnenkomst moast ik wer efkes werom tinke oan it lustrumgala fan 2000 dat wy as lustrumkommisje foar de FFJ Bernlef organisearre hiene yn dit moaie pân. Op it selde plak as wêr't wy fan ús lustrumdinee genietsje koene stiene no moaie Sineeske objekten en in hiele grutte lampe hong yn de midden fan it koepeltsje. Krekt lykas by de oare al earder besochte woksinesen wie it ek hjir ûnbeheind wokke. Wat wol oars wie wiene de liflafkes dy't der by servearre waarden. Sa wiene der ferskate spesjaliteiten. Fan kâlde mar dêrom net minder lekkere foargerjochten oant Pekingein en Pekingeinesop. Ek wie der lykas by de Ni Hao by it kasino in bamisopmakker. De bakplaat wie krekt as dy by it kasino wat oan de bekaaide kant. Yn de Pein is de kar in stik grutter en kin der bygelyks ek in lekker sipeltsje op de bakplaat. Hjir wie der kar út in stik as 4 soarten fisk en fleis. It smakke wol goed mar in sipelrinkje as in sjampinjontsje hie it feest fansels al wat kompletearje kinnen. By de Wok makke de skerpte fan it skerpste sauske it nedich om in ekstra gleske drinken te bestellen. Dat wie dus wol skerp genôch mar dat heart ek sa fansels. Dêrnei haw ik noch wat hinnepoaten opiten dy't men ûnbeheind opskeppe koe. Se hiene oan my noch wol in bytsje gearder mochten mar se smakken prima. Oan it ein fan de rit koene wy noch iis opskeppe. Der stie ek in metersgrutte sûkeladefontein mar by gebrek oan in fatsoenlikke leppel haw ik it hiele board ûnder de stream hâlden. It wie lekker mar it wie fansels mear sûkelade as iis. Oan it ein fan de rit wiene wy takocht en hiene wy lekker iten.+ 0 - 0 | § ¶Stiper fan Vitesse
Neist it feit dat ik in fanatyk Feansupporter bin bin ik no ek in hiel lyts bytsje stiper fan Vitesse. De gemeente Arnhim hat de klup foar de safolste kear rêden troch har dizze kear in liening fan sa'n 11.000.000 euro kwyt te skelden. Sa wurdt mei ús belestingjild dus wer ris in fuotbalklupke oerein hâlden. Wannear't jo witte dat de folsleine begrutting fan Vitesse foar 2007-2008 ûngefear 14.000.000 is dan bin wy dus mei ús allen dit jier haadsponsor. Sy meie dan ek wol rap it stadion útwreizje oars kin de haadsponsor net iens yn it stadion. Der is fansels ek noch in lyts foardieltsje foar de Feanfans. By in bankroet fan Vitesse hie it Hearrenfean mooglik 6 punten ynleverje moatten. Lit Vitesse dan ek noch mar in pear moannen bestean...+ 0 - 0 | § ¶Lost 4 mist
Doe't ik fannejûn thús kaam út myn wurk die bliken dat Lost seisoen 4 alwer op tv wie. In skoftke ferlyn haw ik noch in banner op dizze webloch setten dat dit op 13 april begjinne soe. No hawwe hja dat sûnder dat ik it wist ferplakke nei 16 maart. In minne streek fansels want Lost is in searje dêr't je mar min in ôflevering fan misse kinne. Bynammen de earste ôflevering fan elk seisoen is tige nuver en dy hawwe wy no dan ek mist. Ik sil sjen dat ik fia ynternet noch earne oan de ôflevering komme kin. Oars moat wy mar efkes wachtsje oant de DVD fan seisoen 4 útkomt. NET 5 hat yn elk gefal hjir yn hûs gjin freonen makke mei dizze aparte stunt...+ 0 - 0 | § ¶Trots fan it Noarden
Justerjûn hawwe wy, de sportklup Hearrenfean, foar it earst fan FC Grins wûn yn harren Euroborg. Ek al stiene de Grinzers op de ranglist noch in pear punten boppe ús, dochs wiene wy fansels de favorite ploech. Om goed yn de stemming te reitsjen wie ik nei myn wurk op it fytske nei de soas fan Bernlef west. Dêr ha wy fan 15.00 ôf aardich oan it yndrinken west. Doe't wy yn de Euroborg kamen siet der dan ek al aardich wat bearesop yn de aders. Gelokkich hie ik dizze kear neat om oan te jaan dat ik koe flot de tunnel yn om sa úteinlik by Superfries Germ, dy't yn it útfek efter de bar wurke, wer boppe de grûn te kommen. Wy koene wer moai foaroan by it raam plaknimme en sa ús hannen stikken slaan tsjin de ruten. Yn de earste helte wiene wy folle better mar fierder as in bal op de peal kamen wy eins net. Yn de twadde helte kamen de Grinzers mear opsetten en waard it noch spannend ek. Mei in 0-0 hiene wy hast wol frede hân wie it net dat Sulejmani op oanjaan fan Henrique fiif minuten foar tiid dochs de 0-1 binnen wist te krijen. Rob, ús ôfslutdyk, van Dijk koe yn de blessuretiid de Grinzers noch fan skoaren ôfhâlde. Dêrnei haw ik earst de minsken op myn wurk by de Friesche vlag efkes kondolearre en dêrnei haw ik noch efkes op de soas sitten. Uteinlik koe ik oernachtsje op de Brugstrjitte dêr't ik lekker op de bank lein haw. Bedankt dêrfoar Jelmer (en Boele)...+ 0 - 0 | § ¶Nije webside Wêz Handich
Justerjûn is de nije webside fan kuorbal- en tennisferiening Wêz Handich op de maaitiidsgearkomste sjen litten. Fannemoarn betiid efkes nei tolven haw ik de side ek op it net frijjûn sadat de feriening no wer in webside hat dy't by de tiid is en dy't ek noch de Wêz Handich hússtijl brûkt. Tegearre mei twa jonge kuorballers sille wy der soarch foar drage dat de kuorbalklup, dêr't myn freondinne by yn it bestjoer sit, ek op it wrâld wiid web de striid oan gean kin mei dy fan de omlizzende ferienings...+ 0 - 0 | § ¶Minne start fan de kompetysje
Yn de neikompetysje fan BC Drachten is ús tiem min begûn. Dat hie bynammen ek te meitsjen mei myn eigen optreden omdat ik alle trije partijen ferlern haw. Lei dit no oan it feit dat de tsjinstander better wie? Faaks al ja, mar faaks wie ik ek wol te wurch. Ik haw it justerjûn oars ek noch al let makke by de trening fan dat selde plúmkejeien. Us tiem wie fansels ek net goed op elkoar ynspile. Gelokkich pakten de froulju noch wol 2 punten en ek Eise koe syn inkelspul winne. Mei 5-3 binne wy dan ek noch net kânsleas mar mei noch twa partijen te gean sil it wol dreech wurde...+ 0 - 0 | § ¶APK
De Laguna is al wer hast in jier yn myn besit en dat betsjut dan ek dat it tiid wie foar de jierlikse APK. No hat myn Laguna fansels al in kear as alve foar dizze keuring west mar sûnt ik de eigner wurden bin wurdt it ús earste keuring. Soks is fansels altyd wer spannend want mankeart der wat oan de auto, is de útstjit fan útlitgassen wol yn 'e oarder en bin de bannen noch wol goed. Meastentiids is de APK op 'm sels net de grutste kostenpost mar de saken dy't oanpast wurde moatte om troch de keuring te kommen des te mear. Net tsjinsteande it feit dat ik mei de Laguna it ôfrûne jier mear as 25.000 kilometerkes riden haw kaam er der dochs sûnder ekstra kosten ôf. Fansels hat de auto efkes in lytse beurt krigen, wat oalje, wat lucht en ek in nije rutewisker koe der noch wol ôf mar ik mei der foarearst wer in jier yn ride...+ 0 - 0 | § ¶Fuotbal werom nei de publike omrop
De NOS hat it measte jild bean foar de wedstriden fan it earedivyzje fuotbal. It is fansels al gâns minder as it bedrach dêr't De Mol in pear jier ferlyn mei kaam mar alles mei elkoar is it dochs noch in aardich bedrach. It giet hjir yn earste ynstânsje fansels om jild fan de oerheid mar om't de STER no ek wer mear reklamejild binnen helje kin sil it úteinlik allegear wat tafalle. Dy reklame moat ús fansels dan ek by de publike omrop wol troch de strôte treaun wurde dat in soad better sil it net wurde. Gean der mar fanút dat je om even foar sânen mei it board op skoat foar de reklame sitte. Dan om sân oere in pear wedstriden mar even foar acht oere wer reklame, dan efkes it sjoernaal en dan wer reklame en dan noch in pear balskopwedstriden. It grutste foardiel fan dizze diel is dat wy no net langer deagoaid hoege te wurden mei bûtenlânsk fuotbal want dêr sit mar weinich minsken op te wachtsjen tinkt my...+ 0 - 0 | § ¶Wettersnoad
Dêr't hja yn 1953 in bytsje tefolle wetter hiene yn parten fan Nederlân wie der hjoed in bytsje te min yn parten fan Grinslân. No't it molkefabryk oer in pear wiken ticht giet bin wy al aardich oan it ôfbouwen wat de produksje oanbelanget. Ik hie my dan ek al in bytsje ynsteld op in rêstige middei yn Grins. It soe dochs wer in bytsje oars ferrinne. Moarns hie ik al begrepen dat de stêd Grins sûnder wetter siet. It moat in minne tiid west ha foar de ploech dy't om 6.00 begûn is te wurkjen sûnder bakje kofje. De freondinne is dochs mar ôfsetten mar waard by it UMCG wer werom stjoerd. Troch it wettertekoart koe de brânfeiligens net garrandearre wurde. Krekt foardat ik ôfsette soe nei Grins kaam sy dus wer thús. No dogge se fansels op it fabryk gjin wetter by de molke mar sûnder wetter kin der net himmele wurde en dus kinne de molketanks net opfolle wurde en de masjines net draaie. Dat betsjutte dus dat de produksje oant 12.00 stil lein hat. Wy koene dus om healwei trijen noch hast de folsleine produksje foar ús rekken nimme. No wie dat op 'm sels net sa slim want de tiid giet wol folle hurder at jo oan it wurk binne...+ 0 - 0 | § ¶Plysjes - Fuotbal
It is hjoed al wer de twadde 'supersnein' yn ús fuotbalkompetysje dy't útfalt troch dat de plysjes stake. No kin ik my goed yntinke dat de plysjes in pear sinten ekstra fertsjinje wolle. Se fertsjinje folle mear as dat se krije fansels. Dêr't wy nei it balskoppen ta komme om ús ploech oan te moedigjen en om moai fuotbal te sjen wurde de plysjes oproppen at der ûngeregeldheden binne. Wannear't de hooligans fan de iene klup dy fan de oare klup nei it libben stean moat de plysje dêr at it heal kin tusken yn stean gean. Net it moaiste wurk fansels en soks mei bêst wat mear betelle wurde. Dochs fyn ik it wol spitich dat de plysje no de folsleine kompetysje op syn kop set. Dêrmei pakke hja net de minsken dy't oer de leanen gean mar de gewoane man dy't syn lêste sinten op tafel lein hat foar in seisoenskaart fan syn as har klup. De plysjes, dy't by in soad minsken dochs al gjin goeie namme hawwe fanwege lullige boetes, moatte der al in bytsje om tinke dat de boargers wat respekt oerhâlde foar harren fansels...+ 0 - 0 | § ¶Noflik jûntsje NAC
De nûmer trije fan de earedivyzje kaam hjoed op besite yn it Abe Lenstrastadion. Wy hawwe it dan net oer ien fan de grutte trije mar gewoan oer NAC Breda, de ploech dy't in soad punten pakt mei mar in pear goals. Mei de Jouster doelman Jelle ten Rouwelaar, dy't al 16 kear de nul hâlden hie dit seisoen, tusken de peallen koe it wol ris in dreech jûntsje wurde. It foel gelokkich allegear wat ta. Us ploechje hie der al wer sin oan nei de wat mindere searje wedstriden. De sukkeltsjes fan NAC ha eins net ien kear echt op goal richtsje kinnen. Der wiene genôch kânskes mar alles waard neist, foar as oer de goal lâns (s)kopt. Fia it liif fan in spiler fan NAC kamen wy ek noch op 1-0 foar en ús Sulejmani spile dêrnei noch twa kear de folsleine definsje fan NAC fuort sadat wy mei 3-0 wer nei boven sjen koene. Dêr't wy dik fertsjinne wûnen makken de Grinzers spitigernôch yn de lêste minuten folslein net fertsjinne de 1-2 wêrtroch't it ferskil twa punten bliuwt. In moaie útgongssituaasje om as ûnderhûn ôf te reizgjen nei de griene kûfeuze...
+ 0 - 0 | § ¶Minne ferliezers
Ferline wike wie it foar it earst mooglik om domeinnammen ûnder it .nl domein te registrearen mei allinnich nûmers. Dit gie troch in saneamde 'Landrush' dy't om tolve oere middeis begûn. Alle dielnimmers koene doe fia eamels domeinnammen oanfreegje wêrby't de domeinnamme úteinlik nei de earste gie. No giet der yn de domeinwrâld in soad jild om dat der wiene fansels in pear domeinhandelaren dy't it wat snoader oanpakten dan mannich kollega. Sa hat it Jouster bedriuw MijnAlbum BV no trijekwart fan alle leuke nammen registreare kinnen troch gebrûk te meitsjen fan in 35 tal eamelservers wêrmei't hja de SIDN bestookten sadat oaren der net trochhinne komme koene. Fan de nûmers ûnder de 2100 hawwe hja har no 1604 taeigene. De oare registrearders binne no lulk mar eins bin it fansels gewoan minne ferliezers. Der bin mar in hantsjefol dy't dat iene domein no misse moatte dêr't hja in goed idee foar hiene. De measten woene gewoan rap wat jild fertsjinje troch de nammen foar goed jild oan de man te bringen. Dat soks no troch de Jousters bart kin se mar min sette. Jitiizer hat yntusken harren domein www.117.nl oer de landrush hinne tille kinnen. Faaks kin sy it no alsnoch behâlde.+ 0 - 0 | § ¶Unbegryplik
Hjoed waard Henk van Dijk yn heger berop feroardiele ta 30 jier en TBS foar de moard en ferkrêfting fan de tolvejierrige Suzanne út Tweede Exloërmond. Hy hat har nei de ferkrêfting deariden mei syn kampearwein. Yn earste ynstânsje hie Henk 20 jier en TBS krigen, no is dat dus ferhege nei 30 jier. Earder al waard Julien Constancia foar de moard sûnder ferkrêfting op de acht jier âlde Jesse út Hoogerheide ta 12 jier plus TBS feroardiele. Yn heger berop waard dit letter alsnoch libbenslang. Libbenslang betsjut yn Nederlân echt libbenslang wêrtroch't de ynwenners fan ús lân net langer bang hoege te wêzen foar Julien C. Yn it gefal fan Henk van Dijk betsjut 30 jier sel dat Henk nei alle gedachten oer 20 jier al wer frij litten wurde kin at er him yn de sel in bytsje gedraacht. Sjoen it feit dat er no 47 jier is soe hy dus wannear't er frij komt krekt mei pensioen kinne, útgeande fan in ferheging fan de pensioensleeftiid nei 67 yn 20 jier tiid. Fansels kin mei TBS de saak noch wol in bytsje rekt wurde mar ik begryp wier net wêrom't ek Henk net libbenslang opsluten wurdt. Om noch efkes in bekende saak út it ferline der by te heljen. Ferdi Elsas wie 46 jier doe't er oppakt waard foar de moard en ûntfiering fan Gerrit Jan Heijn. Ferdi krige dêrby 20 jier plus TBS. Nei 13 jier kaam dizze man frij en hy wennet no gewoan krekt as wie der neat bart yn Ruurlo. Wannear't jim oer 20 jier in nije pensionearre buorman krije mei in kampearwein op it hiem, pas dan mar op jim dochterkes...+ 0 - 0 | § ¶Bleate bealch
It bestjoer fan de sportklup Hearrenfean wol net ha dat de supporters harren boppeliif ûntbleatsje. By de wedstryd tsjin de superboeren wiene inkelde fanatike supporters sa wiis mei de oerwinning dat se harren truien útlutsen. It bestjoer fynt dit net fatsoenlik en hat dêrom frege dit net wer te dwaan. No bin ik wol hiel benijd wat der sneon tsjin NAC barre sil. De kâns is fansels grut dat in moai nustje leden fan Nieuw Noord om te provosearen it himd oer de kop lûkt. Ik sjoch der sels ek net sa'n probleem yn. Ik soe it slimmer fine at men it ûnderliif ûntbleatsje soe. Faaks soe it ek wol grappich wêze en doch allegear in Fryske boerkini oan. It kin fansels ek in fersyk fan haadsponsor Univé wêze. De syktekosten gean ommers wer rap omheech at se allegear longûntstekking krije...+ 0 - 0 | § ¶Doarpsbelang
As aktyf en potinsjeel belutsen ynwenner fan Rottefalle mocht ik fansels net ûntbrekke op de jiergearkomste fan doarpsbelang. Op de gearkomste yn de Herberg van Smallingerland wiene in moai nustje minsken ôfkaam. De seal siet aardich fol al wiene it wol bynammen de wat âldere ynwenners. Ik wie mei myn trijentritich winters ien fan de jongsten. In grut pluspunt fan de gearkomste wie dat de fiertaal Frysk wie. Utgeande fan it ferslach yn it doarpskrantsje hie ik dêr net op rekkene. Op 'm sels wol apart fansels dat in gearkomste yn it Frysk hâlden wurdt en dat de oantekens dêrnei yn it Hollânsk oerset wurde moatte troch de skriuwer. It die bliken dat doarpsbelang him as har ynset op in breed flak. Sa wie fansels de werynrjochting fan sawol de strjitten as it sportfjild oan de oarder mar ek de grafitti op de tunneltsjes. Ek op biologysk mêd wie der noch genôch te learen. Sa binne Swannen sa trou dat hja nei it ferstjerren fan harren partner gjin nije mear oannimme wolle. Ek learden wy dat jo kangaroes net yn in lyts hokje sette moatte omdat se dan stress krije en dêroan dea gean. Omdat ik fan de measte saken yn ús doarp noch net goed op de hichte wie haw ik earst mar ris alles oanheard. By it omfreegjen haw ik fansels noch al efkes fan my hearre litten. Myn fraach oft der al in feest organisearre wurdt foar de iepening fan ús nije strjitten waard negatyf beantwurde yn de sin fan dat der noch neat op priemmen stie mar de measte oanwêzigen stiene wol posityf tsjinoer in feestje oer. It komt wol goed hjir yn de Rottefalle...
+ 0 - 0 | § ¶Fergees te krijen Fryske kompakt skiif
Yn it kader fan de aksje praat mar Frysk dielt de Afûk 100 eksimplaren út fan de nije singel fan Van Wieren. It ienige watst dêr foar dwaan moatst is efkes in eameltsje stjoere nei praatmarfrysk@gmail.com mei yn it ûnderwerp 'Dûnsje'. Fansels moatst ek efkes dyn namme en adres der by sette en efkes in leuke reden jaan om dy ek sa'n skyfke te stjoeren. Ik haw yntusken de skiif binnen en hoewol't it mar in singeltsje is stean der dochs twa aardige nûmers op. Persoanlik fyn ik de b-kant 'Kâld fjoer' noch moaier as 'Dûnsje'. Bestel 'm mar rap want 100 fan dy skyfkes bin fansels rap fuort...
+ 0 - 0 | § ¶In albertiaan yn de famylje
Wy hiene hjoed it famylje foljebaltoernoai wêrby't alle neiteam fan beppe Kuipers har âlden oanwêzich is. Dat betsjut dat wy yn de doniahal fan Sint Nyk tsien foljebaltiems op de flier krigen. Nei't it foarprogramma, it balskoppen fan sawol de jongerein as de âldere jongerein, koene wy los. Der sit fansels in grut ferskaat oan spilers yn de tiems. Fan de lytste neefkes oant de âldste omkes stiene hja yn it fjild. Fansels wiene de regels in bytsje oanpast. Sa mochten de jonges net smashe en der moast ûnderhâns opslein wurde. Sa ûntwikkele him in nijsgjirrich gefjocht tusken de ferskate ploechjes dy't aardich oan elkoar weage wiene. Ik foljebalje sels ien kear yn it jier en krekt lykas by oare sporten moat ik it mear fan myn ynset hawwe as fan myn sportlichaam. Uteinlik ha wy de earste trije wedstriden ferlern mar oan it ein koene wy dochs noch foar in posityf einde soargje. Sa eindigen wy net as lêste. Neist in sportyf hichtepunt is fansels ek de lêste helte wichte. Lekker ite en wat byprate mei de ferskate famyljeleden. Sa hearde ik dus fan ien fan myn jongste nichtsjes dat dy krekt lid wurden wie fan Albertus. No moat ik der wol efkes bysizze dat dizze studinte nea yn Fryslân wenne hat wêrtroch't Bernlef dus by foarbaat al kânsleas wie. Dochs fûn ik it wol skokkend sjoen it feit dat Albertus dochs wol de studinteferiening west hat dêr't ik it minste respekt foar hie. Gean dan by Vindicat at je by in balletinte wolle...+ 0 - 0 | § ¶Tele 2 kear niks
Sa no en dan sjoch ik wol efkes op de offisjele webside fan sportklup Hearrenfean. Hjoed kaam dat, sa like it alteast, wol goed út omdat Univé ús fia de webside fergees de live útstjoering fan FC Twinte -SC Hearrenfean oanbiede woe. Wy moasten efkes in koade oanfreegje en dêrmei koene wy dan de wedstryd sjen fia Tele 2. Fansels haw ik fuortdaalks efkes sa'n koade oanfrege. Doe't ik middeis de útstjoering efkes teste woe krige ik in ferbiningstest en dêr kaam ik goed trochhinne. Dêrnei krige ik in pear reklamefilmkes te sjen dat it like allegear goed te kommen. Jûns om 19.55 besocht ik oppenij op de side te kommen mar doe wie der gjin binnenkommen mear oan. Sa no en dan die hiel tele2.nl it net mear mar meastentiids bleau ik gewoan yn de ferbiningstest hingjen. In pear kear kamen de reklamefilmkes foarby mar it balskoppen koene wy net sjen. Gelokkich wiene de freonen fan Omrop Fryslân der wol gewoan de hiele útstjoering by. Spitigernôch koene de Feansters net oertsjûgje en sa ferlearen wy alwer it tsiende punt yn fjouwer wedstriden. Nije wike tsjin NAC moat der mar wer ris wûn wurde...