Thaeke syn tinzen

+ 2 - 0 | § ¶Benefytspoaster

+ 1 - 0 | § ¶PCTV

By de boppesteande titel moatte jim net tinke oan televyzje op it rekkenreau, wat fansels op myn nije kompjûter goed mooglik is, mar oan de ferneamde keatspartij yn Frjentsjer dy't troch omrop Fryslân knap yn byld brocht waard. De partij waard in pear oerkes ferlyn wûn troch it partoer fan Bouma, van der Graaf en Groenendijk. Douwe Groenendijk waard unanym en terjochte útroppen ta kening. Al fanôf 15.00 wie de Omrop der rjochtstreeks by oanwêzich en sa koene wy as tv-sjogger tsjûge wêze fan de prachtige partijen tusken Bouma cs en Van der Meulen cs. Ek seagen wy de Wassenaars der kânsleas ôfgean tsjin de lettere twadde priis winners. Op 'm sels wol spitich foar Chris fansels want ik hie him in moaier ôfskied gund mar sa is keatsen no ien kear. Oan it ein fan de rit stie Douwe Groenendijk dus mei de keningsbal en dat is moai want ik kin Douwe ek persoanlik wol. Wy hawwe yn Grins al ris in pear kear in keatstwedstryd organisearre en ik wit dat er der altyd hiel fanatyk mei dwaande is. Dat er no nei in fervelende blessure as kening werom komt is hardstikkene moai foar him en it wie ek dik fertsjinne. De Omrop fertsjinnet ek in plomke want se hiene prachtige bylden. It bliuwt fansels wol dreech om it rappe lytse baltsje goed te folgjen mar de sfearympresje wie yn elk gefal tige slagge. Ik bin sels noch nea op de PC west mar it wurdt in kear tiid fansels...

+ 0 - 1 | § ¶Memme-, Jellesma- en Mop fan de dei

Nei't jierrenlang de famyljedei foar de famylje Jellesma wat op in leech pitsje stien hat is Ineke no aktyf dwaande om de famylje wer ris ûnder ien dak te krijen. It idee is om kommend jier yn it de maaitiid nei Duinrell ta te gean. In wykein lang mei al it neiteam fan Roel en Rinkje yn in pretpark anneks gliidbaanparadys (tikibad). Dat wie wol ien fan de wichtichste saken dy't op ús mem har jierdei oan de oarder kamen. Troch it minne waar fan ôfrûne sneon yn Sint Nyk en omkriten wie mem har jierdei dizze kear net tradysjoneel op de Pôle mar yn de jachthaven fan Sint Nyk. Dêr koene wy ek noflik sitte en it skeelt in moai ein mei de auto oer in polderdykje hobbeljen. Wol wie it spitich dat der fuort nei't ik oankaam wie in dikke bui foel. Mar mei twa oan elkoar ferbûne partytinten wie dat noch krekt op te fangen. Druppelde de earste oeren it wetter út de himel. Mei de selde faasje kamen ek de omkes en muoikes oandruppeljen. Sa koe der mei in moai nustje efkes praten wurde. De mop fan de dei fan omke Folkert wol ik jim fansels net ûnthâlde. Omke Folkert wie op fakânsje yn Belzenlân doe't er dêr in ploechje wurkmannen dwaande seach. De iene helte dolde in groppe en de oare ploech smiet dy groppe wer ticht. Dêr woe hy fansels wol efkes mear fan witte dat hy frege wat de bedoeling wie. "Wy lizze hjir in triedleas netwurk oan" wie it antwurd fan de Belze wurkman!

+ 0 - 1 | § ¶De kroegbaas en de alkomobilist

De stifting foar ferantwurde alkoholgebrûk wol kroegbazen oanpakke foar ûngelokken feroarsake troch dronken bestjoerders. In nuvere aksje fansels want wêr hâldt dan de ferantwurding op? Immen dy't yn in kroech in pear potsjes bier nimt en dêrnei 100 meter fierderop yn in auto stapt, dêr kin sa'n kroegbaas dochs neat oan dwaan? It liket my dat jo as kroegbaas gjin drank skinke oan immen wêrfan't it dúdlik is dat dy dêrnei yn in auto stapt. Wat soe no de folgjende stap wêze? De bouwer, ymporteur, dealer fan de auto mei ferantwurdlik hâlde omdat der gjin alkoholslot ynboud sit? De stoker as brouwer fan de alkoholyske lekkernijen/bier oanpakke foar it ferskaffen fan de drank? Der is mar ien dy't echt ferantwurdlik is foar it riden mei drank op en dat is de drankrider sels. Dat je mei drank op net mear helder tinke kinne mei dúdlik wêze mar wannear't je earne hinne gean om te drinken dan moat je ek soargje foar in sliepplakje as alternatyf ferfier...

+ 0 - 1 | § ¶Ald papier

De barbecook arena is hjoed offisjeel goedkart foar ienmalich gebrûk. Nei alle gedachten kin er ek wol faker brûkt wurde mar dat moat de takomst noch útwize fansels. Mar mei dizze oankeap is ek myn barbekjoenivo nei in heger nivo tild. It wie oars noch in hiele toer om him oan de praat te krijen want de arena hat in 'quickstart systeem' (rap oan systeem) wat ynhâldt datst him mei trije feltsjes krantepapier hyt krijst. Op 'm sels gjin probleem mar no wie krekt juster it âld papier fuort gien. Bakken fol mei reklametroep en kranten dy't garant stean koene foar moannen barbekjoewille lizze no foar in dûbeltsje de kilo earne yn in grutte kontener. Fansels hiene wy noch wol âlderwetsk oanmakmateriaal mar ik woe fansels graach de rapstarter útbesykje dat ik haw mar in âlde UK opoffere út 1998. Op de foarside stiene wy yn de swimbroek klear foar de twadde nijjiersdûk. Ik haw der noch wol in pear mear fan en sa haw ik dochs noch wer wat oan myn RUG-perioade. Mei trije feltsjes dûbeltearde UK yn de skoarstien en in bultsje houtskoal dêr boppe op hiene wy binnen in kertier it saakje oan de praat. It ienige wat der efkes barre moast wie de luchtgatten iepen en in fjoerke by de UK. Dêrnei wie it wachtsjen wat dus nei in kertierke beleane waard mei in prachtich hyt fjoerke. Wy hiene noch nea sa lekker barbeknoeit yn ús túntsje...

+ 1 - 0 | § ¶De barbekjoearena

De ôfrûne jierren ha wy ús opwurke fan in balkon op tsien heech fia in lyts terras tusken it hûs en it hok nei in fatsoenlik plak om te sitten. Dêr moast fansels ek de fleisskroeier noch efkes op oanpast wurde. Hiene wy al earder in goedkeap herniabakoventsje kocht fan 5 euro dy't it wûnder boven wûnder langer as twa kear úthâlde. No bin wy dochs echt wol tatreden ta it bettere fleisskroeierstiidperk. Ik wie al in skoftke op syk nei wat in grutter eksimplaar mar ik woe net ien mei in deksel. De measte Webers foelen dus ôf. Uteinlik haw ik fia ynternet de Barbecook Arena fûn. Omdat heit sa'n rustfrijstielman is haw ik ek mar keazen foar de net ruskjende fariant. No kin wy dus mei 10 man fleis briede op hast in meter fan de grûn. It skynt dat er mei trije feltsjes krantepapier oan de praat te krijen is. Moarn komme heit en mem en Rinkje en Marcel en dan sille wy him efkes besykje. Al haw ik it idee dat ik it fleis hjoed ek wol op in swarte plaat smite kin. Dan wurdt it sa wol gear...

+ 0 - 1 | § ¶Skûtsjesilen op de lanlikke tv

Nei de finale fan it skûtsjesilen, dat yn it skûtsje fan it Hearrenfean in knappe winner krige, makke Klaas Jansma him fia Frits Wester hurd foar it sjen litten fan it skûtsjesilen op de lanlikke televyzje. Dêr moat wy fansels al in bytsje mei oppasse Klaas. Op dit stuit is Omrop Fryslân it wichtichste medium foar de skûtsjesilerij mar at de publike omrop as in kommersjele (wêr bliuwt SBS 6) yn dit gat springt dan moat der straks fjochte wurde om de bêste gasten oan tafel te krijen. Dêrneist kin it typyske Frysk eigene dan wol ris ûndersnijd reitsje. Sjoch nei de alvestêdetocht wat in Nasjonaal folksfeest wurden is dêr't gjin wurd Frysk mear by is. It soe better wêze en soargje der foar dat Omrop Fryslân yn hiel Nederlân te sjen is. Fia de skûtel en de digitale televyzje is dat al mooglik. Wannear't straks de programma's dan ek noch ûndertitele wurde fia teletekst (foar de dôven) dan kinne de Hollanders ommers sa mei sjen nei jim prachtige programma.

+ 1 - 0 | § ¶Keiwike, ferken dyn Grins

Ald foarsitter (wat klinkt dat âld net?) fan Bernlef Durk de Vries frege oan my om efkes wat reklame yn de foarm fan ferwizings te meitsjen foar syn keiside. Hy is dêr al moannen mei dwaande mar der komme noch net genôch minsken op. Dus freontsjes en freondintsjes, allegear efkes rap sjen op de Keiwikeside fan Durk. Bynammen voar de wat jongere lêzer, de lêzer dy't de tritich noch net passearre is, dy't him (ynkoarten) yn Grins ophâld is it fansels tige nijsgjirrich om efkes lid te wurden fan studinteferiening Bernlef. Do learst dêr dyn Grins kennen en dyn grinzen te ferlizzen. Sa genôch ferwizings Durk?

+ 0 - 1 | § ¶Nije túnmeubels

In pear dagen ferlyn hiene wy al in nustje aluminium ferstelbare opklapstuollen oanskaft foar op it nije terras. Nei lang omswalkjen by ferskate winkels del kamen wy se úteinlik dochs tsjin by de makro dêr't se in winstpakker wiene. Hjoed moasten der eins noch in pear kessentsjes foar komme want it metaal wie wat kâld oan de billen fansels. Wy ha stêd en lân ofreizge om wat te finen mar by de measte winkels wie de kar ûngefear gelyk. De freondinne wist net krekt wat sy socht mar wol wat sy net socht en sa koe it barre dat wy fia de Vrijbuiter yn Roden, wat trouwens wol in nijsgjirrige winkel is om ris troch hinne te rinnen, by Tuinland yn Grins. Dêr hiene hja guon kessens yn de oanbieding mar dat wiene fansels wer krekt dy kessens dy't men leaver net keapet. Wy ha se dan ek mar lizze litten. Fia ferskate binnentrochdykjes kamen wy úteinlik by de mazzelshop yn Ljouwert dêr't wy yn de kolleksje fan foarich jier krekt in prachtich eksimplaar fûnen. De kessentsjes moatte net lelijk wêze fansels mar se moat ek wer net te bot opfalle want it wichtichst is fansels de persoan dy't yn de stoel sit en net it kessentsje dêr ûnder. No ja, wy kin dus no lekker yn fiif stannen sitte en lizze dus lit it moaie waar mar komme. Pyt hat it al oer in waarmteweach...

+ 1 - 0 | § ¶Nije spilers Heerenveen

Alle kearen wit de direksje fan SC Heerenveen ús wer posityf te ferrassen mei nije oankeapen dy't net ien foarsjen koe. Sa kaam juster ynienen út de lucht fallen dat wy de kommende twa seisoenen brûk meitsje kinne fan âld Feyenoorder Bonaventure Kalou. Hy is de âldere broer fan de wannaby Nederlanner Salomon Kalou dy't no foar Chelsea spilet. Kalou kin at er noch altyd like goed is as in pear jier ferlyn mei syn ûnderfining de jonge jonges fan it Fean op sleeptou nimme. Ien fan dy jonge jonges is Tarik Elyounoussi sa docht hjoed bliken. Hy wurdt oan ús presintearre as it twafâldich Noarsk talint fan it jier. Ajax kin dan ek mar fêst begjinne te sparjen want nei kommend seisoen sil Tarik ús grif wer de noadige miljoenen opsmite...

+ 1 - 0 | § ¶Freonen fan Warber Fryslân

Wy ha in eameltsje krigen fan Piter Wilkens dat hy ek in nûmer skriuwe sil foar de Fryske Sinteklaasferskes kompaktskiif fan ús Stifting Warber Fryslân. Dat is fansels goed nijs. Earder hie ek Remon de Jong al tasein om mei te wurkjen en ik leau dat der noch wol in pear prominente Friezen dwaande binne. Jim kinne yntusken jim hyvesfamylje ek wer wat útwreidzje want sûnt koart is der no ek in Freonen fan Warber Fryslân hyves...

+ 0 - 1 | § ¶Cloverfield

No't ik dochs yn it filmwykeintsje sit kin ik jim ek noch wol efkes wat mear fertelle oer Cloverfield. De film begjint mei 'Dizze kamera waard fûn yn it gebiet wat eartiids as 'Central Park' bekend stie. Dêrnei sjogge wy mei troch it each fan de kamera fan in figuer dy't it moai fynt om alles om him hinne te filmjen. By de meast eangstige ogenblikken bliuwt er dochs gewoan troch filmjen. Dat is oan de iene kant wol apart mar oan de oare kant kin jo der faaks ek wer oan fertsjinje. Gean der bygelyks mar fanút dat de minsken dy't fan 9-11 in pear moaie bewegende bylden makke hawwe dêr net minder fan wurden binne. In bytsje in terrorist soe der syn eigen oanslagen mei finansiere kinne. No ja, it begjint allegear noch hiel aardich mar al gau docht bliken dat der wat goed mis is yn New York. Sa rôlet de holle fan it frijheidsbyld al rap troch de strjitte en der ontploft it yn en 't oar. Wat der krekt bart sil ik fansels net ferklappe al kin ik der wol by fertelle dat it einde in bytsje minder is as it begjin en it middenstik. It befredige my yn elk gefal net...

+ 0 - 1 | § ¶Rambo 4

It skynt moade te wêzen foar âlde filmhelden om wer oppenij op it skerm te kommen. Sa hiene wy dit jier Indiana Jones al en earder kaam ek John 'Die Hard' Mc Clane werom. Nei Rocky koe Rambo fansels net efterbliuwe om oppenij de pylk en bôge op te pakken foar wat aksje. Ik haw de film op DVD kocht en ôfspile op myn 5.1 setsje en foar it earst haw ik it lûd wat sefter setten. Net omdat it sa min wie mar omdat it sa oergryslikke lûd wie. It wie eins ien lange searje fan eksploasjes en kûgels. Wat dat oanbelanget is it nivo fan it ferhaal fan Rambo der net op foarút gien. Dizze kear hoegde hy net nei Vietnam as Afghanistan mar nei Birma. Dêr wie noch in rezjym wat gjin kunde hie oan de feteraan. No stelde dat ferhaal dus net in soad foar. Rambo brocht in pear sendelingen nei Birma, sy kamen net werom dus helle hy se sels wer op út it kamp fan in barbaarske Birmaan. It hie in Suske en Wiske wêze kinnen wat dat oanbelanget al ha dy oer it generaal noch mear djipgong. Sûnder al te folle fjochterij helle hy se út it kamp en dêrnei kamen se efter him oan wêrnei't er minutenlang mei in grut kaliber automatysk gewear de giele mantsjes troch midden sjitte mocht. In echt drege tsjinstander wie der dizze kear net. Dêr wie it kaliber fan syn gun miskien ek wat te grut foar. Wat dat oanbelanget moat in in film wêze dy't Rob Camies wol wurdearje kin. Wie de Ramboparody yn Hot Shots part deux al de meast bluodrigge film ea, dizze giet der grif fier oerhinne. Dizze film is dan ek net geskikt foar famkes, teare sieltsjes en minsken mei gefoelige earen. De 5.1 set hat him der yn elk gefal wol goed mei útleve kinnen...

+ 1 - 0 | § ¶Klaas idols en it Skûtsjesjoernaal

Omdat it skûtsjesilen hjoed in rêstdei hie organisearre Omrop Fryslân in spesjale Klaas idols. Wat no krekt de bedoeling fan dizze ferkiezing wie is my noch net dúdlik. Wie de omrop op syk nei immen dy't Klaas Jansma it bêste imiteare koe as moast der in nije eigensinnige skûtsjesylferslachjouwer (leuk wurd foar galchje) komme? Ut de útstjoering die bliken dat der socht waard nei in imitaasjeklaas. Nei it beharkjen fan de útstjoering wie ien ding dúdlik. Klaas Jansma moat yn it harnas stjêre wat it skûtsjeferslach oanbelanget. De bêste man is gewoan net te ferfangen. De útstjoering mei de Klaas idols wie in aardige fynst mar hoecht om my net wer. It nivo fan de útstjoering gie der net mei omheech. Dat selde jildt eins yn grutte linen foar de kofjeminút fan Jelle Reijinga. Dat heakket net in soad ta en it soe dan ek better wêze at Jelle gewoan serieus mei praat oer de wedstriden. Hy soe bygelyks ek in minút de tiid krije kinne om spesifike gefallen tidens de wedstryd te analisearjen op in 'Jan van Halst' eftige wize mei kleurde pylkjes en sa. Fierder mei ik graach nei it skûtsjesjoernaal sjen fansels, al ergerje ik my al wat oan it Hollânske "Dit programma wordt mede mogelijk gemaakt door...". Dêr hiene de advertearders dochs better foar in Fryske tekst kieze kinnen sa liket my. As soe it sa better hingjen bliuwe omdat minsken har der oan ergerje?

+ 1 - 0 | § ¶Wêr bemoeit Kroes har mei?

Sa't jim grif witte binne Campina en Royal Friesland Foods dwaande mei in fúzje. No is sa ûngefear elkenien al akkoard en no sil Eurokommisaris Kroes har dêrmei bemoeie. Sy is benaud dat it nije suvelkonsern te grut wurde sil en dat de konsumint dêrfan de dupe is omdat der dan in hegere priis frege wurde sil. No haw ik begrepen dat Nestlé en Danone op dit stuit hast like grut binne as it takomstige Friesland Campina en dizze bedriuwen meie dochs ek gewoan bestean. Wêrom dan sa yngewikkeld dwaan oangeande dizze fúsje? Fansels wurdt de nije koperaasje wol hiel grut yn Nederlân mar is dat in probleem? Yn ús frije merkekonomy meie bedriuwen dochs seker sels wol witte mei wa't hja gearwurkje wolle? Stel no dat ik op dit stuit in nije molkekoperaasje begjin en ik keapje alle boeren by Campina en Friesland Foods wei troch harren in bettere priis te garrandearjen. Soe dat dan net meie fan frou Kroes? Dan bin ik ommers like grut as de fúsjeklup dy't der no oan liket te kommen. Wat dat oangiet is de bemoeisucht fan Europa neffens my al fierstente grut. Lit de merk de priis mar bepale en lit de ûndernimmers harren eigen koers mar útstippelje. Wannear't de polityk fan betinken is dat sy it better kinne moat der mar in steatsbedriuw komme dat molke levert tsjin in goedkeapere priis. It sil dreech wurde om mei ambtners de notiidske boeren te ferslaan...

+ 1 - 0 | § ¶Paadsje

It moaie fan in frijsteande wenning is dat jo om jo hûs hinne rinne kinne. Yn ús gefal is dat wat lestich sjoen it feit dat wy tusken de buorlju in sket pleatst hawwe mar yn prinsipe soe it kinne. No lei der oan de foar- en sydkant fan ús hûs allinnich noch mar swarte grûn mei hjir en dêr in plantsje dus soe sa'n rûntsje om in moaie ynwâlderij betsjutte kinne. Ik haw dan wol de kisten yn de kontener smiten mar ek mei gewoane skuonnen nimst noch genôch sân mei de hûs yn. Dêrom waard it wol tiid foar in paadsje. De stiennen stiene hjir oars ek al in pear wiken foar de doar mar de strjitlizzers hiene it frijwat drok. Juster ha se dochs efkes goed dwaande west want wy ha no in moai paadsje fan bakte en trommele waaltsjes foar en neist it hûs lizzen. De postboades en kranterûnrbingers kinne no ek wer fatsoenlik by ús foardoar komme. Sa ha wy al wer in stapke út ús lange ferbettertrajekt ôfwurkje litten. Us hûs wurdt moaier en moaier. No moat de foarside fan ús hûs noch wat ferfraaid wurde mei in tún as gersfjild en in haachje om der foar te soargjen dat ús foartún nea wer in parkearterrein wurde sil...

+ 1 - 0 | § ¶Radmer updeet

Radmer leit op dit stuit, nei't er in pear dagen earder fan it dak fallen wie, yn it siikenhûs fan Grins. Dêr wachtet er oant syn foet en de sjirurch klear binne foar in operaasje. Fansels haw ik efkes by him del west. Doe't ik oankaam yn it UMCG moast ik earst wol efkes goed sykje. It is in allermachtichst grut siikenhûs en ik wie it bryfke fergetten mei te nimmen mei syn keamernûmer. Lokkigernôch is myn ûnthâld noch frij aardich sadat ik nei twa kear it paad frege te hawwen dochs yn in lift stappe koe nei de tredde ferdjipping. Op 'm sels wol yroanysk fansels dat hy nei in fal fan de tredde ferdjipping no wer op dy selde hichte leit. By syn bêd oankaam sieten syn heit en mem dêr ek al. Radmer syn foet lei op in kessen en der sieten in pear nuvere swarte plakjes op. Ek wie de foet wat dikker as gewoanlik mar fierder koest net sjen dat der fan binnen goed kapot wie. Radmer lei no al sa'n 10 dagen yn it siikenhûs mar se koene him noch net operearje omdat syn foet noch te bot opswollen wie. Ynkoarten soene de spesjalisten der mei oan de gong mar der wie net in soad hoop foar him. De kâns is frij grut dat er fan no ôf as in soarte fan Manke Nelis troch it libben moat. Op 'm sels altyd noch better dan as Koos Alberts fansels. Hy koe der sels noch wol om laitsje yn elk gefal. Omdat de stuollen fan it UMCG sa designd wiene dat se in Kuipers mar kwalik hâlde koene bin ik mar yn in rolstoel delploft. Dat die my wer efkes werom tinken oan myn eigen siikenhûsavontoer fan 22 jier ferlyn doe't ik mei in nulle yn de knibbel hast trije wiken bliuwe mocht. It is te hopen dat de Dokters der noch wat fan meitsje kinne by Radmer. Us Beppe hat al in keunstheup en ús heit in keunstknibbel. Soe der foar Radmer net in keunstinkel ûntwikkele wurde kinne?

+ 1 - 0 | § ¶Sûnder Tolk?

Sulejmani stiet de media yn syn nije Ajaxmouhimd yn frij goed Ingelsk te wurd. Ek kin er al in bytsje Nederlânsk prate. Wêrom't er hjir op it Hearrenfean dan altyd brûk makke fan de fertaaltsjinsten fan ús topper Daniël Pranjic is foar my in riedsel. Hy seit dat er hoopt dat Huntelaar bliuwt. Van Basten hat Huntelaar sels oanfierder makke om sa de druk om te bliuwen noch mar wat heger te meitsjen. Op 'm sels wol grappich dat de oanfierder fan Marco syn Ajax yn it Nederlânsk alvetal mar kwalik yn it b-tiem spylje mocht. Sa goed is Ajax dus ek wer net. Nasjonaal sil mannich ploech der in bêste kluif oan hawwe fansels...

+ 0 - 1 | § ¶Drokte yn Earnewâld

Doe't wy juster mei de auto troch it Sjûkemar riden foel ús op dat heit en mem dêr net mei de boat leinen. It wie wykein en frij goed waar dus wie der wat nuvers oan de hân. Doe't ik de radio oan sette en itskûtsjesilen der foar krige wist ik wol better fansels. Dy wiene al wer op de smelle wetterkes rûnom de Alde feanen. Ik haw der hjoed dan ek mar efkes in tillefoantsje oan weage en yndie leine hja foar de bûlefaar fan Earnewâld. It waar wie hjoed net sa denderjend dat wy it op de tandem besochten mar wy ha der al efkes mei de auto hinne west. Doe die bliken dat it yn Earnewâld wol in gesellige boel wie. Yn it ferline, doe't ik noch mei heit en mem mei gie op de boat wie de sneins altyd in soarte fan tsjerkse rêstdei mar no wiene op snein net allinnich guon winkels (de moarns) iepen, mar ek de merke wist de fleur der wat yn te bringen. De freondinne woe my net yn de sweef ha dus dat plesier gie oan myn noas foarby. Lokkigernôch hawwe wy noch al efkes de fiskkarre fan wat grammen kibbeling ôfholpen. Juster hat Snits de earste wedstryd wûn. Myn favoryt Wâldsein (myn bertedoarp) kaam spitigernôch net fierder as plakje tolve. Moarn ha se wol in goed lot omdat hja dan as earste fuort meie wat op de smelle wetterkes seker net ferkeard is. Spitigernôch hâldt soks wol yn dat se tiisdei yn Earnewâld as allerlêste starte moatte. It sil dreech wurde en hâld de rappe Snitsers fan it earste plakje...

+ 0 - 1 | § ¶Barbeknoeie op nivo

De freondinne hat in freondinne dy't sûnt in pear jier yn it Gooi wennet. Dêr wiene wy hjoed útnoege foar in barbekjoefeestje. No bin ik as karniforiër dêr fansels altyd wol foar te finen dat wy setten nei myn wurk de middeis ôf nei Naarden. Mei de rûtebeskriuwing fan myn sels ûntwikkele 'Wêz Handich rûteplanner' op skoat koene wy fansels it earste stikje fan de reis wol dreame. Pas doe't wy Sint Nyk foarby wiene waard it terrein wat minder bekend en pas yn de omkriten fan Almere waard it opletten. Der wie by de Hollandse brug in omlieding en wy koene dêr de A1 net op dus waarden wy omlaat fia de A27. Dan komt fuortdaalks it neidiel fan in papieren TomTom om de hoeke sjen fansels want no doogde ús rûte net mear. Mei de kaart yn de hân kamen wy dochs wer yn de omkriten fan Naarden út en dêr soene wy dan ôfslach fiif ha moatte. Dat wie ienfâldich genôch tochten wy mar ôfslach fiif wie allinnich oan de oare kant fan de fangreel. Wy moasten dus noch wer in eintsje op nei Amsterdam wêr't wy by ôfslach fjouwer gelokkich ûnder de A1 troch koene. Doe kaam alles gelokkich wer goed en sa kamen wy by John en Jane harren hûs oan. In alleraardigste twa ûnder ien kap dy't foar Hollânske begripen hiel rûm wie sa waard ús ferteld. De tún wie eins ien grut terras mei hjir en dêr wat strúkjes. Spitigernôch hiene de buorlju in fiver yn de tún mei in fontijn sadat ik de hiele tiid op en del nei it húske fleach. Doe kaam de barbekjoe foar it ljocht. Us manier fan barbeknoeien wie altyd in bêste laach koalen (briketten) oan de praat krije en dan it roaster der op en dan mar bakke. John hie in oare, faaks ek bettere, mar wol sleauwere wize fan fleisskroeien. It roaster lei wol hast 30 sintimeter boppe it fjoer wêrtroch't it fleis net swart waard mar wol gear. It duorre wat langer fansels mar it smakke oergryslik goed. Sa haw ik foar mysels in barbeknoeiduurrekôr festige tinkt my. By ús megafjoer bin wy meastentiids yn ien tot twa oerkes aardich sêd. No duorre it allegear wat langer sadat wy nei elke bakbeurt al wer opnij honger hiene. Wy nimme dizze metoade mei yn ús syktocht nei de ideale barbekjoe...

+ 0 - 1 | § ¶Eredivisie LIVE

By de start fan de nije fuotbalkompetysje lansearje de fuotbalklups ek in nij digitaal tv kanaal ûnder de namme Eredivisie Live. Op dizze stjoerder binne alle wedstriden (út de earedivyzje) live te sjen. Fansels moat der in pear sinten betelle wurde foar dizze stjoerder. By UPC kinst de earste trije moanne foar €6,- yn 'e moanne sjen, dêrnei wurdt dat €9,95 en it kin per moanne opsein wurde. Op 'm sels net ûnaardich fansels allinnich freegje ik my in pear dingen ôf. Komme de bekerwedstriden ek op dit kanaal? Moat ik ek yn de simmer betelje wylst der dy moannen hielendal gjin fuotbal is as moat ik alle kearen wer yn juny opsizze en my foar augustus dan wer oanmelde? As seisoenskaarthâlder fan it Hearrenfean soe it by my bynammen om de útwedstriden gean. Dat binne der 17 stiks at wy de play-offs net meirekkenje. De wedstryd tsjin Grins folgje ik meastentiids wol fanút de Euroborg dus dan soe ik 3x6 + 7x9,95 = 87,65 betelje. Diel dat ris troch dy 16 wedstriden en dan komst op 5,48 per wedstryd. Fansels komme der ek noch in soad praatprogrammas by. Ik lit it noch wol efkes yn my omgean...

+ 1 - 0 | § ¶Leanslaaf

Hjoed foel de jackpot fan de steatslotterij. Gewoanwei falt dizze haadpriis soms mar omdat er no al in pear kear net fallen wie moast der hjoed in winnend lot lutsen wurde. Myn lotnûmer mocht ek meidwaan oan dizze ûnhuere foarm fan selsferriking. It gie dan ek om it astronomyske bedrach fan €25.000.000,- Yn myn holle spûken al dagen lang gedachten oer wat te dwaan mei dy sinten. Soe ik it bekend meitsje en sa ja, oan wa? Wat soe ik keapje en wat soe ik foaral net dwaan? Guon minsken sizze dat de kâns op it winnen fan sa'n lotterij net sa grut is en dat je better it jild yn de bûse hâlde kinne. Ik fyn dat in flauwe kul argumint. Sjoch, dy €14,50 kin ik bêst misse en hoewol't ik ek wol wit dat de kâns lyts is keapje je mei sa'n lot dochs in kâns op in riker libben mar je keapje bynammen ek in dream. In moanne lang kinne jo tadreame nei it moment dat de útslach bekend makke wurdt. Dreamen spatte dan ek nuver útien at op side 101 fan teletekst al melding makke wurdt fan it feit dat it winnende lot yn De Haach ferkocht is. Doe't ik dat lies hie ik eins al gjin nocht mear om nei de folsleine útslagen te sjen. Faaks hie ik noch wol in lytsere priis mei genôch nullen om in leuke ferbouwing mooglik te meitsjen mar it mocht dizze kear net sa wêze. Ik hie wol it einsifer fan sawol de 25.000.000 euro as de 1.000.000 euro goed mar spitigernôch foel op it nûmer twa fierder gjin priis. Sa stean ik dus wer mei lege hannen al haw ik dus wol sa'n 20 nachtsjes as miljonêr libbe yn myn dreamen. Moarn mar wer gewoan oan it wurk...

+ 0 - 1 | § ¶Oerfallers socht

De plysje fan Amsterdam smyt no de privacy fan oerfallers ek eindelik ris oer board. Soarge Geen Stijl al folle earder foar it oplossen fan mannich laffe died troch filmkes fan bewakingskameras op harren side te setten. No hat ek de plysje fan Amsterdam in eigen side mei faak ûndúdlike kykjes fan oerfallers der op. Op 'm sels in aardich idee fansels en hjirmei trochbrekke sy ek it privacyfraachstik want at de plysje filmkes fan kriminele aktiviteiten op ynternet set dan meie oaren soks fansels ek. Wat dat oanbelanget tink ik dat de side fan de plysje Amsterdam op 'm sels redelik kânsleas is. Ik kin my net yntinke dat der in soad minsken binne dy't alle dagen efkes op sa'n side sjogge útsein om te sjen oft hja der sels ek op stean fansels. Wat dat oanbelanget hie de plysje fan Amsterdam fansels better gearwurkje kinnen mei Geen Stijl want dêr komme dochs al in hiel soad minsken efkes del. By in dúdlikke foto duorret it nea lang oant de dieder bekend is. Faak jout de dieder him sels ek al oan om mar sa rap mooglik fan dy side ôf te kommen...

+ 1 - 0 | § ¶Fier fuort mar wol kânsen

Yn de twadde ronde fan de KNVB-beker spilet it Hearrenfean in útwedstryd tsjin MVV. Dat betsjut dat ús mannen hielendal nei Maastricht ôfreizgje meie. In bytsje te fier om mei te reizgjen fansels dus dat skeelt wer in pear sinten. Yn elk gefal is it in wedstryd dy't wy net ferlieze meie. Stean der fierders noch nijsgjirrige wedstriden op de aginda? Jawis wol! Sa spilet PSV tsjin Jong PSV. Ferline jier waard PSV noch útskeakele troch de beloften fan Hearrenfean. Dizze kear meie hja besykje harren eigen beloften der út te smiten. Taktysk besjoen soe PSV dan ek op twa hynders ynsette kinne troch alle toppers by de beloften yn te setten. Faaks kin dan twa kear Europeesk fuotbal helle wurde wannear't PSV him pleatst fia de kompetysje en Jong PSV fia de beker. Ajax krijt it dreech tsjin FC Utrecht wat ek altyd in goeie bekerklup is. Ien fan dy twa sjogge wy dus net werom. Lit ús hope dat de Kromme van Basten de poat dwers set want Ajax is oant no ta yn de beker foar it Hearrenfean altyd it einstasjon west. De Ljouwerters meie it thús tsjin Swolle besykje en de Snitsers fan ONS kinne by winst yn de earste ronde Excelsior op besite ferwachtsje.

+ 0 - 1 | § ¶10 jier ferkearing

Fan ús heit en mem kin ik it feestje noch wol heuge dat sy tolve en in heal jier troud wiene. Ek harren fiifentweintichjierrich jubileum stiet my noch redelik goed by. Pake en beppe wiene sels 60 jier by elkoar wat fansels grut fierd wurden is. Ik sil sa fier nei alle gedachten nea komme. Fiifentweintich jier soe fansels noch wol kinne mar sjoen it feit dat wy noch altyd net troud binne en ik op dit stuit al 33 bin soene wy dan beide 93 wurde moatte en noch dit jier boaskje moatte. Dy kâns is net sa hiel grut. Wol ha wy hjoed 10 jier offisjeel ferkearing. Fereale wiene wy fansels noch wat langer mar sûnt de nacht nei it dramatysk ferrûne WK fan 1998 dêr't Guus noch gjin gelok hie mar wy dus wol binne wy in steltsje. Weddenskippen waarden der ôfsletten mar de steltsjes dy't meidiene oan dy weddenskip bin yntusken al net mear by elkoar wylst wy noch alle dagen wer gek op as fan elkoar wurde...

+ 1 - 0 | § ¶Op ien poat kinst net stean...

Yn Lloret de Mar is in 18 jierrich Nederlânsk famke dea fallen doe't hja nei in jûntsje stappen besocht fan it iene nei it oare balkon te springen. De riskante aksje op de tredde ferdjipping fan appartementekompleks Eva mislearre wêrnei't it famke fan in hichte fan goed 10 meter nei ûnderen foel. Sy wie op slach dea. Gewoanwei soe sa'n berjocht my net in hiel soad dwaande hâlde wie it net dat myn neef Radmer ek krekt yn in selde situaasje ferkearre hat. Hy wie efkes op stap west en doe't er syn kaai kwyt wie besocht er fia in steiger by de buorlju yn syn keamer te kommen. It risseltaat wie dat er binnen in fraksje fan in sekonde yn de steech op de grûn lei. Gelokkich hat er allinnich syn foet stikken al is de kâns wol frij grut dat dy foet frijwat skansearre is wêrtroch't er miskien wol nea wer fatsoenlik brûkt wurde kin. De siswize 'op ien poat kin men net stean' dy't gewoanwei brûkt wurdt om noch mar in ekstra buorrel te nimmen wurdt sa wol hiel nuver bewezen fansels. Mar goed, it hie ek folle slimmer ôfrinne kinnen lykas it boppeste berjocht wol sjen lit. Radmer, in soad betterskip tawinske en lit ús hope dat de dokters dyn poat wer in bytsje yn it gareel krije kinne. Der binne oars noch safolle lannen dy't noch op dy wachtsje...

+ 1 - 0 | § ¶Falkjesile is myn nocht

De freondinne woe hiel graach te silen en ik mei dat fansels ek graach dwaan. It wie moai waar hjoed dat wy moasten mar efkes sjen dat wy noch in boat krije koene. Wy bin ôfsetten nei Earnewâld omdat dêr miskien noch wol in boatsje foar ien dei te hier wie tochten wy. Boppedat leit Earnewâld hjir mar in pear kilometer wei. Midden yn it doarp seagen wy al in pear boatsjes lizzen mar dy wiene spitigernôch al fersein. By de Twirre hiene wy mear súkses. Dêr koene wy noch wol in boatsje hiere. Sa setten wy al rap ôf yn de rjochting fan de prinsehof. Oer in pear dagen sile hjir de skûtsjes wer oer de nauwe wetterkes mar no wie der noch romte sat. In soad falkjes hellen ús op de motor yn mar dat is fansels gjin silen. Wy hiene de tiid wol dat wy dreaune moai nei de Sânemar ta. Yn de Folkertsleat moasten wy sa no en dan noch efkes in slachje meitsje mar dêrnei koene wy wer moai troch driuwe oant Trijehûs. Op it Prinses Margrietkanaal hawwe wy efkes in pear kear de motor oan hân omdat wy oars lavearje moasten en dat hie de wetterplysje leaver net. Op de pikmar hawwe wy fansels efkes sitten by it Teehûs. Dêr ha wy in lekker bakje sop hân. Doe koene wy silend wer werom nei Earnewâld. Yn it lêst waarden wy noch troch ferskate skûtsjes ynhelle dy't mei gang om ús hinne fleagen. Wy hiene prachtich sylt en de sinne hie ús feltsje wer lekker read baarnd. Wy sil dan ek noch wol in pear daagjes werom tinke oan dizze prachtige dei (au)...

+ 0 - 1 | § ¶In priis is net te keap, in spiler wol.

Nei't wy begjin dit jier al in bêste som jild krigen hiene foar ús Alves ha wy hjoed oppenij foar in rekôr soarge. Sulejmani is sûnt hjoed de djoerste transfer binnen Nederlân. Neffens de berjochten krijt it Hearrenfean sa'n 18 miljoen foar de publyksleafling. Wol is it fansels spitich dat wy him no dit seisoen wer minimaal twa kear treffe. It hie better west at Sulejmani nei it bûtenlân gien wie fansels. Ek haw ik no noch mear myn betinkings by de missers yn de kompetysje tsjin dat selde Ajax en de 'blessure' dy't er oprûn flak foar it treffen mei Ajax yn de play-offs. Wat dat oangiet naam Huntelaar in stik better ôfskied troch tsjin de Amsterdammers yn de snie noch efkes it ferskil te meitsjen. Wy moat mei Sulejmani fansels in topper misse mar bynammen ek in moaie stadionsong. No mar hope dat wy kommend seisoen oppenij in pear spilers oanlûke dy't it net witte te finen. Dat is dit bestjoer wol tafertroud liket my ta...

+ 0 - 1 | § ¶It griene gers

It gers dat wy ôfrûne sneon saaid hawwe komt no al boppe de grûn. Op de ferpakking stie dat dit pas nei twa wiken barre soe mar troch it moaie waarme waar is de grûn sa hyt dat it gers der út fljocht. No is it fansels wol saak om regelmjittich foar wat wietichheid te soargjen want oars krije wy fuortdaalks giel gers en dat is fansels net de bedoeling. Apart is wol dat krekt it stikje mei it measte skaad no al it grienste is. No ja, oer in pear wiken is ús tún mei terras wol klear foar in feestje tocht ik sa. Der moat dan ek mar efkes in datum prikt wurde foar it twadde 'eigen hûs en túnfeest' wat dan ek fuort kombinearre wurde kin mei it 100 jierrich bestean fan ús hûs...

+ 0 - 1 | § ¶Kilometerheffing

Ik snap eins net goed wat it doel fan de oerheid is om mei yngewikkelde systemen in kilometerheffing yn te fieren. Wy hawwe ommers al wit ik hoe lang in prima systeem wêrby't eltse Nederlanner mar ek alle bûtenlanske gasten netsjes per kilometer betelje. Dêr komt noch by dat dit systeem ek rekkening hâldt mei it miljeu want hoe suniger de auto en de rydstyl hoe minder kilometerheffing at men betelje hoegt. Dit systeem neame wy de brânstofpriis. Wat my oanbelanget skaffe wy de wegenbelesting ôf en meitsje se de brânstof noch mar in bytsje djoerder. Eltse Nederlanner kin dan in autoke op it hiem ha en hoe mear at je ride hoe mear de staat binnen hellet. Gjin yngewikkelde systemen mar gewoan mei de pin betelje by eltse tenkbeurt...

+ 1 - 0 | § ¶Smookferbod?

Fan hjoed ôf mei der net mear smookt wurde yn de hoareka. Nei't jierrenlang de smokers de net-smokers fergees mei genietsje lieten is dêr hjoed dus in ein oan kaam. It sil efkes wennen wêze want troch de stank fan al dy smokers rûkten wy fansels lang sa goed net dy skrale bierluchten en de luchtsjes fan de minsken om ús hinne. Ek wurdt it no wat minder ienfâldich om in net smookjend famke te fersieren yn de kroech. Foar dat je sa ticht by binne dat je troch hawwe dat de skoarstien bûten al sa no en dan ris rikket is it fansels al te let. Ik mei hope dat der foar smookmasjines trouwens in útsûndering makke wurdt. It is altyd grappich om de soas fan Bernlef folslein mistich te meitsjen mei sa'n smookmonster. It liket my trouwens gjin probleem want ik haw begrepen dat ek yn de koffywinkeltsjes noch altyd wol rookt wurde mei. Der mei allinnich gjin tabak mear troch de hash hinne smiten wurde. No gun ik elkenien syn pafke wol al haw ik leaver net dat soks by my yn de omkriten plakfynt fansels. Dat wat dat oangiet stekke jim der oan de oare kant fan it ynternet noch mar efkes ien op. At jim tenminsten net yn in ynternetkafee sitte op't stuit...