+ 0 - 0 | § ¶Fakânsje
Myn skoansuske en de freon hawwe in fakânsjehûske yn Voorthuizen op de Veluwe. Omdat wy ek wol hast tawiene oan in fakânsje mochten wy dêr in pear dagen yn. Fannemoarn bin wy dus al betiid ôfsetten yn de rjochting fan ús grutte Nasjonale bosk- en heide gebied. It wie net al te drok op de wei dus wy koene aardich trochride. Nei't wy yn it parkje de auto útladen hiene wie in tiid foar in fytstochtsje. Dat tochtsje duorre krekt 2,5 kilometer en doe wie de freondinne al sa siik as in hûn dat wy ha rjochtsomkear makke en bin wer op it hûske oangien. Letter op de dei hawwe wy noch al in stikje te rinnen west. Dat gie aardich better gelokkich. It is bêst moai op de Veluwe mar it is wol in hoop fan it selde. Mar ris sjen wat de dei moarn dan wer bringe sil...+ 0 - 0 | § ¶Grutte Pier en bange famkes
Us lokale kuorbalklupke hie in leuk útstapke foar de âldere jongerein betocht. Hja koene mei as begelieders op it tintekamp fan de jongere garde. Op it sportfjild fan Eastermar wie in ferskaat oan tintsjes opsetten dêr't in stik as 35 bern de nacht yn trochbringe soene. Yn it foar moasten de bern fansels al efkes in speurtocht rinne en dy stie yn it teken fan Grutte Pier. Ik mocht ferklaaid as nuvere mûnts it ferhaal fan Grutte Pier opleppelje dy't yn it ferline goud kwyt rekke wie fan de Rottefalsters. Hy soe krekt sa lang spoekje oant it werom fûn wie. Troch dat ik in nuver masker op hie wiene der in pear famkes sa bang wurden dat se eins net mear de bosk yn doarden. Nei lang praten bin se dochs allegear ôfsetten. Ik haw noch efkes noflik neisitten by it kampfjoer en sa waard it al wer rap let. De earste posten wiene rap werom mar de minsken dy't op de lêste post sieten moasten hiel lang wachtsje oant alle groepkes delkaam wiene. Doe't elkenien wer werom wie wiene der al wer in moai nustje âldere jongeren bykaam om it feestje mei te fieren. De bern koene yntusken harren tintsje opsykje. Ynkoarten moat der ek mar ris sa'n tintekamp komme foar de Rottefalsters fan 18 jier en âlder...+ 0 - 0 | § ¶De ferkearde kant
As âld Sint Nykster haw ik fansels de noadige optochtweinen sjoen yn myn libben mar in gondel wie noch net earder oan my foarby fearn. De gondelfeart fan Aldeboarn is ien fan de bekendsten fansels en sûnt M8eld en Jelle dêr wenje komme wy dêr ek gauris efkes. It waard dan ek wol ris tiid om de fersierde gondels mei eigen eagen te oanskôgjen. Tegearre mei de freondinne giene wy mei de auto rjochting Aldeboarn. Fia in nij soarte fan fjouwerkante minirotonde (?) kamen wy oan de râne fan it doarp terjochte. Dêr waarden wy de greide ynstjoerd dêr't wy fergees parkeare koene. Om it doarp yn te kommen wie al in lytse donaasje nedich mar dat mei ek wol fansels. Lâns de Boarn wie it al in drokte fan belang en der wie ek noch in soarte fan bradery mei ferskate kreamkes. Dêr kamen wy fansels net foar en sa fûnen wy nei in rûntsje om in moai plakje oan de Boarn. Krekt foar de start giene alle brêgen iepen en de ljochten út en doe kamen de fersierde gondels lâns. Se wiene in stik grutter as dat ik my foarsteld hie. De grutte izeren bakken mei de lytse sleperkes der foar koene mar kwalik troch de nauwe wetterkes hinne dus der wie al de noadige stjoermanskeunst nedich. De buerten hiene der wol wat moais fan makke al moat ik wol sizze dat it gemiddelde nivo fan ôfwurking yn Sint Nyk dochs noch krekt wat heger leit. Dochs wiene der in pear prachtige weinen by. De grappichste fûn ik eins de wein fan Moeke de Bruin dêr't in lading libbensgrutte peukjes de kroech net mear yn mocht. De Boarnsters gean ek noch ris mei harren tiid mei. Sa koe der per SMS stimt wurde op de moaiste gondel. Spitigernôch wie der ek immen dy't it nedich fûn om regelmjittich minsken fia in lûdsynstallaasje op de boat op te roppen op dizze 'moaiste gondel' te stimmen. Dat die dan wol wer in bytsje ôfbreuk. Doe't de gondels allegear lâns west wiene giene de brechjes wer ticht en ik soe doe efkes kofje helje foar de freondinne. Krekt doe't ik mei it bakje yn de hân werom nei de oare kant soe hiene de Boarnsters de bocht al wer naam en dus stie ik foar de iepen brêge. De freondinne siet sûnder kofje en ik baarnde my de klauwen oan it guod dat ik sels net mei. De folsleine twadde helte wiene wy dus skieden troch it smelle wetterke. Nei ôfrin bin wy tefreden wer nei hûs ta rûn. De yntusken lau wurden kofje smakke noch prima en it wie al wer let wurden. Spitigernôch moasten wy it feest oan ús foarby gean litte...+ 0 - 0 | § ¶Herfkens
Ald minister Herfkens hoecht de hiersubsydzje dy't hja ten ûnrjochte krigen hat net werom te beteljen. Dat makket it regear hjoed bekend. Frou Herfkens hie sûnder it te witten de rigels oertreden mar it hat foar har dus gjin gefolgen. Hoe oars is dat foar mannich oare boarger yn ús lân dy't per ûngelok wat tefolle hiersubsydzje kriget. Hoe oars is dat foar mannich studint dy't sûnder dêr sels erch yn te hawwen ûnterjochte stúdzjejild kriget Oant de lêste sint moat it dan werom en noch mei rente ek! Frou Herfkens mei de sinten hâlde mar it giet ek mar om 190.000 euro. It liket my earder in keapsubsydzje want foar 190.000 moat dochs wol in aardich hokje kocht wurde kinne liket my. No sil frou Herfkens dus in jier wurkje foar de Feriene Naasjes foar mar $1,-. De fraach is no fansels wol: Hoefolle oeren wurket sy dan foar dy FN? Ik haw trouwens noch wol in goeie tip foar frou Herfkens. Wannear't sy middeling oanfreget fan har ynkommen by de belestingtsjinst dan kin sy noch in moai nustje sinten werom krije...+ 0 - 0 | § ¶Thaeke wit wol wat
De minksen fan de Benefytsaksje hawwe it aardich drok hân de ôfrûne dagen mar sûnt hjoed steane de útslagen fan de Fryske kenniskwis dan dochs op de side. De winner wie âld Bernlef foarsitter (mar noch net sa hiele lang âld) Jorrit Rodenhuis mei 43 punten mar dy siet sa te sjen yn in tiem tegearre mei freondinne Tsjitske (tredde mei 41 punten) en skoanmem Annigje (fjirde mei 40 punten). It rychje G15-G17-G19 hie troch kollektive kennis in streekje foar fansels. Prominente winner Henk Kroes hie krekt twa punten mear as my en mei myn 36 puntsjes stie ik op in dield njoggende plak tegearre mei û.o. âld-foarsitter Liuwe Westra. Ik hoech my dan ek net te skamjen want ik sit by de bêste 10%...+ 0 - 0 | § ¶Acht tûzen?
Omrop Fryslân wit te melden dat der al acht tûzen euro ophelle is troch de Bernleffers yn aksje. Dat betsjut dat der dan noch in gatsje yn de begrutting sit fan 3300 euro mar it begjin is der yn elk gefal. Fine jo it ek sa bernich fan dy grutte útjouwerij út Alkmaar en wolle jo ús der finansjeel wer boppe op helpe? Jo kinne fansels noch altyd in pear sinten oermeitsje op postbanknûmer: 1176135 ûnder fermelding fan Benefytsaksje. Se krije ús der fuort net ûnder...+ 0 - 0 | § ¶Kluitman en Bernleffers yn aksje bedankt!
Hoewol't it fansels spitich wie dat útjouwerij Kluitman in rjochtsaak tsjin Bernlef begûn, dizze dêrnei seis jier lang oanhold en sa úteinlik mei 11.300 euro oan de haal gean koe wol ik dochs dy selde útjouwerij betankje. Sûnder Kluitman hiene wy it ôfrûne wykein in bytsje duf yn de bank hongen wylst der no in aldermachtichst moai wykein mei kennis, krêft en kultuer plakfûn hat. In folle grutter dankjewol giet fansels út nei alle minsken dy't de aksje op tou setten hawwe, de stipers fan de aksje en de besikers fan de ferskate eveneminten. Ek de minsken dy't 125 kilometer lang myn domme praat oanharkje moasten en de ferskate artysten. Miskien moat wy ynkoarten de Kameleonfilm mar wer ris sjen litte. Dan krije wy 5000 euro boete en dan kinne wy kommend jier wer sa'n prachtich moai wykein organisearje...+ 0 - 0 | § ¶Snel nei Ljouwert en nei Snits ta...
De lêste etappes wiene fan Dokkum nei Ljouwert en fan Ljouwert wer nei Snits. Ik haw der foar keazen om fan Ljouwert nei Snits te fytsen dan koe de Laguna thús bliuwe. Moarns efkes foar tsienen siet ik al op myn eigen fytske om sa yn Drachten op de bus nei Ljouwert te stappen. Foar mar ien euro koe ik dizze rit meitsje en dat rêd ik mei de Laguna lang net fansels. Bykommend foardiel wie ek noch dat wy dan letter mei ien auto wer nei de Rottefalle koene en dat ik dan dus in kear gjin bob hoegde te wêzen. Doe't ik yn Ljouwert op it Aldehoustertsjerkhôf oankaam wie dêr frij weinich aksje. Wol stie der in moaie Fryske flagge op de toer en dat die my goed fansels. It wie in bûnte samling fan AB Fryslân weintsjes en de mei poasters folplakte rolstoelbus wie ek dúdlik werkenber. De organisaasje moast dan ek wol yn de omkriten wêze mar yn hokker kroech sieten hja? In tillefoantsje holp my út de rie en in freonlikke Ljouwerter brocht my nei Fire. Foar tolven wie Fire gjin kroech mar in soarte fan kofjesjop dus myn joustratsje sânomheech skeat der fuortdaalks alwer by yn. Dan mar twa gehaktballen en in waarme poeiermolke mei slachrjemme. Dat smakke my poerbêst en no wie der ek wol wer enersjy genôch om noch in eintsje op de pedalen te stean. Doe't it bierfytske krekt wat te let oankaam namen wy rap op it brechje foar Fire plak op it fytske. Dan hoechden wy net earst in bult op. Men woe ús doe wol troch it steechje hinne ha dat nei de Aldehou liede. Mei pine en moeite ha wy de fyts dêr troch krigen en doe gie it op nei Snits. Op de grutte dyk de stêd út rjochting Crystalic waarden wy troch Anton nei rjochts stjoerd. It wie syn bedoeling ús op it fytspaad te krijen mar wy giene fansels braaf rjochtsôf. In pear bochtsjes letter sieten wy wer op it goeie paad mar doe like it derop as soene wy de A31 opride. Dat wie fansels net sa'n goed plan dus dan mar efkes in bytsje spoekride en de paralelwei op. Efter Deinum giene wy op Jellum en Boksum oan en doe wie it eins net sa dreech mear om te finen. Louw Vrolijk stie ús noch op te wachtsjen en oppenij stiene der minsken lâns de kant fan de dyk mei jild te swaaien. Om 16.00 soe it konsert begjinne mar wy wiene al om 15.00 yn Snits dat wy hawwe de bierfyts earst mar efkes parkeard by it âlde fet. Doe kaam ik mei it plan om Piter Wilkens de lêste hûndert meter foarop de bierfyts te setten. De organisaasje sette alles yn it wurk en om efkes foar fjouwer oere kaam Piter dan ek op de bierfyts te sitten. Sa fleagen wy mei gitaarmuzyk fan Piter en sang fan in bierfyts fol folk troch de Easterstrjitte. By Scheer en Foppen moasten wy noch efkes werom omdat dêr pealtsjes wiene dy't der tweintich jier ferlyn noch net stiene. Doe't wy op de marktstrjitte oankamen seach it dêr al swart fan de minsken. Douwe Gerlof Heeringa stie op it poadium om Piter oan te kondigjen en it wie gesellich. Piter Wilkens brocht fansels in geweldige sjo mar doe't letter Sebeare it stokje oernaam spilen hja ek noch efkes tegearre it nûmer Famkes. In prachtige oergong fansels. Sebeare knalde der ek goed yn en doe wie it tiid foar de Putkapel om de minsken te fermeitsjen. Jitiizer koe dan moai efkes opbouwe. De mouhimden mei Leaver dea as braaf wiene yntusken allegear al útferkocht en ek de bearenburch wie rap op. Ik haw oan dat lêste fansels sels ek de nedige bydrages levere. Op de nûmers fan Jitiizer koene wy efkes flink út ús dak gean en de tip dy't se ús joegen mocht der noch jild oer bliuwe (Snel nei Ljouwert as nei Grins ta...) sille wy ûnthâlde. Nei in nij rûntsje Putkapel koe Pigmeat it feest yn stijl ôfslute. De waargoaden hiene yntusken al foar wat minder droech waar soarge mar in wiete frou is in ingel yn bêd dus bin ik tegearre mei de freondinne nei Pigmeat mar wer ôfsetten nei de Rottefalle. No mar hope dat der genôch jild binnen kaam is. Ik haw myn bêst yn elk gefal dien...+ 0 - 0 | § ¶Tusken Frjentsjer en Dokkum
It fytsavontoer fan juster wie my sa goed befallen dat ik my spontaan wer oanbean haw om hjoed in pear kilometerkes mei te fytsen. Hjoed wie in wat koartere etappe fan Frjentsjer nei Dokkum ta. Dit waard opdield yn twa parten sadat ik my yn Stiens melde koe foar de grutte wikseltrúk. Wêr't ik krekt yn Stiens wêze moast wie my yn earste ynstânsje net krekt dúdlik makke mar nei't ik trije kear troch en om it doarpke hinne riden wie bin ik earst mar ris yn de rjochting fan Bitgum flein. Dêr kaam ik in blauwe AB Fryslân auto tsjin mei Jelmer en Jurjen efter it stjoer. Ik haw myn âld Laguna dan ek mar in slach yn de rûnte slingere en bin efter harren oanflein. By it begjin fan Stiens wie men mei de wei dwaande. Ek wie der in groppe oanlein dy't wierskynlik bynammen it slûpferkear opkeare moast. Twa wiken ferlyn koe de bierfyts hjir noch wol del mar op dit stuit wie dat net mear mooglik dus moast der wat oars betocht wurde. Ik bin doe mar nei it sintrum gien om dêr in fiskje yn te nimmen. Sûnt ik by Doede in mouhimd krigen ha mei dêrop de tekst "Ik ben een visjunk" moat ik my fansels sa no en dan al efkes in sjot seefruchten ta tsjinje. Op it fytske setten wy doe ôf foar Dokkum mar earst moasten wy fansels noch efkes troch Hallum dêr't it koekjesfabryk ien fan ús grutte stipers wie seis jier ferlyn. Yn Hallum makke men har klear foar in skeelerkriich of in hurdfytserij ofsa want alles wie ôfsetten mei stekken en de Ljouwerter krante hie ek in moaie finisjbôge opblaast krekt as wie it in toer de Frâns. Wy koene moai efkes oer it parkoer hinne sadat wy gjin lêst hiene fan fervelende autokes dy't om ús hinne jagen. Ek koe it publyk sa moai út de gefaresône bliuwe. Flak foar de Claerkampsterbrêge bûgden wy rjochtsôf in lyts fytspaadsje yn. Oft dat de offisjele rûte wie is my net bekend mar it wie wol in gelok want al nei hûndert meter stie dêr in hiele leave frou mei tsien euro te swaaien. Se bea ús ek allegear noch in iisko oan dat wy hawwe dêr efkes in heal oerke yn de tún sitten. Persoanlik haw ik dêrby noch efkes op fjouwer plakken in lyts bytsje foarwurk foar de NAM dien. Doe't wy de reis wer fierder setten oan de oare kant fan de Dokkumer Ie kamen wy nei tal fan rûntsjes oer minirotondes dien te hawwen úteinlik oan by de winkelstrjitte fan Dokkum. Dêr stie in boardsje dat oanjoech dat wy der net yn mochten mar sokke boardsjes hawwe fansels in reade râne dy't as in lape by in bolle ús de krêft joech om it dochs te besykjen. Fol gas fleagen wy troch it smelle strjitsje mar omdat hieltyd mear winkels in flinke sinne- as reinwearing oan de gevel hiene moasten wy sa no en dan wol efkes wachtsje oant dizze nei binnen ta draaid wie. Op it plein wat no foar ús lei stiene de grutte keardels fan de keten al op ús te wachtsjen. Ik hie earst noch it plan en doch efkes mei mar nei it sjen fan de bearen út Ie hawwe wy dochs mar besletten dit net te dwaan. By oankomst yn Dokkum koene wy fuortdaalks alwer yn de auto stappe want it bier wie hast op. Marius Dussel hie sa faak yn de krante setten dat der flink wat bier sopen wurde moast foar it goeie doel dat ús barpersoaniel wie al licht yn panyk. Fanút Grins hawwe wy dan ek rap noch in pear fusten ophelle. Doe't om in oerke as njoggen alles oan kant wie hawwe wy de hikken werom brocht nei de gemeente en de diksys mei dong en al by Jarig syn broer op de platte wein tilt. It wie in moai feestje west wat úteinlik yn de pizeria ôfsletten waard mei in platte skiif mei lekker guod der op. Moarn de lêste etappes en fansels bin ik der ek dan wer by...+ 0 - 0 | § ¶Ald sear as âld nijs?
Yn 2002 betocht ik dat it wol aardich wie om, nei't Steven de Jong it sels net dwaan woe, de Kameleon dan yn elk gefal mar as earste yn it Frysk nei it folk te bringen. Begjin 2008 kaam de rjochter mei de útspraak dat ús dit grapke in foarske boete opleverje soe. Pas yn de neisimmer fan 2008 en krekt wylst hast de folsleine feriening him (letterlik) út de naad wrot om dy sinten werom te fertsjinjen, komt dan ynienen fia in kollum yn it Frysk deiblêd ús âldlid Jaap Krol mei de oprop dat men syn âlde studinteferiening net in sint betelje moat. De boeken soene yn it Hollânsk wêze en jo mochten dat wat sa bedoeld wie troch in skriuwer as filmer net samar feroarje. It is knap dat Jaap Krol soks seis jier lang foar him hâlde kinnen hat wylst ús eigen ferieningsbledsje alle moannen wer stiet te springen om in bytsje ynbring fan nivo. No tink ik persoanlik dat wy mei ús film tichter by de wrâld fan Hotze de Roos bleaun binne as it ferhaal wat Steven de Jong rûnom it boatsje de Kameleon makke hat. De echte fans binne it wat dat oanbelanget ek wol mei ús iens lykas te lêzen is yn it ûndersteande stikje út de grutte broer fan it Frysk deiblêd.
Krityk is fansels net slim mar seis jier nei de tiid komt soks fansels wol as moster nei it miel. Miskien is it tiid om Woody Allen der dan mar efkes by te heljen. Woody sei: "If my films make one more person miserable, I'll feel I have done my job." It bin net myn wurden mar dy fan Woody, faaks kinst dêr treast yn fine Jaap? Mochtest al dyn sinten werom ha wolle foar it kaartsje fan de film dêrt'st seis jier ferlyn net om laitsje koedest dan bin ik de beroerdste net. Atst my it kaartsje oerlangje kinst dan betelje dy it bedrach graach werom.
+ 0 - 0 | § ¶Fryske kennis
Klaas Yde woe wol ris witte hoefolle de oare Friezen witte fan ús provinsje. Dêrom hie hy fannejûn ûnder de flagge fan de benefytsaksje yn de Koornbeurs yn Frjentsjer in Fryske kenniskwis organisearre dêr't bekende Friezen lykas Johannes Brandsma, Taeke Triemstra, Henk Kroes, Renze Westra en noch in nustje oaren oan meidiene. Klaas Jansma presintearre it wer op legendaryske wize sa't allinnich Klaas dat kin. Der wiene in soad lestige fragen en ek in moai nustje strikfragen by. Sa waard der frege hoefolle punten der maksimaal yn in keatspartij ferkeatst wurde kinne (154) mar ek moast it geslacht fan in ljip fêststeld wurde en koe der topografyske kennis spuid wurde. Dêr't ik drok oan it neitinken wie oer wat no de lytse gemeente wie kwa ynwenners wie ik fansels hielendal de eilannen fergetten (Skiermûntseach). It giet fansels te fier om alle fragen te behanneljen yn dit stikje mar oan it ein fan de rit kaam Henk Kroes as winner fan de prominenten út de striid. Ald foarsitter fan Bernlef Jorrit Rodenhuis wie de bêste út de seal en syn freondinne dy't net yn alle antwurden mei him mei gien wie waard tredde. Myn skoare sil letter noch op de webside fan de Benefytsaksje te sjen wêze. Ik hoop al dat ik better skoart haw as de freondinne fansels....+ 0 - 0 | § ¶Fan Snits nei Frjentsjer
Fannemoarn moast ik om goed acht oere yn Sleat wêze om dêr de earste groep minsken op de bierfyts ôf te lossen. Dat betsjutte dus dat ik der betiid ôf moast dat ik tink, it kin ek noch wol in bytsje earder. Sa siet ik om goed fjouwer oere al yn de Laguna op wei nei Snits. Oer in lege A7 ryd soks fansels aardich oan dat ik wie moai op tiid by de winkel fan de Weduwe Joustra foar de doar. Om 4.45 wie dêr noch in ferhipt lyts bytsje aksje. Ik wie al efkes bang dat se al fuort wiene as dat se in oare startlokaasje keazen hiene mar nei in tillefoantsje die bliken dat ik dochs goed te plak wie. Om klokslach fiif oere kaam de bierfyts it Lyts sân op draaien. Doe't ús eigen lytse Jelmer stuntpiloat fan it sadel kaam wipte hy fuort efkes syn flerk út de kom dat fuort nei't foarsitster Fonny it startsein jûn hie fleach de bierfyts fuort en bleaune Jelmer en ik efter. Ik haw doe earst mei Jelmer nei de earste help west fan it siikenhûs dêr't wy op 'm sels rap holpen waarden. De dokter miende earst noch yn in lang ferhaal útlizze te moatten dat se earst nei in oare pasjint moast en dat it dus wol efkes duorje koe. Lokkigernôch koene wy har der fan oertsjûgje dat wy hastich wiene omdat wy noch in lange reis foar de boech hiene. De meidieling nei ôfrin dat se no dan mar nei de pasjint ta moast dy't oan it deagean wie foel ús al wat nuver op it dak mar ja, takt is net myn sterkste punt dat dan kinne je der fan in oar ek net al te folle in punt fan meitsje fansels. Doe't wy net folle letter yn Drylst kamen koe Jelmer wer op de bierfyts plaknimme. Ik bin dêrnei in eintsje trochriden nei it nije akwadukt yn de Jeltsesleat. De brêge dêr't wy eartiids faak ûndertroch fearn binne blykt hielendal ferdwûn te wêzen en dêr foar yn it plak is der no in prachtich nij akwadukt makke. Mar by de bou hiene de bouwers net rekken hâlden mei de hichte fan de bierfyts sadat de ploech efkes oer de grutte dyk moast. Op dy dyk mochten de autokes 80 kilometer yn it oere wylst de bierfyts mar in goeie 10% dêrfan helle. It wie dan ek mar goed dat wy de spits noch krekt foar wiene. Nei dizze passaasje bin ik troch riden nei Sleat dêr't wûnder boppe wûnder it fisktintsje al iepen like te wêzen. De flaggen wapperden al en de doar stie iepen dat ik hie al hast de hoop in betiid deltsje te skoaren mar spitigernôch wie allinnich de himmelster der. Dy hat in oere langer wurk hân mei it himmeljen omdat ik har wat fan it wurk hâlden haw mar wy ha wol efkes smûk praten. Doe't de bierfyts úteinlik ek yn Sleat oankaam en der in moai nustje nije fytsers bykamen koe ik foar it earst op it fehikel plaknimme. It begûn yn Sleat fuort mei in dreech smel strjitsje dat de stjoerfrouskeunsten waarden fuortdaalks op de proef steld. Tusken Wikel en Balk waarden wy noch as wynfanger brûkt troch in groepke skoalbern mar omdat ús acht tot tsien kilometer yn it oere dochs wat te min fan it goeie wie bin se ús letter dochs mar foarby flein. Yn Balk krigen wy in ferslachjouwer fan omrop Gasterlân yn de fyts. Dy hat efkes in moai petearke mei ús hâlden foar de lokale radio. Doe't wy wat te bot op de rem trapen waard dit nuveraardich ôfbrutsen trochdat de sjoernalist hast lansearre waard. Uteinlik koene wy de tocht dochs noch wer trochsette. Fanút Balk giene wy lâns de Luts mar dêr wie alles ôfsletten foar autokes omdat se mei de dyk dwaande wiene. Op in pear weiwurkers nei hiene wy dus mar in bytsje publyk. Dat joech fansels de minsken fan Omrop Fryslân al efkes de kâns om ús in stikje te fergesellen. Sa waard der foar ús spannende tillevyzje makke omdat Trevor it oandoarde om tusken opstakels troch te knallen dêr't wy yn it foar net fan tocht hiene dat it passe soe. Flak foar Starum krigen wy noch wat ferkuolling fan in lyts stoartbuike mar it dak en de minsken dy't foar my sieten koene lokkigernôch in soad opfange. Yn Starum wie yn prinsipe myn reis fan hjoed alwer foarby dat ik hie my al ferheuge op in pear sâlte hjerrings fan Doede Bleeker. By oankomst yn Starum haw ik him dan ek fuortdaalks efkes opsocht. Doe't er efkes bûten stie om in sigretsje te smoken haw ik him efkes gewurde litten wêrnei't er yn rap tempo tweintich hjerrings foar ús skjinmakke. Ik soe se eins sels stypje mar hy woe der gjin jild foar ha omdat it foar de goeie saak wie dus dat wie wer bêst genôch. Der fanút geande dat myn ploechje en de opfolgers wol in hjerring lesten hie ik ûngefear ien per persoan mar omdat de opfolgers hast allegear frou wiene bleaune der noch genôch oer dat ik haw my ek de twadde, tredde, fjirde en fyfde mar flink smeitsje litten. Omdat der noch wat romte oer wie op de fyts bin ik noch mar in etappe mei gien. De froulju hiene in fracht bearinneburch ynslein en dat drukte it tempo aardich. Sa hellen wy lang net de topsnelheid dy't wy mei de eardere groep helle hiene mar it wie wol gesellich. Troch de smelle strjitsjes fan Hylpen en yn de drokte by Warkum wie der genôch te belibjen. Us eindoel wie Boalsert dêr't wy in pear oeren letter en in bytsje efter op it strakke skema fan de organisaasje oankamen. Oppenij stie der in frisse ploech klear foar it ein fan de reis. Omdat my ek dizze ploech wol smûk talike en omdat der ek dizze kear efter de bar noch wol in plakje oer wie bin ik oppenij mei de bierfyts mei gien. Fanút Boalsert setten wy ôf rjochting Wytmarsum en sa gong it rjochting Frjentsjer mar wy moasten fansels noch al efkes by Harns del. Fia Kimswert, dêr't wy efkes mei Grutte Pier op de foto gien binne, ferfolgen wy ús reis nei Harns. Dêr hawwe wy de moaiste files ûntstean litten. It wie no wer in bytsje spitstiid en dat betsjutte dat it dreech ynheljen wie foar de weinen efter ús. Wy hiene fansels ús bêste kreften ek al tsien kear opbrûkt dat mei pine en moeite slagge it ús om de brêge oer it Van Harinxmakanaal te bedwingen. Dêrnei wie it eindoel nei lang fytsen yn sicht. Om efkes foar healwei achten wiene wy by de koarnbeurs yn Frjentsjer dêr't Henk Kroes ek krekt oankaam. Tegearre mei dy selde Henk Kroes hawwe wy nei lang eamele te hawwen mei de lokale parkearwachtster de bierfyts parkeard. Hoewol't Kroes de lêste jierren al de noadige kilometerkes op de fyts ôflein hat (û.o fan Wladiwostok nei Skeveningen) makke hy pas hjoed syn debút op in fytskafee. Doe koe it kennisfeest lostbarste yn de Koornbeurs dêr't de sfear goed wie en de omjouwing prachtich...+ 0 - 0 | § ¶Sleat - Starum
Moarn is it dan eindelik safier. Wy sille ús wurkstraf útfiere om sa Kluitman finansjeel te kompinsearjen foar harren ûnfermogen om te provitearjen fan ús grappige studintikoaze filmke fan seis jier ferlyn! Moarns begjint der in ploechje te fytsen op it fytskafee yn Steven de Jong syn thússtêd Snits. De start sil al om 5.00 oere plakfine. Dêrnei giet de rûte fia Drylts nei Sleat. Yn Sleat stap ik op de bierfyts en sa sille wy sjen yn Starum te eindigjen. Dêr sil wy grif efkes by Doede oan wylst ús fytskafee dan wer mei nije gasten fierder sil rjochting Frjentsjer. Google ierde seit dat it ûngefear 102 kilometer is en dat je dat yn 20 oeren rinne kinne. Mei de fyts sil it net folle hurder gean tinkt my mar dat moat fansels al want om 19.30 moat ik yn Frjentsjer opdrave foar de kenniskwis. Jim kin trouwens ek noch meidwaan, sjoch op www.benefyt(s)aksje.nl!Tiid Plak Aksje
5.00 Snits Start Benefytsaksje troch Wed. Joustra & Arno Brok
5.35 Drylts Oankomst bierfyts
6.00 Jutryp Oankomst bierfyts
6.15 Hommerts Oankomst bierfyts
7.25 Spannenburch Oankomst bierfyts
7.40 Tsjerkgaast Oankomst bierfyts
8.00 Sleat Oankomst bierfyts
8.20 Wijckel Oankomst bierfyts
8.50 Balk Oankomst bierfyts
9.40 Riis Oankomst bierfyts
10.15 Himmelum Oankomst bierfyts
10.50 Warns Oankomst bierfyts
11.25 Starum Oankomst bierfyts
12.20 Molkwar Oankomst bierfyts
12.50 Hylpen Oankomst bierfyts
13.40 Warkum Oankomst bierfyts
14.30 Parregea Oankomst bierfyts
15.15 Boalsert Oankomst bierfyts
16.15 Wytmarsum Oankomst bierfyts
16.45 Arum Oankomst bierfyts
17.10 Kimsert Oankomst bierfyts
17.50 Harns Oankomst bierfyts
18.30 Hjerbeam Oankomst bierfyts
19.00 Frjentsjer Oankomst bierfyts
19.30 Frjentsjer Start Fryske Kwis
Grotere kaart weergeven
+ 0 - 0 | § ¶De Laguna is wer rêstich
Sûnt in pear wiken makke myn autoke wat in nuver leven. In skoftke ferlyn kaam ik ta de konklúzje dat de útlaat wat lekte. Omdat myn autoke syn bêste tiid wol hân hat wie ik fan doel om der net mear al te folle jild oan te besteden mar sûnt in pear dagen hinget it achterein fan de útlaat sawat op de grûn. Omdat ik hjoed in frije dei hie bin ik mar efkes nei de garaazje west hjir yn it doarp. Wiebe, de garaazjehâlder, hie in misstapke makke en siet mei de poat yn it gips mar dochs huppele er flot efkes mei my nei de autolift. Dêr wiene wy al rap efter it probleem. Krekt efter de tuskendemper wie de útlaat finaal dwers trochmidden. Ik wie efkes bang dat dit in djoer grapke wie mar it foel ta. Wy ha in nije tuskendemper besteld en dy is de middeis noch ôflevere. Om 13.00 koe ik myn autoke wer ophelje. De buorlju kinne no moarns wer in oerke langer lizzen bliuwe want it measte lûd is no wer foarby...+ 0 - 0 | § ¶Sinteklaas is ferkâlden
De aksje fan Stifting Warber Fryslân, dêr't ik ek by yn it bestjoer sit, set him yn foar it meitsjen fan in kompakt skiif mei Fryske Sinteklaasferskes. Op de skiif komme stikjes dy't de measte Friezen wol kinne lykas Swarte Pyt gong út fytsen en Sinteklaas ryd op syn hynder mar dêrneist binne der ek al in moai nustje bekende Friezen (BF'ers) dy't dwaande binne foar ús in nij nûmer te skriuwen. Sjonger Meindert Talma is fuort ek mar in studio yndûkt en sa hawwe wy no al in earste demo. Harkje ris nei 'Sinteklaas is ferkâlden' en lit ús ris witte wat jim fan it nûmer fine. It is al wat oars as oars mar wy hiene fan Meindert ek net oars ferwachte fansels...+ 0 - 0 | § ¶Krintsjebrij part III
Goed nijs foar de leafhawwers fan Bessola, krintsjebrij as pareltsjebrij. It is Friesland Foods slagge om it resept fan it produkt dat neffens harren eigen parseberjocht net mear genôch ferkocht waard oer te dwaan oan in biologysk suvelbedriuw út Leusden. Dit bedriuw sil no de goed 900.000 pakken Bessola yn it jier besykje te ferkeapjen. Dat der noch genôch belangstelling foar is mei dúdlik wêze want de supermerken wolle it mar wat graach wer yn it assortiment opnimme.+ 0 - 0 | § ¶Feestje sûnder my
De strjitten yn de Rottefalle en it nije sportkompleks binne juster offisjeel iepene wurden. It is oars wol hast allegear bûten my omgien. Troch myn avontoeren yn Grins dy't oant 9.20 duorren wie ik pas om in oerke as 15.00 yn it doarp werom. Doe hie der al in grut part fan de iepening plakfûn. Wol wie der op it sportfjild noch wakker drokte. Der koe tennist wurde op it nije tennisfjild en der wiene ferskate sponsorlopen en oare aksjes om de lêste sinten lyk te krijen. Ek wie der in fleisskroeierij en in grutte feesttinte. It feest sels haw ik net mear meimakke want ik wie min en wurch. Ik leau dat de jierren begjinne te tellen. Ik wurd âld!+ 0 - 0 | § ¶Hoelang bekomme?
Fannemoarn lei ik om 9.20 op myn matsje yn it hûs fan Jarig yn Grins. Ik wie dêr hinne rûn omdat it moai waar wie, ik gjin sin hie om allinnich in taksy te beteljen en ik koe sa moai efkes de drank der wer út rinne. Al foar tolven wie ik wer wekker. Doe't ik noch lei hie ik it idee dat ik sa wol nei hûs ride koe mar doe't ik efkes letter stean gie die bliken dat de drank dochs noch net hielendal útwurke wie. It is altyd lestich om te bepalen wannear't je no wer yn in auto stappe meie. Wy hawwe foar alle wissichheid earst noch mar efkes in skodde molke jierdbei helle. Dêr knapt in minske fan op. In bytsje kâld en in bytsje fet yn kombinaasje mei wat sûker en focht docht it goed by in kater. No foel dat mei dy kater genôch mei. Ik hie net enoarm folle sûpt mar ôfrûne op hiele flessen siet it tichter by in folle as by in legen ien fansels. Kertier foar trijen haw ik dan dochs mar wer besocht my nei de Rottefalle te krijen. Op dat stuit hie ik sels it idee dat it wol wer koe. Ik wit net at in blaastest posityf foar my útpakt hie mar gelokkich sil ik dêr ek nea efter komme. Ik bin feilich en sûnder problemen thús kaam yn elk gefal...+ 0 - 0 | § ¶Kij ite foar in kei-jûntsje
Op de lêste dei fan de keiwike hie Jarig my, en noch in moai nustje oare lju, útnoege foar in fleisskroeierij. Jarig hie it hiele Gildehús hast leech kocht sa die bliken mar der kamen dan ek wol in man as twintich. Om der foar te soargjen dat wy net te lang op fleis wachtsje moasten hie ik myn Barbecook ek mar efkes yn de auto laden. Nei dat elkenien efkes yn de walm fan it AD fan Jarig siet koe it fleisskroeien begjinne. It wie hiel leuk om in moai nustje âldleden wer ris te sjen. Doe't wy letter op de jûn nocht hiene om it Frysk folksliet te sjongen fûn Jarig it tiid wurden om nei de soas ôf te setten. Wy hawwe in limûsine komme litten en mei fiif man waarden wy keurich foar de doar fan Bernlef ôfsetten. Op de soas wie it net hiel drok mar wol gesellich. Wat my fuort opfoel doe't wy binnen kamen wie in megagrutte Stef stuntpiloat. Durk hie wer ris syn bêst dien en mei in rutewiskermotorke yn it midden fleach Stef syn rûntsjes. Dêrby sloech er dizze kear gjin fysjes om mar koe er tsjin bearenburchromerkes oan tikje. Yn dat gefal wie it fansels tiid om te sûpen. In eintsje fierderop stie in spikerbar besteande út in stik as fiif seis stikjes beam. Dêr koe manmachtich op de spiker huft wurde. Ek op de soas wiene de noadige âldleden oanwêzich al wie myn generaasje wol in bytsje ôfwêzich. Dy bin fansels allegear bern oan it krijen, meitsjen as opfieden. Ik haw my yn elk gefal poerbêst fermakke. Oan it ein fan de jûn hawwe wy ek noch efkes twa fleskes bearenburch fuort phúft. Dat gie noch wûnderbaarlik goed al hiene myn buormannen dêrtroch wat minder gelok fansels. It is meastentiids ek net ferstannich om lofts fan my sitten te gean (tip). Om 9.20 koe ik my fijn deljaan yn Jarig syn wenkeamer. It wie doe al wer ljocht. It wie in prachtich jûntsje mar ien ding fûn ik wol spitich. Plestik glêzen drinke foar gjin meter. It wie dan ek mar goed dat der hjir en dêr noch wol in gleske te skoaren wie. De rytsjes hiene dan ek al rap plak makke foar de Joustra sânomheech. Oare kear mar wer gewoan yn glês SB, dat lûkt grif mear nije leden...+ 0 - 0 | § ¶Fan auto nei fytsparkearplakje
Doe't wy krekt ús hûs kocht hiene die ús foartún, dy't doe noch fol mei stoepetegels lei, bynammen tsjinst as parkearterrein foar de memmen dy't harren bern by de skoalle kwyt woene. Sûnt dy tiid is der in protte feroare. Wy hawwe de tegels no efter it hok lizzen yn de foarm fan in terras. Der rint no allinnich noch in lyts klinkerpaadsje nei de foardoar ta. Ynkoarten sille wy de foartún noch fierder ôfskûtelje mei haachjes en dan is it foar de postboade fansels net sa ienfâldich mear om mei de fyts nei de doar ta te kommen. Fan dêr dat ik ús heit frege hie om in moai fytserekje te meitsjen dat wy dan foar by de stoepe pleatse kinne. Juster kaam er it bringen en it wie wer in pronkstikje. Wy bin grif ien fan de weinigen yn de Rottefalle mei in folslein fan rustfrij stiel makke fytserekje. Ik sil mysels ynkoarten mar wer ris oan de skeppe sette...+ 0 - 0 | § ¶Thaeke docht wer oan sport
Tidens de Simmerfakânsje lei it plúmkejeien efkes stil mar hjoed koene wy wer los yn sporthal De Drait. Troch omstandigheden moast ik hjoed de trening noch efkes oerslaan mar ik haw dochs yn myn nije BCD pakje efkes aktyf west yn de hal. Op in gegeven moment foel it my op dat der in nij nuver stippellyntsje lutsen wie yn de hal. Doe fertelde myn tsjinstander dat der in folslein nije flier yn lei. Foar de fakânsje wie de flier noch grien west, no is dizze ljochtblau wurden. Dat wie my dus noch net iens opfallen. No ja, blau is fansels ek mear ús kleur dus wat dat oangiet is it wol in foarútgong tinkt my. De opkomst wie net sa hiel grut mar ik haw dochs efkes lekker om my hinne slein. Mochten jim yn de omkriten fan Drachten wenje en nocht hawwe om tsjin in plúmke oan te rossen dan kinne jim op 6 septimber nei ús iepen dei ta. Ik sels bin der dan net want ik moat dan keatse yn Sint Nyk fansels...+ 0 - 0 | § ¶Griene streek is hûndert!
Alle dagen wer binne der fan dy sleauwe riders op de dyk dy't net troch hawwe dat wannear't der in griene streek yn it midden fan de dyk leit dit oanjout dat je op in autodyk ride. Dat betsjut dus ek dat je dêr dan hûndert kilometer yn it oere meie. Op de fjouwerbaans wâldwei is it faak noch wol dúdlik dat jo dêr hûndert ride meie mar ek tusken de ôfslach Wergea en de Werpsterhoeke is it gewoan hûndert kilometer yn it oere. Lokkigernôch meitsje se dêr no ek in griene streep. Ek tusken Goutum en Deinum is it útsein by de Rotonde gewoan hûndert. Tusken Deinum en de snelwei Ljouwert Harns is it trouwens ek hûndert al ha se dêr noch gjin griene streek lutsen. Ik ergerje my alle kearen wer oan dy kloateautokes dy't foar filefoarming soargje troch braaf tachtich te riden. Tachtich is prachtich mar net lâns in griene streek...
+ 0 - 0 | § ¶Keiwike
Ik hie fansels al in hiel soad reklame makke foar de keiside fan myn freon Durk mar faaks is it wol sa leuk om ek sels efkes del te kommen. No sil ik net fuortdaalks alle keiberntsjes skrikke litte dus de earste fjouwer dagen is de soas fan Bernlef noch Thaeke-frij. Freed moat dan mar efkes de dei wêze en sjoch wer in kear yn Grins. Eartiids wie it altyd de sneons fan de keiwike dat de âldnuten efkes delkamen mar omdat de keiwike no in midwike is moat wy as wurkjenden it mar mei de oars dochs ek frijwat rêstige freedtejûn dwaan. Elkenien dy't sin hat om my in buorrel te drinken is dus by dizze fan herte útnoege op freedtejûn yn de Pizel (túnstrjitte 22 Grins). Stean jim leaver net mei my oan ien bar dan is der op de dûnsflier ek grif noch wol wat plak...+ 0 - 0 | § ¶Rottefalster ûndernimmers ha it dreech om de kop boppe wetter te hâlden
It is al wer in pear wykjes ferlyn dat de ûndernimmersferiening RIHA fan de Rottefalle in syldei op de aginda setten hie. Doe koene wy fansels noch net in foarspelling krije oer it waar fan hjoed. Foar it fleisskroeien hie Pyt hjoed eventueel noch wol in seis jaan kinnen want it wie droech en net kâld mar foar it silen waaide it dochs wol frijwat hurd. Der giene dan ek mar twa boatsjes it mar op. Earst efkes besykje op de motor en dêrnei mei allinnich it fokje. Undernimme is sa no en dan wat risiko nimme fansels dat sa wiene der trije net neier te neamen manlju dy't mienden dat se wol mei fol túch sile koene. De koppen stiene op it mar en de froulju dy't allegear by my oan boat sieten wiene al wiet genôch dat foar ús siet der net folle oars op dan wat hinne en war dwarrelje op it fokje. Wy ha net moai syld mar we ha wol efkes moai fuort west. Yntusken fleagen de trije manlju machtich moai troch it mar en ik wie wol in bytsje oergeunstich. Doe't der in donkere loft oankaam bin wy mar nei de kant gien. Krekt op tiid foar de bui wiene wy wer oan lân. De manlju moasten har mar rêde. Doe't wy in heal oerke letter wer ris oer de mar seachen koene wy op wat surfplankjes nei gjin seiltsje mear sjen. Foar de grap sei ik noch dat se wol ris om lizze koene. Efkes letter like it yndie sa te wêzen. In hiel ein ûnder yn de mar dreau in foarmke wat wol wat op in sylboat sûnder mêst like. In pear minuten letter siet der ynienen ek wer in mêst op it foarmke. Omdat elkenien de tillefoan op de bar lein hie koene wy nimmen berikke dat op it lêst bin ik der dochs mar efkes hinne fearn. Doe die yndie bliken dat de manlju slach oer de harsens gien wiene. It nuverste wie noch dat se omkipt binne oer de hege kant. It roer wie stikken en doe't se op in golf kamen kipten hja ynienen om. Nei't elkenien wer droege klean oan hie koene wy by de barbekjoe noch wer wat opwaarmje. Dy barbekjoe fan paviljoen de Leyen wie trouwens neat mis mei. Hearlikke salades en genôch, wat sis ik, fierstentefolle fleis. Oare kear meie der noch wol wat mear ûndernimmers mei dwaan fansels mar dizze jûn sil wy yn elk gefal net rap ferjitte...+ 0 - 0 | § ¶Batman begjint
Eartiids seach ik al nei de âlde pearse batmansearjes en ek de earste films wiene frij aardich. No draait op dit stuit de Dark knight yn de bioskopen en dy krijt prima resinsjes. Doe't ik hjoed dan ek by de C1000 wie yn Dronryp hoechde ik dan ek net lang te twiveljen en sa seach ik fannejûn tegearre mei de freondinne yn ús eigen priveebioskoop Batman begins. In realistyske film, foar safier't soks mooglik is, oer it ûntstean fan Batman. Dizze film hat ús de folle twa oeren wekker hâlden en it is seker in oanrieder foar dyjinne dy't dit sjenre wurdearje kin. In moai soad aksje mar ek wol wat djipgong. Ynkoarten mar ris nei de Dark Knight ta dus...+ 0 - 0 | § ¶Bernlefspam
Jim kinne der fansels al lang net mear omhinne. Op 22, 23 en 24 augustus sille in moai nustje Bernleffers de alvestêdetocht fytse mei in fytskafee. Op ferskate plakken hingje al de poasters dy't ik okkerdeis hjir ek al pleatst haw. Dêrneist wurdt ek it wrâldwiid web goed brûkt foar de noadige Bernlefspam. Ik sels, mar ek oare Bernleffers yn aksje, bin drok dwaande om op alle msn nammen de side www.benefytsaksje.nl te pleatsen. Op al ús hyvessiden stiet it yn de agenda. Ik haw der persoanlik foar soarge dat it ek yn de aginda stiet fan myn âlde skoalle de RSG yn Snits. Dêrneist stiet it no ek by Praat mar Frysk op de hyvesside en sa ek noch in moai nustje oare hyvessiden. Ik hoop yn de keiwike ek noch in pear echte poasters te regeljen sadat ek de Rottefalsters en de besikers fan de Pôledei mei dy kant op kinne. Dus 22, 23 mar bynammen ek 24 augustus efkes nei de Benefytsaksje ta. Spamt it foart, spamt it foart...+ 0 - 0 | § ¶Hitte foar it fjoer
De mannen fan Foppe de Haan hawwe hjoed yn harren earste wedstryd tsjin de Nigerianen de brilstân op it skoareboerd stean litten. Neffens Foppe wie it te hyt foar ús balskopperkes en koene de Nigerianen dêr faaks wat better oer. At dat mar goed komt tink ik dan want it Olympyske fjoer moat ommers noch ûntstutsen wurde. Dat bart moarntemiddei pas om 14.00 Nederlânske tiid. It is dêr dan al wer tsjin de jûntiid oan. It is in bytsje nuver fansels, dat de fuotballers al begûn binne wylst de spullen noch net iepene wurden binne. It hie faaks better west en iepenje de spullen in pear dagen earder. Dan hiene ek alle atleten efkes mei rinne kinnen yn de flaggeparade. Is der trouwens al bekend wa't de Nederlânske flagge nei binnen tôgje moat? Fan dizze kant fan it net winskje ik alle sporters mar fansels benammen ek de Fryske sporters en kootzj in soad medaljes ta. En dat se mar fan goud wêze meie...+ 0 - 0 | § ¶Kenniskwis
Omdat ik de beroerdste net bin en omdat Klaas Yde sa oantrúnt haw ik my hjoed ek mar oerhelje litten om mei te dwaan oan de Fryske kenniskwis yn Frjentsjer. Dy aksjes foar ús Kameleonrjochtsaak bin wol tige handich om myn webloch wat te foljen yn dizze barre komkommertiden. Hjirby daachje ik dan ek elkenien út om my te ferslaan wat de Fryske kennis oanbelanget.
+ 0 - 0 | § ¶Staveringshifker op Fjoerfoks
Ik wie al in leafhawwer fan de swalker Fjoerfoks (firefox) omdat dy yn it Frysk útjûn wurden is mar no is ek de staveringshifker ymplementearre. Dat betsjut dat wannear't ik mei fjoerfoks earne in formulierke ynfolje en dêr in Fryske staveringsflater yn sit dit automatysk oanjûn wurdt mei in read streekje ûnder it wurd. Sa kin ik dus no noch ienfâldiger myn webloch bywurkje omdat de measte stomme skriuwflaters fuortdaalks opfalle. In hiele aardige fynst fansels. It ienige neidiel is dat wannear't ik no wat skriuwe wol yn in oare taal as it Frysk de helte fan myn wurden in reade streek krijt. It is trouwens wol opfallend dat de Fryske staveringshifker yn dizze tekst de wurden 'Fjoerfoks', 'Firefox', 'Staveringshifker' en 'Webloch' net as geef Frysk beskôget. Ek 'Ymplementearre' krijt trouwens in streekje...
+ 0 - 0 | § ¶Benefytskonsert 24 augustus Snits
De folsleine ynfolling fan it benefytskonsert foar de slachtoffers fan de Kameleonrjochtsaak is no bekend. In prachtige samling fan Fryske topmuzikanten en sfearmakkers stiet op de poaster. Ik kin se wol neame mar ik lit jim de poaster wol efkes sjen. Dat liket my better ta. Dus freontsjes en freondintsjes, allegear nei Snits, net foar in wike mar foar in sneintemiddei. O en Pigmeat docht ek mei...