+ 0 - 0 | § ¶Pannekoekhúske Amsterdam
Mei fjouwer frijkaartsjes fan ús wurkjouwer Royal FrieslandCampina Domo op sek mocht ik hjoed mei twa oare wurknimmers en in soantsje fan ien fan de oare twa wurknimmers nei Ajax-FC Hearrenfean. Dat FC stie op it kaartsje mar dat wie in flater fan de Amsterdammers fansels. Ik mocht earst noch efkes wurkje oant 16.00 en omdat ik doe dochs al yn Dronryp wie bin ik fuort mar nei Harns riden om dêr Irma en Ramon op te pikken. Ludo wie al yn Dronryp ynstapt. De navigaasjeset liede ús prachtich troch de nijbou fan Harns hinne en sa wiene wy rap teplak. Mar omdat de wedstryd pas om 20.45 begûn hoechden wy ús net te haasten dus earst mar wat drinken. Even foar fiif oere kropen wy yn de Laguna en mei de navigaasjeset op Amsterdam Arena liede dizze ús rjochting ôfslútdyk oer de nije N31. It ride moai oan dat om in oer as seis wiene wy al yn de omkriten fan Amsterdam. Wy hawwe dan ek earst noch mar efkes in Mc Donalds opsocht. Dêr siet Ramon, tsien jier âld en Ajax fan, mei grutte eagen te sjen nei my, fjouwerentritich jier âld en foar Hearrenfean. Hy hie mar in lullich happy meal dêr't dizze man lang net happy fan wurdt fansels. Nei fjouwer hamburgers fan formaat en in bak patat koene wy wer fierder. It waard al tsjuster doe't wy ûnder it IJ troch riden en it wie dan ek mar goed dat de frou fan de navigaasje ús it paad wiisde. Dat is it neidiel fan dy lûdsmuorren. Jo sjogge neat mear fan de omjouwing en alles liket op elkoar. Uteinlik riden wy rjocht op de Arena ôf en omdat wy frijkaartsjes hiene foar de garaazje koene wy dêr ek sa nei binnen ta. Wy wiene noch moai op tiid want der stiene mar fjouwer auto's tusken ús en de slachbeam. In oerke letter wie dat gâns oars. Yn de enoarme parkeargaraazje fûnen wy al rap in plakje. Wy moasten wat langer sykje om in útgong te finen mar doe stiene wy ek fuortdaalks foar de Ajaxwinkel. Dêr is de Feansjop neat by want dizze winkel hie de omfang fan in lytse supermerk. It wie dêr ek smoar drok en ús ienige Ajaxfan moast fansels in pear Ajaxartikels hawwe. Myn Hearrenfeanhimd kaam krekt mei ien pompeblêd boppe de kraach út mar ik hie dat net troch op dat stuit. Ik fûn it dan ek al wat nuver dat men my sa oanstaarde. By de útgong moast ik troch de kassa mar ik hie neat kocht. Op de fraach oft der neat foar my by wie haw ik mar earlik antwurd jûn. It is wol allegear moai guod mar der stiet oeral Ajax op! Doe nei bûten dêr't de lawaaierige kearn ûnder plysjebegelieding it stadion binnen kaam. Ik tocht earst dat it de F-side wie mar dat binne dochs wer oaren sa die bliken. Sy songen en sy hiene spandoeken mei en it wie in hiele aardigheid al wie de plysjebegelieding faaks wat oerdreaun. Doe mar nei binnen ta want wy hiene ek kaartsjes foar de fergese bar. Wy waarden as VIP net fûljeard mar de haadsteward seach wol myn Hearrenfeansjaal út de bûse hingjen. Dy mocht ik net om ha en sy woe him ôfnimme. Ik frege har wêrom't sy dy ôfnimme woe want der stie nergens dat jo gjin sjaaltsje mei hawwe mochten it stadion yn. Nei dat ik tasein hie dat ik 'm net om dwaan soe mocht ik der dochs yn. Oer myn mouhimd hie se neat sein dus yn it stadion dochs mar de trui los. Yn it stadion mochten wy in pear roltreppens op en doe kamen wy op de tribune telâne. In alleraardigst plakje tusken de reservebank en de hoekflagge yn op tij sântjin. It wie noch leech yn it stadion dus wy giene earst mar nei de bar. Ik wie fansels de Bob dus kola foar my. In pear kola's letter bin wy nei de tribune gien. It foel my op dat it frijwat stil wie yn de Arena. Ik koe de Feanfans soms hearre, de F-side hearde ik pas neidat Ajax in reade kaart krige. Luinge koe net in soad goed dwaan by de Amsterdammers hoewol't er ús ek noch in strafskop ûnthâlden hie. Syn mem koe it ek net goed dwaan want dy krige it âldste berop fan 'e wrâld nei har holle slingere. By it Hearrenfean wie soks genôch west foar in stadionferbod mar yn Amsterdam is soks hiel normaal sa die bliken. Doe't wy de wedstryd ek noch mei 0-1 wûnen wie it fansels hielendal feest. It wie ek gjin goed fuotbal wat wy sjoen hiene mar wy hiene wol terjochte wûn. Yn it fergees drinken paradys hawwe wy noch efkes wachte oant de files oplost wiene. Dat koene wy moai sjen omdat wy boven de yngong fan de garaazje sieten. Der kamen hieltyd minder minsken by de bar en de minsken dy't der noch wiene hiene in heech gehalte oan Frysk bloed. Om in oerke as 23.00 mochten der ek noch twa spilers fan Ajax opdrave om de sponsors tekst en útlis te jaan. Troch it minne resultaat hiene hja dêr net in soad sin yn die bliken. Wol woene hja noch efkes mei Ramon op de foto. Dêrnei binne wy mar wer ôfset nei de auto. It wie noch in hiele toer om dizze te finen omdat wy op de ferkearde ferdjipping sochten. Nei't wy de garaazje útriden wiene wy ek samar wer yn Fryslân. Ramon hat de hiele weromreis sliepen en dat wie mar goed ek. Hy hie ferlern dus de weromreis wie lang sa leuk net as hinne fansels. Om 02.00 wie ik wer yn de Rottefalle. Doe haw ik de wedstryd noch in kear op tv sjoen. Omdat de wedstryd yn de reguliere útstjoering noch mar krekt dien wie moast ik noch wachtsje op de neibeskôgings oant alle oare wedstriden west wiene. Dus om 3.00 lei ik pas op bêd. De emoasje fan de suporter dy't mei Marco yn diskusje gie hie ik yn it stadion net sjoen. Moai dat de tv dêr noch efkes omtinken oan joech. Wer gjin kampioen Pannekoek!+ 0 - 0 | § ¶Moaie oplossing foar de Jouwer
Ik liket der op dat der in moaie oplossing komt foar it knooppunt De Jouwer. In soad nij asfalt en op- en ôfritten dêr't je mei faasje oerhinne skeure kinne. Mar rap útfiere fan de sinten fan dy te djoere trein tinkt my. En meitsje der dan fuort ek in akwadukt by ûnder de Skarsterrien...
+ 0 - 0 | § ¶In minder goeie lotterij
Oppenij komt de staatsloterij yn opspraak. Earder waard al dúdlik dat sy by de lotterij ek de net ferkochte nûmers meidwaan lieten. Wannear't in priis foel op in net ferkocht nûmer dan wie dat dus gewoan winst. Letter soe dit feroare wurde mar no docht bliken dat troch in 'flater' der oppenij 800.000 lotten meidien hawwe dy't ner ferkocht wiene. Dat betsjut dus dat der sa'n 16% fan al it lotterijjild net útkeard wurden is. It liket my dan ek gaadlik dat it jild wat op dy lotten fallen is noch in kear ferlotte wurdt ûnder de dielnimmers fan doe. Sa fier sil it wol net mear komme omdat in hiel soad lotten al ynlevere binne fansels. Mar it bliuwt in frjemde lotterij. It wurdt tiid dat dy lotterij gewoan krekt as de lotto live dien wurdt op tv ynstee fan mei in kompjûterke...+ 0 - 0 | § ¶In goed lot
Fannejûn waard bekend dat it Hearrenfean yn de kwartfinale fan de beker thús spilet tsjin Nec. Dat is fansels in hiele aardige lotting. Nec is net de ienfâldigste tsjinstander mar it is ek net de dreechst mooglikke lotting. Slimmer hie it west wannear't wy út nei Twente as Alkmaar mochten. Om de beker te winnen moatte jo fan elkenien winne kinne fansels. Mar lit AZ no mar ús tsjinstander wêze yn de Kuip. Mochten hja dan lânskampioen wurde dan hawwe wy yn elk gefal Uefakup fuotbal sekersteld...+ 0 - 0 | § ¶Ljipaaisykjen per sms?
De ien as d'oare malloat hat no betocht dat ljipaaisikers in mobile tillefoan mei hawwe moatte at sy oan it ljipaaisykjen binne. By elts aaike wat fûn wurdt moat der dan in sms'ke stjoerd wurde nei in bedriuw yn Gelderlân. Wannear't de 7000 tastiene aaikes fûn binne krije alle rapers in sms dat se net mear sykje meie. No liket dit fansels in hiel aardich systeem mar wetterticht is it fansels lang net? It is hast net te kontrolearjen oft in aaisiker wol sms't hat foar de aaien dy't er by him draacht. Ek oan de kant fan de Marianne Thiemes is der fraude mooglik. Stel no dat de faunabeskermers op dei ien 7000 sms'kes ferstjoere sûnder dat hja in ei fûn hawwe?+ 0 - 0 | § ¶Meismokende bern
Yn neifolging fan it ferbod om te smoken op it wurk, en dus ek yn kroegen wat foar guon minsken in wurkplak is, soe it de minister siere wannear't der ek in ferbod komme soe op it smoken yn de omjouwing fan bern. Sa soe in ferbod op it smoken yn in auto dêr't ek bern sitte fansels net ferkeard wêze. Minister Klink fynt dat allinnich "minder passend en net proporsjoneel". Hy wiist der fierders ek op dat net smoke hyltyd mear de omgangsfoarm wurdt yn Nederlân. Ik sjoch persoanlik net yn wat dy sjochwize mei it ferbod op smoken yn de omjouwing fan bern, sawol yn de auto as thús, te krijen hat. Miskien wol de minister yn tiden fan krisis de molkko fan de tabakaksijns net alhiel oer boat sette?+ 0 - 0 | § ¶Wy kin wer omheech sjen
Nei de goeie searje dy't de ploech fan Trond Sollied delset hat en de wat mindere searje fan de ploegen boven ús, op AZ nei dan, kinne wy wer omheech sjen. In plak by de earste fjouwer moat sawysa ús doel wêze omdat wy dan gjin play-offs hoege te spyljen mar moaier noch soe it wêze wannear't wy by de earste twa eindigje. Omdat it earste plak wol hiel fuort is soe it Hearrenfean him dit seisoen rjochtsje moatte op it twadde plak wat foarronde Champions League bringt. Nei it ferlies fan Ajax, ús kommende tsjinstander, sit der wer fan alles foar ús yn. It kin noch in moai jier wurde. Marco van Basten is net sa gelokkich. No ek wer in reade kaart dy't je as skiedsrjochter jaan kinne mar net perfoarst hoege te jaan. Ik hie 'm net jûn yn elk gefal. Miskien sit Marco nije wike wol neist my op de earetribune fan de Arena want wy hawwe de kaartsjes fan de Domo krigen...+ 0 - 0 | § ¶In soad drokte
De freondinne hie ús opjûn foar it nijjiershapke fan ús buertferiening mar ik hie net goed yn de kop dat it Hearrenfean jûn ek spylje moast tsjin Roda. Gewoanwei begjint sa'n wedstryd om 19.30 mar dizze begûn al om 18.45 en dus bleau der foar it iten net in soad tiid oer. Eins mocht ik fan de freondinne hielendal net nei it balskoppen ta mar omdat der mear hinne giene koe ik dochs fuort komme. Wy hawwe earst efkes noflik iten yn doarpshûs It Tiksel. In lekkere Hollânske pot mei ferskate stamppotten en goed wat fleis, spek en woarst. Doe't der in moaie laach yn de mage siet koe ik ek noch meiride nei it Fean. Bêst genôch fansels en sa wie ik noch krekt op tiid op de tribune om it Frysk folksliet mei te razen. De wedstryd tsjin Roda like ienfâldich te wurden omdat Roda op in degradaasjeplak stie mar ús ploechje hie it dochs dreech. Troch in aksje fan Beerens en in strafskop benutten troch Pranjic wisten wy doch de trije punten yn it Fean te hâlden. Mei goed wurk fan Vandenbussche, dy't eins man fan de wedstryd wurde moast, wisten wy ek wer ris de 0 te hâlden. Werom yn de Rottefalle wie ik moai op tiid thús en nei Studio Sport haw ik my mar deljûn want ik wie noch altyd wurch fan de ôfrûne koarte nachten...+ 0 - 0 | § ¶Tûzen minsken de Hel yn
Willem de Vries en Wim Brons sille Steven de Jong helpe om oan tûzen figuranten te kommen foar syn nijste film "De hel van '63". As it de beide Noardewynpresintatoaren slagget om tûzen figuranten te regeljen krije sy sels ek in roltsje yn de film. Breidzje josels nei Laplân neame se de aksje omdat fan de moaiste figuranten der fiif útsocht wurde dy't mei meie nei Laplân. No gunne wy it Wim en Willem fansels wol om dy tûzen minsken te regeljen mar wie 999 ek net genôch west. Steven de Jong kin ommers sels ek wol meispylje as figurant as soe hy himsels wer in haadrol tabediele? Ik, "die jongen met die trui", doch yn elk gefal net mei salangt dy v net in f wurdt...+ 0 - 0 | § ¶Ynfalle yn de kompetysje
Doe't ik juster by it plúmkejeien binnenkaam wie it earste wat my frege waard oft ik ek moarn (hjoed dus) ek ynfalle woe yn de kompetysje. Fansels like my dat hardstikkene moai dus mocht ik hjoed alwer opdraven komme yn de Drait. Dêr mochten wy oantrede tsjin de plúmkejeiers fan Stiens. It ploechje dêr't ik yn mei die stie bovenoan en bynammen de Stiensers koene it har noch lestich meitsje. Ik mocht fuortdaalks begjinne mei it hearen enkelspul. No hie ik in frij aardige tsjinstander mar it minste wie noch dat ik in te rappe shuttle pakt hie. Dêrtroch sloech ik hieltyd 5 sintimeter te fier en dat seach myn tsjinstander. Ik waard dus net fan de baan slein mar ik sloech mysels letterlik fan de baan. Yn twa setten ferlear ik dus redelik kânsleas omdat ik nea echt lekker yn myn spul kaam. By de hearendûbel gie it gelokkich al in stik better en sa wisten wy dizze punten al binnen te slepen. De miks wie spitigernôch wer krekt net omdat de tsjinstanders krekt efkes in bytsje skerper wiene. Uteinlik wie it in 4-4 lykspul en koene wy yn de kantine noch efkes neigenietsje fan drinken en bitterballen. It wie in gesellich ploechje dêr't ik wol faker mei op en út wol. Ek lokke my dy kompetysje wol oan op dit nivo. Mar ik haw gewoan net altyd genôch tiid om hiel faak te spyljen...+ 0 - 0 | § ¶Fersliepen
Juster wie ik pas om goed twa oere wer yn de Rottefalle. It mei dan ek gjin wûnder hite dat ik fannemoarn de wekker net goed heard haw. Miskien haw ik 'm ek wol útslein ofsa. Yn elk gefal waard ik om 6.30 wekker en doe hie ik eins krekt de Wâldwei oprolje moatten om op tiid op myn wurk te kommen. No haw ik moarns meastentiids net in soad tiid nedich dus wie ik binnen fiif minuten likegoed wol yn de auto mar op in koart ritsje fan in heal oere falt net in soad tiid mear yn te heljen. Ik haw my dan ek mar deljûn by it feit dat ik te let wêze soe. Uteinlik noch net iens in kertierke dus it foel noch ta. Jûn efkes goed bysliepe sit der ek net yn want jûn moat der al wer plúmkejage wurde...+ 0 - 0 | § ¶Feyenoord - Hearrenfean
Omdat, troch de takomstige nijbouplannen yn Rotterdam, dit miskien wol ien fan de lêste kânsen wêze kin om ris yn de Kuip te sjen, haw ik hjoed mar efkes mei west nei Rotterdam. Omdat ik myn nije Laguna der net oan weachje woe en omdat it kaartsje foar de busreis ek net sa hiele djoer wie haw ik keazen om mei de bus te gean. Hoewol't de wedstryd pas om 20.45 begjinne soe moasten wy dochs al om 16.15 op it Hearrenfean wêze. Mei twa folle bussen setten wy ôf nei Rotterdam. Underweis kaam der immen fan Feanfan del om de Feanfan paskes te kontrolearjen. Dy haw ik noch net dus soe ik eins €10,- bybetelje moatte yn de bus. Dochs bin ik ferline jier by de bekerwedstryd tsjin Ajax al lid wurden allinnich haw ik nea wat krigen. Oppenij haw ik myn gegevens ynfolle en sa hoechde ik dy tsien euro dus net te beteljen. Ek wie der wer in poeltsje makke om de útslach te foarspellen. It mantsje neist my sei dat er it mar belachelik fûn dat der minsken ynsetten op ferlies fan it Hearrenfean. Ik haw him doe mar efkes ferteld dat ik dat sels ek fan doel wie. Ik haw de poele op 1-0 setten foar Feyenoord omdat ik dan by in kut risseltaat yn elk gefal de kosten foar it kaartsje noch werom fertsjinne hie. Fansels hoopte ik net op in oerwinning yn de poele mar it wie mear in foarm fan risikosprieding. Om goed seis oere wiene wy al yn Bodegraven op fytsôfstân fan Rotterdam. Troch gebrek oan files wiene wy dus rom op tiid en sa koene wy dêr earst noch wol efkes nei de Mc Donalds foar in hapke. Mei goed 100 Feanfans bestoarmen wy de pleatslikke Mc dy't op dat stuit in bytsje te min minsken oan it wurk hie. Troch de stress fan safolle Friezen dy't allegear in flinke bestelling opjaan woene gie der fansels ek wol ris wat mis wat dan wer mei in soad gejoel ûntfongen waard. Op in pear lytse frou-freonlikke sprekkoarkes nei gie alles fierder hiel kreas. Doe wie it wachtsjen op ús eskorte. Wy wiene fansels net los fertroud yn Rotterdam en de plysje wie krekt mei de spilersbus ûnderweis. Doe't se werom wiene koene wy sa yn ien kear troch ride nei de Kuip dêr't de bus moai troch in stek ride koe sadat wy gjin kontakt krigen mei de Feyenoorders. Dat wie dus al in stik better as by Ajax dêr't wy tusken de Amsterdammers troch nei ús fak rinne moasten. Yn de Kuip hiene wy in moai Nieuw Noord eftich plakje efter de goal. Om de Rotterdammers in bytsje rêstich te hâlden waard de pleatslikke materiaalman efkes foar de mikrofoan setten. Elkenien moast toch wol efter de klup stean want it legioen wie nedich om te winnen. It slagge mar heal want echt útfluite waarden de spilers net mear mar it legioen hat se ek net echt tajuicht. Gelokkich wûnen wy de wedstryd mei 3-0 en dus hie ik de poele net wûn mar wy sieten no wol by de lêste acht. Alle kâns om yn Maaie dus noch in kear nei de Kuip te gean. De weromreis gie ek wer hardstikke moai ûnder begelieding fan de plysje wiene wy samar de stêd út. Wol wie it fansel al frij let doe't wy thús kamen mar it wie in moaie tocht west en in moai risseltaat. No noch in goeie lotting...+ 0 - 0 | § ¶Nij Frysk wurdboek
In Frysk-Nederlânsk en in Frysk-Ingelsk wurdboek wie der al earder. Sûnt hjoed is der ek in Frysk-Frysk wurdboek. It giet hjirby dus net om in wurd oer te setten nei in oare taal mar om yngewikkelde Fryske wurden better te begripen. De Fryske Akademy hat der tweintich jier oan wurke. Der stean 70.000 wurden yn beskreaun. Aardich is dat der ek nije termen lykas foar de kompjûter yn foar komme. Minister Plasterk hat it earste eksimplaar yn ûntfangst naam. No hiene se dy fansels better it Frysk-Nederlânske boekje jaan kinnen...+ 0 - 0 | § ¶Windows sûnder explorer?
Tsjonge jonge jonge wat in kolder is it wer yn Europa. Microsoft wurdt der fan beskuldige dat se misbrûk meitsje fan harren monopolyposysje omdat se Internet Explorer fergees by Windows leverje. Opera, in oare makker fan swalkprogrammas, fynt dat sy dêrtroch net in fatsoenlikke kâns krije om te leverjen. Straks meie wy in nije auto keapje en moat wy dêrnei earst nei de Kwikfit foar de bannen en nei in oare winkel foar de radio. Wannear't Opera fan betinken is dat sy better binne as Internet Explorer dan moatte sy dêr mar wat mear reklame foar meitsje liket my...+ 0 - 0 | § ¶In oare jierdei
Eartiids wiene feestjes altyd leuk omdat je dan lekker ûnder it genot fan in buorrel mei elkoar yn hegere sfearen kamen. Tsjintwurdich binne feestjes oars. Al myn freonen en freondinnen wenje tsjintwurdich yn Grins of troch it hiele lân hinne. Dat betsjut dus dat der Bobt wurde moat en dat der dus mar in ferhipt lyts bytsje alkohol skonken wurde kin. Op 'm sels net slim mar it feestje wurdt der wol hiel oars fan fansels. En dat is efkes wennen. Yn earste ynstânsje hawwe wy út iten west by de Wokchinees yn de Pein. Dat wie hiel gesellich allinnich moast Wouter my sa noadich wer in Legodinkje jaan dus haw ik my dêr earst mar efkes op útleeft. By de Pein koene wy ús wer lekker folstopje mei waarm fleis en it wie gesellich. Doe yn karrafaan op nei de Rottefalle. Der kamen ek noch in pear gasten by en sa hawwe wy wol efkes moai sitten mar it wie dochs in bytsje suffer as oars. Om in oerke as tolve wie it feestje dan ek frijwat oer. Doe stapte elkenien wer yn de auto en dat wie it. It moat dus allegear noch in bytsje wenne, sa'n feestje. Miskien moat ik oare kear wat mear lokalen útnoegje. Miskien moat ik ek mar gewoan akseptearje dat ik âld wurd!+ 0 - 0 | § ¶In bytsje jierdei
Hjoed wurd ik al wer fjouwerentritich jier âld. Mar in momint om dat te fieren is der hjoed net echt by dus dat moat dan moarn mar efkes. Wêrom al dy drokte sille jim tinke? No ik haw earst gewoan nei myn wurk west dêr't ik elkenien op oerdreaun folle apeltaart traktearre haw. Ik mei sels altyd wol in flinke hoeke dus ik hie gewoan de taarten yn fjouwer stikken ferparte en dus moast ik 5 apeltaarten hawwe. It die bliken dat net elkenien in fatsoenlik hoekje woe dus waard it mes der gauris yn set om de stikjes wat draaglikker te meitsjen. Nei myn wurk kaam ik thús dêr't ik it iten klear makke foar my en de freondinne mar fuort nei't wy it op hiene mocht ik al wer yn de auto want hjoed moast it Hearrenfean tsjin Feyenoord spylje. Dat wy fansels sawysa al in moaie wedstryd dy't ik perfoarst net misse woe mar no mei it ûntslach fan Verbeek wie it allegear noch moaier fansels. Moai op tiid, rûm in oere foar de wedstryd draaide ik by it Hearrenfean it klaverblêd op. Dêr begjint dan meastal de file en dat wie no net oars. Troch de stopljochten by de ôfrit by de Mc Donalds skarrelje ik dan altyd stadich troch en op it lêst kin ik dan ynfoege út de baan fanôf de Jouwer. No gie it allegear wat minder flot as oars. Der kaam gjin beweging yn en ek de stream neist my bleau mar stean. Soe der wat bart wêze? Net folle letter makken blauwe en giele swaailampen dúdlik dat der wat oan de hân wie. It duorre mar en it duorre mar en wylst seach ik ek noch dat guon aso's fia de lofterbaan foardrongen. Ik haw altyd soks fan moai efteroan slute mar de patserbakken triuwe 'm der altyd wol op it lêste momint tusken fansels. No ja, nei in goed oere koene wy stadich wer fierder. Doe mocht ik fan de plysje net rjochtút nei myn fêste parkearplak mar ik waard by de Mc Donalds rjochtsôf stjoerd. Noch fierder fan it stadion ôf wylst de wedstryd al op it punt fan begjinnen stie. Doe bin ik mar in blokje omriden by it motel lâns en sa krige ik dochs wer in plakje yn myn fertroude strjitte. Mar doe wie it noch wol hast in kertier rinnen nei it stadion. Doe't ik it stadion yn sicht krige hearde ik de minsken al razen foar Gert-Jan Verbeek. Op it parkearterrein dêr't men Thialf bouwe wol barste it stadion út yn gejuich. Wy stiene al mei 1-0 foar troch in goal fan nije oanwinst Victor Elm. Lekker is dat, hawwe jo de jierdei en dan bart der soks. No ja, yn it stadion koe ik ûnder it genot fan in mingel kola wer in bytsje by sinnen komme. It Hearrenfean wie fansels folle better as de 'Sakkefullers' út Rotterdam mar Das Fantoom makke dochs de 1-1 út neat. Doe waard it wer efkes spannend. Ik kaam ta de konklúsje dat wannear't Makaay in blessure oprinne soe dat dan Fantoompine hite soe. It barde lykwols net al makke it Hearrenfean de wedstryd wol yn styl ôf troch mei 3-1 te winnen. Omdat ik jierdei wie soe ik rap nei hûs om sa noch in momint tegearre mei Aetsje te wêzen mar op de hoeke fan ús stadion sammelden de Feyenoordfans harren om dêr hun eigen bus tsjin te hâlden. Dat wie nijsgjirrich dus ik haw dêr efkes sjoen. Ik tocht dat se de spilers opwachten om harren efkes de wierheid te sizzen mar letter die bliken dat se de bus krekt sa lang tsjinhâlde woene oant der in gesprek west hie mei tal fan spilers. De Feyenoordfans wiene fierder frij rêstich en it wie moai om te sjen hoe't se foar harren klup en harren âldtrener opkamen. De 'sakkefullers' ieten ûnder it fuortriden rêstich harren broadsje op. Nei't de bus fuort gien wie bin ik ek mar ôfsetten. De jierdei wie yntusken hast oer...+ 0 - 0 | § ¶Alvestêdetocht no ek keninklik
Nei FrieslandCampina en de PC is no ek de alvestêdeferiening keninklik wurden. It docht wol bliken dat de Oranjes it goed foar hawwe mei ús provinsje. Willem Alexander hat yn it ferline de tocht sels ek al ris riden dus dat jout noch in ekstra stikje glâns oan dizze titel. It wurdt yntusken hast wol wer ris tiid foar in tocht...+ 0 - 0 | § ¶Gert Jan Verbeek fuort by Feyenoord
Twa dagen foar de konfrontaasje mei syn âlde klup hat Feyenoord Gert-Jan Verbeek dien jûn. Der wie gjin fertrouwen mear by de spilers en dat net allinnich, se hawwe him de poat ek flink dwers setten. It machtsspultsje fan de goed betelle spilers tsjin de (goed betelle) trener dy't harren stevich oanpakke woe hat lykas hast altyd de skealje wer yn it foardiel fan de spilers trochslaan litten. Verbeek hoecht him foarlopich gjin soargen te meitsjen. Dy krijt wol genôch jild mei en der sil grif wol wer in oare klup wêze mei minder ferwende spilers yn de seleksje. Yn elk gefal kin Gert-Jan no freed gewoan wer foar it Hearrenfean wêze. De ferwende mantsjes krije it freed noch dreech want se spylje net allinnich tsjin it Hearrenfean mar ek noch ris tsjin harren eigen legioen dat folslein efter Verbeek stean bliuwt, wêrfoar hulde!+ 0 - 0 | § ¶Stikkerboat
Nei it kenteken is der no wer in oar middel om boatsjeminsken te pleachjen. As it oan âld-steatssekretaris Gabor fan Natuerbehear leit farre alle boatsjeminsken aanst mei in stikker op 'e boat. Mei dy stikker betelje se dan in lanlike heffing dy't keppele is oan de oerflakte fan de boat. Lanlik soe dat 45 miljoen euro opsmite. Al it brêge- en slúsjild wurdt ôfskaft. Oerheden wurde dêr dan foar kompensearre. No is de fraach fansels, op hokker hichte wurdt dat oerflak bepaald. Is dat op it breedste stik fan de boat as faaks it breedste stik boppe de wetterline? Ik kin my bygelyks situaasjes yntinke wêrby't in sylboatsje dat skean sylt omdat it hurd waait mear opperflak ynnimt dan in sylboatsje dat stilleit. Mar wannear't je de boat net op tiid leech skeppe binne der ek situaasjes mooglik dat allinnich noch de mêst boppe wetter útkomt. Soe immen mei in dúkboat allinnich hoege te beteljen foar it oerflak fan syn periskoop en hoe sit it eins mei faarauto's? Moatte dy no straks in kenteken op de dyk hawwe en in stikker op it wetter? Foarlopich stel ik myn bestelling fan de nijste fleantúchdrager noch mar efkes út. Al is it fansels mei sa'n grutte boat ek dreech kontrolearjen at de stikker der wol as net op sit...
+ 0 - 0 | § ¶Vlemmix klúnt de alvestêdetocht
De altyd like mediageile Johan Vlemmix hat it yn de plasse helle en gean de alvestêdetocht folslein klunend ôflizzen. Dat is wol efkes oare koek dan de fytstocht fan Brandsma in wike earder fansels. Fansels docht Vlemmix it net yn ien dei want dat soe wat te folle fan it goeie wêze. Sels de normale alvestêderinners dogge der in dei as 5 oer. Johan Vlemmix wol de tocht yn 10 dagen klune. Dat soe dan in nij rekôr wêze al kin ik my net heuge dat der al in rekôr festige is. Sa hawwe wy dus ek it rekôr alvestêdetocht op de bierfyts. No ja, it makket ek net út. It hat fansels neat om de hakken mar ik fyn it wol in prestaasje fan formaat at it him slagget...+ 0 - 0 | § ¶TV momint fan it jier
Net Peter R. de Vries mei syn útstjoering oer Joran van der Sloot, dy't mear as sân miljoen minsken foar de tv krige, waard winner fan it tv-momint fan 2008. Net de bijna omrop GeenStijl dy't mei harren filmke mei ferantwurdlik wiene foar de ûndergong fan Ella Vogelaar en dy't mannich ynternetstimming nei harren hân setten. Wat dan wol sille jim tinke? No, it tv-momint is fansels ús eigen Yta Strikwerda. It wie televyzje dêr't noch wiken lang oer neipraten is want Yta slagge der yn om Paul de Leeuw ûnder de tomme te hâlden. Fansels wol ik Yta lokwinskje mei dizze prachtige oerwinning. Dochs doogt it net fansels want dizze oerwinning hie echt wol nei Joran van der Sloot gean moatten...+ 0 - 0 | § ¶Rintje Ritsma syn ôfskied
Op it EK-Allround yn Thialf waard hjoed ôfskied naam fan Rintje Ritsma. De bear fan de Lemmer hie al earder ôfskied naam mar men fûn dat net genôch. Rintje fertsjinne in grut ôfskied yn Thialf. Der waard grut útpakt en Mart Smeets fûn it dan ek geweldich dat sa'n sportman sa'n ôfskied krige. Mar hja lieten it net sjen want der moast earst efkes reklame foar en dêrnei wie der gjin tiid mear. Dat is dochs wol skandalich want wy meie wol oeren sjen nei krekt net de bêste reedriders dy't harren ferplichte rûntsje dogge mar dan is der gjin tiid mear om ús kampioen te huldigjen. In miste kâns. Om it in bytsje goed te meitsjen hjir noch in stikje fan ynternet...+ 0 - 0 | § ¶Blokjes
By it reedriden binne der in pear regels mei grutte gefolgen. Sa liedt it oanreitsjen fan de blokjes yn de bocht ta diskwalifikaasje. Earst leine de blokjes noch op de streep mar no binne de blokjes efter de streep dellein. By it reitsjen fan in blokje binne jo dus oer de streep west en wurde jo diskwalifisearre. Op 'm sels dúdlik mar dêrmei is it EK Allround yn Hearrenfean no wol moai nei de kloaten holpen. Troch de misslach fan Bökko en de diskwalifikaasje fan Fabris kin Sven him der no allinnich noch sels ôfride troch op in blokje te stappen. Wat dan oanbelanget wie it miskien better west en jou in blokjestikker in herkânsing troch bygelyks in tiidstraf te jaan. By it silen is it bygelyks sa dat jo nei it reitsjen fan de tonne noch in rûntsje meitsje. By it reedriden soene je bygelyks ek efkes oerrein komme kinne of gewoan in sekonde by de tiid optelle. It toernoai hie der yn elk gefal mei rêden west...+ 0 - 0 | § ¶Sven wol de alvestêdetocht ride
Sven Kramer wol sa graach de alvestêdetocht ride dat er dêr eventueel de WK Allround wol foar sjitte litte wol. Dat seit heit Yp Kramer hjoed. Yp Kramer wie sels de nûmer acht fan 1986 en Sven kennende wol er dy prestaasje al ferbetterje. No is de fraach fansels oft Sven soks ek kin. Fansels kin hy de alvestêdetocht wol útride mar soene de betûfte marathonriders de rappe Fries op it koarte langebaanwurk (10 km) efter har hâlde kinne? Ik bin dêr wol benijd nei. Mocht der dit wykein al in alvestêdetocht komme dan sjocht der dochs gjin kop nei dy WK Allround. Foar stiper TVM soe it dan ek allinnich mar moai wêze at Sven de alvestêdetocht rydt. Ik bin trouwens ek wol benijd wêr't Sven foar kiest mocht de alvestêdetocht midden yn de Olimpyske spullen falle kommend jier...+ 0 - 0 | § ¶Alvestêdetocht?
Jacob Brandsma út de Hommerts hat it hjoed presteard om de alvestêdetocht op redens te kombinearjen mei dy fan pinkstermoandei op 'e fyts. De 50 jierrige Brandsma hie oer mediaomtinken net te kleien. Hiel Nederlân siet mei in kamera as mikrofoan efter de man oan. Fansels is Brandsma wol in bikkel mar atst 'm riden sjochst dan tink ik, der sit net in soad gong yn. Ik leau net dat hjir de bêste reedrider fan stâl helle wurden is. De earme man sakke ek noch foar de kamera troch it iis hinne. Op 'm sels is it wol dapper wat Brandsma prestearde mar oan de oare kant jout er fansels ek folslein it ferkearde foarbyld. Oare, minder betûfte wekdûkers, komme no fansels ek yn de ferlieding om it iepen wetter te beriden. Ek is it fansels skandalich dat er hiele stikken op de fyts ôfleit. No haw ik wol respekt foar de prestaasje fan in man fan 50 dy't op houtsjes en in mountainbike 200 kilometer oankloait mar mei in echte alvestêdetocht hat dit fansels neat te krijen...+ 0 - 0 | § ¶Húskes ticht
Wat hiene wy in prachtige moaie nije treinen hjir yn it Noarden en ja, dat bin se fansels noch altyd wol. Mar no't it in lyts bytsje begjint te friezen wurkje de húskes ynienen net mear. Wy hawwe it dan net oer nachten lang min tweintich mar temperatueren krekt ûnder nul. Arriva hat dêrom besletten de doarren fan de húskes mar op slot te dwaan. No is fansels de reis yn Fryslân nea bot lang en in stasjon is gau berikt mar fan sa'n moaie nije trein hiene je dochs wat mear isolaasje ferwachte. De NS hat hjir oars hielendal gjin problemen mei. Dêr binne de húskes gewoan te brûken. Faaks is it gewoan in ferkapte besuniging want no hoege de húskes ommers ek net mear himmele te wurden...+ 0 - 0 | § ¶Keninklik
Us âlde bedriuw Friesland Foods wie al keninklik mar nei't wy fusearre binne mei Campina moast de keninginne fansels noch wol efkes sjen oft it nije, noch folle gruttere suvelbedriuw, noch wol hofleveransier bliuwe koe. No is der fansels sûnt de fúsje net in protte kar mear yn de supermerken dus hofleveransier is FrieslandCampina grif wol mar de keningin hat no ek bepaald dat wy Royal FrieslandCampina hite meie. In rojaal gebaar fansels fan ús keninginne. No freegje ik my wol ôf wat dan it favorite neigesetsje fan de oranjes wol net is? Oranjefla kin it net wêze want dat wie fan Campina en dy wiene net keninklik...+ 0 - 0 | § ¶Is sparje wol in goed foarnimmen?
Yn dizze tiid fan kredytkrisis binne der in soad Nederlanders dy't har foarnaam hawwe om mear te sparjen en wêr mooglik te besunigjen. Dat is fansels it domste wat jo dwaan kinne want wannear't wy no allegear de beurs ticht hâlde dan fersterket soks allinnich mar de 'krisis'. It is no júst saak om safolle mooglik jild yn de ekonomy te pompen sadat wy de krisis wat oerwaaie litte kinne. Sparje kinne je better dwaan yn tiden dat it goed giet mei de ekonomy. Wy moatte ek net sa oerspannen reageare op dy krisis want sis no earlik, wa is der no ôfrûne jier yn lean op efterút gien?+ 0 - 0 | § ¶Hans Vonk
No't Kenny Steppe blesseart is hat it Hearrenfean Hans Vonk fan Ajax los weakje kinnen. Vonk wol graach nei it WK yn syn heitelân Súd Afrika ta en dêrfoar moat er spylje fansels. By Ajax wie hy de nûmer trije en dus wie de kâns op wedstrydminuten net sa grut. By it Hearrenfean kin er no besykje om Vandenbussche út de basis te spyljen. Mei Hans Vonk krije wy yn elk gefal wer in bytsje ûnderfining yn de ploech. Wat my oanbelanget hoecht er Vandenbussche net út de goal te krijen want dat soe dan betsjutte dat Bryan geweldich yn foarm is fansels...+ 0 - 0 | § ¶FrieslandCampina
Krekt foar it ein fan 2008 krigen Frieslandfoods en Campina fan Neelie dochs noch tastimming om de lapen gear te smiten. Der wiene wol in pear betinksten. Sa moat Friesche vlag deifarske molke no ferkocht wurde en ek Campina moat in tsiisfabryk ferkeapje. It is dan ek mar goed dat de festiging yn Grins sletten is oars hie dy ek noch ferkocht wurde moatten. No ja, sûnt hjoed wurkje ik dus offisjeel by FrieslandCampina. Ien fan de grutste molkfabriken fan Europa. In soad feroaret der net fansels, allinnich de namme. Al sil it foar guon wol efkes wennen wêze dat de konkurint no gjin konkurint mear is...+ 0 - 0 | § ¶Frije dei
Hjoed haw ik in frije dei. Dat betsjut dus dat ik moarn wer gewoan oan it wurk moat en dêrút meie jim konkludearje dat ik dus wer net in hiel soad jild wûn haw yn de steatslotterij. Ik hoech my hjoed ek net te fertoanen oan de râne fan de Leyen want de bysûndere prestaasje fan Jezus, it rinnen oer wetter, kin dêr no troch elke mongoal herhelle wurde. Juster is it net hiel let wurden. Deeglik as wy wurden binne gie nei in pear fjoerpylkjes it fjoer yn ús al aardich út. Betiid op bêd dus mar der bin fansels mindere plakjes om it nije jier yn te gean...Fanôf dit plak winskje ik jim dan ek alle segen en goeie dingen ta, útsein de haadpriis yn de steatslotterije want dy is foar my! Ik hie oars hast krekt genôch wûn foar in nij lot. Der hoecht mar in pear euro by...