Thaeke syn tinzen

+ 0 - 0 | § ¶Fryske bewegers krije bewegingsromte

In dei neidat bekend wurden is dat Marktplaats.nl Fryske advertinsjes opkeart krijt de Ried fan de Fryske beweging in heal miljoen yn de skoat goaid út in neilittenskip. De hear Koopmans, dy't fan oarsprong út Hijum kaam, wie de ôfrûne tiid as stiper al royeert omdat er syn jild net mear oermakke. No makket er dat nei syn dea yn ien klap goed troch in heal miljoen euro oer te meitsjen. Dat is fansels hardstikkene moai foar de Fryske bewegers en sy hawwe dan ek al in goed plan om it jild te brûken. De webside kin wol in bytsje ferbettere wurde sa wurdt sein. No meitsje der dan fuort ek mar in Frysktalige merkpleats.nl by soe ik sizze...

+ 0 - 0 | § ¶Lekker ite en trije punten

Hjoed spile it Hearrenfean de útwedstryd tsjin PSV. Ik hie net de mooglikheid om de wedstryd te folgjen want ik mocht mei de freondinne mei op besite by in âld-kollega. Jierliks hawwe hja noch in itentsje by ien fan de âld-kollega's en it idee is dan dat elkenien wat lekkers mei nimt. Wy woene eins Elly har fantastyske sûkerbôlepudding meitsje mar it neigesetsje wie fansels al fersein dat it waard mar wer de sop. De hiele dei hat de freondinne yn de keuken stien om in hearlik knolselderysopke te meitsjen. It klinkt smoarch, dat begryp ik, mar mei wat hamreepkes der troch is it dochs in hearlik gerjocht dêr't je bêst noch in kear fan opskeppe wolle. Nei dit lekkere foargerechtsje koene wy ek noch genietsje fan in ferskaat oan foarôfhapkes, haadgerjochten en amuses. Ek it neigesetsje smakke nei mear, gelokkich wie der ek noch mear! Sa krigen wy in hiel smaaklik miel dat ús oeren kostte om nei binnen te krijen. Under it genot fan in wyntsje, want de freondinne wie de bob, waard it letter en letter. Doe't wy yn de tsjustere nacht thús kamen haw ik dochs noch mar efkes flot side 818 fan teletekst opsocht. By PSV stie in 2 dus ik wie al in bytsje depri oan it wurden mar doe seach ik by it Hearrenfean in 3 stean. 2-3 en sa die bliken mei in strafskop yn de lêste minút de folle winst yn Eindhoven. Dat betsjutte dus dat wy tsjin de tradysjonele top 3 ploegen dit jier mar 4 punten ferspile hawwe fan de 18. In machtich moaie jûn waard sa noch moaier...

+ 0 - 0 | § ¶Pannekoeken yn Europa

It is dochs wûnderbaarlik dat de Amsterdammers dy't sa'n wikselfallich seisoen trochmeitsje no ten koste fan Fiorentina troch gean yn Europa wylst de Tukkers dy't al wiken lang moai en goed fuotbal spylje oan it koartste ein lûke. It mei dan mar in spultsje wêze mar it is wol in frjemd spultsje. No ja, lit de Ajax manlju dan noch mar in pear drege wedstriden yn Europa balje dan kinne wy dêr moai fan provitearje troch in plakje op te skowen mei it Fean. En mocht Twente troch dizze útskeakeling ek noch yn de Nederklits komme dan is der miskien ek noch wol in plakje yn de foarrondes fan de Champions league weilein...

+ 0 - 0 | § ¶Skoalle?

De nije plattegrûn fan de Rottefalle is in stik kreaser as de âlde allinnich haw ik it earste flaterke al ûntdutsen. De skoalle dy't by ús efter hûs leit hawwe sy yn de kaart boppe op ús hûs tekene. Ik tocht earst dat sy Thaeke.com op de kaart tekene hiene omdat der in nûmerke by ús hûs stie mar it docht no bliken dat dat dus de skoalle is. No skeelt it fansels mar 50 meter en de measte Rottefalsters sille wol witte wêr't de skoalle stiet, fremden hawwe der dochs net folle te sykjen liket my. Dochs liket it my better en feroarje dat yn de nije fersje al efkes...

+ 0 - 0 | § ¶Doarpsbelangen Rottefalle

As belutsen ynwenner fan Rottefalle haw ik fannejûn fansels efkes nei de gearkomste fan doarpsbelang west. No hie dy fergadering op 'm sels net in hiel soad om de hakken. Ferline jier bygelyks wie der folle mear reboelje fanwege de doarpsfernijing. Dit jier wie ien fan de wichtichste punten de kontribúsjeferheging. Dy ferheging kaam der net tsjinsteande de kredytkrisis sûnder kommintaar trochhinne. Rottefalle is it ôfrûne jier in stik moaier wurden en it doarpsbelang sjocht der op ta dat it noch moaier wurdt. Sa krije wy noch in moai nustje boarterstúntsjes. Ek hawwe wy in pear moaie nije plattegrûnen krigen sadat elkenien yn ús doarp no goed te finen is. In aplauske foar de warbere minsken fan doarpsbelang is dan ek wol op syn plak...

+ 0 - 0 | § ¶Bestelle is mooglik

De side www.fryskewinkel.nl mei dan noch net hielendal klear wêze, dochs is it no al mooglik om te bestellen. It ienige wat jim hoege te dwaan is efkes yn te loggen (earst efkes registrearje) en dan ferskynt der op in ferskaat oan plakjes in bestelknop. It assortiment wurdt noch altyd útwreide, ynkoarten dus ek de Fryske Cohen, Roech as tou en Friesstyle te bestellen op dizze unike Frysktalige websjop...

+ 0 - 0 | § ¶Fryskewinkel.nl

Nei't ik entûsjast Frysktalige Sinteklaas kompakt skyfkes ferstjoerd haw foar Warber Fryslân like it my ek wol aardich om it assortiment wat grutter te meitsjen. Ik haw dêrom de namme www.fryskewinkel.nl registreard en op dy side sil ynkoarten in Fryske wepsjop komme dêr't tal fan Fryske produkten op te keap wêze sille. Yn earste ynstânsje bin ik dwaande in grutte samling fan Frysk(talig)e kompakt skiven yn te fieren yn de troch my sels makke wepsjop. Dêrby begjin ik fansels mei myn eigen skyfkes. Ik haw in dikke 150 stiks. It docht trouwens bliken dat dêr ek in soad skiven by binne dy't al net iens mear te krijen binne yn de handel. Fia in flinke databasekonstruksje dêr't ik wol efkes oer nei tinke moast en dy't my de noadige harsensellen kostte hat is no in moai nustje skiven te bestellen. It is eins de bedoeling om yn in letter stadium ek noch boeken, films en oare Fryske saken oan te bieden. Hawwe jim ferlet fan in Frysk stikje muzyk? Gean dan rap nei Fryskewinkel.nl en bestel foardat ek jo favorite artyst net mear leverbaar is...

+ 0 - 0 | § ¶Tomtom seit ryd mar om

Hjoed wiene Machteld, Jelle en Lyne efkes by ús om in bakje sop te iten. Omdat it Hearrenfean fannejûn thús spylje moast tsjin it twadde fan Willem soe ik mei Jelle nei Hearrenfean wylst Machteld dan wer werom ride soe nei Aldeboarn. Omdat men tusken Drachten en it Hearrenfean mei herstelwurksaamheden oan de A7 dwaande wie stie der in behoarlike file sa hearden wy. It wie dan ek saak om efkes in oare rûte te kiezen. De yn myn Laguna ynboude 'tomtom' sei fuortdaalks al dat it better wie om in alternative rûte te kiezen. Hy stelde foar om dan mar fia de Wâldwei nei de Werpsterhoeke te gean en dêr dan wer rjochting it Hearrenfean te gean. Om Machteld efkes op wei te helpen hawwe wy foar in oare rûte keazen oer Boarnburgum. Sa kamen wy binnentroch úteinlik lâns Aldeboarn wat yn earste ynstânsje net de bedoeling wie mar even letter sieten wy dochs wer op de grutte dyk. It wie ûnderweis drokker as gewoan op de lytse dykjes. Dochs grappich dat minsken mei sa'n navigaasjesetsje yn de auto lekker einen omride omdat de frou yn it kastje dat seit. Eartiids soe men gewoan domwei achterop de file knalle. No ja, wy wiene noch moai op tiid foar it balskoppen en wy hiene ek noch in ienfâldige oerwinning tsjin de Tilburgers. It is yn elk gefal moai om te witten dat myn Carminat my op tiid warskôget foar fervelende files. Hoewol, tsjin de file by de ôfrit fan de Mc Donalds op it Hearrenfean kin er my net helpe. Dêr is it altyd mear stilstean as trochriden...

+ 0 - 0 | § ¶Monopoly

Hjoed hawwe wy wer efkes yn Aldeboarn sjoen by Jelle, Machteld en Lyne. It wie dreech om in frije dei te plannen want ús wykeinen sieten wer grôtfol. Lyne groeit al as koal en neidat sy op bêd gien wie hawwe wy efkes in hearlik miel hân. Jo misten it fleis hast net iens en dat is dochs wol in kompliment weard fan dizze karnyfoarjer. Wy soene in spultsje dwaan en ik hie my ynsteld op de kolonisten fan Catan mar it waard úteinlik Monopoly. Ik haw dat spultsje al jierren net mear dien. It duorret oars ek frij lang en mei syn twaën is it heal sa leuk net as mei meardere minsken. Ik hie it gelok mei want ik krige moai wat kaartsjes mar gjin inkelde strjitte hie ik kompleet. De freondinne hie allinnich hiel Utert en de wetterlieding mar omdat sy de ienige wie mei hotels hawwe wy de striid dochs noch ferlern. It jammere fan Monopoly is dat wannear't der ien blut is dizze persoan dan net mear meidwaan kin. By Catan kinst noch sa min stean mar do bliuwst wol oant it ein yn it spul. No ja, yn elk gefal wie it leuk om wer ris yn Aldeboarn te sjen. Wy hawwe dan ek fuort mar in ôfspraak makke foar moarn by ús thús. Machteld woe de bananesop keure. No dan fuortdaalks mar fansels...

+ 0 - 0 | § ¶Hype Hype Hoera

Nei fjouwer jier Sonja Bakkerjen hawwe de Nederlanders no massaal Skijt oan Sonja krigen. Ik haw gelokkich nea aktyf mei dien oan dizze hype want it iten fan Sonja wie wol hiel lekker mar dan moasten jo it wol allegear kear trije dwaan om sêd te wurden. Yn tiden fan kredytkrisis kinne jo as minsk mar better wat fet op de bonken hawwe om de barre tiden te trotsearjen. Boppedat kin dan de kachel ek in graadsje leger stean...

+ 0 - 0 | § ¶UWV gekte

Justermiddei kaam der in skriuwen fan it UWV troch de bus. Ik soe siik thús sitte mar hja koene my op myn mobile nûmer net berikke. No moast ik mar rap kontakt opnimme mei dizze kontroleurs want oars soe ik gjin rjocht hawwe op myn syktewetútkearing. Ik haw hjoed foar it earst wer nei myn wurk ta west dat ik haw fanôf myn wurk de UWV'ers mar efkes skille. Hja hiene dus meardere kearen besocht te skiljen op myn mobyl en ik naam net op. Ik haw de minsken útlein dat myn mobyl efkes in bytsje stikken is en dat ik de hûs net út mocht of koe. Boppedat hie ik wol in fêst tillefoannûmer en dat wie ek wol bekend by Randstad. Dêrneist stean wy fansels gewoan yn it tillefoanboek. Ek fia ynternet bin ik frij ienfâldich te finen mar de persoan fan it UWV fûn dat ik dochs mar de mobyl oan hawwe moast wannear't ik siik wie. Neffens my bin ik net iens ferplicht om in tillefoan te hawwen mar om de frede te bewarjen en myn útkearing feilich te stellen haw ik der mar net in al te grut punt fan makke. No mar hope dat it goed komt. Myn earste wurkdei gie trouwens frij aardich mar ik moat noch wol goed oppasse dat ik de poat net ferkeard del set. Plúmkejeien sla ik hjoed mar oer yn elk gefal...

+ 0 - 0 | § ¶Moarn mar wer oan it wurk

Hoewol't it poatsje noch altyd net hiel sterk is bin ik dochs fan doel om moarn mar wer oan it wurk te gean. Der moat fansels al wat bôle ûnder de hamburgers komme. No sil ik fia de syktewet ek wol in pear sinten beure mar in fetpot sil it grif net wêze en lit ik no krekt in grut leafhawwer fan fetpotten wêze. Mar efkes sjen hoe't it ankeltsje him hâldt...

+ 0 - 0 | § ¶Interpolis helpt

Ik haw fannemoarn efkes mei Interpolis skille en it frommiske dat ik foar de tillefoan hie fertelde my dat sy alles wol betelje sille. Dat is dan yn elk gefal wol wer goed nijs. No mar hope dat it allegear wer krekt sa moai wurdt as dat it wie. Moarn komt sawysa wer efkes in delegaasje fan oannimmers en timmermannen del om nei ús bovenferdjipping te sjen. Dan kinne se hjir fuort ek efkes in begrutting op los litte...

+ 0 - 0 | § ¶No ek noch in rút stikken

It wie hjoed wer sa'n hearlike kloatedei. Myn foet wie al stikken. Myn sportklup kaam yn Nijmegen moai op 0-1 dus mei in goed gefoel gie ik nei myn skoanâlden foar in bakje tee en in spultsje. Dat spultsje (triomino) ferlear ik fansels kânsleas en doe't wy thús kamen die bliken dat it Hearrenfean de foarsprong ek noch wer ferspile hie. Ynienen hearden wy in raar lûd en doe die bliken dat der in gat yn ien fan ús prachtige moaie ruten siet. Der lei in lyts stientsje op de grûn dy't nei alle gedachten de feroarsaker west hat. No wit ik net oft hjit sprake west hat fan in oanslach op ús hûs, in oanslach op in willekeurich hûs as stom tafal. Ik hoop fansels op it lêste mar it is wol hiel fervelend want it is in djoer raam wat hielendal op maat makke wie en wat besaaid is mei latsjes. Ek siet alles krekt moai yn de ferve. Moarn mar ris efkes mei Interpolis skilje om te sjen oft sy it ek wer glashelder meitsje kinne...

+ 0 - 0 | § ¶Blauwe plakken

It docht bliken dat myn ankeltsje toch wat mear te lijen hân hat as ik tocht. Der komme no ek wat bloedútstoartings en blauwe plakken op myn foet. It bloed rint fansels altyd nei it leechste punt dus by de teannen wurdt it ek al in bytsje blau. Noch mar in pear daachjes thús sitte dus. Dat hat wol wer as foardiel dat ik sa myn efterstân mei de webloch wer in bytsje bywurkje kin. Ek kin ik no moai mei wat administraasje dwaande want de belesting wol ek graach myn oanjefte wer binnen hawwe ynkoarten.

+ 0 - 0 | § ¶Nije porno foar Ljouwert

Yn Ljouwert sieten hiele ranzige mantsjes fan ús sinten in pornoarchyf oan te lizzen. No skynt dat archyf ynienen kwyt te wêzen. It hat der alle skyn fan dat der no dus in eks-ambtner thús in prachtige Ljouwerter Pornomuseum begjinne sil. Om de foarrie Ljouwerter porno wer in bytsje oan te foljen hie Man bijt hond betocht dat it wol in hiele aardigheid wêze soe en filmje efkes mei in neakend wyfke boven op ús Mem. Ik moat sizze dat ik dat wol in moaie aksje fyn. Ik hie it sels ek betinke kinnen!

+ 0 - 0 | § ¶Dy ferrekte ankel

Fannemoarn waard ik wekker en it earste wat ik die wie fansels efkes nei it poatsje sjen. It wie no dochs wol in bytsje dik dus ik haw der mar in steunkous om hinne dien en de rest fan de dei mei de poat om heech lein. Gelokkich haw ik noch in moaie samling films dy't ik wol mear as ien kear sjen wol. Ik haw my by Randstad efkes offisjeel siik meld dat ik sit no yn de syktewet. Ik mei dan ek net fan hûs omdat der eventueel ien delkomme kin. Se kinne ek skilje fansels. No is dat trouwens ek gjin probleem want mei dy ferrekte ankel kom ik ek net sa fier fuort. Ik hoop dat it wer wat ôfsakje sil sadat ik sneon wer oan it wurk kin...

+ 0 - 0 | § ¶De ferrekte ankel

Gewoanwei gean ik altyd allinnich mei de auto nei it plúmkejeien yn Drachten mar hjoed soe ik efkes in doarpsgenoat oppikke omdat dy gjin auto foar de doar hie. Alles gie goed oant wy yn de Drait oan it opwaarmjen wiene foar de trening. By in frij ienfâldige beweging bleau myn foet stean (tink ik) en myn lichaam woe fierder nei achteren. Gefolch wie dat ik langút gie en mei de harsens op de grûn klapte. No ferstap ik my wol ris faker en dan gean ik wer stean en dan skodzje ik in kear mei de holle en dan giet it wol wer mar no koe ik wol fernimme dat der efkes mear tiid nedich wie. It poatsje wie wat gefoelich en ik besleat dan ek mar om efkes te kuoljen ûnder de kâlde kraan. Dêr haw ik in kertierke ûnder stien mar it waard net echt dik ofsa. It soe dan ek wol in bytsje tafalle mar omdat it dochs noch wat gefoelich wie haw ik mar net mear plúmkejage. Om myn meirider syn trening net te misgunnen haw ik doe yn de kantine mar efkes it balskoppen sjoen tsjin Tuneesje. No dat wie ek net in wedstryd om fan op te fleuren. In dikke blunder fan Stekelenburg besoarge ús noch in lykspul ek. Gelokkich wie it mar in oefenwedstryd. Nei ôfrin bin ik nei hûs riden, haw myn meirider ôfset en doe haw ik my mar siik meld foar de oare deis want ik haw no wol it gefoel dat ik hjir net al te bot op wurkje kin. It sil wol in minne nacht wurde...

+ 0 - 0 | § ¶Froastskea

Us Fryske diken binne krekt lykas al dy oare asfaltdiken yn ús lân net in stoer weard. Der is no al wer foar miljoenen oan froastskea ûntstien oan de diken wylst it mar kwalik kâld west hat. Temperatueren fan ûnder de -10 ha wy neffens my net echt hân. Der wiene al in moai soad diken min mar no is ek de A7 tusken Drachten en it Hearrenfean in 70 kilometerdyk wurden. Ik sil dan ek ris op myn rûteplanner sjen oft der ek in b-dyk neist leit dêr't ik dan yn elk gefal noch 80 mei...

+ 0 - 0 | § ¶Herten op Skylge

Wa bin wy om te bepalen dat der gjin herten op Skylge wêze meie? Wa bin wy om te bepalen dat se der wol wêze moatte? Se binne der no op dat net iens sa hiele grutte eilân en it wie de bedoeling om de bistkes te ferdôvjen. Omdat dat net slagge is wurde se no mar ôfsketten. No bin ik fansels gjin jager mar ik freegje my dochs in bytsje ôf wat it grutte ferskil yn jachtmetoade is oangeande ferdôvjen as fermoardzjen. Jo richte en it is raak as it is mis liket my. Yn elk gefal kinne de leafhawwers fan wyld ynkoarten Skylge oandwaan foar Hertebyfstik mei Cranberrysaus. Der kin hjir en dêr noch in kûgeltsje ynsitte fansels. Leafhawwers fan ferdôvjen kinne it feestmiel fuortspiele mei in lekker juttersbitterke...

+ 0 - 0 | § ¶De echte Sven

Hie Sven Kramer it yn it ferline faak wat te ienfâldich troch dat er nei syn konkurinten ride mocht. Dit wykein mocht ús Superfries wer ris fol oan de bak. Op de 500 meter waard er al efkes narre troch in iistransplantaasje dy't de rit fan Verheijen en dy noch wol oerlibje koe mar krekt foar Sven syn start dochs noch 20 minuten fertraging opsmiet. Hy joech der net in soad om mar ferlear wol in bytsje op syn konkurinten. Mei troch dit gedoch pakte er se op de 5000 meter allegear keihurd werom. Hy moast no ek wol in tiid delsette fansels omdat de konkurinten allegear nei him op it iis kamen. Dan wurdt sa'n toernoai ynienen folle moaier fansels. Hjoed mocht er op de 1500 meter net in soad ferspylje op Bøkko. Hy ferlear de rit krekt mar hy bleau op it earste plak stean. Dêrtroch mocht er yn de lêste rit oer 10.000 meter 4 sekonden ferspylje op Bøkko dy't tsjin him ride mocht. In geweldich gefjocht wêrynt Bøkko yn it lêste de oanfal socht mar dy oanfal waard troch Sven ôfdien mei in pear krachtige halen wêrnei't er ek noch it baanrekôr fan Bøkko út de boeken ried. In fantastysk moai toernoai om te sjen en sûnder al te folle gedoch mei diskwalifikaasjes ek. Bedankt Sven!

+ 0 - 0 | § ¶Aardich jûntsje NAC

Foar de feroaring wie ik ris in kear moai op tiid yn it stadion foar de wedstryd Hearrenfean - NAC. Sa koe ik moai rûm stean en efkes yndrinke (mei kola, want wy hite net allegear Popov). No is der de ôfrûne dagen wol genôch sein oer ús alkomobilist tinkt my en hoe kinne jo no better de minsken wer efter jo krije dan troch te skoaren. Dat die Popov dan ek. Nei 18 minuten knikkere hy de bal der moai yn troch dat hy de holle der no wol goed by hie. It troch my ynsetten: "Daar moet op gedronken worden hi ha ho" (Fryske stikjes wurkje net sa goed yn Nieuw Noord) waard flot oernaam troch it hiele fak. Spitigernôch kaam NAC troch in lichte oertreding fan Popov út in frije traap al rap wer op 1-1. Dêrnei mocht Jelle Ten Rouwelaar syn Friese (Jouster) woartels toane troch de bal wat ûnhandich te ferwurkjen. Mei 2-1 koene wy de rêst yn en Jelle is in superfries. Op 'm sels spitich dat er net foar it Hearrenfean spilet trouwens want it is wol in geweldige doelman. Ik soe 'm der wol by ha wolle. Nei rêst makke Elm de 3-1 en doe wie de wedstryd oer. Vandenbussche krige dizze kear de measte stimmen foar Man fan de wedstryd. Wannear't Popov der sneon ien minder naam hie wie hy dat miskien wol west. By de eareronde gie it "Daar moet op gedronken worden hi ha ho" jitris en doe fertaalde Dingsdag dat efkes foar Popov...

+ 0 - 0 | § ¶Regels bin net altyd regels foar Verdonk

Rita Verdonk stipet kafee de Kachel út Grins yn de striid tsjin it smookbelied. No wie Rita neffens my altyd sa foar it tapassen fan de regels mar yn dit gefal makket sy graach in útsûndering sa docht bliken. Trots op Nederland wol de buertkroegen doarpskafees behâlde en hja wolle in ein oan de betutteling. Kafeeeigners moat neffens Verdonk sels mar bepalde wat wol en net mei yn harren saak. Dan kinne de klanten kieze seit Rita. Dat is fansels net hielendal korrekt want ek no kinne klanten sels kieze oft sy wol as net nei it kafee gean wolle. Sy meie dêr allinnich net in sigret opstekke. Wannear't it frijlitten wurdt dan mei der dus wer smookt wurde en dan bliuwt de kar om wol as net nei it kafee te gean gelyk mar dan sitte de net smokers dus wol yn de smook fan de smokers. Trots op Nederland wol minsken graach stimulearje om sûn te libjen mar hja wolle it net ferplichtsje om dit te dwaan. Wannear't Rita dus oan de macht komt dan kin drugs, paddo's en wit ik wat net allegear gewoan yn de winkel ferkocht wurde. It sil in moai Nederlân wurde, om grutsk op te wêzen...

+ 0 - 0 | § ¶Popov is Bobôf

Hearrenfeanspiler Goran Popov is sneontenacht oanhâlden yn it sintrum fan it Hearrenfean. Hy hie te folle dronken en ried mei twa lekke bannen tsjin it ferkear yn sa meldt Omrop Fryslân hjoed. Sportklup Hearrenfean wol net sizze oft dit ek gefolgen hat foar de ferdigener. No wit ik net wat ik no it slimste fyn oan dit bericht. It hat yn elk gefal meardere kanten. Minsken dy't dronken yn de auto stappe, dat kin fansels sawysa net. De rjochter moat him dan ek mar efkes goed bûge oer dizze saak. Dêr hat de wurkjouwer dan fansels fierders neat mei te krijen. Wannear't ik it selfde dwaan soe dan soe men dêr by de Domo net iens fan witte. It wie miskien efkes lestich út te lizzen wêrom't ik mei de trein nei myn wurk kom mar foar de rest hawwe sy dêr net in soad mei nedich tinkt my. Sneontenacht moast Popov fansels efkes de winst op Ajax fiere en dêr is ek neat mis mei. Mar hy hie der fansels al efkes rekkening mei hâlde moatten dat hy tiisdei alwer in wedstryd tsjin Vitesse oankaam. By ús is it fansels sa dat de spoaren fan in jûntsje trochsakjen net in hiel soad werom te finen binne yn ús deistich wurk mar by topfuotbal is dat fansels wol oars. Ik freegje my trouwens ek noch ôf wêr't er dy twa lekke bannen oprûn hat. Der moat dus earne wat skea wêze want twa lekke bannen krije jo net samar tinkt my...

+ 0 - 0 | § ¶Fusyklup

De fans fan Roda JC en Fortuna Sittard binne lulk omdat de klups fusearje wolle. No kin ik my dat fan Fortunakant noch wol in bytsje yntinke omdat alles nei Kerkrade liket te gean. Mar foar de Rodafans makket it dochs net safolle út liket my? Roda JC is sawysa al in fusyklup. Yn 1962 kaam dizze klup ta stân troch in fusy tusken Roda Sport en Rapid JC. De earste fan dy twa is in produkt fan de fusy tusken Kerkrade en Bleijerheide yn 1954. De twadde komt ek út in fusy, dizze kear tusken Rapid '54 en Juliana. Wannear't dizze oanhang fan Roda dus tsjin fusys binne dan kinne se ek nea fan fan Roda JC wêze liket my. Stel no dat se hjir yn Fryslân Cambuur en it Hearrenfean gearfoege soene. Wannear't dan de wedstriden op it Hearrenfean wêze soene dan soe ik dêr net in soad beswier tsjin hawwe. It mei dan bêst FK Fryslân hite ofsa. De thúshimden soene dy fan it Fean wêze kinne, it úttenu dat fan Cambuur want it giel en blau binne net de Cambuurkleuren mar de Fryske kleuren. Fan my mei it al is it wol skande dat wy dan gjin echte derby mear hawwe. Mar dy wurdt op dit stuit ek al hast nea mear spile...

+ 0 - 0 | § ¶Drama yn Arnhim

In oerwinning op Vitesse wie hjoed wer in brêge te fier sa die bliken. Nei de knappe rige fan twa kear winst op Feyenoord, winst op Roda en winst op Ajax wie Vitesse hjoed de ploech dy't de earste goal makke. Omdat dat pas flak foar tiid barde wie der ek gjin kâns mear om hjir wat oan te dwaan. Eins wie it net folle oars as yn de Arena allinnich skoarde it Hearrenfean doe earst. De pannekoekbakkers fan Amsterdam kinne dan ek wer efkes sykhelje want dit wie in moaie kâns om hegerop te kommen. In echte topklup binne wy noch altyd net sa docht bliken...

+ 0 - 0 | § ¶Transformers 2

Nei it earste part fan Transformers as echte film, ferhaaltechnysk net denderjend mar wat kwa byld en lawaai wol frij aardich, komt der no ek wer in ferfolch op. De earste 30 sekonden fan de treler binne al frijjûn.

+ 0 - 0 | § ¶Nichtedei

Nei de lange reis fan juster en fannacht mochten wy hjoed al wer betiid út de fearren. Op it program stie no in ritsje nei Rotterdam foar de nichtedei. Hoewol't ik noch net hielendal de sliep út hie bin ik dochs mar wer efter it stjoer kropen. Gewoanwei gean wy altyd by de Gouwe rjochting Rotterdam mar myn navigator woe my noch efkes rjochtút hawwe nei Den Haach ta. In eintsje fierder kamen wy sa fia de N209 fia in hiele oare kant Rotterdam yn. Oft it no koarter wie wit ik net mar it wie wer ris wat oars. Yn elk gefal ferdwaalden wy net mear yn Rotterdam wat yn it ferline noch wol ris barre woe troch in ferkearde ôfslach. De oare twa nichten wiene wat oan de lette kant mar dat makke net út want dan koene wy moai efkes byprate mei myn skoansus, de swager en de bern. Net folle letter siet it hiele hûs fol mei minsken en bern. It waard wol hiel dúdlik makke dat wy de ienigen wiene dy't net sa'n lyts hummeltsje by ús hiene. Foaral by de groepsfoto fan de bern wie ús ynbring gering. Nei in leuke middei haw ik tegearre mei de freondinne jûns by de Hajé op 'e Jouwer noch efkes in goed miel naam. Doe't wy thús wiene bin ik fuort yn bêd ploft en yn sliep fallen...